¿Táan wa a kanáantik le herencia tsʼaʼantechoʼ?
«Toʼoneʼ [...] t-kʼamaj u kiliʼich muukʼ Dios, utiaʼal beyoʼ ka k-kʼaj óolt le baʼaxoʼob tu tsʼáajtoʼon Dios tu yoʼolal u yutsiloʼ.» (1 COR. 2:12)
1. ¿Baʼax maʼ tu tsʼáaik cuenta yaʼab máak?
YAʼAB máakeʼ maʼ tu tsʼáaik cuenta bukaʼaj koʼojil u tojol baʼax yaantiʼ, baʼaleʼ ken u peʼerteʼ teʼ ku kʼaʼajal u yiikʼiʼ. ¿Tsʼoʼok wa u yúuchultech beyoʼ? U jaajileʼ yaan horaeʼ maʼatech k-tsʼáaik cuenta bukaʼaj kʼaʼanaʼanil junpʼéel baʼal ichil k-kuxtal. Maʼ xaaneʼ juntúul máax líikʼ ich ayikʼalileʼ maʼ tu tsʼáaik cuenta bukaʼaj baʼaloʼob yaantiʼ. Le táankelmoʼob xanoʼ yaʼab baʼaloʼob kʼaʼanaʼantak yaantiʼob, baʼaleʼ maʼ tu tsʼáaikoʼob cuenta tumen yaʼab baʼaloʼob maʼ u yiloʼob ichil u kuxtaloʼobiʼ.
2, 3. 1) ¿Baʼax kʼaʼabéet u beetik le táankelmoʼoboʼ? 2) ¿Baʼax jeʼel u yáantkoʼon utiaʼal k-kanáantik le herencia yaantoʼonoʼ?
2 Wa paalech bey xan wa tsʼoʼok a táankelemtaleʼ, ¿baʼaxoʼob maas kʼaʼanaʼantak a wilik? Teʼ yóokʼol kaabaʼ le táankelmoʼoboʼ baʼax maas kʼaʼanaʼan u yilkoʼobeʼ u náajaltikoʼob yaʼab taakʼin, u yantaltiʼob junpʼéel nuxiʼ naj wa u maas túumbenil celular wa uláakʼ baʼaloʼob jeʼex leloʼobaʼ. Chéen baʼaleʼ táan u peʼertikoʼob le baʼax maas kʼaʼanaʼanoʼ: le ayikʼaliloʼob ku tsʼáaik Diosoʼ. Wa líikʼech ichil u jaajileʼ kʼaʼabéet a kanáantik le nojoch herencia * tsʼoʼok u tsʼáaiktech a taataʼoboʼ (Mat. 5:3). Wa maʼ ta kanáantik le herenciaaʼ jeʼel u bintech kʼaasil ichil a kuxtaleʼ.
3 ¿Baʼax jeʼel a beetik utiaʼal a kanáantik le herencia yéetel maʼ u bintech kʼaasiloʼ? Koʼox ilik jujunpʼéel ejemploʼob yaan teʼ Biblia jeʼel u yáantkoʼon k-kanáant le herencia yaantoʼonoʼ, kex táankelmoʼon wa maʼ.
MAʼ TU KANÁANTOʼOB LE HERENCIAOʼ
4. ¿Baʼax ku yaʼalik Yáax tiʼ Samuel 8:1 tak 5 yoʼolal u paalal Samuel?
4 Le Bibliaoʼ ku tʼaan tiʼ jujuntúul máaxoʼob tu kʼamoʼob junpʼéel nojoch herencia, chéen baʼaleʼ maʼ tu kanáantoʼobiʼ. Lelaʼ bey úuchik tiʼ u paalal le profeta Samueloʼ. Letiʼeʼ desde tu chichnil ka káaj u meyajtik Jéeoba yéetel chúukpaj u yóol u meyajte (1 Sam. 12:1-5). Samueleʼ tu tsʼáaj junpʼéel maʼalob ejemplo tiʼ Joel yéetel Abías, u paalal, chéen baʼaleʼ letiʼobeʼ maʼ tu kanáantoʼob le herenciaoʼ. Le Bibliaoʼ ku yaʼalikeʼ «maʼ tu beetajoʼob baʼax tubeeliʼ» (xok 1 Samuel 8:1-5).
5, 6. ¿Baʼax úuch tiʼ u paalal yéetel u yáabil Josías?
5 Lelaʼ bey xan úuchik tiʼ u familia rey Josías, letiʼeʼ jach tu tsʼáaj u yóol u meyajt Dios. Ka kaxtaʼab u libroil u Leyoʼob Jéeoba yéetel ka tu yuʼubaj u xoʼokleʼ, Josíaseʼ tu séebaʼanil tu beetaj baʼax ku yaʼalik. Tu xuʼulsaj u adorartaʼal le beetbil diosoʼoboʼ yéetel tu xuʼulsaj xan le espiritismo teʼ luʼumiloʼ, tsʼoʼoleʼ tu líiʼsaj u yóol le kaaj utiaʼal ka u beet baʼax ku yaʼalik Jéeobaoʼ (2 Rey. 22:8; 23:2, 3, 12-15, 24, 25). ¡Letiʼeʼ maʼalob baʼax tu kaʼansaj tiʼ u paalal! Óoxtúul tiʼ u paalal yéetel juntúul u yáabileʼ tu beetaj u reyiloʼob, chéen baʼaleʼ mix juntúul tu kanáantoʼob le nojoch herencia pʼaʼattiʼoboʼ.
6 Jehoacaz, juntúul tiʼ u paalaloʼob Josíaseʼ, tu beetaj u reyil «baʼaleʼ le baʼaxoʼob tu beetaj[oʼ] kʼaas tu yich Yuumtsil». Tres meses káajak u reinar ka kʼaʼal tumen u faraonil Egipto tak ka kíimi (2 Rey. 23:31-34). Ka tsʼoʼokeʼ Jehoiaquim, u yíitsʼin Jehoacaz, reinarnaj ich once jaʼaboʼob. Baʼaleʼ letiʼeʼ maʼ tu beetaj xan le baʼax kaʼansaʼabtiʼ tumen u taataoʼ. Jehoiaquimeʼ jach kʼasaʼan kaʼachi, le oʼolal Jeremíaseʼ tu profetizartaj: «Bíin muʼukuk bey juntúul burroeʼ» (Jer. 22:17-19). U maasil reyoʼob anchaj ka tsʼoʼok u reinar Josías, jeʼex Sedequías u paal bey xan Joaquín u yáabileʼ, maʼ xan tu beetoʼob baʼax maʼalobiʼ (2 Rey. 24:8, 9, 18, 19).
7, 8. 1) ¿Baʼax tu beetaj Salomón yéetel le nojoch herencia tsʼaʼabtiʼoʼ? 2) ¿Baʼax jeʼel k-kanik tiʼ le máaxoʼob maʼ tu kanáantoʼob le nojoch herencia tsʼaʼabtiʼoboʼ?
7 Rey Salomoneʼ kaʼansaʼab xan tiʼ baʼax maʼalob tumen David, u taata. Tiʼ letiʼeʼ kaʼansaʼab ka u yaabilt Jéeoba, baʼaleʼ ka máan kʼiineʼ Salomoneʼ xuʼul u kanáantik le nojoch herencia tsʼaʼabtiʼoʼ. Le Bibliaoʼ ku yaʼalik: «Le ka nuxibchaj Salomoneʼ beetaʼab u kʼéechel u puksiʼikʼal tumen u yatanoʼob utiaʼal u bin tu paach beetbil [diosoʼob], tumen maʼ jach u kʼububa kaʼach tiʼ Yuumtsil u [Dios], jeʼel bix tu kʼubilakuba David u taataeʼ» (1 Rey. 11:4). Yoʼolal le baʼax tu beetoʼ xuʼul u kʼaʼamal tumen Jéeoba.
8 Tuláakal le máakoʼob tsʼoʼok k-aʼalikaʼ jeʼel kaʼach u páajtal u yeʼeskoʼob u yaabiltmoʼob Jéeoba yéetel u beetkoʼob baʼax maʼalobeʼ, baʼaleʼ maʼ tu beetoʼobiʼ. Le Bibliaoʼ ku tʼaan xan tiʼ uláakʼ táankelmoʼob tu kanáantoʼob le nojoch herencia pʼaʼattiʼob jeʼex u beetik yaʼab táankelmoʼob teʼ kʼiinoʼobaʼ. Koʼox ilik baʼax tu beetaj jujuntúul táankelem paalaloʼob úuchjeakil jeʼel u yáantik le táankelmoʼob bejlaʼoʼ.
TU KANÁANTOʼOB LE HERENCIAOʼ
9. ¿Baʼaxten maʼalob baʼax tu beetaj u paalal Noé? (Ilawil le dibujo yaan tu káajbal le xookaʼ.)
9 U paalal Noeeʼ tu beetoʼob baʼax maʼalob. Tiʼ Noeeʼ aʼalaʼab ka u beet junpʼéel arca utiaʼal ka u salvartubaʼob letiʼob bey xan le baʼalcheʼoboʼ. Letiʼobeʼ tu naʼatoʼobeʼ kʼaʼabéet u beetkoʼob baʼax ku yaʼalik Jéeoba yéetel u yáantkoʼob u taataʼob u beet le arcaoʼ. Jeʼex u yaʼalik le Bibliaoʼ ookoʼob teʼ arca ka taal le Búulkabaloʼ (Gén. 7:1, 7). ¿Baʼax utsil tu taasaj? Génesis 7:3, ku yaʼalikeʼ tu yoksoʼob le baʼalcheʼob teʼ arca utiaʼal maʼ u chʼéejloʼoboʼ. Tsʼoʼoleʼ u familia Noé xaneʼ tu salvartuba. U paalal Noeeʼ tu kanáantoʼob le herencia wa le kaʼansaj tsʼaʼabtiʼob tumen u taataʼoboʼ, le oʼolaleʼ áantajnajoʼob utiaʼal maʼ u xuʼulsaʼal tiʼ wíinik yéetel utiaʼal ka seguernak u adorartaʼal chéen Jéeoba (Gén. 8:20; 9:18, 19).
10. ¿Bix úuchik u yeʼesik kantúul táankelmoʼob tu kanáantoʼob le herencia tsʼaʼabtiʼoboʼ?
10 Ka máan yaʼab jaʼaboʼobeʼ anchaj kantúul táankelem paalaloʼobeʼ tu yeʼesoʼob baʼax maas kʼaʼanaʼan u yilkoʼob. U kʼaabaʼobeʼ Hananías, Misael, Azarías yéetel Daniel, letiʼobeʼ bisaʼaboʼob Babilonia tu jaʼabil 617 táanil tiʼ u taal Jesús. Jach yaan kaʼach u naʼatoʼob yéetel jatsʼutsoʼob, wa u kʼáatoʼobeʼ jeʼel kaʼach u kuxtaloʼob jeʼex le babilonioʼoboʼ. Baʼaleʼ yéetel baʼax tu beetoʼobeʼ tu yeʼesoʼob maas kʼaʼanaʼan le nojoch herencia wa le baʼaxoʼob kaʼansaʼabtiʼob tumen u taataʼoboʼ. Letiʼobeʼ bendecirtaʼaboʼob tumen Jéeoba úuchik u beetkoʼob le baʼaxoʼob kaʼansaʼabtiʼob desde tu chichniloʼoboʼ (xok Daniel 1:8, 11-15, 20).
11. ¿Baʼaxten jeʼel u páajtal k-aʼalikeʼ tak uláakʼ máakoʼob tu jóoʼsoʼob u yutsil le baʼax tu kanaj Jesús tiʼ u Taataoʼ?
11 Jesús, u Hijo Dioseʼ, jach maʼalob ejemplo tu tsʼáaj tiʼ bix unaj u kanáantaʼal le herenciaoʼ. Letiʼeʼ yaʼab baʼaloʼob tu kanaj tiʼ u Taata yéetel mix juntéen tu tuʼubsaj. Lelaʼ bey u yeʼesik le baʼax tu yaʼalaʼ: «Le baʼaloʼobaʼ kin waʼalik jeʼex u kaʼansmilten le Taataoʼ» (Juan 8:28). Tsʼoʼoleʼ u kʼáat kaʼach ka jóoʼsaʼak u yutsil tumen u maasil le baʼax tu kanaj tiʼ u Taataoʼ. Tu yaʼalaj tiʼ le máakoʼoboʼ: «Kʼaʼabéet xan in kʼaʼaytik u maʼalob péektsilil u Reino Dios tiʼ uláakʼ kaajoʼob, tumen le beetik túuxtaʼaben» (Luc. 4:18, 43). Jesuseʼ tu kaʼansaj tiʼ le máakoʼoboʼ maʼ maʼalob ka táakpajkoʼob tiʼ le ‹yóokʼol kaaboʼ› tumen le yóokʼol kaaboʼ maʼ u yaabiltmaj le baʼaxoʼob ku kaʼansik Diosoʼ (Juan 15:19).
¿TÁAN WA A KANÁANTIK LE HERENCIA TSʼAʼANTECHOʼ?
12. 1) Le bix úuchik u kaʼansaʼal Timoteooʼ, ¿baʼaxten chíikaʼan tiʼ le bix u kaʼansaʼal yaʼab táankelem paaloʼob bejlaʼoʼ? 2) ¿Tiʼ baʼax kʼáatchiʼiloʼob unaj u tuukul le táankelmoʼob meyajtik Diosoʼ?
12 Jeʼex le táankelem paalaloʼob tsʼoʼok k-chʼaʼchiʼitikoʼ, maʼ xaaneʼ techeʼ kaʼansaʼabtech tumen a taataʼob baʼax ku yaʼalik Jéeoba. Wa beyoʼ le bix úuchik a kaʼansaʼaloʼ chíikaʼan tiʼ le bix úuchik u kaʼansaʼal Timoteooʼ (xok 2 Timoteo 3:14-17). A taataʼobeʼ tu kaʼansoʼobtech máax u jaajil Dios yéetel bix jeʼel a beetik baʼax uts tu tʼaaneʼ. Maʼ xaaneʼ desde ta chaambalil káaj a kaʼansaʼal, le kaʼansajaʼ tu tsʼáajtech le naʼat kun kʼaʼabéettaltech «utiaʼal ka a salvartaba tu yoʼolal le fe ka tsʼáaik tiʼ Cristo Jesusoʼ», tsʼoʼoleʼ táan xan u yáantkech bejlaʼa utiaʼal ‹ka noʼojaʼanchajkech› utiaʼal a meyajtik Dios. ¿Táan wa a kanáantik le herencia tsʼaʼantechaʼ? Tukle: «¿Bix in wuʼuyikinba ikil in táakpajal ichil le yaʼabkach máakoʼob meyajtik Dios yéetel chúukaʼan óolaloʼ? ¿Kiʼimak wa in wóol ikil in táakpajal ichil le máaxoʼob ku yéeyik Dios utiaʼal ka u amigotoʼ? ¿Kiʼimak wa in wóol tumen in wojel u jaajil?».
¿Kiʼimak wa a wóol ikil a táakpajal ichil le yaʼabkach máakoʼob meyajtik Dios yéetel chúukaʼan óolaloʼ? (Ilawil xóotʼol 9, 10 yéetel 12)
13, 14. 1) ¿Baʼax ku taaktal u beetik jujuntúul táankelmoʼob meyajtik Dios? 2) Kex maʼ chéen chʼaʼabileʼ, ¿baʼaxten unaj u chúukpajal k-óol k-meyajt Jéeoba? Tsikbalt junpʼéel baʼax uchaʼan.
13 Jujuntúul táankelem paalaloʼob ku líikʼloʼob ichil u jaajileʼ, maʼ tu yilkoʼob bukaʼaj jatsʼutsil u kaajal Dios. Tsʼoʼoleʼ ku tuklikoʼobeʼ jatsʼuts u kʼasaʼan u yóokʼol kaab Satanás, le oʼolal ku taaktal u yilkoʼob baʼaxoʼob ku beetaʼaliʼ. Baʼaleʼ techeʼ bix a wilik, ¿maʼalob wa ta tʼaan le bix u tuukuloʼobaʼ? ¿Jeʼel wa a takikaba tu beel junpʼéel camión chéen utiaʼal a wuʼuyik wa yaan u yaatal tuʼux ken u jéentantech bey xan utiaʼal a wilik wa jeʼel u kíimskecheʼ? ¿Máasaʼ junpuliʼ maʼ ta beetik? Lelaʼ ku yeʼesikeʼ maʼ tsaaj ka a táakbesaba tiʼ le baʼaloʼob kʼaastak yaan teʼ yóokʼol kaab utiaʼal a tsʼáaik cuenta jach jeʼel u beetiktech loobeʼ (1 Ped. 4:4).
14 Gener, juntúul táankelem xiʼipal asiaileʼ, líikʼ ichil u jaajil yéetel 12 jaʼaboʼob yaantiʼ ka okjaʼanaji. Baʼaleʼ ka joʼopʼ u táankelemtaleʼ, taakchaj u beetik le baʼaxoʼob ku beetaʼal teʼ yóokʼol kaabaʼ. Letiʼeʼ ku yaʼalik: «Taak kaʼach in beetik le baʼax in kʼáat jeʼex u maasil táankelem paalaloʼoboʼ». Genereʼ kex táan kaʼach u meyajtik Dioseʼ ku beetik baʼaloʼob kʼaastak. Ka tu tsʼáaj 15 jaʼaboʼob tiʼeʼ tsʼokaʼaniliʼ u káajal u káaltal, u poochʼil yéetel u beetik uláakʼ baʼaloʼob kʼaastak jeʼex u amigoʼobeʼ. Genereʼ suuk kaʼach u bin u báaxt kʼaakʼas videojuegoʼob yéetel u amigoʼob tsʼoʼoleʼ tsʼoʼok u sen áakʼabtal tu suut. Ka máan kʼiineʼ tu tsʼáaj cuentaeʼ le baʼaloʼobaʼ maʼ tu taasik kiʼimak óolal tiʼ, tsʼoʼoleʼ ku yuʼubik minaʼan u biilal u kuxtal. Beora tsʼoʼok u kaʼa suut Gener teʼ múuchʼuliloʼ ku yaʼalik: «Tak bejlaʼa kin wuʼuyik ku túuntaʼal in wóol in beet baʼax maʼ maʼalobeʼ, baʼaleʼ kin tsʼáaik in wóol in meyajt Jéeoba tumen maas jeʼel u taasikten yaʼab bendicionoʼobeʼ».
15. ¿Baʼax maʼ unaj u tuʼubsik le máaxoʼob maʼ j-Jaajkunaj u taataʼoboʼ?
15 Yaan táankelmoʼob xaneʼ u taataʼobeʼ maʼ j-Jaajkunajoʼobiʼ. Maʼ xaaneʼ techeʼ maʼ j-Jaajkunaj a taataʼobiʼ, kex beyoʼ unaj u kiʼimaktal a wóol tumen tsʼoʼok a kʼaj óoltik Jéeoba yéetel táan a meyajtik. U millonesil máakoʼob yaan way Luʼumeʼ, chéen baʼaleʼ tiʼ cada mil máakoʼobeʼ chéen juntúul u kʼaj óol u jaajiliʼ. ¡Techeʼ juntúulech tiʼ le máaxoʼob kʼaj óoltmil u jaajiloʼ! Le oʼolaleʼ junpʼéel nojoch bendición a wantal ichil máaxoʼob tsʼoʼok u natsʼik Jéeoba tu yiknal yéetel tsʼoʼok u kaʼansiktiʼob u jaajil (Juan 6:44, 45). ¡K-ojéeltik lelaʼ jach ku taasiktoʼon kiʼimak óolal kex jeʼel bixak t-kʼaj óoltil u jaajileʼ! (Xok 1 Corintoiloʼob 2:12.) Genereʼ ku yaʼalik: «¿Máaxen teen utiaʼal ka u beet in cuentail Jéeoba, le Máax beetmil tuláakal baʼaloʼ?» (Sal. 8:4). Juntúul kiik asiail xaneʼ ku yaʼalik: «Wa juntúul paal ku bin xook ku kiʼimaktal u yóol ken kʼaʼajsaʼak tumen u maestroeʼ, ¿maʼ wa maas jeʼel u kiʼimaktal u yóol máak tumen kʼaj óolaʼan tumen Jéeoba, le maas Nojoch j-Kaʼansajoʼ?».
¿BAʼAX KEN A BEETE?
16. ¿Baʼax unaj u beetik le táankelmoʼob meyajtik Diosoʼ?
16 Jach jatsʼuts u yantal máak ichil le máaxoʼob táan u kanáantkoʼob le nojoch herencia yaantiʼoboʼ. Techeʼ, ¿yaan wa xan a kanáantik le nojoch herencia yaantechoʼ? Wa ka kanáantikeʼ yaan a táakpajal ichil le yaʼabkach máakoʼob ku chúukpajal u yóol u meyajtoʼob Diosoʼ. Lelaʼ letiʼe baʼax maas maʼalob jeʼel u páajtal a yéeyikoʼ. Maʼ a beetik u pʼáatal minaʼan u biilal a kuxtal jeʼex le táankelem paalaloʼob yaan teʼ yóokʼol kaab taʼaytak u xuʼulsaʼaloʼ (2 Cor. 4:3, 4).
17-19. ¿Baʼax jeʼel u yáantkech utiaʼal maʼ u lúubul a wóol kex jelaʼan a wilaʼal tumen u maasileʼ?
17 U jaajileʼ kex maʼalob baʼax k-beetkeʼ jelaʼan u yilaʼal tumen u maasil, le oʼolal yaan horaeʼ ku talamtaltoʼon k-beetik baʼax maʼalob. Koʼox tʼaan tiʼ juntúul máax ku táakpajal teʼ Juegos Olimpicosoʼ. Wa ku invitartaʼal utiaʼal u táakpajleʼ u kʼáat u yaʼaleʼ tu tsʼáaj u yóoliʼ. Maʼ xaaneʼ le baʼaxoʼob anchaj u beetkoʼ jelaʼan ilaʼabik tumen u maasil, tumen anchaj tak u xulik u beetik jujunpʼéel baʼaloʼob suuk u beetik u maasil máakoʼob. Kex u yojel jelaʼan u yilaʼal baʼax ku beetkeʼ tu tsʼáaj u yóoliʼ tumen u kʼáat ganar.
18 Óoliʼ mix máak ku kutal u tukult baʼax jeʼel u yúuchul tiʼ wa ku beetik baʼax kʼaaseʼ. Baʼaleʼ techeʼ maʼalob ka tukult baʼax jeʼel u yúuchultech wa ka beetik baʼax kʼaaseʼ, beet baʼax maʼalob kex jelaʼan u yilaʼal tumen u maasil, maʼ a táakpajal tiʼ baʼaxoʼob jeʼel u kʼaskúuntik a tuukul yéetel jeʼel u náachkuntikech tiʼ Dioseʼ, beyoʼ jeʼel u yantaltech «le kuxtal jach tu jaajil kuxtaloʼ» (1 Tim. 6:19). Le kiik tsʼoʼok k-chʼaʼchiʼitikoʼ ku yaʼalik: «Maʼalob u yuʼubikuba máak ken u defendert baʼax ku creertik, tumen ku yeʼesik maʼ sajak u beet baʼax jelaʼan tiʼ le baʼaxoʼob ku beetaʼal tu yóokʼol kaab Satanasoʼ. Ka weʼesik xan chúukaʼan a wóol utiaʼal a tsʼáaikaba tu contra u yóokʼol kaab Satanás. Ken a beet beyaʼ táan a kiʼimakkúuntik u yóol Jéeoba tumen maʼalob baʼax ka beetik. Teech xaneʼ ku kiʼimaktal a wóol tumen kex jelaʼan a wilaʼal tumen u maasileʼ táan a beetik baʼax maʼalob».
19 Maʼ a peʼertik a tiempo tiʼ le baʼaloʼob ku tuklaʼal ku taasik kiʼimak óolal bejlaʼoʼ (Ecl. 9:2, 10). Jéeobaeʼ ku tsʼáaik u biilal a kuxtal yéetel jeʼel u tsʼáaiktech kuxtal minaʼan u xuuleʼ, le oʼolaleʼ ¿máasaʼ jeʼel a weʼesik minaʼan a naʼat wa ka joʼopʼok a máan «jeʼex u [...] máakiloʼob le yóokʼol kaabaʼ»? Bey túunoʼ wa ka chʼaʼtuklik a meyajtik Jéeobaeʼ yaan u yantal u biilal a kuxtal (Efe. 4:17; Mal. 3:18).
20, 21. 1) Wa k-chʼaʼtuklik baʼax maʼalobeʼ, ¿tiʼ baʼax ken u yáantoʼon teʼ túumben luʼumoʼ? 2) ¿Baʼax ku páaʼtik Jéeoba ka k-beete?
20 Wa k-chʼaʼtuklik k-beetik baʼaxoʼob maʼalobtakeʼ yaan u yantaltoʼon kiʼimak óolal teʼ kʼiinoʼobaʼ, tsʼoʼoleʼ yaan u káajal k-kanik bix jeʼel k-kuxtal ich kiʼimak óolal teʼ túumben luʼumoʼ. ¡Jach yaʼabkach bendicionoʼob ken k-kʼame! (Mat. 5:5; 19:29; 25:34.) Chéen baʼaleʼ utiaʼal k-kʼamkeʼ kʼaʼabéet k-beetik baʼax ku yaʼalik Jéeoba (xok 1 Juan 5:3, 4). Maʼ chéen chʼaʼabil u meyajtaʼal Dios yéetel chúukaʼan óolaliʼ, baʼaleʼ yaʼab utsiloʼob ku taasik.
21 ¡Yaʼab baʼaloʼob tsʼoʼok u tsʼáaiktoʼon Jéeoba! K-ojel baʼax ku yaʼalik u Tʼaan, k-kʼaj óol tubeel xan letiʼ yéetel k-ojel baʼax u tukulmaj u beetik maʼ kun xáantal. Kiʼimak k-óol tumen kʼaj óolaʼanoʼon yéetel u kʼaabaʼ yéetel u j-Jaajkunajoʼon. Tsʼoʼoleʼ Dioseʼ ku yaʼaliktoʼoneʼ maʼ ken u pʼatoʼon (Sal. 118:7). Kex táankelmoʼon bey xan wa tsʼoʼok u yantal k-jaʼabileʼ, koʼoneʼex eʼesik k-kanáantik le nojoch herencia tsʼaʼantoʼonoʼ yéetel koʼoneʼex eʼesik taak k-tsʼáaik tiʼ Jéeoba «nojbeʼenil utiaʼal mantatsʼ» (Rom. 11:33-36; Sal. 33:12).
^ xóot’ol 2 Ichil le nojoch herenciaaʼ táakaʼan: K-kaanbal tu yoʼolal Jéeoba, k-kanik bix jeʼel k-meyajtikeʼ, k-kʼaj óoltaʼal yéetel u kʼaabaʼ Jéeoba, k-amigotik, k-naʼatik baʼax u kʼáat u yaʼal le Bibliaoʼ, k-meyajtik yéetel chúukaʼan óolal jeʼex u beetik k-taataʼobeʼ bey xan k-meyajtik Jéeoba jeʼex tu beetil le máaxoʼob meyajt úuchjeakiloʼ.
