1, 2. 1) Tu káajbaleʼ, ¿bix kaʼach u kuxtal Adán yéetel Eva? 2) ¿Baʼax kʼáatchiʼiloʼob kun núukbil teʼ xookaʼ?

KA BEETAʼAB Adán yéetel Evaeʼ, minaʼan kaʼach u enemigoʼob, minaʼan u kʼebanoʼob yéetel tiʼ kajaʼanoʼob tiʼ junpʼéel paraísoeʼ. Letiʼob kaʼacheʼ u paalaloʼob Dios yéetel jach maʼalob u biskubaʼob tu yéetel (Gén. 2:7-9; Luc. 3:38). Adán yéetel Evaeʼ tsʼaʼab u beetoʼob junpʼéel meyaj jach kʼaʼanaʼan (xok Génesis 1:28). ¿Bukaʼaj túun tiempo unaj u kuxtaloʼob utiaʼal u tsʼoʼokbeskoʼob le meyaj tsʼaʼabtiʼoboʼ? Utiaʼal u ‹chupikoʼob le yóokʼol kaab yéetel u méekʼtáantikoʼoboʼ› maʼ kʼaʼanaʼan kaʼach ka kuxlakoʼob utiaʼal mantatsʼiʼ, baʼaleʼ kʼaʼanaʼan u kuxtaloʼob kaʼach utiaʼal mantatsʼ utiaʼal u kanáantkoʼob «tuláakal le baʼalcheʼob» yaan way yóokʼol kaaboʼ. Adán yéetel Evaeʼ jeʼel kaʼach u páajtal u beetkoʼob utiaʼal mantatsʼ le meyajaʼ.

² Wa beyoʼ, ¿baʼaxten túun jelaʼan bix kuxlikoʼon bejlaʼeʼ? ¿Baʼaxten yaʼab baʼaxoʼob maʼ tu chaʼikoʼob u yantaltoʼon kiʼimak óolal? ¿Bix úuchik u yantal le kíimil, le maas nojoch enemigooʼ? ¿Baʼax ken u beet Dios utiaʼal u xuʼulskoʼob? Teʼ xookaʼ yaan k-ilik bix u núukik le Biblia le kʼáatchiʼobaʼ.

3, 4. 1) ¿Baʼax tu yaʼalaj Jéeoba tiʼ Adán yéetel Eva maʼ unaj u beetkoʼobiʼ? 2) ¿Baʼaxten unaj kaʼach u yuʼubikoʼob u tʼaan Dios?

³ Kex beetaʼab Adán yéetel Eva utiaʼal u kuxtaloʼob utiaʼal mantatsʼeʼ, maʼ u kʼáat u yaʼal wa maʼ tu páajtal u kíimloʼob kaʼachiʼ. Utiaʼal ka seguernak u kuxtaloʼobeʼ kʼaʼabéet u chʼaʼik u yiikʼoʼob, u jaanloʼob, u yukʼikoʼob jaʼ yéetel u weenloʼob. Baʼaleʼ baʼax maas kʼaʼanaʼan utiaʼal u kuxtaloʼobeʼ, letiʼe u biskubaʼob yéetel Jéeobaoʼ tumen letiʼ tsʼáa u kuxtaloʼob (Deu. 8:3). Utiaʼal lelaʼ kʼaʼabéet u chaʼik u nuʼuktaʼaloʼob tumen Dios. Tak táanil tiʼ u beetik Evaeʼ, Jéeobaeʼ tu yaʼalaj tiʼ Adán: «Ku páajtal a jaantik u yich tuláakal u cheʼiloʼob le kúuchilaʼ, chéen maʼ a jaantik u yich u cheʼil u kʼaj óolalil uts yéetel kʼaas. Tumen u kʼiinil bíin a jaanteʼ [yaan] a kíimil» (Gén. 2:16, 17).

⁴ «U cheʼil u kʼaj óolalil uts yéetel kʼaa[seʼ]» ku chíikbesik le derecho yaan tiʼ Dios utiaʼal u yaʼalik baʼax maʼalob yéetel baʼax kʼaasoʼ. Adaneʼ ku naʼatik kaʼach baʼax maʼalob yéetel baʼax kʼaas tumen beetaʼab jeʼel bix Dioseʼ, tsʼoʼoleʼ yaan u conciencia. Baʼaleʼ le cheʼoʼ ku kʼaʼajsik tiʼ Adán yéetel Evaeʼ mantatsʼ kʼaʼabéettiʼob u nuʼuktaj Jéeoba. Wa ka u jaantoʼob u yich le cheʼoʼ bey ka u yaʼaloʼob tiʼ le Máax beetmiloʼoboʼ: «Maʼ kʼaʼabéettoʼon a nuʼuktajiʼ». Wa ka u nuʼuktubaʼob tu juunaloʼobeʼ yaan u bin kʼaasil tiʼob bey xan tiʼ u paalaloʼob. Tsʼoʼoleʼ yaan u kíimloʼob jeʼex aʼalaʼabiktiʼob tumen Jéeobaoʼ.

5. ¿Baʼaxten maʼ uʼuyaʼab u tʼaan Jéeoba tumen Adán yéetel Evaiʼ?

⁵ Adaneʼ tu yaʼalaj tiʼ Eva le baʼax aʼalaʼabtiʼ tumen Diosoʼ. Evaeʼ pʼáat tu pool le baʼax aʼalaʼab tumen Diosoʼ, le oʼolal ka tu chʼaʼchiʼiteʼ óoliʼ de memoriail tu yaʼalil (Gén. 3:1-3). Letiʼeʼ tiʼ juntúul kaan tu yaʼalaj. Baʼaleʼ u jaajileʼ Satanás beet u yilaʼal bey táan u tʼaan le kaanoʼ. Satanaseʼ juntúul u ángel Dios kaʼachi, baʼaleʼ tu tsʼíiboltaj u yantal páajtalil tiʼ yéetel u nuʼuktikuba tu juunal (ket yéetel Santiago 1:14, 15). Utiaʼal u béeytal baʼax u kʼáateʼ, tu yaʼaleʼ Dioseʼ chéen táan u tuus. Tu yaʼalaj tiʼ Evaeʼ maʼ kun kíimil wa maʼ tu beetik baʼax ku yaʼalik Dios. Hasta tu yaʼalajtiʼeʼ yaan u pʼáatal jeʼex Dioseʼ (Gén. 3:4, 5). Evaeʼ tu creertaj baʼax tu yaʼaleʼ ka tu jaantaj u yich le cheʼoʼ, beyoʼ tu yeʼeseʼ u kʼáat u nuʼuktuba tu juunal. Tsʼoʼoleʼ tu yoksaj xan tu pool Adán utiaʼal ka u jaante (Gén. 3:6, 17). Bey úuchik u tuʼusul tumen Satanasoʼ (xok 1 Timoteo 2:14). Adaneʼ kex u yojel maʼ maʼalob ka u jaant u yich le cheʼoʼ, tu yuʼubaj u tʼaan u yatan. Le kaanoʼ bey maʼ kʼasaʼan u yilaʼal kaʼacheʼ, baʼaleʼ juntúul máax kʼasaʼan péeks u beet lelaʼ. Le enemigoaʼ u yojel yaan u bin kʼaasiltiʼob wa ku creertoʼob baʼax ku yaʼalik.

6, 7. Jéeobaeʼ ¿bix úuchik u juzgartik Adán yéetel Eva?

⁶ Adán yéetel Evaeʼ tuukulnajoʼob chéen tiʼ u yutsiloʼob, le oʼolal tu tsʼáajubaʼob tu contra Jéeoba, le máax tsʼáa u kuxtaloʼob yéetel tuláakal baʼax yaantiʼoboʼ. Dioseʼ u láaj ojel kaʼach baʼax tsʼoʼok u yúuchul (1 Cró. 28:9; xok Proverbios 15:3). Jéeobaeʼ tu chaʼaj tiʼ Adán, Eva yéetel Satanás u yeʼeskoʼob wa jach tu jaajil u yaabiltmoʼob. Tumen u paalal beet baʼax kʼaaseʼ jach yaachaj wal tu yóol baʼax tu beetoʼobeʼ (ket yéetel Génesis 6:6). Baʼaleʼ tumen Jéeoba juntúul Juez justoeʼ, anchaj u tsʼoʼokbesik le leyoʼob u tsʼaamoʼ ka túun tu castigartoʼob.

⁷ Dioseʼ tsʼokaʼaniliʼ u yaʼalik tiʼ Adán lelaʼ: «U kʼiinil bíin a jaant [u yich u cheʼil u kʼaj óolalil uts yéetel kʼaaseʼ yaan a] kíimil». Maʼ xaaneʼ Adaneʼ tu tukleʼ le «kʼiin» aʼalaʼabtiʼoʼ junpʼéel kʼiin de 24 horaʼob, le oʼolal wal tu tukleʼ yaan u kíimil chéen pʼel u tsʼoʼokol le kʼiin jeʼeloʼ. Baʼaleʼ le «táan u yustaj u yiikʼal oknaj kʼiin[oʼ]» kaʼa tʼaʼanoʼob tumen Jéeoba (Gén. 3:8). Tumen Jéeoba juntúul  maʼalob Juezeʼ, yáax tu yuʼubaj le baʼax yaan u yaʼal le máaxoʼob kʼebanchajoʼob utiaʼal u defenderkubaʼoboʼ (Gén. 3:9-13). Ka tsʼoʼokeʼ tu yaʼalajtiʼob yaan u kíimloʼob (Gén. 3:14-19). Wa ka kíimsaʼakoʼob kaʼach tumen Jéeoba teʼ súutukiloʼ bejlaʼa maʼ kun béeytal le baʼax u tukulmaj utiaʼal le wíinikoʼoboʼ (Isa. 55:11). Bey túunoʼ kex teʼ kʼiin káaj u muʼyajoʼob yoʼolal le kʼebanoʼ, Jéeobaeʼ tu chaʼaj u kuxtal Adán yéetel Eva utiaʼal u yantal u paalaloʼob. U paalaloʼob túuneʼ yaan u páajtal u yilkoʼob le baʼaloʼob maʼalobtak ken u beet Jéeobaoʼ. Baʼaleʼ tu táan Jéeobaeʼ kíimoʼob desde teʼ kʼiin ka kʼebanchajoʼoboʼ. Utiaʼal Jéeobaeʼ mil jaʼaboʼobeʼ bey jeʼex junpʼéel kʼiineʼ, le oʼolal jeʼel u páajtal k-aʼalikeʼ kíimoʼob teʼ «kʼiin» ka kʼebanchajoʼoboʼ (2 Ped. 3:8).

8, 9. Úuchik u kʼebantal Adaneʼ, ¿baʼax úuch tiʼ u paalal? (Ilawil le dibujo yaan tu káajbal le xookaʼ.)

⁸ ¿Tu taasaj wa muʼyajil tiʼ u paalal Adán yéetel Eva le baʼax tu beetoʼoboʼ? Tu taasaj. Romailoʼob 5:12, ku yaʼalik: «Tu yoʼolal chéen juntúul máak ook le kʼeban way yóokʼol kaab, yéetel tu yoʼolal le kʼeban ook le kíimiloʼ, bey xan úuchik u máan le kíimil tiʼ tuláakal máakoʼ tumen tuláakloʼob kaʼach tsʼoʼok u kʼebantaloʼob». Le máax yáax kíimoʼ Abel, juntúul máax chúukaʼan kaʼach u yóol tiʼ Dios (Gén. 4:8). Tsʼoʼoleʼ tak u maasil u paalaloʼob yéetel u yáabiloʼob Adán anchajoʼ chʼíijoʼob yéetel kíimoʼob. ¿Baʼaxten túun tak letiʼob kʼebanchajoʼob? Apóstol Pabloeʼ ku núukik le kʼáatchiʼaʼ: «Yaʼab máakoʼob aʼalaʼab yaan u kʼebanoʼob tu yoʼolal u x-maʼ uʼuyajtʼaanil [...] juntúul máak» (Rom. 5:19). Tu yoʼolal Adán yéetel Evaeʼ tuláakal wíinik yaan u kʼeban yéetel ku kíimil. Le kʼeban yéetel le kíimiloʼ bey kaʼatúul enemigoʼob mix máak jeʼel u páajtal u púutsʼul tiʼobeʼ. Kex maʼ k-jach ojel bix úuchik u máan le kʼeban yéetel le kíimil tu wíinklil u paalal Adanoʼ, ku páajtal k-ilik le muʼyajil ku taaskoʼ.

⁹ Le Bibliaoʼ ku ketik le kʼeban yéetel le kíimil yéetel junpʼéel «[pixib] balmail tuláakal le kaajoʼoboʼ» bey xan «tuláakal le múuchʼ kaajoʼoboʼ» (Isa. 25:7). Le ‹pixibaʼ› jach aal yéetel táan u kupik u yiikʼ tuláakal wíinik. Le Bibliaoʼ ku yaʼalikeʼ «tu yoʼolal [Adaneʼ] tuláakal máak táan u kíimil» (1 Cor. 15:22). Le oʼolal Pabloeʼ tu beetaj le kʼáatchiʼaʼ: «¿Máax kun jáalkʼabtiken tiʼ le wíinklil táan u bisken tiʼ le kíimiloʼ?» (Rom. 7:24). ¿Yaan wa máax jeʼel u páajtal u jáalkʼabtik Pabloeʼ? *

10. 1) ¿Baʼax tekstoiloʼob eʼesik yaan u xuʼulsaʼal le kíimiloʼ? 2) Le tekstoʼoboʼ, ¿baʼax ku kaʼansiktoʼon yoʼolal Jéeoba yéetel u Paal?

¹⁰ Jéeobaeʼ jeʼel u páajtal u jáalkʼabtik kaʼach Pabloeʼ. Isaíaseʼ ka tsʼoʼok u tʼaan tiʼ le ‹pixiboʼ› tu yaʼalaj: «Yuumtsileʼ, bíin u xuʼuls junpuliʼ le kíimiloʼ, bíin u choʼ u jaʼil u yich tuláakal máak» (Isa. 25:8). Jeʼex juntúul taatatsil ku luʼsik yéetel kiʼimak óolal baʼax beetik u muʼyaj u paalal yéetel ku choʼik u jaʼil u yichoʼobeʼ, Jéeobaeʼ yaan u xuʼulsik le kíimil anchaj úuchik u kʼebantal Adanoʼ. Jéeobaeʼ yaan juntúul máax kun áantik u beet lelaʼ: Jesús. Yáax tiʼ Corintoiloʼob 15:22, ku yaʼalik: «Jeʼex tu yoʼolal Adán tuláakal máak táan u kíimileʼ, tu yoʼolal Cristo xaneʼ tiʼ tuláakal máak kun tsʼaabil kuxtal». Pabloeʼ ka tsʼoʼok u kʼáatik máax kun jáalkʼabtik tiʼ le kíimiloʼ, tu yaʼalaj: «¡Gracias tiʼ Dioseʼ, yoʼolal k-Yuumtsil Jesucristo[!]» (Rom. 7:25). Jeʼex túun k-ilkoʼ kex Adán yéetel Eva maʼ tu yuʼuboʼob u tʼaan Jéeobaeʼ, letiʼeʼ maʼ xuʼul u yaabiltik wíinikiʼ. Tsʼoʼoleʼ Jesús, le máax áant u  beet le yáax wíinikoʼoboʼ, maʼ xuʼul xan u yaabiltik wíinikiʼ (Pro. 8:30, 31). Baʼaleʼ Jéeoba yéetel Jesuseʼ, ¿bix ken u jáalkʼabtiloʼob wíinik tiʼ le kʼeban yéetel le kíimiloʼ?

11. ¿Baʼax tu beetaj Jéeoba utiaʼal u yáantik máak?

¹¹ Adaneʼ maʼ tu beetaj baʼax aʼalaʼabtiʼ tumen Jéeobaiʼ le oʼolal kíimi. Yoʼolal le baʼax tu beetaʼ tuláakal máak yaan u kʼeban yéetel ku kíimil (Rom. 5:12, 16). Le Bibliaoʼ ku yaʼalik: «Yoʼolal u kʼeban juntúul máak aʼalaʼab yaan u kʼeban tuláakal máak» (Rom. 5:18). ¿Baʼax jeʼel u páajtal u beetik Jéeoba utiaʼal u yutskíintik le baʼax tsʼoʼok u yúuchloʼ? Le ken u yutskíinteʼ, ¿bix ken u yeʼesil de ke letiʼeʼ juntúul Dios justo? Le baʼax tu yaʼalaj Jesusaʼ ku núukik le kaʼapʼéel kʼáatchiʼoboʼ: «U Paal máakeʼ [...] taal [...] utiaʼal u tsʼáaik u kuxtal bey junpʼéel boʼol utiaʼal u salvartaʼal yaʼab máakoʼobeʼ» (Mat. 20:28). Tumen minaʼan u kʼebaneʼ Jesuseʼ jeʼel u páajtal u boʼotik le bukaʼaj kʼaʼabéet utiaʼal u jáalkʼabtaʼal tuláakal máakoʼ. U kuxtal Jesús tu kʼuboʼ, ¿bix tu yeʼesil Jéeobaeʼ juntúul Dios justo? (1 Tim. 2:5, 6).

12. U kuxtal Jesús tu kʼuboʼ, ¿bix úuchik u yeʼesik de ke Jéeobaeʼ juntúul Dios justo?

¹² Tumen minaʼan u kʼeban Jesuseʼ, jeʼel u páajtal kaʼach u kuxtal jeʼex kuxlajik Adán táanil tiʼ u kʼebantaleʼ. Baʼaleʼ Jéeobaeʼ u tukulmaj kaʼach u chupik le Luʼum yéetel u paalaloʼob Adanoʼ. Jesús túuneʼ tumen u yaabiltmaj u Taata bey xan u paalaloʼob Adaneʼ, tu kʼubaj u kuxtal minaʼan u kʼebanoʼ. Lelaʼ u jeel u kuxtal Adán tu peʼertoʼ. Ka tsʼoʼokeʼ Jéeobaeʼ tu kaʼa kuxkíintaj yéetel junpʼéel kaʼanilbeʼen wíinklil (1 Ped. 3:18). U kuxtal Jesús tu kʼuboʼ ku yeʼesikeʼ Jéeobaeʼ juntúul Dios justo tumen utiaʼal ka u kʼam u paalal Adán tuláakal le baʼax tu peʼertoʼ anchaj u tsʼáaik u kuxtal Jesús, lelaʼ letiʼe boʼol jach kʼaʼabéet kaʼachoʼ. Bey úuchik u jeelintik Jesús u kuxtal Adanoʼ. Pabloeʼ ku yaʼalik: «Bey xan u yaʼalik le Kiliʼich Tsʼíiboʼ: ‹Adán, le yáax wíinikoʼ, suunaj juntúul kuxaʼan máak›. Le u tsʼook Adanoʼ kʼuch u beetuba juntúul kaʼanilbeʼen máak ku tsʼáaik kuxtal» (1 Cor. 15:45).

13. ¿Baʼax ken u beet «u tsʼook Adán» yoʼolal le máaxoʼob tsʼoʼok u kíimloʼoboʼ?

¹³ Maʼ kun xáantaleʼ Jesús, ‹u tsʼook Adanoʼ› yaan u «tsʼáaik kuxtal» tiʼ tuláakal u paalaloʼob Adán. Tumen yaʼab tiʼ letiʼob tsʼoʼok u kíimloʼobeʼ yaan u kaʼa kuxkíintikoʼob utiaʼal ka kuxlakoʼob way Luʼumeʼ (Juan 5:28, 29).

14. ¿Bix kun luʼsbil le kʼeban yaan tiʼ wíinikoʼ?

¹⁴ ¿Bix túun kun luʼsbil le kʼeban yaan tiʼ wíinikoʼ? Jéeobaeʼ tsʼoʼok u tsʼáaik junpʼéel Reino teʼ kaʼan nuʼuktaʼan tumen «u tsʼook Adán» yéetel uláakʼ 144,000 máakoʼob yéeyaʼanoʼob way luʼumeʼ (xok Apocalipsis 5:9, 10). Le 144,000 reyoʼobaʼ yaan u naʼatkoʼob bix juntúul máak yaan u kʼeban tumen letiʼobeʼ j-kʼebanoʼob kaʼachi. Tu yáamil mil jaʼaboʼobeʼ le sukuʼunoʼob yéeyaʼanoʼob bey xan Jesusoʼ yaan u yáantkoʼob u kajnáaliloʼob yóokʼol kaab utiaʼal ka pʼáatak minaʼan u kʼebanoʼoboʼ (Apo. 20:6).

15, 16. 1) ¿Baʼax tiʼ ku tʼaan le Biblia ken u yaʼal «u tsʼook enemigo kun xuʼulsbiloʼ», yéetel baʼax kʼiin ken xuʼulsaʼak? 2) Jeʼex u yaʼalik Yáax tiʼ Corintoiloʼob 15:28, ¿baʼax ken u beet Jesús?

¹⁵ Ken tsʼoʼokok le mil jaʼaboʼoboʼ, le máaxoʼob tu beetoʼob baʼax ku yaʼalik Diosoʼ yaan u pʼáatal minaʼan u kʼebanoʼob yéetel maʼ kun kíimloʼob. Pabloeʼ ku yaʼalik: «Tumen jeʼex tu yoʼolal Adán tuláakal máak táan u kíimileʼ, tu yoʼolal Cristo xaneʼ tiʼ tuláakal máak kun tsʼaabil kuxtal. Baʼaleʼ tu tsoolol kun tsʼaabil kuxtal tiʼ cada juntúul: yáaxeʼ tiʼ Cristo, tsʼoʼoleʼ tiʼ le máaxoʼob u tiaʼaloʼob Cristo tu yáamil le kʼiinoʼob way yanoʼ. Tu tsʼookeʼ tu séebaʼanil ken u kʼub le Reino tiʼ u Dios yéetel u Taataoʼ; lelaʼ yaan u beetik ken tsʼoʼokok u xuʼulsik tiʼ tuláakal gobierno, tiʼ tuláakal autoridad bey xan tiʼ tuláakal páajtalil. Tumen Cristoeʼ yaan u reinar tak ken tsʼaʼabak tuláakal u enemigoʼob tu yáanal u yook tumen Dios.  Le kíimiloʼ letiʼe u tsʼook enemigo kun xuʼulsbiloʼ» (1 Cor. 15:22-26). Jeʼex k-ilkoʼ «u tsʼook enemigo[oʼ]» letiʼe kíimil anchaj yoʼolal Adanoʼ, le enemigoaʼ yaan u xuʼulsaʼal. Le ‹pixib balmail tuláakal wíinikoʼ› mix bikʼin kun kaʼa kʼaʼajsbil (Isa. 25:7, 8).

¹⁶ Le apóstol Pablooʼ ku seguer u yaʼalik: «Ken u kʼub tiʼ Dios tuláakal le baʼaloʼoboʼ, yaan xan u tsʼáaikuba yáanal u páajtalil Dios, le Máax kʼub tuláakal le baʼaloʼob tiʼoʼ, utiaʼal beyoʼ Dioseʼ ka u beetuba tuláakal baʼal utiaʼal tuláakal máak» (1 Cor. 15:28). Ken tsʼoʼokok lelaʼ tsʼokaʼaniliʼ u béeytal tuláakal le baʼax tsʼaʼab u beet Jesús yáanal u Reinooʼ. Yéetel kiʼimak óolal túuneʼ yaan u kaʼa kʼubik tiʼ Jéeoba le páajtalil tsʼaʼantiʼoʼ yéetel yaan xan u kʼubiktiʼ tuláakal le máakoʼob tsʼoʼok u pʼáatal minaʼan u kʼebanoʼoboʼ.

17. ¿Baʼax kun úuchul yéetel Satanás?

¹⁷ ¿Baʼax túun kun úuchul yéetel Satanás, le máax sen beetik u muʼyaj wíinikoʼ? U núukileʼ tiaʼan tiʼ Apocalipsis 20:7 tak 15. Ken tsʼoʼokok le mil jaʼaboʼoboʼ, Satanaseʼ yaan u yilik u kaʼa táabsik le máakoʼob minaʼan u kʼebanoʼoboʼ. Ken tsʼoʼokok túuneʼ letiʼ yéetel tuláakal le máaxoʼob tsaypachtikoʼ yaan u xuʼulsaʼaloʼob. Teʼ Bibliaoʼ le xuʼulsajilaʼ ku yaʼalaʼaltiʼ «kaʼa kíimil» (Apo. 21:8). Tuláakal le máaxoʼob kun kaʼa kíimloʼoboʼ mix bikʼin kun kaʼa kuxkíintbiloʼob lelaʼ u kʼáat u yaʼaleʼ le «kaʼa kíimiloʼ» mix bikʼin kun xuʼulsbil. Baʼaleʼ le máaxoʼob u yaabiltmoʼob yéetel ku meyajtikoʼob Dios yéetel chúukaʼan óolaloʼ, maʼ kun kaʼa kíimloʼob.

18. ¿Bix kun béeytal le meyaj maʼ tu tsʼoʼokbesaj Adanoʼ?

¹⁸ Teʼ kʼiinoʼob jeʼeloʼ tuláakal máak kun pʼáatal minaʼan u kʼeban yéetel yaan u kʼaʼamloʼob tumen Jéeoba utiaʼal u yantaltiʼob kuxtal minaʼan u xuul. ¡Tuláakal le baʼax beetik maʼ u yantal kiʼimak óolaloʼ yaan u xuʼulsaʼal! Le meyaj maʼ tu tsʼoʼokbesaj Adanoʼ yaan u béeychajal. Le Luʼumaʼ yaan u chuʼupul yéetel u paalal Adán, yéetel kiʼimak óolal ken u kanáantoʼob tuláakal u jejeláasil baʼalcheʼoboʼ bey xan le Luʼumaʼ. ¡Jach ku kiʼimaktal k-óol k-ojéeltikeʼ Jéeobaeʼ yaan u xuʼulsik le kíimiloʼ!