Áant le máaxoʼob ku xupkubaʼob u meyajtoʼob Diosoʼ
«K-kʼaʼajsik le baʼaxoʼob ka péeksaʼaleʼex a beeteʼex tumen a fejeʼexoʼ, le baʼaxoʼob ka beetkeʼex tu yoʼolal a yaabilajeʼexoʼ.» (1 TES. 1:3)
1. ¿Bix u yilik kaʼach Pablo le máaxoʼob ku xupkubaʼob u kʼaʼaytoʼob le maʼalob péektsiloʼ?
LE APÓSTOL Pablooʼ u yaabiltmaj kaʼach le máaxoʼob ku xupkubaʼob u kʼaʼaytoʼob le maʼalob péektsiloʼ. Letiʼeʼ tu tsʼíibtaj: «Tu táan k-Dios le k-Taataoʼ, mantatsʼ k-kʼaʼajsik le baʼaxoʼob ka péeksaʼaleʼex a beeteʼex tumen a fejeʼexoʼ, le baʼaxoʼob ka beetkeʼex tu yoʼolal a yaabilajeʼexoʼ bey xan le chúukaʼan óolal yaanteʼex tu yoʼolal a esperanzaʼex tiʼ Yuumtsil Jesucristooʼ» (1 Tes. 1:3). Teʼ kʼiinoʼobaʼ kex wa chéen junpʼíit ku páajtal k-beetik utiaʼal k-meyajtik Jéeoba bey xan wa maʼeʼ, letiʼeʼ láayliʼ jach u yaabiltmoʼoneʼ (Heb. 6:10).
2. ¿Baʼax ken k-il teʼ xookaʼ?
2 Desde úuchjeakileʼ yaʼab sukuʼunoʼob tsʼoʼok u beetkoʼob kʼeexoʼob ichil u kuxtaloʼob utiaʼal u xupkubaʼob u meyajtoʼob Jéeoba. Koʼox ilik bix úuchik u beetik jujuntúul sukuʼunoʼob teʼ yáax siglooʼ yéetel bix u beetik jujuntúul sukuʼunoʼob teʼ kʼiinoʼobaʼ, tsʼoʼoleʼ yaan k-ilik xan bix jeʼel k-áantkoʼobeʼ.
SUKUʼUNOʼOB TU XUPUBAʼOB U MEYAJTOʼOB DIOS TEʼ YÁAX SIGLOOʼ
3, 4. 1) ¿Bix úuchik u meyajtik Dios jujuntúul sukuʼunoʼob teʼ yáax siglooʼ? 2) ¿Bix u beetkoʼob utiaʼal u yantaltiʼob taakʼin yéetel uláakʼ baʼaloʼob?
3 Ka tsʼoʼok u yokjaʼ Jesuseʼ tu káajsaj junpʼéel meyaj kun beetil tuláakal yóokʼol kaab: u kʼaʼaytaʼal le maʼalob péektsiloʼ (Luc. 3:21-23; 4: 14, 15, 43). Ka tsʼoʼok u kíimil Jesuseʼ u apostoloʼob seguernaj u beetkoʼob le meyajaʼ (Bax. 5:42; 6:7). Yaan sukuʼunoʼobeʼ tu pʼataj u yotochoʼob utiaʼal u kʼaʼaytikoʼob le maʼalob péektsiloʼ wa u beetik u misioneroiloʼob. Felipeeʼ kʼaʼaytajnaj tiʼ jejeláas tuʼux tiʼ u luʼumil Palestina (Bax. 8:5, 40; 21:8). Pablo xaneʼ kʼaʼaytajnaj tiʼ náanach kaajoʼob (Bax. 13:2-4; 14:26; 2 Cor. 1:19). Uláakʼoʼob, jeʼex Silvano (Silas), Marcos yéetel Lucaseʼ, tu tsʼíibtoʼob le Bibliaoʼ wa tu yáantoʼob le máaxoʼob tsʼíibtoʼ (1 Ped. 5:12). Yaʼab kiikoʼob xan áant le sukuʼunoʼobaʼ (Bax. 18:26; Rom. 16:1, 2). Le Kiliʼich Tsʼíiboʼob ich Griegooʼ yaʼab u tʼaan tiʼ le máaxoʼob tu kʼubaj u yóoloʼob u meyajtoʼob Diosoʼ. Leloʼ ku yeʼesikeʼ Jéeobaeʼ jach u yaabiltmaj yéetel ku kanáantik le máaxoʼob meyajtikoʼ.
4 Baʼaleʼ le sukuʼunoʼob ku xupkubaʼob u meyajtoʼob Dios teʼ yáax siglooʼ, ¿bix tu beetiloʼob utiaʼal u yantaltiʼob taakʼin yéetel uláakʼ baʼaloʼob? Toʼoneʼ k-ojleʼ Pablo yéetel le sukuʼunoʼob láakʼintikoʼ ku meyajoʼob chéen wa jaypʼéel kʼiin. Letiʼobeʼ maʼ tu páaʼtkoʼob kaʼach u tsʼaʼabal tuláakal baʼax kʼaʼabéettiʼob tumen le sukuʼunoʼoboʼ, baʼaleʼ yaʼab u téenel áantaʼaboʼob (1 Cor. 9:11-15). Yaan horaeʼ ku invitartaʼaloʼob janal wa ku yaʼalaʼaltiʼob ka pʼáatkoʼob tu yotoch le sukuʼunoʼoboʼ. Áantaʼaboʼob xan tumen tu túulisil le múuchʼuliloʼ wa tumen jujuntúul sukuʼunoʼob (xok Baʼaxoʼob 16:14, 15 yéetel Filiposiloʼob 4:15-18).
SUKUʼUNOʼOB TÁAN U XUPKUBAʼOB U MEYAJTOʼOB DIOS BEJLAʼEʼ
5. ¿Baʼax tu yaʼalaj juntúul sukuʼun yéetel u yatan ikil u xupkubaʼob u meyajtoʼob Dios?
5 Bejlaʼa xaneʼ yaʼab sukuʼunoʼob ku xupkubaʼob u meyajtoʼob Jéeoba (ilawil le cuadro « Sukuʼunoʼob ku xupkubaʼob u meyajtoʼob Dios»). ¿Bix u yuʼubikubaʼob yoʼolal lelaʼ? Maʼalob ka a kʼáat a wuʼuy tiʼob. Jach yaan u líiʼsik a wóol le baʼax ken u yaʼaloʼoboʼ. Koʼox ilik baʼax ku yaʼalik juntúul sukuʼun tsʼoʼok u beetik u precursor regularil, u precursor especialil, u misioneroil yéetel bejlaʼeʼ táan u beetik u betelitail táanxel luʼumil. Letiʼeʼ ku yaʼalik: «In káajsik in xupkinba utiaʼal in maas meyajtik Dioseʼ junpʼéel tiʼ le baʼaxoʼob maas maʼalob tsʼoʼok in chʼaʼtuklik in beetkoʼ. Ka tu tsʼáaten 18 jaʼaboʼobeʼ, maʼ in wojel wa yaan u seguer in xookiʼ, in meyaj bul semana wa in beetik in precursoril. Istikyaj úuchik in chʼaʼtuklik baʼax ken in beete. Baʼaleʼ tsʼoʼok in wilkeʼ Jéeobaeʼ maʼatech u tuʼubsik le baʼaxoʼob k-beetik utiaʼal k-xupikba k-meyajtoʼ. Le baʼaxoʼob tsʼoʼok u yáantken Jéeoba in kanoʼ, tsʼoʼok u meyajten tak tiʼ baʼaxoʼob maʼ in tukultmaj kaʼachiʼ. Lelaʼ junpuliʼ maʼ tun béeytal in beetik kaʼach wa ka xiʼiken tu paach le baʼaxoʼob ku tsʼáaik le yóokʼol kaabaʼ». U yatan le sukuʼunaʼ ku yaʼalik: «Cada junpʼéel tiʼ le jejeláas bix tsʼoʼok in meyajtik Jéeobaoʼ tsʼoʼok u kaʼansikten yaʼab baʼaloʼob. Yaʼab u téenel tsʼoʼok k-ilik bix u nuʼuktikoʼon yéetel u kanáantkoʼon Jéeoba. ¡Bukaʼaj baʼaloʼob tsʼoʼok k-peʼertik kaʼach wa ka pʼáatkoʼon k-méekʼ k-kʼabeʼ! Sáamsamal in tsʼáaik nib óolal tiʼ Jéeoba ikil u chaʼik k-xupikba k-meyajte». ¿A kʼáat wa a wuʼuyaba jeʼex le sukuʼunoʼobaʼ?
6. ¿Baʼax maʼ unaj u tuʼubultoʼoniʼ?
6 U jaajileʼ maʼ tuláakal ku páajtal u xupkuba u maas meyajt Diosiʼ. ¿Kux túun teech? Maʼ xaaneʼ yoʼolal baʼaxoʼob ka aktáantikeʼ maʼ tu páajtal a beetik beoraaʼ. Baʼaleʼ maʼ u tuʼubultecheʼ Jéeobaeʼ u chʼaʼamaj en cuenta tuláakal baʼax ka beetik utiaʼal a meyajtik. Apóstol Pabloeʼ tu chʼaʼchiʼitaj le sukuʼunoʼob yanoʼob tu múuchʼulil Colosasoʼ yaneʼ tu yaʼalaj tak bix u kʼaabaʼob, lelaʼ ku yeʼesikeʼ Jéeobaeʼ u chʼaʼamoʼob en cuentail (xok Filemón 1-3). Pablo yéetel Jéeobaeʼ nojoch baʼal u yilkoʼob le meyaj táan u beetkoʼob kaʼachoʼ. Jéeoba, k-Taata yaan teʼ kaʼanoʼ, nojoch baʼal u yilik le meyaj ka beetkoʼ. Baʼaleʼ ¿bix jeʼel k-áantik le sukuʼunoʼob táan u xupkubaʼob u meyajtoʼob Diosoʼ?
¿BIX JEʼEL A WÁANTIK LE PRECURSOROʼOBOʼ?
7, 8. 1) ¿Baʼax ku beetik le precursoroʼoboʼ? 2) ¿Bix jeʼel k-áantik le precursoroʼoboʼ?
7 Jeʼex le máaxoʼob tu tsʼáaj u yóoloʼob kʼaʼaytaj teʼ yáax siglooʼ, le precursoroʼoboʼ jach ku yáantajoʼob teʼ múuchʼuliloʼ. Yaʼab tiʼ letiʼobeʼ setenta horaʼob ku kʼaʼaytajoʼob cada mes. ¿Bix jeʼel k-áantkoʼobeʼ?
8 Shari, juntúul precursoraeʼ tu yaʼalaj: «Tumen sáamsamal k-jóokʼol kʼaʼaytajeʼ, jeʼel u tuklaʼal mix baʼal k-muʼyajtikeʼ. Baʼaleʼ ku kʼaʼabéettal u líiʼsaʼal k-óol» (Rom. 1:11, 12). Uláakʼ kiik máan xáanchaj táan u beetik u precursoraileʼ, ku yaʼalik yoʼolal le precursoroʼob yanoʼob tu múuchʼuliloʼ: «Yaʼab u meyajoʼob, maʼatech u jeʼeleloʼob. Ken aʼalaʼak u bisaʼaloʼob teʼ territorio kʼaʼaytaj, ken invitartaʼakoʼob janal, ken siʼibik u tojol u gasonilaʼob wa ken áantaʼakoʼob yéetel uláakʼ baʼaxoʼob kʼaʼabéettiʼobeʼ, jach ku tsʼáaikoʼob u diosboʼotikil. Wa k-beetik beyaʼ k-eʼesik k-tuukul tu yoʼolaloʼob».
9, 10. ¿Baʼax tsʼoʼok u beetik jujuntúul sukuʼunoʼob utiaʼal yáantkoʼob le precursoroʼob yanoʼob tu múuchʼuliloʼoboʼ?
9 Uláakʼ bix jeʼel k-áantkoʼobeʼ letiʼe ka k-láakʼintoʼob teʼ kʼaʼaytajoʼ. Bobbi, juntúul precursoraeʼ ku yaʼalik: «Jach ku kʼaʼabéettal k-áantaʼal ich semana». Uláakʼ precursora yaan tu múuchʼulileʼ tu yaʼalaj xan: «Istikyaj u yantal máax láakʼintikoʼon ken jóokʼkoʼon kʼaʼaytaj de tarde». Juntúul kiik ku meyaj tu Betelil Brooklyneʼ, ku tsikbaltik bix u beetik u precursorail kaʼachi: «Kʼajaʼanteneʼ juntúul kiik yaan u cocheeʼ ku yaʼalikten: ‹Wa minaʼan máax yéetel a jóokʼol kʼaʼaytajeʼ tʼaneniʼ, jeʼel in láakʼintikecheʼ›. ¡Letiʼe kiik áanten utiaʼal maʼ in pʼatik in precursoradooʼ!». Koʼox ilik xan baʼax tu yaʼalaj Shari: «Ken tsʼoʼokok le kʼaʼaytajoʼ, le precursoroʼob maʼ tsʼokaʼan u beeloʼoboʼ ku pʼáatloʼob tu juunaloʼob. ¿Baʼaxten maʼ ta invitartikoʼob utiaʼal ka u láakʼintechoʼob teʼ adoración ich familiaoʼ? Wa ka invitarkoʼob xan táakpajal tiʼ uláakʼ baʼaloʼob ka beetkeʼ yaan u kiʼimaktal u yóoloʼob».
10 Juntúul kiik óoliʼ cincuenta jaʼaboʼob joʼopʼok u xupkuba u meyajt Dioseʼ, ku kʼaʼajsik bix u beetik u precursorail kaʼach yéetel uláakʼ kiikoʼob maʼ tsʼokaʼan u beeloʼobiʼ: «Le ancianoʼoboʼ ku xíimbaltikoʼob kaʼach le precursoroʼob cada dos mesesoʼ. Ku kʼáatkoʼob wa toj u yóoloʼob, bix u bintiʼob tu meyajoʼob bey xan wa yaan uláakʼ baʼax chiʼichnakkúuntikoʼob. Jach ku yilik u yáantajoʼob. Ku taal u xíimbaltoʼonoʼob teʼ tuʼux kajaʼanoʼon utiaʼal u yilkoʼob wa kʼaʼabéettoʼon áantajoʼ». Maʼ xaaneʼ lelaʼ ku kʼaʼajsiktoʼon bukaʼaj kiʼimakchajik u yóol Pablo úuchik u yáantaʼal tumen juntúul sukuʼun yaan Éfeso. Letiʼeʼ tu yilaj u yáantik Pablo kex kʼaʼabéet xan u tsʼáaik baʼax kʼaʼabéet tiʼ u familia (2 Tim. 1:18).
11. ¿Baʼax ku beetik le precursor especialoʼoboʼ?
11 Tiʼ jujunpʼéel múuchʼuliloʼobeʼ yaan precursor especialoʼobiʼ. Yaʼab tiʼ le sukuʼunoʼobaʼ ku kʼubikoʼob ciento treinta horaʼob cada mes teʼ kʼaʼaytajoʼ, tsʼoʼoleʼ yaʼab bix u láakʼ u yáantajoʼob teʼ múuchʼuliloʼ. Le oʼolaleʼ óoliʼ minaʼan tiempo utiaʼal meyajoʼob ka u náajaltoʼob taakʼin. Utiaʼal u kʼubik u yóoloʼob kʼaʼaytajeʼ, u najil Beteleʼ cada meseʼ ku yáantkoʼob yéetel junpʼíit taakʼin.
12. Le ancianoʼob yéetel u maasil sukuʼunoʼoboʼ, ¿bix jeʼel u yáantkoʼob le precursor especialoʼoboʼ?
12 ¿Bix jeʼel k-áantkoʼobeʼ? Juntúul anciano ku meyaj Betel suuk u tsikbal tu yéeteloʼobeʼ, ku yaʼalik: «Maʼalob ka tsikbalnak le ancianoʼob yéetel le precursor especialoʼoboʼ, beyoʼ jeʼel u yojéeltikoʼob baʼaxoʼob kʼaʼabéettiʼobeʼ yéetel bix jeʼel u yáantkoʼobeʼ. Jujuntúul sukuʼunoʼobeʼ ku tuklikoʼobeʼ tumen ku yáantaʼaloʼob yéetel junpʼíit taakʼineʼ, maʼ kʼaʼabéet mix baʼal tiʼobiʼ. Baʼaleʼ yaʼab bix jeʼel u yáantaʼaloʼobeʼ». Jeʼex le precursor regularoʼoboʼ, le precursor especialoʼoboʼ ku tsʼáaikoʼob u diosboʼotikil ikil u láakʼintaʼaloʼob teʼ kʼaʼaytaj ken kʼaʼabéetchajkoʼ. Techeʼ, ¿jeʼel wa u páajtal a láakʼintikoʼobeʼ?
¿BIX JEʼEL A WÁANTIK LE SUPERINTENDENTE TIʼ CIRCUITOOʼ?
13, 14. 1) ¿Baʼaxten unaj k-áantik le superintendenteʼob tiʼ circuito yéetel u yatanoʼoboʼ? 2) ¿Bix jeʼel u páajtal a wáantkoʼobeʼ?
13 Le superintendenteʼob tiʼ circuito yéetel u yatanoʼoboʼ kex muʼukʼaʼan u fejoʼobeʼ láayliʼ kʼaʼabéet u líiʼsaʼal u yóoloʼobeʼ. Tsʼoʼoleʼ yaan horaeʼ kʼaʼabéet u láakʼintaʼaloʼob teʼ kʼaʼaytajoʼ. Letiʼobeʼ uts tu tʼaan u yantaloʼob yéetel le sukuʼunoʼob utiaʼal u náaysik u yóoloʼoboʼ. Yaan kʼiineʼ ku kʼojaʼantaloʼob yéetel ku kʼaʼabéettal u ingresartaʼaloʼob hospital. ¿Máasaʼ maʼalob ka xiʼikoʼon k-xíimbaltoʼob utiaʼal k-eʼesik k-tuukul tu yoʼolaloʼob? Tuukulnakoʼon tiʼ Lucas, «le doctor jach yaabiltaʼanoʼ», letiʼeʼ tu kanáantaj yéetel yaabilaj le apóstol Pablo bey xan le máaxoʼob láakʼintoʼ (Col. 4:14; Bax. 20:5–21:18).
14 Le superintendenteʼob yéetel u yatanoʼoboʼ kʼaʼabéet u yantaltiʼob maʼalob amigoʼob. Juntúul superintendenteeʼ tu yaʼalaj: «In amigoʼobeʼ bey u yojloʼob jach baʼax kʼiin kʼaʼabéet u líiʼsaʼal in wóoleʼ. Tsʼoʼoleʼ yéetel yaabilaj ku beetkoʼobten kʼáatchiʼob, leloʼ ku yáantken in waʼal bix in wuʼuyikinba. Tak chéen ka u chʼenxikintoʼob baʼax kin waʼalikeʼ, kin wuʼuyikinba maʼalobil». Jeʼex k-ilkoʼ ken k-áant le superintendenteʼoboʼ jach ku tsʼáaikoʼob u diosboʼotikil.
¿BIX JEʼEL A WÁANTIK LE BETELITAʼOBOʼ?
15, 16. 1) ¿Baʼax ku beetik le betelitaʼob yéetel le sukuʼunoʼob yanoʼob tu Najil Asambleaʼoboʼ? 2) ¿Bix jeʼel k-áantik le sukuʼunoʼobaʼ?
15 Tiʼ tuláakal yóokʼol kaabeʼ yaan sukuʼunoʼob ku meyajoʼob tu najil Betel wa tu Najiloʼob Asamblea utiaʼal u maas kʼaʼaytaʼal le Reinooʼ. Wa t-múuchʼulil wa teʼ circuito tuʼux yanoʼon yaan betelitaʼobeʼ, ¿bix jeʼel u páajtal k-áantkoʼobeʼ?
16 Le sukuʼunoʼobaʼ ken kʼuchukoʼob tu najil Beteleʼ maʼ xaaneʼ ku tuklik u láakʼtsiloʼob yéetel u amigoʼob tu pʼatoʼoboʼ. Le oʼolaleʼ jach ku tsʼáaikoʼob u diosboʼotikil u yáantaʼaloʼob yéetel u yeʼesaʼal yaabilaj tiʼob tumen uláakʼ betelitaʼob yéetel le sukuʼunoʼob yanoʼob teʼ múuchʼulil tuʼux ku binoʼoboʼ (Mar. 10:29, 30). Letiʼobeʼ tsʼaʼan u yorail u meyajoʼob, baʼaleʼ ku binoʼob muchʼtáambal yéetel ku kʼaʼaytajoʼob cada semana. Baʼaleʼ yaan horaeʼ ku kʼaʼabéettal u pʼáatloʼob meyaj maas yaʼab tiempo. Le sukuʼunoʼob yanoʼob teʼ múuchʼulil tuʼux ku binoʼoboʼ kʼaʼabéet u naʼatkoʼob lelaʼ, u yeʼeskoʼob nojoch baʼal u yilkoʼob le meyaj ku beetkoʼoboʼ yéetel u yeʼeskoʼob yaabilaj tiʼob (xok 1 Tesalonicailoʼob 2:9).
BIX JEʼEL K-ÁANTIK LE SUKUʼUNOʼOB KU BINOʼOB TÁANXEL LUʼUMILOʼ
17, 18. ¿Baʼaxoʼob ku beetik le sukuʼunoʼob ku binoʼob táanxel luʼumiloʼ?
17 Jujuntúul sukuʼunoʼob táan u xupkubaʼob u meyajtoʼob Dioseʼ, ku binoʼob áantaj táanxel luʼumil. Maʼ xaaneʼ yaan u kʼaʼabéettal u kankoʼob yaanal tʼaan, u jaantkoʼob baʼaloʼob maʼ suuk tiʼobiʼ yéetel u suuktal tiʼob le bix u kuxtal le sukuʼunoʼob teʼ tuʼux ku binoʼoboʼ. ¿Baʼaxten ku binoʼob táanxel luʼumil? ¿Baʼax meyajil ku beetkoʼobiʼ?
18 Jujuntúul tiʼ le sukuʼunoʼobaʼ misioneroʼob le oʼolal maases chéen kʼaʼaytaj ku beetkoʼob. Letiʼobeʼ yaʼab baʼaloʼob kaʼansaʼantiʼob, le oʼolal le sukuʼunoʼob yanoʼob teʼ múuchʼulil tuʼux ku binoʼoboʼ jach ku kaanbaloʼob tiʼ letiʼob. U najil Beteleʼ ku kaxtik tuʼux u kajtaloʼob yéetel ku yáantkoʼob xan yéetel junpʼíit taakʼin utiaʼal u manikoʼob le baʼaxoʼob maas kʼaʼabéettiʼoboʼ. Yaan xan uláakʼ sukuʼunoʼobeʼ ku binoʼob áantaj tsʼeʼetsʼek tiempo Betel, utiaʼal u beetaʼal najiloʼob Betel, Oficinaʼob tiʼ Traducción, u Najiloʼob Asamblea wa u Najiloʼob Reino. Le najil Betel yaan teʼ tuʼux ku binoʼob wa le múuchʼulil tuʼux kun antaloʼoboʼ, letiʼob tsʼáaik baʼax u jaantoʼob, tuʼux kun pʼáatloʼob wa uláakʼ baʼaloʼob. Jeʼex le betelitaʼoboʼ, letiʼobeʼ ku binoʼob muchʼtáambal yéetel ku jóokʼloʼob kʼaʼaytaj teʼ múuchʼulil tuʼux ku túuxtaʼaloʼoboʼ, lelaʼ ku kiʼimakkúuntik u yóol le sukuʼunoʼoboʼ.
19. ¿Bix jeʼel u páajtal k-áantik le sukuʼunoʼob táanxel luʼumiloʼob taaljaʼanoʼob áantaj teʼ tuʼux kajaʼanoʼonoʼ?
19 ¿Bix jeʼel u páajtal k-áantik le sukuʼunoʼobaʼ? Maʼ xaaneʼ maʼatech u jaantkoʼob le baʼaxoʼob suuk k-jaantikoʼ. Lelaʼ maʼalob ka k-chʼaʼ en cuenta ken k-invitartoʼob janal. Maʼalob ka k-kʼáattiʼob wa u kʼáat u túuntoʼob junpʼéel tiʼ le janaloʼob suuk k-jaantikoʼ bey xan wa yaan baʼax maʼ kiʼ u yuʼubikoʼobiʼ. Tsʼoʼoleʼ kʼaʼabéet k-eʼesik paciencia tiʼob le táan u suuktal tiʼob le bix kuxlikoʼonoʼ bey xan le táan u kankoʼob le tʼaan k-ojloʼ. Maʼ xaaneʼ yaan u chan xáantal ken joʼopʼok u naʼatkoʼob baʼax k-aʼalik, baʼaleʼ jeʼel u páajtal k-áantkoʼob utiaʼal u kanoʼob u yaʼaloʼob tubeel le tʼaanoʼoboʼ. Kʼaʼajaktoʼoneʼ letiʼobeʼ taak u kaanbaloʼob.
20. ¿Bix jeʼel k-áantik le sukuʼunoʼob ku xupkubaʼob u meyajtoʼob Dios bey xan u taataʼoboʼ?
20 Le máaxoʼob táan u xupkubaʼob u meyajtoʼob Diosoʼ maʼ xaaneʼ yaan u kʼuchul u kʼiinil u tuklikoʼob bix ken u kanáantil u taataʼob tsʼoʼok u chʼíijloʼoboʼ. Wa j-Jaajkunaj le taatatsiloʼobaʼ maʼ xaaneʼ maʼ u kʼáat ka xuʼuluk u meyajtaʼal Jéeoba tumen u paalaloʼob teʼ tuʼux yanoʼoboʼ (3 Juan 4). U jaajileʼ le sukuʼunoʼobaʼ yaan u yilik u kanáantkoʼob yéetel u xíimbaltikoʼob u taataʼob. Baʼaleʼ le sukuʼunoʼob kajaʼanoʼob naatsʼ tiʼ u taataʼob le sukuʼunoʼobaʼ, maʼalob ka u yil u tsʼáaikoʼob le áantaj kʼaʼabéettiʼoboʼ. Unaj k-kʼaʼajsikeʼ le sukuʼunoʼob táan u xupkubaʼob u meyajtoʼob Diosoʼ táan u beetkoʼob junpʼéel nojoch meyaj: táan u yáantajoʼob utiaʼal u kʼaʼaytaʼal le maʼalob péektsil tiʼ tuláakal yóokʼol kaaboʼ (Mat. 28:19, 20). Teech yéetel le múuchʼulil tuʼux yanechoʼ, ¿jeʼel wa u páajtal a wáantkeʼex le sukuʼunoʼob utiaʼal u kanáantkoʼob u taataʼob tsʼoʼok u chʼíijloʼob wa kʼojaʼanoʼoboʼ?
21. ¿Bix u yuʼubikuba le sukuʼunoʼob ken áantaʼakoʼob yéetel ken líiʼsaʼak u yóoloʼoboʼ?
21 Máaxoʼob ku chʼaʼtuklik u xupkubaʼob u meyajtoʼob Dioseʼ maʼatech u beetkoʼob yoʼolal taakʼin, baʼaxeʼ ku beetkoʼob tumen u yaabiltmoʼob Jéeoba bey xan u yéet wíinikiloʼob. Letiʼobeʼ ku tsʼáaikoʼob u diosboʼotikil yoʼolal tuláakal le áantaj ku tsʼaʼabaltiʼoboʼ. Juntúul kiik ku yáantaj táanxel luʼumileʼ, ku yaʼalik: «Tak chéen ka tsʼaʼabaktoʼon u diosboʼotikil tiʼ junpʼéel chan juʼun yoʼolal le baʼaxoʼob k-beetkoʼ, kiʼimak óol tumen k-ilik yaabiltaʼanoʼon yéetel kʼaʼanaʼan u yilaʼal le meyaj k-beetkoʼ».
22. Techeʼ, ¿bix a wilik le sukuʼunoʼob ku xupkubaʼob u meyajtoʼob Diosoʼ?
22 Le sukuʼunoʼob ku xupkubaʼob u meyajtoʼob Diosoʼ tsʼoʼok u yéeyikoʼob ichil u kuxtaloʼob le baʼax maas maʼaloboʼ. Lelaʼ junpʼéel meyaj táaj jatsʼuts, tumen le baʼaxoʼob ku kaʼansaʼaltiʼoboʼ yaan u meyajtiʼob yáanal u Reino Dios. Ken kʼuchuk le kʼiin jeʼeloʼ tuláakloʼon ken k-xupba sáamsamal k-meyajt Dios yéetel kiʼimak óolal. Le oʼolaleʼ koʼoneʼex áantik le sukuʼunoʼobaʼ. Koʼoneʼex eʼesik ‹k-kʼaʼajsik le baʼaxoʼob ku beetkoʼob yoʼolal u fejoʼob yéetel yoʼolal u yaabilajoʼoboʼ› (1 Tes. 1:3).
