Le nukuch talamiloʼoboʼ jeʼel u beetik k-sen chiʼichnaktaleʼ, u pʼáatal minaʼan k-muukʼ yéetel jeʼel u beetik u kʼexpajal bix k-ilik le kuxtaloʼ. Bey úuchik tiʼ David ka tu aktáantaj yaʼab talamiloʼob. ¿Bix tu aktáantil? Le salmo tu tsʼíibtaʼ ku yeʼesik bix tu aktáantil: «Yéetel kʼaʼam tʼaan kin tʼaan tiʼ Yuumtsil; yéetel kʼaʼam tʼaan kin kʼáatik chʼaʼ óotsilil tiʼ. Ta táan kin tsʼáaik in muʼyaj; ta táan kin tsʼáaik ojéeltbil in yaj óolal le ken in wuʼuy u naʼatʼal in tseem. Yuumtsil, techeʼ a wojel baʼax bejil kin bisik». Jeʼex k-ilkoʼ Davideʼ yéetel kabal óolal tu kʼáataj u yáantaj Dios (Sal. 142:1-3).

Tiʼ uláakʼ salmoeʼ tu yaʼalaj: «Chéen junpʼéel baʼal tsʼoʼok in kʼáatik tiʼ Yuumtsil, chéen junpʼéel baʼal kin tsʼíiboltik: ka yanaken tu [templo] Yuumtsil tuláakal u kʼiinil in kuxtal, utiaʼal ka in [pakt u templo, Traducción del Nuevo Mundo] yéetel ka in pakt u kiʼichkelmil» (Sal. 27:4). Máans ta tuukul bix u yilik kaʼach David u táankabil le tabernáculo tuʼux ku adorartaʼal Jéeobaoʼ. Letiʼeʼ maʼ tu páajtal u yookliʼ tumen maʼ tiʼ u chʼiʼibal Leví u taaliʼ. Kex beyoʼ jach kiʼimak u yóol, le oʼolal taak u pʼáatal u «pakt u kiʼichkelmil» Jéeoba tuláakal u kʼiiniloʼob u kuxtaliʼ.

Ken aʼalaʼak kiʼichkelem junpʼéel baʼaleʼ u kʼáat u yaʼaleʼ jatsʼuts u yilaʼal. Davideʼ jach maʼalob u yilik kaʼach le baʼaxoʼob u beetmaj Jéeoba utiaʼal u adorartaʼaloʼ. ¿Kux túun toʼon?

Bejlaʼeʼ utiaʼal k-náatsʼal tiʼ Jéeobaeʼ maʼ kʼaʼabéet junpʼéel templo jeʼex tu kʼiinil Davidoʼ, baʼax kʼaʼabéeteʼ letiʼe tuláakal le baʼaxoʼob u tsʼaamaj utiaʼal u adorartaʼaloʼ (templo espiritual). * Wa k-paktik u templo Jéeoba jeʼex tu beetil Davidoʼ, toʼon xaneʼ yaan k-paktik «u kiʼichkelmil» Jéeoba.

Koʼoneʼex ilik baʼax u kʼáat u yaʼal le altar tuʼux ku tóokaʼal le siibaloʼob, wa altar de cobre, yaan kaʼach tu yookbal le tabernaculooʼ (Éxo. 38:1, 2; 40:6). Le altaroʼ tu yeʼeseʼ Dioseʼ jeʼel u kʼamik u kuxtal Jesuseʼ (Heb. 10:5-10). ¿Baʼax utsil ku taasiktoʼon? Apóstol Pabloeʼ tu tsʼíibtaj: «Kex u enemigoʼon Dios kaʼach[eʼ] béeychaj k-kaʼa bisikba tu yéetel úuchik u kíimil u Paal» (Rom. 5:10). Wa k-tsʼáaik k-fe tiʼ u kʼiʼikʼel Jesús tu wekoʼ, yaan k-lúubul utsil tiʼ Jéeoba yéetel yaan k-bisikba maʼalob tu yéetel (Sal. 25:14).

Tumen ku tuʼupul k-kʼebaneʼ ku «tsʼaʼabal [k-muukʼ] tumen Jéeoba» (Bax. 3:19). Le bix yaniloʼonoʼ jeʼel u páajtal k-ketik tiʼ bix yanil juntúul máak kʼalaʼan cárcel yéetel yaan u kíimsaʼaleʼ, baʼaleʼ ku arrepentir yéetel ku kʼexik bix u kuxtal táanil tiʼ u kʼuchul u kʼiinil u kíimsaʼal. Ken u yil juntúul juez, ku chʼaʼik óotsilil, le baʼax ku beetik le máakaʼ ku chʼaʼtuklik u tupik le baʼax kʼaas u beetmoʼ yéetel ku yaʼalik maʼ u kíimsaʼal. ¡Bukaʼaj wal kun kiʼimaktal u yóol le máakaʼ! Jéeobaeʼ bey jeʼex le juezaʼ, tumen ku chʼaʼik óotsilil tiʼ le máakoʼob ku arrepentiroʼoboʼ yéetel ku tsʼáaik u páajtalil u kuxtaloʼob.

Davideʼ tu yileʼ jejeláas bix u adorartaʼal Jéeoba tu templo. Tu yileʼ le kaajoʼ ku muchʼkuba teʼ templooʼ, ku xoʼokol yéetel ku kaʼansaʼal le Leyoʼ, ku  tóokaʼal incienso, tsʼoʼoleʼ tu yilaj xan le meyaj ku beetik le sacerdoteʼob yéetel le levitaʼoboʼ (Éxo. 30:34-38; Núm. 3:5-8; Deu. 31:9-12). Le baʼaloʼobaʼ óoliʼ chíikaʼan xan tiʼ bix k-meyajtik Dios bejlaʼeʼ.

Le tʼaanoʼob «bukaʼaj maʼalobil yéetel jatsʼutsil ka múuchʼ kajlak sukuʼuntsiloʼob bey juntúuliliʼobeʼ» táan u béeytal bejlaʼeʼ jeʼex úuchik u yilaʼal úuchjeakiloʼ (Sal. 133:1). «Tuláakal le sukuʼunoʼob» yaan way Luʼumoʼ tsʼoʼok u yilkoʼob bix u bin k-maas yaʼabtal (1 Ped. 2:17). Teʼ muchʼtáambaloʼoboʼ ku xoʼokol yéetel ku tsoʼolol baʼax ku yaʼalik le Bibliaoʼ. Yéetel u kaajaleʼ, Jéeobaeʼ ku kaʼanskoʼon tubeel. Ku tsʼáaik xan toʼon yaʼab jóoʼsaʼaniloʼob utiaʼal k-xakʼalt teʼ adoración ich familia wa t-juunaloʼ. Juntúul sukuʼun tiʼ le Cuerpo Gobernanteoʼ, tu yaʼalaj: «Ken tuukulnaken tiʼ baʼax ku yaʼalik Jéeoba, tiʼ baʼax u kʼáat u kaʼans bey xan in wilik u yantalten le naʼatil yéetel le kʼaj óolal ku tsʼáaikoʼ, tsʼoʼok u yáantken yéetel tsʼoʼok u taasikten yaʼab kiʼimak óolal». Jeʼex túun k-ilkoʼ le kʼaj óolaloʼ ku taasik kiʼimak óolal ichil u kuxtal máak (Pro. 2:10).

Jeʼex úuchjeakileʼ le máaxoʼob meyajtik Diosoʼ sáamsamal ku payalchiʼob tiʼ letiʼ. Utiaʼal Jéeobaeʼ bey kiʼibok inciensoeʼ (Sal. 141:2). ¡Jach ku líiʼsik k-óol k-ojéeltikeʼ Jéeobaeʼ ku yuʼubik le payalchiʼob k-beetik yéetel kabal óolaloʼ!

Moiseseʼ tu yaʼalaj ich payalchiʼ: «Ka yanak t-óokʼol u yutsil k-Yuum [Dios], ¡Yuumtsil utsil jetsʼkúuntik k-meyaj[!]» (Sal. 90:17). Jéeobaeʼ ku kiʼikiʼtʼantik le kʼaʼaytaj k-beetkoʼ tumen ku yilik k-jach tsʼáaik k-óoliʼ (Pro. 10:22). Maʼ xaaneʼ yaan máax tsʼoʼok k-áantik u kʼaj óolt Dios, wa maʼ xaan xaneʼ maʼ xuʼuluk k-tsʼáaik k-óol kʼaʼaytaj ichil yaʼab jaʼaboʼob kex maʼ yaʼab máax uʼuyikoʼoniʼ, kex kʼojaʼanoʼon, lubaʼan k-óol wa kex k-chʼaʼpachtaʼal (1 Tes. 2:2). Baʼaleʼ tsʼoʼok ‹k-paktik u kiʼichkelmil› Jéeoba yéetel tsʼoʼok k-ilkeʼ jach ku kiʼimaktal u yóol tumen k-tsʼáaik k-óol k-meyajte.

Davideʼ tu yaʼalaj: «Yuumtsil, techeʼ tuláakal baʼaxech tiʼ teen; techeʼ ka chupiken yéetel utsiloʼob; in kuxtaleʼ ta kʼab yaan. Teneʼ, táaj utsil kúuchil tin tiaʼalintaj» (Sal. 16:5, 6). Davideʼ kiʼimak u yóol kaʼach ikil u yantal junpʼéel «kúuchil» tiʼ, wa u páajtalil u meyajtik Jéeoba yéetel u kʼaʼamal. Maʼ xaaneʼ jeʼel k-aktáantik yaʼab talamiloʼob jeʼex Davideʼ, baʼaleʼ jeʼex letiʼeʼ tsʼoʼok xan u kiʼikiʼtʼantkoʼon Jéeoba. Le oʼolaleʼ unaj k-adorartik yéetel kiʼimak óolal yéetel mantatsʼ unaj ‹k-paktik u templo› Jéeoba.