KUXAʼANOʼON tiʼ kʼiinoʼob jach talamtak mix juntéen ilaʼak (2 Tim. 3:1-5). Sáamsamal ku kʼaʼabéettal k-eʼesik wa k-yaabiltmaj Jéeoba bey xan wa yaan k-tsʼáaik ichil k-kuxtal baʼaxoʼob ku yaʼalik. Jesuseʼ u yaʼalmiliʼ yaan u yilaʼal kʼiinoʼob jach talamtakeʼ, baʼaleʼ tu yaʼalaj tiʼ u disipuloʼobeʼ yaan u líiʼsik u yóoloʼob utiaʼal ka chúukpajak u yóoloʼob tak tu xuul (Mat. 24:3, 13; 28:20). Utiaʼal lelaʼ tu tsʼáaj juntúul palitsil utiaʼal u tsʼáaik le «janal [...] jach tu yorailoʼ» (Mat. 24:45, 46).

Desde ka tsʼaʼab le palitsil tu jaʼabil 1919, u millonesil «uláakʼ palitsiloʼob» tiʼ jejeláas tʼaanoʼob tsʼoʼok u yokloʼob ichil u kaajal Dios yéetel táan u kʼamkoʼob le kaʼansaj ku keʼetel yéetel janaloʼ (Mat. 24:14; Apo. 22:17). Baʼaleʼ u jaajileʼ maʼ tuláakal le jóoʼsaʼaniloʼob sutaʼan ichil le tʼaan ku beetik le máakoʼoboʼ. Tsʼoʼoleʼ maʼ tuláakal máak ku páajtal u xokik le jóoʼsaʼaniloʼob tiʼ computadoraoʼ. Yaʼab máak xaneʼ maʼ tu páajtal u yokol teʼ kúuchil jw.org utiaʼal u chaʼantik le videoʼob wa u xokik le baʼaxoʼob ku tsʼaʼabaloʼ. ¿U kʼáat wa túun u yaʼal ku peʼertikoʼob le kaʼansaj ku tsʼaʼabal utiaʼal u maas muʼukʼaʼankúuntik u fejoʼob tiʼ Diosoʼ? Utiaʼal k-ilkeʼ, koʼox xakʼaltik kanpʼéel kʼáatchiʼob.

Ka aʼalaʼab tiʼ Jesús tumen Satanás ka u sut waajil le tuunichoʼoboʼ, Jesuseʼ tu yaʼalaj: «Maʼ chéen yéetel waaj unaj u kuxtal wíinikiʼ, baʼaxeʼ tak yéetel tuláakal tʼaan ku jóokʼol tu chiʼ Jéeoba» (Mat. 4:3, 4). ¿Tuʼux túun yaan le tʼaanoʼob ku taal tiʼ Jéeobaoʼ? Teʼ Bibliaoʼ (2 Ped. 1:20, 21). Bey túunoʼ le baʼax maas kʼaʼanaʼan ichil le kaʼansaj ku tsʼáaiktoʼon Jéeobaoʼ, letiʼe Bibliaoʼ (2 Tim. 3:16, 17).

Yéetel u yáantaj u kaajal Jéeobaeʼ, le Biblia Traducción del Nuevo Mundo de las Santas Escriturasoʼ jeʼel u páajtal u xoʼokol tu chúukaʼanil wa junjaats ich maas tiʼ 120 tʼaanoʼobeʼ, cada jaʼabeʼ táan xan u jóoʼsaʼal ichil u maasil tʼaanoʼob. Tsʼoʼoleʼ yaan u millonesil uláakʼ Bibliaʼob ichil u milesil uláakʼ tʼaanoʼob. Yéetel le baʼax ku yúuchlaʼ ku béeytal baʼax uts tu tʼaan Jéeoba, tumen letiʼeʼ «u kʼáat ka u salvartuba tuláakal u jejeláasil máakoʼob yéetel ka kʼuchuk u chúukaʼan kʼaj óoltoʼob le jaajoʼ» (1 Tim. 2:3, 4). Tsʼoʼoleʼ tumen tuláakal baʼal «chíikaʼan u yilk[eʼ]ʼ» jeʼel u páajtal k-aʼalikeʼ Jéeobaeʼ yaan u natsʼik tu yiknal le máaxoʼob «wiʼijoʼob tiʼ tuláakal le baʼaxoʼob ku tsʼáaik Dios» utiaʼal u tsʼáaiktiʼob le janal kʼaʼabéetoʼ (Heb. 4:13; Mat. 5:3, 6; Juan 6:44; 10:14).

Utiaʼal u muʼukʼaʼantal k-fejeʼ maʼ chéen unaj k-xokik le Bibliaoʼ, kʼaʼabéet k-naʼatik tubeel baʼax ku yaʼalik yéetel k-tsʼáaik ichil k-kuxtal (Sant. 1:22-25). Lelaʼ bey tu beetil juntúul etíope teʼ yáax siglooʼ. Letiʼeʼ táan kaʼach u xokik u Tʼaan Dios ka kʼáataʼabtiʼ tumen Felipe: «¿Jach wa tu jaajil ka naʼatik le baʼax ka xokikoʼ?». Le etíopeoʼ tu núukajtiʼ: «¿Bix túun jeʼel u páajtal in naʼatik wa minaʼan máax tsolikteneʼ?» (Bax. 8:26-31). Felipe túuneʼ tu yáantaj le máak utiaʼal ka u naʼat tubeel baʼax ku yaʼalik u Tʼaan Diosoʼ, le máakaʼ kʼuch tu puksiʼikʼal le baʼax tu kanoʼ yéetel okjaʼanaji (Bax. 8:32-38). Bejlaʼa xaneʼ le jóoʼsaʼaniloʼoboʼ tsʼoʼok u yáantkoʼon k-naʼat baʼax ku kaʼansik le Bibliaoʼ. Lelaʼ jach ku kʼuchul t-puksiʼikʼal, le oʼolal ku taaktal k-tsʼáaik ichil k-kuxtal (Col. 1:9, 10).

Toʼoneʼ yaʼab janal ku tsʼáaiktoʼon Jéeoba ikil u tsʼáaiktoʼon le jóoʼsaʼaniloʼoboʼ (Isa. 65:13). Junpʼéel tiʼ leloʼobaʼ letiʼe revista U Pʼíich Tulumil Kanan ku jóoʼsaʼal ich maas tiʼ 210 tʼaanoʼoboʼ. Le revistaaʼ ku tsolik le profecíaʼob yaan teʼ Bibliaoʼ, ku yáantkoʼon k-naʼat le kaʼansajoʼob talamtakoʼoboʼ yéetel ku kaʼansik bix jeʼel k-tsʼáaik ichil k-kuxtaleʼ. Uláakʼ junpʼéeleʼ letiʼe revista ¡Despertad! ku jóoʼsaʼal ich óoliʼ 100 tʼaanoʼoboʼ. Le revistaaʼ ku tʼaan tiʼ le jatsʼuts baʼaloʼob beetaʼanoʼ yéetel ku kaʼansiktoʼon bix jeʼel k-tsʼáaik ichil k-kuxtal baʼax ku kaʼansik le Bibliaoʼ (Pro. 3:21-23; Rom. 1:20). Le palitsil chúukaʼan u yóoloʼ ku tsʼáaiktoʼon jóoʼsaʼaniloʼob ich maas tiʼ 680 tʼaanoʼob. ¿Ka jóoʼsik wa tiempo sáamsamal utiaʼal a xokik le Bibliaoʼ? ¿Ka láaj xokik wa le revistaʼob bey xan le túumben jóoʼsaʼaniloʼob yaan ichil le tʼaan a wojloʼ?

Baʼaleʼ maʼ chéen jóoʼsaʼaniloʼob ku tsʼaʼabaltoʼoniʼ. U kaajal Jéeobaeʼ ku beetik bosquejoʼob chʼaʼan u tuukulil teʼ Biblia utiaʼal u máansaʼal tsoltʼaanoʼob teʼ muchʼtáambaloʼob bey xan teʼ asambleaʼoboʼ. ¿Ka jóoʼsik wa u yutsil le tsoltʼaanoʼob, le dramaʼob, le eʼesajiloʼob bey xan le entrevistaʼob ku máansaʼal teʼ asambleaʼob wa teʼ muchʼtáambaloʼoboʼ? ¿Máasaʼ jach yaʼab kiʼikiʼ janal ku tsʼáaiktoʼon Jéeoba? (Isa. 25:6.)

¡Maʼatech! Baʼaleʼ maʼ unaj u lúubul k-óol wa k-ilik maas yaʼab jóoʼsaʼaniloʼob yaan tiʼ le sukuʼunoʼob ichil le tʼaan u yojloʼoboʼ. Tuukulnakoʼon tiʼ le apostoloʼoboʼ. Letiʼobeʼ maas yaʼab baʼax kaʼansaʼabtiʼob ke tiʼ le disipuloʼob anchaj teʼ yáax siglooʼ (Mar. 4:10; 9:35-37). Kex beyoʼ u maasil disipuloʼoboʼ maʼ pʼáat minaʼan le kaʼansaj kʼaʼabéetchajtiʼoboʼ (Efe. 4:20-24; 1 Ped. 1:8).

Maʼalob ka k-kʼaʼajs xaneʼ yaʼab tiʼ le baʼaxoʼob tu beetaj Jesús ka kuxlaj way Luʼumoʼ maʼ tsʼíibtaʼab teʼ Evangelioʼoboʼ. Lelaʼ bey tu yaʼalil apóstol Juanoʼ: «U jaajileʼ jach yaʼab uláakʼ baʼaloʼob tu beetaj Jesús. Wa ka kʼuchuk tsʼíibtbil tuláakal jach jeʼex úuchik u beetkoʼ, in tuklikeʼ mix tu túulisil yóokʼol kaab jeʼel u yantal tuʼux u tsʼaʼabal tuláakal le rolloʼob kun tsʼíibtbiloʼ» (Juan 21:25). U jaajileʼ u disipuloʼob Jesús anchaj teʼ yáax siglo maas yaʼab baʼax u yojloʼob tu yoʼolal letiʼ, baʼaleʼ Jéeobaeʼ tsʼoʼok u yilik u tsʼáaiktoʼon baʼax kʼaʼabéet utiaʼal u páajtal k-tsaypachtik Jesús (1 Ped. 2:21).

Wa ka tʼaanakoʼon xan tiʼ le cartaʼob tu túuxtaj le apostoloʼob tiʼ le múuchʼuliloʼoboʼ, yaan kex wal junpʼéel tiʼ le tu tsʼíibtaj Pablo maʼ oksaʼab ichil le Bibliaoʼ (Col. 4:16). ¿Lelaʼ u kʼáat wa túun u yaʼal maʼ chúukaʼan le kaʼansaj ku tsʼaʼabaltoʼonoʼ? Maʼatech. Jéeobaeʼ u yojel baʼax kʼaʼabéettoʼon utiaʼal k-muʼukʼaʼantal yéetel tsʼoʼok xan u tsʼáaiktoʼon (Mat. 6:8).

Bejlaʼa xaneʼ yaan sukuʼunoʼobeʼ maas yaʼab jóoʼsaʼaniloʼob yaantiʼob. Ichil le tʼaan a wojloʼ, ¿chéen wa jujunpʼéel jóoʼsaʼaniloʼob yaan? Wa beyoʼ, maʼ u lúubul a wóol, Jéeobaeʼ láayliʼ ku kanáantkecheʼ. Xakʼalxokt le jóoʼsaʼaniloʼob yaan ichil le tʼaan a wojloʼ, yéetel wa ku páajtaleʼ xeen teʼ muchʼtáambaloʼob ku beetaʼal ichil le tʼaan maas ka naʼatikoʼ. Jéeobaeʼ yaan u yáantkech utiaʼal ka muʼukʼaʼanchajak a fe (Sal. 1:2; Heb. 10:24, 25).

Teʼ kúuchil yaantoʼon ich Internetoʼ jeʼel u páajtal u xoʼokol revistaʼob wa uláakʼ jóoʼsaʼaniloʼob ku tʼaanoʼob tiʼ le Bibliaoʼ. Teʼ kúuchilaʼ yaan xan tsolnuʼukoʼob utiaʼal le tsʼokaʼan u beeloʼoboʼ, le táankelmoʼoboʼ, yéetel le taatatsiloʼob mejentak u paalaloʼoboʼ. Le tsolnuʼukoʼobaʼ maʼalob ka u múul xok máak yéetel u familia. Tsʼoʼoleʼ teʼ kúuchilaʼ ku tsʼaʼabal uláakʼ baʼaxoʼob jach kʼaʼanaʼantak jeʼex u clausurail le Escuela tiʼ Galaadoʼ yéetel le muchʼtáambaloʼob ku beetaʼal cada jaʼaboʼ. Ku tsʼaʼabal xan noticiaʼob ku tʼaanoʼob tiʼ le nukuch loobiloʼob ku yúuchloʼ bey xan tiʼ jujunpʼéel juicioʼob ku beetaʼal tiʼ le sukuʼunoʼoboʼ (1 Ped. 5:8, 9). Le kúuchil tiʼ Internetaʼ jach maʼalob xan utiaʼal u yúuchul kʼaʼaytaj, yéetel u yáantajeʼ ku tsʼaʼabal kʼaj óoltbil le maʼalob péektsil tak teʼ tuʼuxoʼob maʼatech u chaʼabal tumen le autoridadoʼoboʼ.

Baʼaleʼ kex wa yaantech Internet bey xan wa maʼeʼ, jeʼel u páajtal a muʼukʼaʼankúuntik a fe tiʼ Dioseʼ. Le palitsil chúukaʼan u yóoloʼ jach yaʼab meyaj ku beetik utiaʼal u imprimirtaʼal jóoʼsaʼaniloʼob utiaʼal u tsʼáaiktoʼon le janal kʼaʼabéettoʼonoʼ. Le oʼolal maʼ a tuklik wa jach kʼaʼabéet a manik junpʼéel nuʼukul chéen utiaʼal a wokol teʼ jw.org. Maʼ xaaneʼ yaan máax ken u chʼaʼtukult u imprimirtik jujunpʼéel baʼaloʼob ku tsʼaʼabal teʼ kúuchil ich Internet utiaʼal u jóoʼsik u yutsil u maasiloʼ, baʼaleʼ lelaʼ maʼ u obligación le múuchʼulil u beetkoʼ.

Jesuseʼ táan u yilik u tsʼáaiktoʼon tuláakal baʼax kʼaʼabéet utiaʼal k-muʼukʼaʼankúuntik k-fe. ¿Máasaʼ jach k-tsʼáaik u nib óolalil tiʼ? Maʼ unaj u tuʼubultoʼon xaneʼ Jéeobaeʼ yaan u seguer u tsʼáaiktoʼon le «janal [...] jach tu yorail» tak ken xuʼulsaʼak tiʼ le kʼasaʼan yóokʼol kaabaʼ.