¿Ta xokaj wa u tsʼook revistailoʼob U Pʼíich Tulumil Kanan maʼ sen úuch jóoʼsaʼakoʼoboʼ? Wa beyoʼ, ilawil wa jeʼel a núukik le kʼáatchiʼobaʼ:

¿Baʼax kʼiin ka kʼaʼaytajnaj Jesús tiʼ le «kʼasaʼan angeloʼob kʼalaʼanoʼoboʼ»? (1 Ped. 3:19.)

Maʼ xaaneʼ tsʼokaʼaniliʼ u kaʼa kuxkíintaʼal Jesús ka tu kʼaʼaytaj tiʼ le kʼasaʼan angeloʼob le castigo ku náajmatkoʼoboʼ (15/6, táan juʼun 23).

¿Máakalmáak le óoxpʼéel baʼaloʼob unaj u beetik le máaxoʼob kaʼa tsʼokaʼan u beeloʼob utiaʼal u bin utsil tiʼoboʼ?

Maʼ a sen kʼaʼajsik a yáax núup, aʼal tiʼ a amigoʼob bix unaj u tratartikoʼob a túumben núup yéetel kʼub a wóol tiʼ kex tu tusech le yáaxoʼ (1/7, táan juʼun 9 yéetel 10).

¿Baʼax kʼiin u juzgartaʼal le «tamanoʼob» yéetel le «chivoʼob» tumen Jesusoʼ? (Mat. 25:32.)

Ken taalak Jesús tu kʼiinil le nojoch muʼyajiloʼ, lelaʼ yaan u yúuchul ken tsʼoʼokok u xuʼulsaʼal le maʼ jaajil religionoʼoboʼ (15/7, táan juʼun 6).

¿Baʼax kʼiin ken okʼolnak yéetel ken u karachʼt u kojoʼob le máaxoʼob beyoʼob kʼaakʼas xíiw tu yaʼalaj Jesusoʼ? (Mat. 13:36, 41, 42.)

Tu kʼiinil le nojoch muʼyajiloʼ; ken u yiloʼob maʼ tu páajtal u púutsʼloʼob tiʼ le xuʼulsajiloʼ (15/7, táan juʼun 13).

¿Baʼax kʼiin ka béeychaj le baʼax tu yaʼalaj Jesús yoʼolal le palitsil chúukaʼan u yóol yéetel yaan u naʼatoʼ? (Mat. 24:45-47.)

Maʼ káaj u béeytal teʼ Pentecostés tu jaʼabil 33, baʼaxeʼ ka tsʼoʼok 1914. Tu jaʼabil 1919, tsʼaʼab le palitsil tu yóokʼol le uláakʼ palitsiloʼob, wa tu yóokʼol tuláakal le máaxoʼob ken u kʼamoʼob le kaʼansajoʼ (15/7, táan juʼun 21 tak 23).

¿Baʼax kʼiin ken u tsʼáa Jesús tiʼ le palitsil chúukaʼan u yóol ka u kanáant tuláakal baʼax yaantiʼoʼ?

Tu kʼiinil le nojoch muʼyajiloʼ; ken xiʼikoʼob kaʼan yéetel ken u beet u reyiloʼob yéetel Cristo (15/7, táan juʼun 25).

¿Ku luʼsaʼal wa teʼ Biblia u kʼaabaʼ le máaxoʼob kʼasaʼanoʼob wa maʼ tu náajmatkoʼoboʼ?

Maʼ beyiʼ. Tumen teʼ Bibliaoʼ yaan máaxoʼob utsoʼob yéetel kʼasaʼanoʼob maʼatech u chʼaʼchiʼitaʼal u kʼaabaʼob (Rut 4:1-3; Mat. 26:18). Tsʼoʼoleʼ chéen ku chʼaʼchiʼitik u kʼaabaʼ kaʼatúul angeloʼob chúukpaj u yóoloʼob (1/8, táan juʼun 10).

Kex áantaʼaboʼob tumen Dioseʼ, ¿baʼax uláakʼ áant le 230 j-Jaajkunajoʼob utiaʼal maʼ u kíimloʼob teʼ «marcha de la muerteoʼ»?

Kex minaʼan kaʼach u muukʼoʼob, wiʼijoʼob, yéetel kʼojaʼanoʼobeʼ maʼ xuʼul u líiʼsik u yóoloʼobiʼ (15/8, táan juʼun 18).

¿Bix u líiʼsik k-óol u tsikbalil u kʼáatmáan le israelitaʼob tu áalkab jaʼil Jordán utiaʼal u binoʼob teʼ luʼum aʼalaʼan u tsʼaʼabaltiʼoboʼ?

Kex kaʼanchajaʼan u jaʼil le Jordanoʼ áantaʼaboʼob tumen Jéeoba utiaʼal u kʼáatmáanskoʼob. Lelaʼ tu beetaj u muʼukʼaʼantal u fejoʼob yéetel u maas kʼubik u yóoloʼob tiʼ Jéeoba, lelaʼ jeʼel xan u yáantkoʼon bejlaʼeʼ (15/9, táan juʼun 16).

¿Baʼax ku yeʼesiktoʼon le Biblia ken u chʼaʼchiʼit le coloroʼoboʼ?

Ku yeʼesikeʼ Dioseʼ ku naʼatik baʼax ku yuʼubik máak ken u yil wa baʼax coloril, yéetel u yojel yaan u yáantkoʼon k-kʼaʼajs baʼaloʼob kʼaʼanaʼantak (1/10, táan juʼun 14 yéetel 15).

Bejlaʼeʼ ¿bix u béeytal u profecíail Miqueas 5:5 ku tʼaan tiʼ le siete u nuukiloʼob baʼateʼel yéetel le ocho máakoʼob jach kʼaʼabéetoʼoboʼ?

Le siete u nuukiloʼob baʼateʼel yéetel le ocho máakoʼob jach kʼaʼabéetoʼob ku yaʼalik Miqueas 5:5, letiʼe ancianoʼob yanoʼob teʼ múuchʼuliloʼoboʼ, letiʼob muʼukʼaʼankúuntik u kaajal Dios utiaʼal u béeytal u aktáantkoʼob baʼax ku taal u kʼiin (15/11, táan juʼun 20).

¿Baʼaxten kʼaʼabéettoʼon Dios?

Kʼaʼabéettoʼon u nuʼuktaj Dios bey xan baʼaxoʼob ku yaʼalik utiaʼal k-aktáantik le talamiloʼoboʼ. Dioseʼ u kʼáat ka kuxlakoʼon ich kiʼimak óolal, le oʼolal ku yáantkoʼon yéetel yaan u béeykuntik le baʼaxoʼob ku yaʼalik teʼ Bibliaoʼ (1/12, táan juʼun 4 tak 6).