1, 2. ¿Baʼaxten way yóokʼol kaabeʼ jach yaʼab u yúuchul tuus, yéetel tuʼux ku yaʼalaʼal jujunpʼéeliʼ? (Ilawil le foto yaan tu káajbal le xookaʼ.)

WAY yóokʼol kaabeʼ sáamsamal u yúuchul tuus. Lelaʼ maʼ jelaʼaniʼ tumen le Bibliaoʼ ku yaʼalikeʼ le Kʼaasilbaʼal, u gobernanteil le yóokʼol kaabaʼ, u yuumil le tuusoʼ (1 Tim. 2:14; 1 Juan 5:19). Jeʼex u bin u náatsʼal u kʼiinil u xuʼulsaʼal le kʼasaʼan yóokʼol kaabaʼ, Satanaseʼ maas ku pʼuʼujul tumen u yojel «chéen junpʼíit kʼiin pʼaataltiʼ» (Apo. 12:12). Le oʼolal cada kʼiin ku máaneʼ le máaxoʼob ku chaʼik u nuʼuktaʼaloʼob tumen le Kʼaasilbaʼaloʼ maas ku tuusoʼob yéetel maases ku yilik u xaʼakʼbesikoʼob u tuukul le máaxoʼob meyajtik Diosoʼ.

² Yaan kʼiineʼ, teʼ televisión, teʼ periódico yéetel teʼ Internetoʼ ku yaʼalaʼal baʼaloʼob maʼ ojéelaʼan wa jaajtak yoʼolal u j-jaajkunajoʼob Jéeobaiʼ. Le oʼolal yaan máaxoʼob ku joʼopʼol u tuukuloʼob kʼaas wa ku pʼuʼujuloʼob tumen ku jáan creertikoʼob le baʼaxoʼob ku yaʼalaʼaloʼ.

3. ¿Baʼax kun áantkoʼon utiaʼal maʼ k-tuʼusul?

³ U maʼalobileʼ utiaʼal maʼ u tuskoʼon le Kʼaasilbaʼaloʼ yaantoʼon le Biblia jach «maʼalob [...] utiaʼal tojkíina[joʼ]» (2 Tim. 3:16). Apóstol Pabloeʼ tu yaʼaleʼ yaan jujuntúul cristianoʼob kajaʼanoʼob kaʼach Tesalónicaeʼ tu chaʼaj u tuʼusloʼob. Letiʼeʼ tu yaʼalajtiʼob: «Maʼ a chaʼikeʼex u xaʼakʼbesaʼal a tuukuleʼex» (2 Tes. 2:1, 2). ¿Baʼaxoʼob ku kaʼansiktoʼon le baʼax tu yaʼalaj Pablooʼ, yéetel bix jeʼel u yáantkoʼon bejlaʼeʼ?

4. 1) ¿Baʼax tu yaʼalaj Pablo tiʼ le tesalonicailoʼob yoʼolal «u kʼiinil Jéeoba»? 2) ¿Bix k-áantaʼal bejlaʼeʼ?

⁴ Ka tu tsʼíibtaj u yáax carta Pablo tiʼ le tesalonicailoʼoboʼ tu chʼaʼchiʼitaj «u kʼiinil Jéeoba». Maʼ u kʼáat kaʼach ka yanakoʼob «ich éeʼjochʼeʼenil[iʼ]» mix ka náayak u yóoloʼobiʼ. Le oʼolal tu kʼaʼajsajtiʼob baʼax unaj u  beetkoʼob tumen «u paalal[oʼob] le sáasiloʼ». Tu yaʼalajtiʼob: «Unaj k-pʼilik k-ich mantatsʼ yéetel unaj k-kanáantik maʼ u saʼatal k-óol» (xok 1 Tesalonicailoʼob 5:1-6). Bejlaʼeʼ táan k-páaʼtik u xuʼulsaʼal le Nojoch Babilonia, wa tuláakal le religionoʼob maʼatech u kaʼanskoʼob u jaajiloʼ. Letiʼe baʼax kun eʼesik tsʼoʼok u káajal u kʼiinil Jéeobaoʼ. Bejlaʼeʼ k-maas naʼatik bix ken u béeykuntil Jéeoba baʼax uts tu tʼaan. Tsʼoʼoleʼ teʼ múuchʼuliloʼ mantatsʼ ku yaʼalaʼaltoʼon baʼax unaj k-beetik utiaʼal maʼ u náayal k-óol. Wa k-beetik u cuentail le baʼaxoʼob ku yaʼalaʼaltoʼonoʼ yaan u maas taaktal k-meyajtik Jéeoba, utiaʼal leloʼ yaan u meyajtoʼon «le páajtalil yaan[toʼon] utiaʼal [k-tuukuloʼ]» (Rom. 12:1).

5, 6. 1) ¿Baʼax tu tsʼíibtaj Pablo tu kaʼapʼéel carta tiʼ le sukuʼunoʼob yanoʼob Tesalónicaoʼ? 2) Yéetel u yáantaj Jesuseʼ, ¿baʼax ken u beet Dios maʼ kun xáantal? 3) ¿Tiʼ baʼax kʼáatchiʼiloʼob unaj k-tuukul?

⁵ Maʼ úuch u túuxt Pablo u yáax carta tiʼ le tesalonicailoʼoboʼ, ka tu túuxtaj uláakʼ junpʼéel. Teʼ kaʼapʼéel cartaoʼ tu yaʼalaj yaan u yantal junpʼéel nojoch muʼyajil ken taalak Jesús juzgar yóokʼol «le máaxoʼob maʼ u kʼaj óoloʼob Diosoʼ bey xan [yóokʼol] le máaxoʼob maʼ tu tsʼoʼokbeskoʼob le maʼalob péektsi[loʼ]» (2 Tes. 1:6-8). Teʼ capítulo 2 tiʼ Tesalonicailoʼoboʼ tu yaʼaleʼ yaan tiʼ le sukuʼunoʼob yanoʼob teʼ múuchʼuliloʼ ku tuklikoʼobeʼ u kʼiinil Jéeobaeʼ jach taʼaytak u kʼuchul, kex maʼ jaajiʼ (xok 2 Tesalonicailoʼob 2:1, 2). Le cristianoʼob teʼ yáax siglooʼ maʼ u jach naʼatoʼob bix kun béeychajal baʼax u yaʼalmaj Diosiʼ. Ka tʼaanaj yoʼolal le profecíaʼoboʼ, Pabloeʼ tu yaʼalaj: «Maʼ chúukaʼan le baʼaxoʼob k-ojloʼ yéetel maʼ chúukaʼan k-profetizariʼ; baʼaleʼ ken kʼuchuk le baʼax chúukaʼanoʼ, le baʼax maʼ chúukaʼanoʼ yaan u xuʼulul» (1 Cor. 13:9, 10). Tsʼoʼoleʼ Pablo, Pedro yéetel uláakʼ sukuʼunoʼob yéeyaʼanoʼobeʼ tu tsʼíibtoʼob baʼax unaj u beetkoʼob, beyoʼ maʼ náay u yóoloʼobiʼ yéetel muʼukʼaʼanchaj u fejoʼob.

⁶ Utiaʼal u tojkíintaʼal bix u tuukuloʼobeʼ Pabloeʼ tu yaʼaleʼ táanil tiʼ u taal u kʼiinil Jéeobaeʼ yaan u yantal junpʼéel nojoch apostasía yéetel yaan u taal xan le «máax [...] ku bin tu contra u ley Diosoʼ». * Ken tsʼoʼokkeʼ Yuumtsil Jesuseʼ, yaan u kʼuchul u kʼiinil «u xuʼulsik» tuláakal le máaxoʼob tu chaʼaj u tuʼusloʼoboʼ. Pabloeʼ tu yaʼalaj yaan  u xuʼulsaʼaloʼob «tumen maʼ tu kʼamoʼob yéetel maʼ tu yaabiltoʼob le u jaajil[oʼ]» (2 Tes. 2:3, 8-10). Le oʼolal unaj k-tuklik: «¿Jach wa in yaabiltmaj u jaajil? ¿In wojel wa baʼax ku tsolik u kaajal Jéeoba yoʼolal le kaʼansajoʼob maas túumbentak ku naʼataʼal jóoʼsaʼan teʼ revistaʼob bey xan tiʼ uláakʼ jóoʼsaʼaniloʼoboʼ?».

7, 8. 1) ¿Tiʼ baʼax unaj u kanáantkuba kaʼach le yáax cristianoʼoboʼ? 2) ¿Tiʼ baʼax unaj k-kanáantikba xan teʼ kʼiinoʼobaʼ?

⁷ Yaan tiʼ uláakʼ baʼaloʼob unaj k-kanáantikba, maʼ chéen tiʼ le apostataʼob yéetel tiʼ le baʼax ku kaʼanskoʼoboʼ. Pabloeʼ tu tsʼíibtaj tiʼ Timoteoeʼ «u yaabiltaʼal le taakʼinoʼ u moots tuláakal u jejeláasil baʼaloʼob kʼaastak». Yéetel tu yaʼaleʼ jujuntúuloʼobeʼ «tsʼoʼok u náachkuntaʼaloʼob tiʼ le fejoʼ yéetel tsʼoʼok u chupik u kuxtaloʼob yéetel yaayaj óolal» (1 Tim. 6:10). Tiʼ uláakʼ baʼax unaj u kanáantkuba máakeʼ letiʼe «baʼaxoʼob ku túulchʼintaʼal u beet [...] tumen u kʼeban wíinkliloʼ» (Gal. 5:19-21).

⁸ Baʼaleʼ k-naʼatik baʼaxten tu yaʼalaj Pablo tiʼ le tesalonicailoʼob baʼaxten unaj u kanáantkubaʼob tiʼ le máaxoʼob «maʼ jaaj wa apostoloʼob[oʼ]». Tumen tak ichil le múuchʼuliloʼ yaan kaʼach máaxoʼob ku yaʼalikoʼob «baʼaloʼob maʼ pataliʼ, utiaʼal ka u jíilt le disipuloʼob tu paachoʼoboʼ» (2 Cor. 11:4, 13; Bax. 20:30). Ka máan kʼiineʼ Jesuseʼ tu yaʼaleʼ maʼalob baʼax ku beetik u múuchʼulil Éfeso tumen u «pʼeek baʼax ku beetik le kʼasaʼan máakoʼoboʼ». Le cristianoʼob yaan Éfesooʼ tu túuntoʼob u yóol le máaxoʼob ku yaʼalikubaʼob apostoloʼoboʼ, ka chíikpaj maʼ jaaj wa apostoloʼobiʼ yéetel chéen táan u «tuusoʼob» (Apo. 2:2). Tiʼ u kaʼapʼéel cartail Tesalonicailoʼobeʼ, Pabloeʼ tu yaʼalaj: «Sukuʼuneʼex, tu kʼaabaʼ Yuumtsil Jesucristoeʼ, k-aʼalikteʼex ka a náachkuntabaʼex tiʼ jeʼel máaxak sukuʼunil maʼ tu yuʼubik tʼaan[eʼ]». Ka tsʼoʼokeʼ maases tʼaanaj tiʼ le «máax maʼ u kʼáat meyaj[oʼ]» (2 Tes. 3:6, 10). Wa unaj u kanáantik maʼ u biskubaʼob yéetel máaxoʼob maʼakʼóoloʼobeʼ, ¿maʼ wa maas unaj u náachtaloʼob tiʼ le máaxoʼob tsʼoʼok u káajal u beetik u apostatailoʼoboʼ? Maʼ unaj u máanskoʼob tiempo yéetel máakoʼob beyaʼ tumen jeʼel u kʼastal u tuukuloʼobeʼ. Bey unaj k-beetik xan teʼ kʼiinoʼobaʼ (Pro. 13:20).

9. ¿Baʼaxten unaj k-kanáantikba wa yaan máax ku joʼopʼol u tʼaan kʼaas tiʼ le Biblia yéetel tiʼ u kaajal Jéeobaoʼ?

⁹ Táan u náatsʼal le nojoch muʼyajil yéetel u xuʼulsaʼal le kʼasaʼan yóokʼol kaabaʼ, le oʼolal le baʼax aʼalaʼabtiʼ le yáax cristianoʼob úuchjeakiloʼ maas unaj k-chʼaʼik en cuentail. Maʼ k-kʼáat kʼam u «nojoch utsil» Dios yéetel u xuʼulul «[k-béeykuntik] le baʼax oʼolal ku tsʼaʼabalt[oʼonoʼ]», tumen jeʼel k-peʼertik u páajtalil k-kuxtal minaʼan u xuul teʼ kaʼanoʼ wa way Luʼumeʼ (2 Cor. 6:1). Wa yaan máax ku bin muchʼtáambal ku joʼopʼol u tʼaan tiʼ baʼaxoʼob minaʼan teʼ Biblia bey xan ku tʼaan kʼaas tiʼ u kaajal Jéeobaeʼ, unaj k-kanáantikba (2 Tes. 3:13-15).

10. ¿Máakalmáak le kaʼansajoʼob maʼ unaj u pʼatik le cristianoʼob yaan kaʼach Tesalónicaoʼ?

¹⁰ Pabloeʼ tu yaʼalaj tiʼ le sukuʼunoʼob maʼ u pʼatkoʼob le baʼax tsʼoʼok u kankoʼoboʼ (xok 2 Tesalonicailoʼob 2:15). ¿Máakalmáak le «kaʼansajoʼob» tsʼoʼok u kankoʼoboʼ? Maʼ letiʼe kaʼansajoʼob ku taaloʼob tiʼ le religionoʼob minaʼan u jaajil tiʼob ku yaʼalikoʼob ku kaʼanskoʼob baʼax ku yaʼalik le Bibliaoʼ. Baʼaxeʼ letiʼe kaʼansajoʼob ku taal tiʼ Jesús, kaʼansaʼab xan tumen Pablo yéetel uláakʼ máaxoʼob meyajt Dios. U maas yaʼabil le kaʼansajoʼobaʼ beetaʼab u tsʼíibtaʼal teʼ Bibliaoʼ. Pabloeʼ tu líiʼsaj u yóol le sukuʼunoʼob  yaan tu múuchʼulil Corinto yéetel le tʼaanoʼobaʼ: «Mantatsʼ ka kʼaʼajsikeneʼex yéetel mantatsʼ ka beetkeʼex le baʼaloʼob jach jeʼex úuchik in tsolikteʼexoʼ» (1 Cor. 11:2). Le kaʼansajoʼobaʼ ku taaloʼob tiʼ juntúul máax maʼatech u tuus, le oʼolal jeʼel u páajtal k-kʼubik k-óol tiʼeʼ.

11. ¿Bix jeʼel u náachtal tiʼ Jéeoba le máax ku chaʼik u tuʼusloʼ?

¹¹ Tu cartail Hebreoʼobeʼ, Pabloeʼ tu yaʼaleʼ juntúul máax meyajtik Dioseʼ kaʼapʼéel bix jeʼel u pʼáatal minaʼan u fe yéetel u náachtal tiʼ Dioseʼ (xok Hebreoʼob 2:1; 3:12). Tu yaʼaleʼ jeʼel u ‹náachkuntaʼaleʼ› wa jeʼel u ‹náachkuntkuba› tu juunaleʼ. Jeʼex wa tiaʼan máak tiʼ junpʼéel chan barco maʼ letiʼ nuʼuktikeʼ, maʼ tu tsʼáaik cuenta baʼax ku yúuchul tumen jujunpʼíitil u bin u náachtal teʼ jáal jaʼoʼ. Baʼaleʼ wa tu juunal máak ku joʼopʼol u lelenchʼintik le chan barco ichil le jaʼoʼ, yoʼolal le baʼax ku beetkoʼ ku bin u náachtal. Le kaʼapʼéel baʼaloʼobaʼ ku yeʼesik baʼax tsʼoʼok u yúuchul tiʼ jujuntúul sukuʼunoʼob; tsʼoʼok u chaʼik u tuʼusloʼob yéetel tsʼoʼok u pʼáatal maʼ u kʼubmaj u yóoloʼob tiʼ u jaajiliʼ.

12. ¿Baʼaxoʼob jeʼel u beetik maʼ k-jach meyajtik Jéeoba jeʼex unajeʼ?

¹² Maʼ xaaneʼ jujuntúul tiʼ le cristianoʼob yaan Tesalónicaoʼ tu chaʼaj u tuʼusloʼob. ¿Bey wa u yúuchul xan toʼonoʼ? Yaʼab baʼax yaan bejlaʼa beetik u meyajtoʼon k-tiempo tiʼ yaanal baʼaloʼ. Tuukulnakoʼon tiʼ bukaʼaj tiempo ku máansik le máakoʼob tiʼ baʼax maas uts tu tʼaan u beetkoʼob tiʼ redes sociales, tiʼ u núukikoʼob yéetel u túuxtikoʼob mensajeʼob tiʼ correo electrónico wa u yilik baʼax ku sen aʼalaʼal yoʼolal le deporteʼoboʼ. Tuláakal le baʼaloʼobaʼ jeʼel u beetik u saʼatal k-óoleʼ yéetel u xuʼulul k-tsʼáaik k-óol k-meyajt Jéeoba. Le oʼolal maʼ xaaneʼ chéen k-jáajan orar, maʼ t-xokik le Biblia jeʼex unajeʼ yéetel maʼatech k-jach bin muchʼtáambal yéetel kʼaʼaytaj. ¿Baʼax unaj k-beetik utiaʼal maʼ k-chaʼik k-tuʼusul tumen le baʼaloʼobaʼ?

13. 1) Jeʼex u yaʼalik le Bibliaoʼ, ¿baʼax modosil yaan tiʼ le máakoʼob bejlaʼoʼ? 2) ¿Baʼax ken u yáantoʼon utiaʼal maʼ u pʼáatal minaʼan k-fe?

¹³ Junpʼéel baʼax jeʼel u kanáantkoʼon utiaʼal maʼ u pʼáatal minaʼan k-fejeʼ, letiʼe k-kʼaʼajsik baʼax súutukil kajaʼanoʼonoʼ yéetel k-tuklik baʼax jeʼel u yúuchultoʼon wa ku joʼopʼol k-bisikba yéetel máaxoʼob ku tuklikoʼob maʼ «tu tsʼook kʼiinoʼob» kajaʼanoʼoniʼ. Apóstol Pedroeʼ tu yaʼalaj yoʼolal le kʼiinoʼob kuxlikoʼonaʼ: «Yaan u taal j-pʼaʼastaj máakoʼob táan u yaʼalikoʼob baʼal jeʼex u túulchʼintaʼaloʼob tumen u tsʼíibolaloʼobeʼ, yéetel yaan u yaʼalikoʼob: ‹¿Baʼax túun úuch yéetel le u taalbal Cristo aʼalaʼanoʼ? Tumen desde le kʼiin ka kíim k-úuchben láakʼtsiloʼobeʼ, tuláakal le baʼaloʼoboʼ láayliʼ bey yaniloʼob jeʼex tu káajbal yóokʼol kaabeʼ›» (2 Ped. 3:3, 4). Utiaʼal maʼ k-tuʼubsik kajaʼanoʼon «tu tsʼook kʼiinoʼobeʼ», unaj k-xakʼalxoktik sáamsamal le Bibliaoʼ. Le apostasía aʼalaʼan yaan u yantaloʼ desde úuch káajak yéetel tak bejlaʼa yaneʼ. Le «máax [...] ku bin tu contra u ley Diosoʼ» tak bejlaʼa táan u beetik u muʼyaj u kaajal Dioseʼ. Le oʼolal maʼ unaj k-tuʼubsik naatsʼ yanil u kʼiinil Jéeobaiʼ (Sof. 1:7).

14. ¿Bix u kanáantkoʼon k-tsʼáaik k-óol kʼaʼaytaj?

¹⁴ Yaʼab baʼax eʼesikeʼ junpʼéel baʼax jeʼel u yáantkoʼon utiaʼal maʼ u tuʼubultoʼon tiʼ baʼax kʼiin kuxaʼanoʼon yéetel maʼ k-chaʼik k-tuʼusleʼ letiʼeʼ k-jóokʼol kʼaʼaytaj mantatsʼoʼ. Jesucristo, u Poolil le múuchʼuliloʼ, tu yaʼalaj tiʼ u j-tsaypachoʼob ka u beetoʼob disipuloʼob yéetel ka u kaʼansoʼob tiʼob le baʼaxoʼob tu kanoʼoboʼ, lelaʼ le kun áantkoʼob utiaʼal u kanáantkubaʼob (Mat. 28:19, 20). Utiaʼal k-beetik le meyaj kʼubéentaʼantoʼonoʼ, unaj k-kʼaʼaytaj yéetel kiʼimak óolal. A tuklikeʼ, ¿le sukuʼunoʼob yaan kaʼach Tesalónicaoʼ chéen wa ku kʼaʼaytajoʼob utiaʼal u yilaʼal táan u beetkoʼob? Kʼaʼajaktoʼon le baʼax tu yaʼalaj Pablo tiʼobaʼ: «Maʼ a  tupikeʼex u kʼáakʼil le kiliʼich muukʼoʼ. Maʼ a mixbaʼalkúuntikeʼex le profecíaʼoboʼ» (1 Tes. 5:19, 20). Tsʼoʼoleʼ ¿máasaʼ le profecíaʼob k-kʼaʼaytikoʼ ku yáantkoʼon utiaʼal maʼ u náayal k-óol?

15. ¿Baʼaxoʼob jeʼel k-xakʼaltik teʼ adoración ich familiaoʼ?

¹⁵ U jaajileʼ tuláakloʼon k-kʼáat áant k-láakʼtsiloʼob utiaʼal u maas maʼalobkíintik bix u kʼaʼaytajoʼob. Yaneʼ utiaʼal u maas maʼalobkíintik bix u kʼaʼaytajeʼ, teʼ adoración ich familiaoʼ ku jóoʼskoʼob tiempo utiaʼal u líiʼskubaʼob. Maʼ xaaneʼ jeʼel u páajtal k-líiʼsikba ich familiail utiaʼal k-ilik bey tiʼ baʼaxoʼob jeʼel u páajtal k-tsikbal yéetel le máakoʼob ken suunakoʼon k-xíimbaltoʼoboʼ. Unaj k-tuklik: ¿Tiʼ baʼax kin tʼaan ken suunaken in kaʼa xíimbaltoʼob? ¿Bey tiʼ baʼaxoʼob uts tu tʼaan u tsikbaleʼ? ¿Baʼax hora maas kulaʼanoʼob tu yotochoʼob? Yaʼab sukuʼunoʼobeʼ teʼ adoración ich familiaoʼ ku jóoʼskoʼob tiempo utiaʼal u líiʼskubaʼob yéetel le jaatsoʼob kun ilbil teʼ muchʼtáambaloʼob utiaʼal u táakpajloʼoboʼ. ¿Jeʼel wa u páajtal k-beetik xan beyaʼ? K-táakpajal teʼ muchʼtáambaloʼoboʼ ku yáantaj utiaʼal u maas muʼukʼaʼantal k-fe, beyoʼ maʼ kun xaʼakʼbesbil k-tuukul (Sal. 35:18). Le adoración ich familiaoʼ ku yáantkoʼon utiaʼal maʼ u joʼopʼol k-tuukul tiʼ baʼaloʼob maʼ tu tsolik le Bibliaoʼ, beyoʼ maʼ tu kaʼapʼéeltal k-tuukul.

16. ¿Baʼax áantik le yéeyaʼanoʼob utiaʼal maʼ u xaʼakʼbesaʼal u tuukuloʼoboʼ?

¹⁶ Ichil yaʼab jaʼaboʼobeʼ Jéeobaeʼ tsʼoʼok u yáantik u kaajal u naʼat baʼax u kʼáat u yaʼal yaʼab profecíaʼob. K-tuukul tiʼ lelaʼ ku yáantkoʼon k-maas k-kʼub k-óol yaan k-kʼamik yaʼab utsiloʼob. Le yéeyaʼanoʼoboʼ yaantiʼob u esperanzail u binoʼob kaʼan gobernar yéetel Cristo. Le jatsʼuts kuxtal kun antaltiʼobaʼ ku yáantkoʼob utiaʼal maʼ u náayal u yóoloʼob yéetel utiaʼal maʼ u xaʼakʼbesaʼal u tuukuloʼob. Ku yuʼubikubaʼob jeʼex le tesalonicailoʼob ka tu yaʼalaj Pablo tiʼob: «Sukuʼuneʼex, toʼoneʼ mantatsʼ k-ilik kʼaʼabéet k-tsʼáaik gracias tiʼ Dios ta woʼolaleʼex, teʼex máaxeʼex yaabiltaʼaneʼex tumen Jéeoba, tumen Dioseʼ tu yéeyajeʼex [...] tu beetaj táan u kiliʼichkúuntkeʼex yéetel u kiliʼich muukʼ, yéetel tu yéeyajeʼex tumen ta tsʼáaj a fejeʼex tiʼ le jaajoʼ» (2 Tes. 2:13).

17. ¿Bix u líiʼsik k-óol le baʼax ku yaʼalik 2 Tesalonicailoʼob 3:1 tak 5?

¹⁷ Le máaxoʼob táan u páaʼtkoʼob u kuxtaloʼob minaʼan u xuul way Luʼumeʼ maʼ unaj u chaʼik xan u tuʼusloʼobiʼ. Wa táan a páaʼtik lelaʼ, yaan u líiʼsik a wóol le baʼax tu yaʼalaj Pablo tiʼ le sukuʼunoʼob kun binoʼob kaʼan yaan Tesalónicaoʼ (xok 2 Tesalonicailoʼob 3:1-5). ¿Máasaʼ jach kiʼimak k-óol u líiʼsaʼal k-óol beyoʼ? Le cartaʼob tsʼíibtaʼab tiʼ le tesalonicailoʼoboʼ ku yeʼesiktoʼon maʼ unaj k-chaʼik k-tuʼusul yéetel le baʼaxoʼob ku yaʼalaʼal mix ojéelaʼan wa jaajoʼ. Tumen naatsʼ yanil le xuʼulsajoʼ, ¿máasaʼ jach jeʼel u yáantkoʼon le baʼax tsʼoʼok u kʼaʼajsaʼaltoʼon teʼ xookaʼ?