GUY HOLLIS PIERCE, juntúul tiʼ le sukuʼunoʼob yaan teʼ Cuerpo Gobernante tiʼ u j-jaajkunajoʼob Jéeobaoʼ xuʼul u meyajtik Dios way Luʼum martes 18 tiʼ marzo tiʼ 2014, le yaan 79 jaʼaboʼob tiʼoʼ. Letiʼeʼ juntúul tiʼ u sukuʼunoʼob Cristo, le oʼolaleʼ kaʼa kuxkíintaʼab utiaʼal u bin kaʼan (Heb. 2:10-12; 1 Ped. 3:18).

Guy Pierceeʼ síij tu kaajil Auburn (California, Estados Unidos) tu kʼiinil 6 tiʼ noviembre tiʼ 1934, yéetel okjaʼanaj tu jaʼabil 1955. Tu jaʼabil 1977, tsʼoʼok u beel yéetel kiik Penny. Letiʼobeʼ seis paalaloʼob tu líiʼsoʼob. Yoʼolal lelaʼ le sukuʼun Pierceoʼ tu yeʼesaj yaabilaj yéetel uláakʼ jatsʼuts modosoʼob jeʼex juntúul taatatsileʼ. Tu jaʼabil 1982, kiik Penny yéetel le sukuʼunoʼ tu beetaj u precursoriloʼob. Tsʼoʼoleʼ tu jaʼabil 1986, káaj u beetik u superintendenteil tiʼ circuito tu luʼumil Estados Unidos. Once jaʼaboʼob tu beetoʼob le meyajaʼ.

Tu jaʼabil 1997, invitartaʼaboʼob meyaj tu betelil Estados Unidos, teʼeloʼ le sukuʼunoʼ meyajnaj tu Departamentoil Servicio. Tu jaʼabil 1998, káaj u yáantik le Comité tiʼ Personal tiʼ le Cuerpo Gobernanteoʼ. Tsʼoʼoleʼ tu kʼiinil 2 tiʼ octubre tiʼ 1999, teʼ muchʼtáambal ku beetaʼal cada jaʼab tumen Watch Tower Bible and Tract Society of Pennsylvaniaoʼ anunciartaʼabeʼ le sukuʼun Pierceoʼ yaan u káajal u meyaj ichil le Cuerpo Gobernanteoʼ. Tu tsʼook u jaʼabiloʼob u kuxtaleʼ meyajnaj xan teʼ comité tiʼ Personaloʼ, comité tiʼ Redacción, comité tiʼ Publicacionoʼob yéetel tiʼ le comité tiʼ Coordinadoroʼoboʼ.

Tumen jach jatsʼuts u modos yéetel mantatsʼ kiʼimak u yóoleʼ, yaʼab sukuʼunoʼob jejeláas tuʼux u taaloʼob tu bisubaʼob tu yéetel. Letiʼ kaʼacheʼ jach kabal u yóol, ku yeʼesik yaabilaj, jach u kʼubmaj u yóol tiʼ Jéeoba yéetel ku beetik baʼax ku yaʼalik, le óolal yaʼab sukuʼunoʼob taakchaj u biskubaʼob tu yéetel. Le sukuʼun Guy Pierceoʼ ku tuklikeʼ maas jeʼel u pʼáatal maʼ u jóokʼol le Kʼiinoʼ ke maʼ u béeychajal baʼax u yaʼalmaj Jéeoba. Letiʼe baʼax u kʼáat ka ojéeltaʼak tumen tuláakal máakoʼ.

Le sukuʼun Pierceoʼ jach meeyjil kaʼachi. Temprano tu líikʼil yéetel yaan kʼiineʼ tak de áakʼab táan u meyaj. Viajarnaj tiʼ yaʼab luʼumiloʼob utiaʼal u líiʼsik u yóol le sukuʼunoʼoboʼ. Kex yaʼab meyaj yaan kaʼach tiʼeʼ ku jóoʼsik tiempo utiaʼal u yáantik, u tsolnuʼuktik yéetel u múul antal yéetel le betelitaʼoboʼ bey xan uláakʼ sukuʼunoʼob. Letiʼeʼ jach maʼalob u kʼamik kaʼach u yuʼulaboʼob, ku yeʼesik yaabilaj yéetel ku líiʼsik u yóol máak yéetel baʼax ku yaʼalik le Bibliaoʼ, le oʼolal maʼ kun tuʼubsbil tumen le máaxoʼob kʼaj óoltoʼ.

U jaajileʼ maʼ kun tuʼubsbil k-sukuʼun Pierce tumen u yatan, u seis paalal, u yáabiloʼob, u x-kaʼa áabiloʼob yéetel tumen tuláakal le máaxoʼob tu yiloʼob bey juntúul taatatsileʼ. Tu kʼiinil sábado 22 tiʼ marzo tiʼ 2014, le sukuʼun Mark Sanderson, uláakʼ máax yaan ichil le Cuerpo Gobernanteoʼ, tu máansaj u discursoil u muʼukul le sukuʼun Pierce tu betelil Brooklynoʼ. Ichil le discursooʼ tʼaanaj tiʼ le esperanza yaan tiʼ le sukuʼun Pierce utiaʼal u bin kaʼanoʼ, tu chʼaʼchiʼitaj le tʼaanoʼob tu yaʼalaj Jesusaʼ: «Tu yotoch in Taataeʼ yaʼab kúuchiloʼob yaan utiaʼal u pʼáatal máakiʼ. [...] Wa xan kin chʼaʼjoʼoltik in bin yéetel in preparartikteʼex junpʼéel kúuchileʼ, yaan in suut, yéetel teen ken in kʼameʼex teʼ najoʼ, beyoʼ le tuʼux kin antaloʼ tiʼ xan kan antaleʼexiʼ. Le tuʼux kin binoʼ teʼexeʼ a kʼaj óoleʼex u bejil» (Juan 14:2-4).

Jach maʼ ken k-tuʼubs le sukuʼun Pierceoʼ, baʼaleʼ kiʼimak k-óol k-ojéeltikeʼ ‹u kʼaj óol u bejil› wa le esperanza yaantiʼ teʼ kaʼanoʼ.