1, 2. ¿Baʼax tu yaʼalaj Jéeoba tiʼ Moisés ka u beete, yéetel baʼax tu yaʼalajtiʼ utiaʼal maʼ u sajaktal?

TUKULTEʼ yaan a bin tʼaan tu favor u kaajal Jéeoba tu táan le gobernador maas yaan u páajtalil way Luʼumoʼ. Maʼ xaaneʼ yaan a sajaktal, yaan a nerviosotal, maʼ ten a kaxt baʼax ken a waʼale, tsʼoʼoleʼ jeʼel a tuklikeʼ maʼ tu páajtal a bin tʼaan tu táan juntúul máak beyaʼ. ¿Baʼax jeʼel a beetik wa a wojel deporsi yaan a bineʼ? ¿Baʼax jeʼel a beetik utiaʼal ka creertaʼak le baʼax ken waʼal tu kʼaabaʼ Diosoʼ?

² Moiseseʼ anchaj u beetik le baʼax tsʼoʼok k-aʼalikaʼ. Jéeobaeʼ tu yaʼaleʼ Moiseseʼ «juntúul jach kabal óolal máak teʼ luʼumaʼ», tsʼoʼoleʼ tu yaʼaleʼ yaan u túuxtik tu táan Faraón utiaʼal u jóoʼsik u kaajal palitsiltaʼan yéetel pechʼ óoltaʼan tu kaajil Egipto (Núm. 12:3). Faraoneʼ juntúul máak jach kʼasaʼan kaʼachi yéetel nojbaʼal u taaskuba. Kex beyoʼ Jéeobaeʼ u kʼáat kaʼach ka xiʼik Moisés utiaʼal u yaʼalik tiʼ Faraón ka chaʼabak u bin u millonesil israelitaʼob palitsiltaʼanoʼoboʼ (Éxo. 5:1, 2). Ka tsʼoʼok u yaʼalaʼal tiʼ Moisés tumen Jéeoba baʼax ken u beeteʼ, yáax baʼax tu kʼáateʼ letiʼ lelaʼ: «¿Máaxen teen utiaʼal ka xiʼiken tu táan faraón, utiaʼal xan ka in jóokʼes le israelitaʼob tu luʼumil Egiptooʼ?». Moiseseʼ tu yuʼubaj maʼ tun páajtal u beetik le baʼax aʼalaʼabtiʼoʼ. Baʼaleʼ utiaʼal maʼ u sajaktaleʼ Dioseʼ tu yaʼalajtiʼ: «Teneʼ yaan in wantal ta wéetel» (Éxo. 3:9-12).

3, 4. 1) ¿Baʼaxten sajakchaj Moisés? 2) ¿Baʼax xan jeʼel u beetik k-uʼuyikba jeʼex Moiseseʼ?

 ³ ¿Baʼaxten sajakchaj Moisés? Tumen maʼ xaaneʼ u yojleʼ Faraoneʼ maʼ ken u creert wa Dios túuxte. Tsʼoʼoleʼ sajakchaj xan tumen maʼ xaaneʼ le israelitaʼoboʼ maʼ ken u creertoʼob wa Jéeoba yéey utiaʼal u jóoʼskoʼob tu luʼumil Egipto. Le oʼolal tu yaʼalaj tiʼ Jéeoba: «Letiʼobeʼ bíin u tukloʼob táan in tusikoʼob, maʼ bíin u táan óoltenoʼobiʼ. [...] [Maʼ xaaneʼ] bíin u yaʼaloʼob: Yuumtsileʼ maʼ chíikpajak techiʼ» (Éxo. 3:15-18; 4:1).

⁴ Maʼ xaaneʼ mix juntéen kun kʼaʼabéettal a bin tʼaan tu táan juntúul gobernante jach yaan u páajtalil. Baʼaleʼ ¿yaan wa hora tsʼoʼok a sajaktal ken tʼaanajech tiʼ Dios wa tiʼ le baʼaxoʼob ken u beet u Reinooʼ? Le baʼax tu yaʼalaj Jéeoba tiʼ Moisés yéetel le baʼax úuch ka tsʼoʼokoʼ ku kaʼansiktoʼon junpʼéel baʼal jach kʼaʼanaʼan.

5. 1) ¿Baʼax tsʼaʼab tiʼ Moisés tumen Jéeoba utiaʼal maʼ u sajaktal? (Ilawil le dibujo yaan tu káajbal le xookaʼ.) 2) Yéetel le baʼax tu beetaj Jéeobaoʼ, ¿bix tu yuʼubiluba Moisés?

⁵ Ka tu yaʼalaj Moisés sajak maʼ u creertaʼal baʼax ken u yaʼaleʼ, áantaʼab tumen Dios utiaʼal maʼ u seguer u chʼaʼik saajkil. U libroil Éxodoeʼ ku yaʼalik: «Yuumtsil túuneʼ tu kʼáatchiʼitaj tiʼ: ¿Baʼax le yaan ta kʼaboʼ? Moiseseʼ tu núukaj: Junpʼéel xóolteʼ. Yuumtsileʼ tu yaʼalajtiʼ: Pul teʼ luʼumoʼ. Moiseseʼ tu pulaj teʼ luʼumoʼ, tu séeblakil suunaj juntúul kaan le xóolteʼoʼ. Moiseseʼ lakchaj u yáalkab utiaʼal u náachtal tiʼ, baʼaleʼ Yuumtsileʼ tu yaʼalajtiʼ: Tichʼ a kʼabeʼ ka mach tu nej. Moiseseʼ tu tichʼaj u kʼab, le ka tu machaj le kaanoʼ, suunaj xóolteʼil tu kaʼatéen. Tu yaʼalaj Yuumtsil: Lelaʼ utiaʼal ka u yoksaj óoltoʼob tsʼoʼok u chíikpajal tech Yuumtsil» (Éxo. 4:2-5). Jeʼex k-ilkoʼ le baʼax ken u yeʼes Dios túuxt Moisesoʼ letiʼe xóolteʼoʼ. Beyaʼ jeʼel kaʼach u páajtal u yeʼesik Moisés táan u yáantaʼaleʼ yéetel táan u tʼaan tu kʼaabaʼ Jéeoba. Jéeobaeʼ tu yaʼalajtiʼ: «Bis le xóolteʼaʼ, tumen [tu] yéetel bíin a beet jakʼ óol baʼaloʼob» (Éxo. 4:17). Yéetel le xóolteʼ tsʼaʼab tiʼ Moisesoʼ béeychaj u beetik le baʼax aʼalaʼabtiʼoʼ, béeychaj u tʼaan yéetel x-maʼ saajkil tu táan Faraón bey xan tu táan le israelitaʼob tu kʼaabaʼ Diosoʼ (Éxo. 4:29-31; 7:8-13).

6. 1) ¿Baʼax unaj u yantal t-kʼab ken kʼaʼaytajnakoʼon, yéetel baʼaxten? 2) ¿Baʼaxten tu yaʼalaj Pablo ‹kuxaʼan u tʼaan Dios yéetel yaan u páajtalil›?

⁶ Ken k-kʼaʼayt le maʼalob péektsil tiʼ k-éet máakiloʼ, maʼ xaaneʼ láayliʼ jeʼel u páajtal u kʼáataʼaltoʼon le baʼax kʼáataʼab tiʼ Moisesaʼ: «¿Baʼax le yaan ta kʼaboʼ?». Toʼoneʼ le baʼax maases k-machmaj yaan hora teʼ kʼaʼaytajoʼ letiʼe Bibliaoʼ, tumen beyoʼ jeʼel u páajtal k-jáan xokik tiʼ wa máaxeʼ. Yaʼab máakeʼ ku yilik le Biblia chéen bey jeʼel baʼaxak libroiloʼ, baʼaleʼ le Bibliaoʼ u Tʼaan Jéeoba, tiʼ ku yaʼaliktoʼon baʼax u kʼáat ka k-beetiʼ (2 Ped. 1:21). Tiʼ xan ku yaʼalik baʼaxoʼob ken u beet u Reino maʼ kun xáantaliʼ. Le oʼolal apóstol Pabloeʼ tu yaʼalaj: «U tʼaan Dioseʼ kuxaʼan yéetel yaan u páajtalil» (xok Hebreoʼob 4:12). ¿Baʼaxten tu yaʼalaj Pablo ‹kuxaʼan u tʼaan Dios›? Tumen Dioseʼ ken u yaʼal junpʼéel baʼaleʼ ku béeytal (Isa. 46:10; 55:11). Ken kʼuchuk u naʼat máak lelaʼ le baʼax ku yaʼalik le Bibliaoʼ ku yantal «u páajtalil» ichil u kuxtal, ku taaktal u beetik le baʼax ku yaʼalikoʼ.

7. ¿Bix jeʼel u meyajtoʼon «tubeel u tʼaaniloʼob le jaajoʼ»?

⁷ Jéeobaeʼ tsʼoʼok u tsʼáaik t-kʼab le Bibliaoʼ. Yéetel u yáantajeʼ jeʼel u páajtal k-eʼesik jaaj baʼax k-kʼaʼaytikeʼ yéetel tiʼ Jéeoba u taal. Pabloeʼ bey tu yililoʼ tumen ka tsʼoʼok u tsʼíib tiʼ le Hebreoʼoboʼ, tu yaʼalaj tiʼ Timoteo: ‹Kaʼans yéetel tsol tubeel u tʼaaniloʼob le jaajoʼ› (2 Tim. 2:15). ¿Bix jeʼel k-beetik xan le baʼax tu yaʼalaj Pabloaʼ? Letiʼe ken k-yéey tubeel baʼax tekstoil ken k-xok tiʼ u yuumil naj utiaʼal k-kʼuchul tu puksiʼikʼaloʼ. Le tratadoʼob jóoʼsaʼab tu jaʼabil 2013, beetaʼan utiaʼal ka maas meyajnaktoʼon le Bibliaoʼ.

8. ¿Baʼax tu yaʼalaj juntúul superintendente tiʼ servicio tu yoʼolal le túumben tratadoʼoboʼ?

⁸ Le túumben tratadoʼoboʼ junpʼéeliliʼ bix  beetaʼaniloʼobeʼ, le oʼolaleʼ desde ta kanaj bix jeʼel a pʼatik junpʼéeleʼ, jeʼel a kanik a pʼat u maasiloʼ. Juntúul superintendente tiʼ servicio kajaʼan Hawái, Estados Unidoseʼ, tu yaʼalaj: «Maʼ t-tuklaj wa jach jeʼel u yáantaj le túumben tratadoʼob teʼ kʼaʼaytaj joonaj joonajil yéetel teʼ tuʼux yaʼab u máan máakoʼ». ¿Baʼaxten jach chéen chʼaʼabil u kʼaʼaytaj máak yéetel le túumben tratadoʼobaʼ? Le sukuʼunaʼ tsʼoʼok u yilkeʼ le bix beetaʼanil le tratadoʼobaʼ ku yáantaj utiaʼal u yaʼalik u yuumil naj baʼax ku tuklik. Lelaʼ ku yáantaj xan utiaʼal u béeytal u maas tsikbal máak yéetel u yuumil naj. Le sukuʼunoʼ ku yaʼalikeʼ le kʼáatchiʼob ku taasik yéetel le jejeláas núukiloʼob yaan teʼ yáax táan juʼunoʼ, ku yáantik u yuumil naj tumen maʼ tu chiʼichnaktal yoʼolal baʼax ken u núuke.

9, 10. 1) ¿Bix u yáantkoʼon le tratadoʼob utiaʼal ka meyajnaktoʼon le Bibliaoʼ? 2) ¿Baʼax tratadoil tsʼoʼok u maas meyajtech, yéetel baʼaxten?

⁹ Cada tratadoeʼ ku yáantkoʼon xok junpʼéel teksto tiʼ le Biblia yéeyaʼan tubeeloʼ. Koʼox tʼaan tiʼ le tratado ¿Yaan wa u xuʼulul k-muʼyaj? Kex u yuumil naj ka u yaʼaltoʼon «yaan», «maʼ», «maʼ xaaniʼ», toʼoneʼ yaan k-eʼesiktiʼ le táan juʼun ku segueroʼ. Tsʼoʼoleʼ k-aʼaliktiʼ: «Ilawil baʼax ku yaʼalik le Bibliaaʼ». Tu tsʼookeʼ ka xokik Apocalipsis 21:3 yéetel 4.

¹⁰ Ken meyajnak xan toʼon le tratado ¿Bix a wilik le baʼax ku kaʼansik le Bibliaoʼ? kex jeʼel bixak ka u núuk u yuumil naj le óoxpʼéel kʼáatchiʼob ku taasik le tratadooʼ, aʼaltiʼ: «Ilawil baʼax ku yaʼalik le Bibliaoʼ». Ken tsʼoʼokkeʼ ka jeʼekʼabtik le tratadooʼ yéetel ka xokik le teksto ku taaskoʼ: «Tuláakal Kiliʼich Tsʼíibeʼ Dios tsʼáa tu tuukul máak utiaʼal ka tsʼíibtaʼak». Tsʼoʼoleʼ aʼaltiʼ: «Yaan xan uláakʼ baʼaloʼob jeʼel u páajtal a kanik tiʼ le tekstoaʼ». Tu tsʼookeʼ ka xokik baʼax ku yaʼalik 2 Timoteo 3:16, 17.

11, 12. 1) ¿Baʼaxten jeʼel u kiʼimaktal k-óol wa ku meyajtoʼon le túumben tratadoʼoboʼ? 2) ¿Bix jeʼel u yáantkech le tratadoʼob utiaʼal a wilik baʼax ken a waʼal ken suunakech a xíimbalt le máakoʼoboʼ?

¹¹ Wa ka wilik jeʼel u páajtaleʼ maʼalob ka seguernak a xakʼaltik le tratado yéetel u yuumil najoʼ. Kex wa maʼ seguernaj a tsikbal yoʼolal le tratadooʼ, unaj u kiʼimaktal a wóol tumen tsʼoʼok a xokik jujunpʼéel tekstoʼob. Maʼ xaaneʼ tuláakʼ súutukileʼ jeʼel u páajtal a suut utiaʼal u seguer a tsikbal yéetel u yuumil najeʼ.

¹² Tu tsʼook u táan juʼunil cada tratadoeʼ ku taasik junpʼéel chan joʼol xook ku yaʼalik «Tukulte». Tu yáanaleʼ yaan junpʼéel kʼáatchiʼ yéetel jujunpʼéel tekstoʼob jeʼel u páajtal a xakʼaltik yéetel u yuumil naj ken suunakech a xíimbalteʼ. Le tratado ¿Bix kun tsʼoʼokol le yóokʼol kaabaʼ? ku taasik le kʼáatchiʼ «¿Bix ken u maʼalobkíintil Dios le yóokʼol kaabaʼ?»,  yéetel ku taasik u tekstoil Mateo 6:9 yéetel 10 bey xan Daniel 2:44. Le tratado ¿Jach wa tu jaajil jeʼel u kaʼa kuxtal le kimenoʼoboʼ? ku taasik le kʼáatchiʼ «¿Baʼaxten k-chʼíijil yéetel k-kíimil?», yéetel ku taasik u tekstoil Génesis 3:17 tak 19 yéetel Romailoʼob 5:12.

13. ¿Bix jeʼel u meyajtoʼon le tratadoʼob utiaʼal k-káajsik xookoʼoboʼ?

¹³ Meyajnaktech le tratadoʼob utiaʼal a káajsik junpʼéel xookoʼ. Tu tsʼook táan juʼunil le tratadoʼoboʼ yaan junpʼéel código QR * (ku biskech juntaatsʼ teʼ jw.org). Ken escaneartaʼak le código yéetel junpʼéel celular wa uláakʼ baʼaleʼ ku jeʼekʼabtik le kúuchil jw.org teʼ tuʼux yaan junpʼéel video ku invitartik máak u xok le Bibliaoʼ. Le tratadoʼoboʼ ku tʼaanoʼob xan tiʼ le folleto U maʼalob péektsiloʼob Diosoʼ yéetel ku invitartik máak u xakʼalt junpʼéel tiʼ le xookiloʼob ku taaskoʼ. Le tratado ¿Máax jach tu jaajil gobernartik le yóokʼol kaabaʼ? ku invitartik máak u xok u 5 xookil le folletoaʼ. Le tratado ¿Baʼax jeʼel u taasik kiʼimak óolal ichil le familiaoʼ? ku invitartik máak xan u xok u 9 xookil le folletoaʼ. Wa ku meyajtoʼon le tratadoʼob jeʼex u yaʼalaʼaltoʼon ka k-beetoʼ yaan u meyajtoʼon le Biblia ken yáax kʼaʼaytajnakoʼon tiʼ u yuumil najoʼ bey xan ken kaʼa suunakoʼon xíimbalte. Tsʼoʼoleʼ jeʼel xan u yáantkoʼon utiaʼal k-maas káajsik xookoʼobeʼ. ¿Baʼax uláakʼ jeʼel a beetik utiaʼal ka meyajnaktech tubeel le Biblia teʼ kʼaʼaytajoʼ?

14, 15. ¿Bix jeʼel k-beetik jeʼex Pablo ken jóokʼkoʼon kʼaʼaytajeʼ?

¹⁴ Ka kʼaʼaytajnaj Pabloeʼ tu yilaj u naʼatik bix u yuʼubikuba «tuláakal máak» (xok 1 Corintoiloʼob 9:19-23). ¿Baʼaxten bey tu beetiloʼ? Letiʼeʼ tu yaʼalaj: ‹Utiaʼal in natsʼik tu yiknal Cristo le judíoʼoboʼ, le máaxoʼob yanoʼob yáanal leyoʼ, le máaxoʼob minaʼanoʼob yáanal leyoʼ yéetel le minaʼan u muukʼoʼoboʼ›. Le apostoloʼ tu yilaj u kʼaʼaytaj tiʼ «tuláakal u jejeláasil máakoʼob» utiaʼal ka u salvarkuba kex chéen wa jaytúuliʼ (Bax. 20:21). ¿Bix jeʼel k-líiʼsikba utiaʼal k-kʼaʼaytaj tiʼ «tuláakal u jejeláasil máakoʼob» jeʼex tu beetil apóstol Pablooʼ? (1 Tim. 2:3, 4.)

¹⁵ Tiʼ K-meeyjil tiʼ le Reinooʼ cada mes ku jóoʼsaʼal eʼesajiloʼob. Ilawil u meyajoʼobtech. Baʼaleʼ ¿kux túun wa le máaxoʼob kajaʼanoʼob teʼ tuʼux ka kʼaʼaytaj maases ku tʼaanoʼob tiʼ yaanal baʼaloʼ? Wa beyoʼ, tukult baʼax jeʼel a waʼalik utiaʼal u taaktal u yuʼubikechoʼobeʼ. Yáaxeʼ tukle: «¿Bix kuxlik le máakoʼob teʼ tuʼux kin kʼaʼaytajoʼ? ¿Baʼax chiʼichnakkúuntikoʼob?». Tsʼoʼoleʼ yéey junpʼéel teksto ka tuklik jeʼel u yáantajeʼ. Juntúul superintendente tiʼ circuito yéetel u yataneʼ, ku yaʼalikoʼob bix u meyajtiʼob le Biblia teʼ kʼaʼaytajoʼ, letiʼobeʼ ku yaʼalikoʼob: «Óoliʼ tuláakal máak ku chaʼik a xokik junpʼéel teksto tiʼ wa maʼ ta xáantal bey xan wa u taatsʼ a waʼaliktiʼob baʼax binech a beete. Táanileʼ k-jeʼekʼabtik le Biblia tuʼux yaan le teksto ken k-xokoʼ, beyoʼ chéen pʼel u tsʼoʼokol k-tsikik u yuumil najeʼ k-xokik le teksto tiʼoʼ». Beoraaʼ koʼox ilik tiʼ baʼaxoʼob ku tʼaan jujuntúul sukuʼunoʼob teʼ kʼaʼaytajoʼ, baʼax kʼáatchiʼil ku beetkoʼob yéetel baʼax tekstoil ku xokikoʼob utiaʼal ka uʼuyaʼakoʼob. Lelaʼ maʼ xaaneʼ jeʼel u meyajtoʼoneʼ.

16. ¿Bix jeʼel u meyajtech le baʼax ku yaʼalik Isaías 14:7 teʼ kʼaʼaytajoʼ?

¹⁶ Wa kajaʼanech tuʼux suuk u yúuchul ookol yéetel yaan kʼasaʼan máakoʼobeʼ, jeʼel u páajtal a waʼalikeʼ: «Chéen tukleʼ junpʼéel kʼiineʼ le periodicoʼoboʼ ku yaʼalikoʼob: ‹Yaan jeetsʼelil way Luʼumeʼ, minaʼan baʼax beetik u sajaktal máak. Tuláakal tuʼux yaan kiʼimak óolal›. ¿Máasaʼ jach jatsʼuts wa ka úuchuk lelaʼ? Lelaʼ yaan u yúuchul, ilawil baʼax ku yaʼalik Isaías 14:7. Le Bibliaoʼ ku tsolikeʼ yaʼab baʼaloʼob ken u beet Dios maʼ kun xáantal utiaʼal ka yanak jeetsʼelil». Tsʼoʼoleʼ xok junpʼéel tiʼ le baʼaxoʼob ken u beet Diosoʼ.

17. ¿Bix jeʼel u meyajtech le baʼax ku yaʼalik Mateo 5:3 teʼ kʼaʼaytajoʼ?

¹⁷ Teʼ tuʼux kajaʼanechoʼ, ¿istikyaj wa u kaxtik u kuxtal máakiʼ? Wa beyoʼ jeʼel u páajtal a  káajsik a tsikbal beyaʼ: «¿Bukaʼaj taakʼin ka tuklik kʼaʼabéet u náajaltik máak utiaʼal ka yanak tuláakal baʼax kʼaʼabéet tiʼ u familia?». Ken tsʼoʼokok u núukikeʼ, aʼaltiʼ: «Yaʼab máakoʼobeʼ kex yaʼab taakʼin ku náajaltikoʼobeʼ maʼ kiʼimak u yóoloʼobiʼ. ¿Baʼax túun kʼaʼabéet tiʼ máak utiaʼal u kiʼimaktal u yóol?». Tsʼoʼoleʼ xok Mateo 5:3 yéetel aʼaltiʼ jeʼel u páajtal a tsʼáaik junpʼéel xook tiʼeʼ.

18. ¿Bix jeʼel u meyajtech Apocalipsis 21:4 utiaʼal a líiʼsik u yóol le máakoʼoboʼ?

¹⁸ ¿Táan wa u muʼyaj le máakoʼob teʼ tuʼux kajaʼanech tu yoʼolal junpʼéel nojoch loobiloʼ? Jeʼel u páajtal a waʼalik lelaʼ: «In kʼáat in xoktech junpʼéel teksto tiʼ le Biblia jach jeʼel u líiʼsik a wóoloʼ». Tsʼoʼoleʼ xok Apocalipsis 21:4 (xoke). Ken tsʼoʼokkeʼ aʼale: «¿Ta wilaj wa baʼax ken u xuʼuls Dios? Yaan u xuʼulsik le okʼoloʼ, le kíimiloʼ, le yaj óolaloʼ yéetel le kʼiʼinamiloʼ. ¿Máasaʼ jach ku líiʼsik k-óol k-ojéeltik lelaʼ? Baʼaleʼ ¿jeʼel wa ta tʼaan u béeytal le baʼax ku yaʼalik le Bibliaaʼ?». Ken tsʼoʼokkeʼ jeʼel u páajtal a kaxtik teʼ folleto Maʼalob péektsiloʼob junpʼéel xook ku maas tsolik lelaʼ.

19. ¿Bix jeʼel u meyajtech Apocalipsis 14:6 yéetel 7 ken tsikbalnakech yéetel máax jach u kʼubmaj u yóol tiʼ u religioneʼ?

¹⁹ Teʼ tuʼux kajaʼanechoʼ, ¿jach wa u kʼubmaj u yóol le máakoʼob tiʼ u religionoʼoboʼ? Wa beyoʼ jeʼel u páajtal a káajsik a tsikbal beyaʼ: «Wa ka taalak juntúul ángel tsikbal ta wéeteleʼ, ¿jeʼel wa a wuʼuyikeʼ?». Tsʼoʼoleʼ xok Apocalipsis 14:6, 7 (xoke). Ken tsʼoʼokkeʼ aʼale: «Le angelaʼ táan u yaʼalik ‹chʼaʼex saajkil tiʼ Dios› yéetel ‹adorarteʼex le Máax beet le kaʼan yéetel le Luʼumoʼ›. ¿Bix túun u kʼaabaʼ le Diosaʼ?». Tsʼoʼoleʼ xok Apocalipsis 4:11, tuʼux ku yaʼalik: «K-Dios Jéeoba, techeʼ jach ka náajmatik a kʼamik nojbeʼenil, tsiikil bey xan páajtalil, tumen teech beet tuláakal baʼal». Ken tsʼoʼokkeʼ aʼal jeʼel a tsolik u maasil tu yoʼolal Jéeobaeʼ.

20. 1) ¿Bix jeʼel u meyajtoʼon Hebreoʼob 3:4 utiaʼal k-kaʼansik bix u kʼaabaʼ Dioseʼ? 2) ¿Yaan wa junpʼéel teksto tsʼoʼok a wilik jach uts tu tʼaan u yuʼubik le máakoʼob teʼ kʼaʼaytajoʼ?

²⁰ Ken tsikbalnakech yéetel juntúul táankelem xiʼipaleʼ, jeʼel u páajtal a waʼalikeʼ: «In kʼáat in xoktech junpʼéel teksto tiʼ le Biblia ku yaʼalik junpʼéel baʼal jach kʼaʼanaʼanoʼ». Tsʼoʼoleʼ xok Hebreoʼob 3:4 (xoke). Ken tsʼoʼokkeʼ aʼale: «Jeʼex ta wiloʼ tuláakal najeʼ yaan máax beetmil, baʼaleʼ ¿ta wilaj wa máax beet tuláakal le baʼaloʼoboʼ? Jaaj, jeʼex t-iloʼ Dios beet tuláakal baʼal. Baʼaleʼ ¿tuʼux ta tʼaan jeʼel u páajtal k-ilik bix u kʼaabaʼ Dioseʼ? Wa a kʼáateʼ jeʼel in weʼesiktech teʼ Bibliaoʼ».

21, 22. 1) Junpʼéel teksto yéeyaʼan tubeeleʼ, ¿bix u yáantik le máakoʼoboʼ? 2) Yéetel le baʼax tsʼoʼok k-kanikaʼ, ¿baʼax ka tuklik a beetik ken kʼaʼaytajnakech?

²¹ U jaajileʼ maʼ k-ojel wa yaan u kʼexik u tuukul u yuumil naj ken k-yéey tubeel junpʼéel teksto utiaʼal k-xokiʼ. Tu luʼumil Australiaeʼ kaʼatúul j-Jaajkunajoʼobeʼ tʼaanajoʼob yéetel juntúul x-lóoʼbayan koʼolel. Juntúul tiʼ letiʼobeʼ tu kʼáatajtiʼ: «¿A wojel wa bix u kʼaabaʼ Dios?». Tsʼoʼoleʼ tu xokaj tiʼ Salmo 83:18. Le koʼoleloʼ tu yaʼalaj bix tu yuʼubiluba ka tsʼoʼok u xoʼokol le teksto tiʼoʼ: «¡Maʼ tu páajtal kaʼach in creertik! Ka tsʼoʼok u binoʼobeʼ naʼaken tin cocheeʼ ka manejarnajen 14 leguas [56 kilómetros] utiaʼal in bin tiʼ junpʼéel librería tiaʼal in wilik wa bey u yaʼalik xan uláakʼ Bibliaʼoboʼ. Tin kaxtaj xan u kʼaabaʼ Dios tiʼ junpʼéel diccionario. Ka tin tsʼáaj cuenta Jéeoba u kʼaabaʼ Dioseʼ, káaj in tuklik: ‹¿Baʼax túun uláakʼ maʼ in wojliʼ?›». Ka tsʼoʼokeʼ letiʼ bey xan le xiʼipal yéetel kun tsʼoʼokol u beeloʼ káaj u xokikoʼob le Bibliaoʼ, maʼ xáanchajeʼ ka okjaʼanajoʼob.

²² U Tʼaan Dioseʼ ku kʼexik u kuxtal le máaxoʼob xokik yéetel ku creertikoʼob tuláakal le baʼaxoʼob ken u beet Jéeoba maʼ tun xáantaloʼ (xok 1 Tesalonicailoʼob 2:13). Toʼoneʼ yaan horaeʼ jeʼel u meyajtoʼon jatsʼuts tʼaanoʼob teʼ kʼaʼaytajoʼ, baʼaleʼ le baʼax ku kaʼansik le Bibliaoʼ maas yaan u páajtalil le oʼolal jeʼel u kʼuchul tu puksiʼikʼal le máakoʼoboʼ. U tʼaan Dioseʼ kuxaʼan yéetel yaan u páajtalil. ¡Le oʼolaleʼ meyajnaktech mantatsʼ!