TU JAʼABIL 537 táanil tiʼ u taal Jesuseʼ, le israelitaʼoboʼ jóokʼoʼob tu kaajil Babilonia utiaʼal u binoʼob tu kaajil Jerusalén. Jéeobaeʼ joʼopʼ u tuklik bix le bej tuʼux kun máanoʼoboʼ. Tu yaʼalajtiʼob: «[Maʼalobkíinteʼex] u beel in kaajal. Beeteʼex kóokoch sak le bejoʼ, láaj moleʼex u tuunichiloʼob» (Isa. 62:10). ¿Bix tu beetil le judíoʼob le baʼax tu yaʼalaj Jéeobaoʼ? Maʼ xaaneʼ yaan tiʼ letiʼobeʼ tu káajsaj u binoʼob utiaʼal u butʼikoʼob yéetel u táaxkuntikoʼob le bejoʼ, beyoʼ maʼ talam kun máan le uláakʼ judíoʼoboʼ.

Jeʼex le israelitaʼoboʼ, bejlaʼa xaneʼ bey táan k-xíimbal tiʼ junpʼéel bej ku biskoʼon tiʼ uláakʼ meyajoʼob ichil u kaajal Jéeobaeʼ. Jéeobaeʼ maʼ u kʼáat ka u takuba mix baʼal t-beeliʼ. Le oʼolal ku yaʼaliktoʼon: ‹Táaxkunt le bej tuʼux ka jetsʼik a wookoʼ, beyoʼ yaan a peʼechakʼ tiʼ luʼum maʼ jajakkiliʼ› (Pro. 4:26, Traducción del Nuevo Mundo). Le baʼax ku yaʼalik le Bibliaaʼ jeʼel u yáantik tuláakal máakeʼ, kex táankelem wa maʼ.

Le máakoʼoboʼ suuk u yaʼalikoʼob tiʼ le táankelmoʼoboʼ: «Bejlaʼa táankelmecheʼ yaʼab baʼax jeʼel u páajtal a beetkeʼ». U suukileʼ le táankelmoʼoboʼ toj u yóoloʼob yéetel yaʼab baʼax taak u beetkoʼob. Le oʼolal le Bibliaoʼ ku yaʼalik: «U [kiʼichkelmil] le táankelmoʼoboʼ tiʼ yaan tu muukʼoʼobeʼ» (Pro. 20:29). Juntúul táankelem yaan baʼax u yojel u beet yéetel yaan u muukʼeʼ, wa ku tsʼáaik u yóol u meyajt Dioseʼ yaʼab baʼax kun páajtal u beetik yéetel yaan u kiʼimaktal u yóol.

Le yóokʼol kaabaʼ jach ku yilik le baʼaxoʼob ku páajtal u beetik le táankelmoʼoboʼ. Wa juntúul j-jaajkunaj tiʼ Jéeoba maʼalob u calificacioneʼ, u profesoroʼob, u yéet xookoʼob yéetel uláakʼ máakoʼobeʼ u suukileʼ ku sen aʼalikoʼobtiʼ ka maas kaʼanchajak u xook utiaʼal u bin utsil tiʼ teʼ yóokʼol kaabaʼ. Yéetel wa jach u yojel u báaxt fútbol, béisbol wa uláakʼ baʼaloʼobeʼ, maʼ xaaneʼ jeʼel u sen aʼalaʼaltiʼ ka u maas  tsʼáa u yóol utiaʼal u kʼuchul u beetuba profesionaleʼ. ¿Uchaʼantech wa beyoʼ? ¿Yaan wa máax a kʼaj óol táan u yúuchultiʼ beyoʼ? ¿Baʼax jeʼel u yáantkech a chʼaʼtukult baʼax maʼalobeʼ?

Le baʼax ku kaʼansik le Bibliaoʼ jeʼel u yáantkech utiaʼal a xíimbal teʼ bej maas maʼalob yanoʼ. Eclesiastés 12:1, ku yaʼalik: «Kaʼalikil táankelmecheʼ, kʼaʼajak tiʼ teech máax beetech». ¿Bix jeʼel a weʼesik ichil a kuxtal ka kʼaʼajsik Máax beetmilecheʼ? ¿Bix jeʼel u yeʼesik tuláakal máak ku kʼaʼajsik Máax beetmileʼ?

Koʼox ilik baʼax úuch tiʼ juntúul sukuʼun kajaʼan tu chikʼinil África, u kʼaabaʼeʼ Eric. * Letiʼeʼ jach uts tu tʼaan kaʼach u báaxtik fútbol, le oʼolal kex chéen 15 jaʼaboʼob yaantiʼeʼ óotaʼab bisbil báaxal tiʼ junpʼéel equipo maas nojoch. Wa ka u beet kaʼacheʼ maʼ kun xáantaleʼ yaan u bin Europa utiaʼal u maas kanik báaxal yéetel yaan u jach kʼaj óoltaʼal kaʼachi. Baʼaleʼ wa ka u chʼaʼtukult kaʼach u beetik beyoʼ, ¿táan wa u kʼaʼajsik le Máax beetmiloʼ? Koʼox ilik baʼax tu chʼaʼtuklaj u beetik Eric yéetel baʼax jeʼel k-kanikeʼ.

Erikeʼ maʼ jóokʼok escuela ka káaj u xook yéetel u j-jaajkunajoʼob Jéeobaiʼ yéetel tu kaneʼ Dioseʼ yaan u luʼsik tuláakal le talamiloʼoboʼ. Tu tsʼáaj cuentaeʼ maas kʼaʼanaʼan u xupik u muukʼ yéetel u tiempo utiaʼal u meyajtik Dios. Le oʼolal maʼ seguernaj u báaxtik futboliʼ, baʼaxeʼ okjaʼanaji yéetel tu kʼubaj u yóol u meyajt Dios. Tu beetaj u siervo ministerialil yéetel ka máan kʼiineʼ bin teʼ Escuela Bíblica utiaʼal Sukuʼunoʼob maʼ Tsʼokaʼan u Beeloʼoboʼ.

Wa ka seguernak u báaxaleʼ, maʼ xaaneʼ tsʼoʼok kaʼach u ayikʼaltal yéetel u jach kʼaj óoltaʼaleʼ. Baʼaleʼ letiʼeʼ u yojel jaaj le baʼax ku yaʼalik le tekstoaʼ: «Le [máax] ayikʼaloʼ ku tukultik u ayikʼalileʼ bey junpʼéel kaaj baʼpachtaʼan tumen kaʼanal tulumoʼo[beʼ]» (Pro. 18:11). Chéen ku tuskuba máax ku tuklik jach kanáantaʼan tumen le taakʼinoʼ. U jaajileʼ le máaxoʼob chéen ku kaxtik u yantal taakʼin tiʼoboʼ chéen ku «chupik u kuxtaloʼob yéetel yaayaj óolal» (1 Tim. 6:9, 10).

U maʼalobileʼ yaʼab táankelmoʼobeʼ jach kiʼimak u yóoloʼob tumen tsʼoʼok u kʼubikubaʼob u meyajtoʼob Dios. Erikeʼ ku yaʼalik: «Tiaʼanen ichil le precursoroʼoboʼ, letiʼobeʼ beyoʼob junpʼéel equipo xaneʼ. Letiʼe maas maʼalob equipo tuʼux jeʼel u páajtal in wantaloʼ, kin tsʼáaik u nib óolalil tiʼ Jéeoba úuchik u yáantken in yéey le bej ku taasik utsil yéetel kiʼimak óolaloʼ».

¿Kux túun teech? Maʼ unaj a beetik jeʼex le máakoʼob teʼ yóokʼol kaabaʼ, baʼaxeʼ maas maʼalob ka a wil wa jeʼel u páajtal a beetik a precursorileʼ. (Ilawil le cuadro «Utsiloʼob maʼatech u taasik u kaʼantal u xook máak».)

Juntúul sukuʼun yéetel u yatan bin u xíimbaltoʼob u Betelil Estados Unidoseʼ tu yiloʼob jach kiʼimak u yóol le betelitaʼoboʼ. Ka máan kʼiineʼ le kiikoʼ tu yaʼalaj: «Suuk kaʼach k-kuxtal jach maʼalob». Letiʼ yéetel u yíichameʼ joʼopʼ u yilkoʼob bix jeʼel u maas meyajtikoʼob Jéeobaeʼ.

Ka káajeʼ jach yaj tu yilil u beetkoʼob le baʼax tsʼoʼok u chʼaʼtuklikoʼoboʼ. Baʼaleʼ junpʼéel kʼiineʼ joʼopʼ u tuukuloʼob tiʼ baʼax tu yaʼalaj u tekstoil le kʼiinoʼ. Le tekstooʼ Juan 8:31, tuʼux tu yaʼalaj Jesús: «Wa ku pʼáatal ta puksiʼikʼaleʼex baʼax kin waʼalikeʼ, jach tu jaajil in disipuloʼex». Lelaʼ tu beetaj u tuklik le kiik yéetel u yíichamoʼ: «Jeʼel baʼaxak ka k-beet utiaʼal k-kuxtal chéen yéetel junpʼíit baʼaleʼ, maʼ chéen kuneliʼ». Tu konoʼob le nuxiʼ naj yaantiʼoboʼ yéetel tu pʼatoʼob uláakʼ baʼaloʼob yaantiʼob utiaʼal u binoʼob tiʼ junpʼéel múuchʼulil tuʼux kʼaʼabéet áantaj. Bejlaʼeʼ precursoroʼob, ku yáantajoʼob utiaʼal u beetaʼal u Najiloʼob Reino yéetel teʼ asambleaʼob tiʼ distritooʼ ku meyajoʼob tuʼux ku kʼaʼabéettal. ¿Bix u yuʼubikubaʼob? Letiʼobeʼ ku yaʼalikoʼob: «Jach kiʼimak k-óol k-kuxtal chéen yéetel junpʼíit baʼal, tumen táan k-beetik le baʼax ku yaʼalik u kaajal Jéeobaoʼ».

Salomoneʼ tu yaʼalaj: «Mantatsʼ paakatnen táanil, mantatsʼ paakatnen aktáan» (Pro. 4:25). Juntúul máak táan u manejareʼ maʼ unaj u náayal u yóol yéetel mix baʼaliʼ, baʼaxeʼ unaj u paktik u beel. Toʼon xaneʼ maʼ unaj u náayal k-óol yéetel uláakʼ baʼaloʼobiʼ, baʼaxeʼ unaj k-ilik bix jeʼel k-maas meyajtik Dioseʼ.

¿Bix jeʼel a maas meyajtik Dioseʼ? Maʼ xaaneʼ jeʼel u páajtal a beetik a precursorileʼ, a bin áantaj tiʼ junpʼéel  múuchʼulil tuʼux maas kʼaʼabéet j-kʼaʼaytajoʼob wa jeʼel u páajtal a bin tiʼ junpʼéel múuchʼulil tuʼux kʼaʼabéet siervo ministerialoʼob wa ancianoʼob kex yaʼab j-kʼaʼaytajoʼob yaneʼ. Wa jeʼel u páajtal a bineʼ, ¿baʼaxten maʼ ta kʼáatik tiʼ le superintendente tiʼ circuito tuʼux maas kʼaʼabéet áantajoʼ? Wa taak a bin maas náacheʼ jeʼel u páajtal a kʼáatik wa yaan múuchʼuliloʼob kʼaʼabéet áantajtiʼobeʼ. *

Koʼox kaʼa tʼaan tiʼ baʼax ku yaʼalik Isaías 62:10. Yaan tiʼ le judíoʼoboʼ yaʼab meyaj tu beetoʼob utiaʼal u maʼalobkíintikoʼob le bej tuʼux kun máan u maasil israelitaʼob kaʼachoʼ. ¿Chéen kunel wa le meyaj tu beetoʼoboʼ? Maʼatech, tumen u kaajal Dioseʼ páajchaj u kʼuchul Jerusalén. Bey túunoʼ wa ka tsʼáaik a wóol utiaʼal a beetik uláakʼ meyajoʼob ichil u kaajal Dioseʼ, letiʼeʼ yaan u yáantkech. Maʼ a chaʼik u kʼatkuba mix baʼal ta beel yéetel maʼ u xuʼulul a kʼáatik le naʼat ku taal tiʼ Diosoʼ. Wa ka beetkeʼ letiʼeʼ yaan u ‹táaxkuntik le bej tuʼux ka jetsʼik a wookoʼ› (Pro. 4:26).