1, 2. Kex jeʼel bukaʼaj k-jaʼabil wa kex jeʼel tuʼuxak k-taaleʼ, ¿bix u kʼáat Dios ka k-adorarte?

¿JAYPʼÉEL jaʼab yaantech? Wa táankelmech bey xan wa x-lóoʼbayanech yéetel tiaʼanech ichil u kaajal Jéeobaeʼ, k-kʼáat ka a wojéelteʼ jach yaabiltaʼanech. Cada jaʼabeʼ tiʼ yaʼab luʼumiloʼobeʼ yaʼab táankelem paalaloʼob ku yokjaʼob. ¿Máasaʼ jach ku kiʼimaktal k-óol ken k-il u yokol ichil u kaajal Jéeoba le táankelmoʼoboʼ?

² Wa táankelmecheʼ maʼ xaaneʼ jach uts ta wich a biskaba yéetel uláakʼ táankelem paalaloʼob. Tuláakloʼon uts t-tʼaan k-náaysik k-óol yéetel máaxoʼob igual u jaʼabiloʼob t-éetel. Baʼaleʼ kex jeʼel bukaʼaj k-jaʼabil wa kex jeʼel tuʼuxak k-taaleʼ, Dioseʼ u kʼáat ka k-adorart junmúuchʼ yéetel u maasil. Le apóstol Pablooʼ tu yaʼaleʼ Dioseʼ u kʼáat ka «u salvartuba tuláakal u jejeláasil máakoʼob yéetel ka kʼuchuk u chúukaʼan kʼaj óoltoʼob le jaajoʼ» (1 Tim. 2:3, 4). Apocalipsis 7:9, ku yaʼalik xaneʼ le máaxoʼob adorartik Jéeobaoʼ ku taaloʼob tiʼ «tuláakal luʼumoʼob, chʼiʼibaloʼob, kaajoʼob yéetel tiʼ jejeláas tʼaanoʼob».

3, 4. 1) ¿Bix u tuukul le táankelem paalaloʼob yaan bejlaʼoʼ? 2) Jeʼex u yeʼesik Efesoiloʼob 4:25, ¿bix unaj k-ilik le sukuʼunoʼob yanoʼob teʼ múuchʼuliloʼ?

³ ¿Máasaʼ le táankelem paalaloʼob meyajtik Diosoʼ jelaʼanoʼob tiʼ le u maasil maʼatech u meyajtikoʼoboʼ? Le yanoʼob teʼ yóokʼol kaabaʼ chéen u yutsil ku kaxtikoʼob yéetel ku beetkoʼob chéen baʼax ku  yóotkoʼob. Yaʼab investigadoroʼobeʼ ku yaʼalikoʼobeʼ le táankelem paalal yaan bejlaʼoʼ jach maʼatech u tuukuloʼob tiʼ u maasil. Le bix u tʼaanoʼob yéetel bix u vestirtikubaʼoboʼ maʼatech u yeʼesik tsiikil tiʼ le máaxoʼob tsʼoʼok u yantal u jaʼabiloʼoboʼ, tsʼoʼoleʼ ku tuklikoʼobeʼ le máakoʼob beyaʼ tsʼoʼok «u máanoʼob de moda».

⁴ Bejlaʼeʼ óoliʼ tuláakal máak ku tuukul beyaʼ. Le oʼolal le táankelem paalal meyajtik Jéeobaoʼ unaj u kanáantkubaʼob utiaʼal maʼ u kʼaskúuntaʼal u tuukuloʼob. Le baʼax ku yúuchlaʼ maʼ táant u káajaleʼ. Teʼ yáax siglooʼ le apóstol Pablooʼ anchaj u yaʼalik tiʼ le sukuʼunoʼob ka u kanáantubaʼob utiaʼal maʼ u tuukuloʼob chéen tu yoʼolaloʼoboʼ. Pabloeʼ tu yaʼaleʼ lelaʼ «letiʼe iikʼ wa tuukul ku meyaj ichil le máaxoʼob maʼatech u yuʼubikoʼob tʼaanoʼ» (xok Efesoiloʼob 2:1-3). K-felicitartik le táankelem paalaloʼob maʼ u chaʼa u kʼaskúuntaʼal u tuukuloʼob yéetel ku múul meyajoʼob yéetel le múuchʼuliloʼ. Yoʼolal bix u kuxtaloʼobeʼ ku yeʼeskoʼobeʼ ku naʼatkoʼob le baʼax tu yaʼalaj Pabloaʼ: «Tuláakloʼoneʼ táakpajaʼanoʼon tiʼ junpʼéeliliʼ wíinklil» (Efe. 4:25). Jach naatsʼ yanil u kʼiinil le xuʼulsajoʼ, le oʼolaleʼ maʼ unaj k-náachtal tiʼ le sukuʼunoʼoboʼ. Lelaʼ bey u yeʼesik jujunpʼéel ejemploʼob tiʼ máaxoʼob meyajt Dios úuchjeakil, koʼox ilik jujunpʼéeliʼ.

5, 6. ¿Baʼax k-kanik tiʼ Lot yéetel u hijaʼob?

⁵ Úuchjeakileʼ Jéeobaeʼ tu yáantaj le máaxoʼob múuchʼ pʼáatoʼob ka kʼaʼabéetchajoʼ. Le baʼax tu beetoʼobaʼ yaʼab baʼax ku kaʼansiktoʼon teʼ kʼiinoʼobaʼ. Koʼoneʼex yáax ilik baʼax úuch tiʼ Lot.

⁶ Lot yéetel u paalaloʼobeʼ tiʼ kajaʼanoʼob kaʼach Sodomaeʼ, baʼaleʼ le kaajaʼ yaan kaʼach u xuʼulsaʼal. Le oʼolal Jéeobaeʼ tu túuxtaj u angeloʼob utiaʼal u yaʼalikoʼob tiʼ ka xiʼik teʼ puʼukoʼoboʼ. Aʼalaʼabtiʼ: «Xeen junpuliʼ [utiaʼal ka a salvartaba]» (Gén. 19:12-22). Loteʼ tu yuʼubaj tʼaan, yéetel u kaʼatúul hijaʼobeʼ binoʼob tu yéetel. Baʼaleʼ le ka tu yaʼalaj Lot tiʼ u novios u hijaʼob kʼaʼabéet u púutsʼloʼobeʼ, letiʼobeʼ «maʼ tu tukultajoʼob wa jaaj le baʼax ku yaʼalaʼaltiʼob[oʼ]» le oʼolal kíimoʼob (Gén. 19:14). Chéen Lot yéetel u hijaʼob kuxlajoʼob tumen junmúuchʼ pʼáatikoʼob yéetel u taataʼob.

7. ¿Bix úuchik u salvartaʼal le máaxoʼob jóokʼoʼob Egipto úuchik u pʼáatloʼob junmúuchʼoʼ?

⁷ Beoraaʼ koʼox tʼaan tiʼ le israelitaʼoboʼ. Le ka jóokʼoʼob tu luʼumil Egiptoeʼ maʼ tu jatsubaʼobiʼ, baʼaxeʼ junmúuchʼ úuchik u jóokʼloʼob. Le ka tu tichʼaj Moisés ‹u kʼab tu yóokʼol le kʼáaʼnáab› utiaʼal ka jaʼatsak tumen Jéeobaoʼ, maʼ kʼáat máan tu juunaliʼ mix chéen yéetel wa jaytúul israelitaʼobiʼ. Baʼaxeʼ jeʼex k-ojliloʼ yéetel u yáantaj Jéeobaeʼ tu kʼáatmáansaj le kʼáaʼnáab junmúuchʼ yéetel le kaajoʼ (Éxo. 14:21, 22, 29, 30). Le kaajoʼ maʼ tu jatsubaiʼ baʼaxeʼ pʼáat junmúuchʼ yéetel «u jejeláasil máakoʼob» maʼ israelitaʼob binoʼob tu yéeteloʼoboʼ (Éxo. 12:38). Teʼ súutukil unaj u pʼáatloʼob junmúuchʼaʼ, ¿máasaʼ junpuliʼ maʼ tu máan t-tuukul wa yaan u jaats táankelmoʼob u jatsmubaʼob yéetel taak u binoʼob táanxel tuʼux? Wa ka u jatsubaʼobeʼ yaan u yeʼeskoʼob jach minaʼan u naʼatoʼob tsʼoʼoleʼ maʼ kun salvartbiloʼob kaʼachi (1 Cor. 10:1).

8. Tu kʼiiniloʼob Jehosafateʼ, ¿bix tu yeʼesil u kaajal Dios junmúuchʼ anikoʼob?

⁸ Tu kʼiiniloʼob rey Jehosafateʼ, jujunpʼéel luʼumiloʼob jach yaan u páajtaliloʼobeʼ bin baʼateʼel tu contra u kaajal Dios (2 Cró. 20:1, 2). Teʼ kʼiinoʼob jeʼeloʼ, ¿baʼax tu beetaj le máaxoʼob meyajtik Diosoʼ? Tu lugar u tuklikoʼob u baʼateloʼob chéen tu juunaloʼobeʼ, tu kʼáatoʼob u yáantaj Jéeoba utiaʼal ka salvartaʼakoʼob (xok 2 Crónicas 20:3, 4). Mix juntúul tiʼ letiʼob tu tuklaj u beetik chéen baʼax u kʼáatiʼ. Le Bibliaoʼ ku yaʼalik: «Tuláakal u kajnáaliloʼob Judá waʼalakbaloʼob tu táan Yuumtsil, paʼteʼ yéetel u yatanoʼob bey xan u paalaloʼob tak u [maas] mejniloʼob» (2 Cró. 20:13). Tuláakloʼob pʼáatoʼob junmúuchʼ yéetel tu beetoʼob baʼax tu yaʼalaj Jéeoba. Úuchik  u beetkoʼob beyaʼ salvartaʼaboʼob tiʼ u enemigoʼob (2 Cró. 20:20-27). ¿Máasaʼ lelaʼ ku kaʼansiktoʼon baʼax unaj u beetik u kaajal Dios ken óotaʼak xuʼulsbil?

9. ¿Baʼax k-kanik tiʼ bix úuchik u pʼáatal junmúuchʼ le sukuʼunoʼob teʼ yáax siglooʼ?

⁹ Le sukuʼunoʼob teʼ yáax siglooʼ láayliʼ xan pʼáatoʼob junmúuchʼeʼ. Le ka ook ichil le múuchʼulil le judíoʼob yéetel le maʼ judíoʼoboʼ maʼ tu jatsubaʼobiʼ, le Bibliaoʼ ku yaʼalikeʼ «maʼ xuʼul u kaanbaloʼob tiʼ le apostoloʼoboʼ, maʼ xuʼul u paklan áantkubaʼob yéetel le baʼaxoʼob yaantiʼoboʼ, mix u múul jaanloʼob yéetel u múul oraroʼob» (Bax. 2:42). Ka joʼopʼ u chʼaʼpachtaʼaloʼobeʼ chíikpaj junmúuchʼ yaniloʼob tumen tu múul kanáantubaʼob (Bax. 4:23, 24). ¿Baʼax ku kaʼansiktoʼon lelaʼ? Ku kaʼansiktoʼoneʼ mantatsʼ unaj k-pʼáatal junmúuchʼ, maases wa yaan baʼaxoʼob k-aktáantik.

10. ¿Baʼax kʼiin maases unaj k-pʼáatal junmúuchʼ?

¹⁰ Táan u náatsʼal u kʼiinil u yúuchul junpʼéel baʼal mix juntéen ilaʼak. Le profeta Joeloʼ ku yaʼalikeʼ u «kʼiinil éeʼjochʼeʼenil» (Joel 2:1, 2; Sof. 1:14). Ken úuchuk lelaʼ u kaajal Dioseʼ maas unaj u pʼáatal junmúuchʼ. Kʼaʼajaktoʼon le baʼax tu yaʼalaj Jesusaʼ: «Tuláakal reino ku paklan baʼateʼel [wa u jatsmuba] u kajnáaliloʼobeʼ, yaan u xuʼulul» (Mat. 12:25).

11. ¿Baʼax ku kaʼansiktoʼon Salmo 122:3 yéetel 4? (Ilawil le foto yaan tu káajbal le xookaʼ.)

¹¹ Maʼ kun xáantaleʼ yaan u maas talamtal le kuxtalaʼ, le ken úuchuk lelaʼ maas yaan u kʼaʼabéettal k-pʼáatal junmúuchʼ. Le u pʼáatal máak junmúuchʼ yéetel u kaajal Jéeobaoʼ jeʼel u páajtal u keʼetel yéetel le bix yanil kaʼach le najoʼob tu kaajil Jerusalenoʼ. ¿Baʼaxten? Tumen le najoʼoboʼ jach taakʼaltak yaniloʼob kaʼachi. Le salmistaoʼ tu yaʼaleʼ Jerusaleneʼ junpʼéel kaaj beetaʼan jach junmúuchʼ. Le oʼolaleʼ u kajnáaliloʼobeʼ ku páajtal u múul áantkubaʼob yéetel u kanáantkubaʼob. Le bix yanil le najoʼobaʼ tu kʼaʼajsaj tiʼ le salmista bix u múuchʼ adorartaʼal Jéeoba tumen u kaajil Israeloʼ (xok Salmo 122:3, 4). Bejlaʼa yéetel teʼ kʼiinoʼob kun taaloʼob tuʼux kun maas talamtal le kuxtalaʼ, jach kʼaʼabéet k-pʼáatal junmúuchʼ, maʼ unaj k-jatsikbaiʼ.

12. ¿Baʼax ken u yáantoʼon utiaʼal k-salvartikba ken óotaʼak xuʼulsbil tiʼ u kaajal Dios?

¹² ¿Baʼaxten jach kʼaʼanaʼan k-pʼáatal junmúuchʼ ken kʼuchuk le kʼiinoʼob talamtakaʼ? Le capítulo 38 tiʼ Ezequieloʼ ku yaʼalikeʼ ‹Gog tiʼ u luʼumil Magogueʼ› yaan u yóotik u xuʼuls u kaajal Dios. Ken úuchuk lelaʼ maʼ unaj k-chaʼik tiʼ mix baʼal ka u jatsoʼoniʼ mix unaj k-kaxtik u yáantaj le kʼasaʼan yóokʼol kaabaʼ. Baʼaxeʼ maas unaj k-pʼáatal junmúuchʼ yéetel k-sukuʼunoʼob. Baʼaleʼ maʼ unaj k-tuklik wa yaan k-salvartikba chéen tumen junmúuchʼ yaniloʼoniʼ tumen cada juntúul yaan u yantal u yeʼesik u kʼubmaj u yóol tiʼ Dios yéetel ku beetik baʼax ku yaʼalik. Chéen le máaxoʼob ku chʼaʼchiʼitkoʼob u kʼaabaʼ Jéeoba ken u salvartubaʼoboʼ (Joel 2:32; Mat. 28:20). Baʼaleʼ ¿baʼax kun úuchul yéetel le máaxoʼob tsʼoʼok u náachtaloʼob tiʼ u kaajal Diosoʼ? ¿Yaan wa u salvarkubaʼob? (Miq. 2:12.)

13. Le baʼax tsʼoʼok k-xakʼaltik tak beoraaʼ, ¿baʼaxoʼob ku kaʼansik tiʼ le táankelem paalaloʼoboʼ?

¹³ Táankelem paal, ¿máasaʼ maas maʼalob maʼ a náachtal tiʼ le sukuʼunoʼob jeʼex u beetik uláakʼ táankelem paalaloʼoboʼ? Teʼ kʼiinoʼob ku taaloʼoboʼ yaan u maas kʼaʼabéettal k-pʼáatal junmúuchʼ kex táankelmoʼon wa kex tsʼoʼok u yantal k-jaʼabil. Le oʼolaleʼ bejlaʼeʼ kʼaʼabéet k-kanik k-bisba yéetel le sukuʼunoʼob utiaʼal k-múul meyajtik Jéeobaoʼ tumen lelaʼ jach kʼaʼanaʼan utiaʼal k-salvartikba.

14, 15. 1) ¿Baʼaxten táan u kaʼansiktoʼon Jéeoba ka pʼáatkoʼob junmúuchʼ yéetel le sukuʼunoʼob teʼ kʼiinoʼobaʼ? 2) ¿Baʼax ku yaʼaliktoʼon Jéeoba ka k-beet utiaʼal k-bisikba yéetel le sukuʼunoʼoboʼ?

¹⁴ Jéeobaeʼ ku yáantkoʼon k-meyajt «chéen yéetel junpʼéeliliʼ tuukul» (Sof. 3:8, 9). Táan  u kaʼansiktoʼon bix ken k-kuxtal maʼ kun xáantal, le ken «u kaʼa muchʼkíint tuláakal baʼal utiaʼal u nupik tiʼ Cristo» (xok Efesoiloʼob 1:9, 10). Letiʼeʼ u kʼáat ka múuchʼ adorartaʼak tumen le máaxoʼob yanoʼob way Luʼumoʼ bey xan teʼ kaʼanoʼ, yéetel maʼ kun xáantal ken u béeykunt leloʼ. Táankelem paal wa x-lóoʼbayan chʼúupal, a tuklikeʼ ¿kʼaʼabéet wa a pʼáatal junmúuchʼ yéetel u kaajal Jéeoba?

¹⁵ Jéeobaeʼ desde bejlaʼa táan u kaʼansiktoʼon ka pʼáatkoʼob junmúuchʼ yéetel u kaajaleʼ yéetel bey u kʼáat ka pʼáatkoʼon mantatsʼoʼ. Le oʼolaleʼ teʼ kiliʼich tsʼíiboʼoboʼ ku sen aʼaliktoʼon ka ‹eʼes nojoch yaabilaj t-baatsil› yéetel ka ‹seguernak k-paklan líiʼsik k-óol yéetel k-muʼukʼaʼankúuntik k-óol› (1 Cor. 12:25; Rom. 12:10; 1 Tes. 4:18; 5:11). Letiʼeʼ u yojel yaan horaeʼ ku talamtaltoʼon k-bisikba yéetel le sukuʼunoʼoboʼ tumen j-kʼebanoʼon. Le oʼolaleʼ ku yaʼaliktoʼon: «Paklan perdonartabaʼex tu jaajil a wóoleʼex» (Efe. 4:32).

16, 17. 1) Jeʼex u yaʼalik u libroil Hebreoʼobeʼ, ¿baʼaxten unaj k-bin teʼ muchʼtáambaloʼoboʼ? 2) ¿Baʼax jeʼel u kanik le táankelem paalaloʼob tiʼ Jesusoʼ?

¹⁶ Jéeobaeʼ ku tsʼáaik le muchʼtáambaloʼob utiaʼal u yáantkoʼon pʼáatal junmúuchʼ yéetel le sukuʼunoʼoboʼ. Hebreoʼob 10:24 yéetel 25, ku yaʼaliktoʼoneʼ unaj k-bin teʼ muchʼtáambaloʼoboʼ tumen teʼeloʼ k-áantaʼal «utiaʼal ka yanak yaabilaj t-baatsil bey xan utiaʼal k-beetik baʼaloʼob maʼalobtak». Tsʼoʼoleʼ Jéeobaeʼ u tsʼaamaj xan le muchʼtáambaloʼob utiaʼal ‹k-paklan líiʼsik k-óol maases bejlaʼa táan k-ilik u náatsʼal le kʼiinoʼ›.

¹⁷ Jesuseʼ jach jatsʼuts u yilik kaʼach le muchʼtáambaloʼoboʼ, lelaʼ ku yeʼesiktoʼon bix unaj k-ilik xan. Le ka tu tsʼáaj 12 jaʼaboʼob tiʼeʼ bin yéetel u taataʼob tiʼ junpʼéel nojoch muchʼtáambal beetaʼab teʼ templooʼ. Le táan u suut José yéetel María teʼ tuʼux kajaʼanoʼoboʼ tu yiloʼob minaʼan Jesús. Le ka tu kaxtoʼob Jesuseʼ tiaʼan kaʼach teʼ templo yiknal le máaxoʼob ku kaʼansajoʼoboʼ, maʼ pʼáat chéen tumen taak u yantal yéetel u yéet paaliloʼobiʼ (Luc. 2:45-47).

18. ¿Bix u yáantaj le payalchiʼ utiaʼal ka múuchʼ pʼáatkoʼon yéetel le sukuʼunoʼoboʼ?

¹⁸ Jeʼex tsʼoʼok k-ilkoʼ utiaʼal k-pʼáatal junmúuchʼ yéetel le sukuʼunoʼoboʼ unaj k-eʼesik yaabilaj yéetel k-bin teʼ muchʼtáambaloʼoboʼ. Baʼaleʼ jeʼel u páajtal xan k-payalchiʼ tu yoʼolal uláakʼ sukuʼunoʼobeʼ. Ken payalchiʼinakoʼoneʼ unaj k-aʼalik tiʼ Jéeoba jach  baʼax táan u muʼyajtikoʼob, beyoʼ k-eʼesik jach tu jaajil táan k-tuukul yoʼolaloʼob. Lelaʼ maʼ chéen le máaxoʼob yaan u jaʼabiloʼob jeʼel u beetkoʼoboʼ, tak le táankelmoʼoboʼ. Wa táankelmech bey xan wa x-lóoʼbayanecheʼ tukult tubeel wa táan a wilik a pʼáatal junmúuchʼ yéetel le sukuʼunoʼob teʼ múuchʼuliloʼ. Wa ka beetik beyoʼ yaan a maas náatsʼal tiʼ u kaajal Dios yéetel yaan a náachtal tiʼ u yóokʼol kaab Satanás taʼaytak u xuʼulsaʼaloʼ.

19-21. 1) ¿Baʼaxoʼob uchaʼantak ku yeʼesik junmúuchʼ yanil máaxoʼob meyajtik Jéeoba? 2) ¿Baʼax ku kaʼansiktoʼon le baʼax tu beetaj jujuntúul sukuʼunoʼoboʼ?

¹⁹ Le máaxoʼob meyajtik Jéeoba bejlaʼoʼ ku yeʼeskoʼob táakaʼanoʼob tiʼ junpʼéeliliʼ wíinklil jeʼex u yaʼalik Romailoʼob 12:5. Lelaʼ maases ku chíikpajal ken úuchuk nukuch loobiloʼob. Tu mesil diciembre tiʼ 2011, junpʼéel chak ikʼaleʼ tu beetaj u búulul jejeláas tuʼuxoʼob tiʼ u islail filipina de Mindanao. Chéen tiʼ junpʼéel áakʼabeʼ maas tiʼ cuarenta mil najoʼob kʼaschaji, ichil leloʼobaʼ yaan u yotoch sukuʼunoʼobiʼ. Le sucursaloʼ tu tsʼáaj le informeaʼ: «Táanil tiʼ u káajal u meyaj le comiteʼob tiʼ socorrooʼ, le sukuʼunoʼob kajaʼanoʼob táanxel tuʼuxoʼoboʼ tsʼokaʼaniliʼ u káajal u túuxtikoʼob áantajeʼ».

²⁰ Tu lakʼin u luʼumil Japoneʼ tu tíituba xan le luʼumoʼ yéetel anchaj junpʼéel tsunamiiʼ, le ka úuch lelaʼ yaʼab sukuʼunoʼob tu peʼertoʼob baʼax yaantiʼob. Yaan tiʼ letiʼobeʼ jach mix baʼal pʼáattiʼob. Yoshiko, juntúul kiik tu peʼertaj u yotoch, kajaʼan 10 leguas (40 kilómetros) tiʼ le najil Reinooʼ, tu yaʼalaj: «Jach péeknaj k-óol ka t-ojéeltaj chéen pʼelak sáaschajik uláakʼ kʼiin u tíituba le luʼumoʼ, le superintendente tiʼ circuito yéetel uláakʼ juntúul sukuʼuneʼ, taal u yiloʼon». Tsʼoʼoleʼ yéetel kiʼimak óolaleʼ tu yaʼalaj: «Jach k-tsʼáaik u diosboʼotikil tiʼ le múuchʼuliloʼ tumen tu yilaj u yáantkoʼon utiaʼal k-seguer antal naatsʼ tiʼ Dios. Tsʼoʼoleʼ tu tsʼáajoʼob xan toʼon nookʼ utiaʼal le keʼeliloʼ, k-xaanab, k-bultoʼob yéetel nookʼoʼob utiaʼal k-wenel». Juntúul sukuʼun tiʼ le comité tiʼ socorrooʼ, tu yaʼalaj: «Le sukuʼunoʼob tiʼ tuláakal le luʼumilaʼ jach múuchʼ yaniloʼob yéetel tu paklan áantubaʼob. Tak le sukuʼunoʼob estados unidosiloʼob áantajnajoʼoboʼ. Le ka kʼáataʼabtiʼob baʼaxten taaloʼob áantaj tak teʼelaʼ, tu yaʼaloʼob: ‹Toʼoneʼ jach taak k-antal junmúuchʼ yéetel le sukuʼunoʼob yanoʼob Japonoʼ, letiʼobeʼ jach kʼaʼabéettiʼob áantaj›». ¿Máasaʼ jach kiʼimak k-óol ikil k-antal ichil máaxoʼob ku tuukuloʼob yoʼolal u maasil? Jéeobaeʼ ku kiʼimaktal u yóol ken u yil junmúuchʼ yanil máaxoʼob meyajtik.

²¹ Maʼ xaaneʼ maʼ kun xáantaleʼ maʼ kun béeytal k-pʼáatal junmúuchʼ yéetel le sukuʼunoʼoboʼ, le oʼolaleʼ unaj k-ilik k-bisikba tu yéeteloʼob teʼ kʼiinoʼobaʼ. Lelaʼ jeʼel xan u yáantkoʼon utiaʼal k-aktáantik le talam kʼiinoʼob ku taaloʼob ken xuʼulsaʼak le yóokʼol kaabaʼ. Fumiko, juntúul kiik japonil tu salvartuba ka máan junpʼéel chak ikʼaleʼ, tu yaʼalaj: «Naatsʼ yaan le xuʼulsajiloʼ. Le oʼolal kʼaʼabéet u seguer k-áantik le sukuʼunoʼob tak ken kʼuchuk u kʼiinil u xuʼulul le nukuch loobiloʼoboʼ».

22. ¿Baʼax utsil ken k-kʼam wa k-pʼáatal junmúuchʼ yéetel le sukuʼunoʼoboʼ?

²² Bejlaʼeʼ kex tsʼoʼok u yantal k-jaʼabil bey xan wa táankelmoʼoneʼ táan k-ilik k-kuxtal junmúuchʼ yéetel u maasil, beyaʼ táan k-líiʼsikba utiaʼal k-salvartikba ken xuʼulsaʼak le kʼasaʼan yóokʼol kaab u jatsmubáaʼ. Jeʼex úuchik u salvartik Dios u kaajal úuchjeakileʼ bey xan ken u salvartil maʼ kun xáantal (Isa. 52:9, 10). Wa taak k-salvartikbaeʼ, unaj k-ilik k-pʼáatal mantatsʼ junmúuchʼ yéetel u kaajal Jéeoba. Junpʼéel baʼax jeʼel u yáantkoʼoneʼ letiʼe k-kanáantik le nojoch herencia tsʼaʼantoʼonoʼ. Tuláakʼ xookoʼ yaan k-kanik lelaʼ.