TU KʼIINIL 28 tiʼ abril tiʼ 2013, anchaj junpʼéel reunión especial tu kaajil Nagoya (Japón). Anthony Morris, juntúul sukuʼun tiʼ le Cuerpo Gobernanteoʼ, tu tsʼáaj junpʼéel anuncio jach jatsʼuts. Tu yaʼaleʼ tsʼoʼok u jóoʼsaʼal ich japonés junpʼéel túumben libro ku kʼaabaʼtik Le Bibliaoʼ: u Evangelioil Mateo. Le maas tiʼ 210 mil máakoʼob binoʼob teʼ reunión, tu chaʼantoʼob tiʼ Internet wa tu yuʼuboʼob tiʼ Internetoʼ joʼopʼ u sen papaxkʼaboʼob ka tu yuʼuboʼob le anunciooʼ.

Le Biblia U Suttʼaanil Túumben Luʼum jóoʼsaʼab ich japonesaʼ, 128 táan juʼunoʼob yaantiʼ, chéen ku taasik u Evangelioil Mateo yéetel jel xakʼaltaʼab baʼax ku yaʼalik. Le sukuʼun Morrisoʼ tu yaʼaleʼ le Bibliaaʼ beetaʼab utiaʼal «u tsʼaʼabal baʼax kʼaʼabéet tiʼ u kajnáaliloʼob Japón». ¿Bix le Bibliaaʼ? ¿Baʼaxten beetaʼabi? ¿Bix kʼaʼamik tumen le máakoʼoboʼ?

Le bix beetaʼabik u libroil Mateoaʼ tu beetaj u jaʼakʼal u yóol u maasil. Le simboloʼob ich japonesoʼ jeʼel u páajtal u tsʼíibtaʼal jeʼex suukil k-tsʼíibeʼ (desde x-tsʼíik tak x-noʼoj), lelaʼ letiʼe bix jóoʼsaʼanil óoliʼ tuláakal le publicacionoʼoboʼ. Chéen baʼaleʼ le simboloʼob ich japonesoʼ jeʼel u páajtal u tsʼíibtaʼal de filaileʼ (desde kaʼanal tak kabal). Lelaʼ letiʼe bix tsʼíibtaʼabik le túumben libroaʼ yéetel bey suuk u tsʼíibtaʼal le periodicoʼob yéetel uláakʼ libroʼob jach kʼaj óolaʼanoʼob Japonoʼ. Yaʼab máax aʼalikeʼ maas chéen chʼaʼabil u xoʼokol. Teʼ libro xanaʼ luʼsaʼab le mejen joʼol xookoʼob yaan tu kaʼanlil le táan juʼunoʼ ka tsʼaʼab ichil le capituloʼoboʼ, beyoʼ jeʼel u páajtal u séeb ilaʼal tiʼ baʼax ku tʼaaneʼ.

Le sukuʼunoʼoboʼ jach séeb úuchik u káajal u yilkoʼob u yutsil le túumben libroaʼ. Juntúul kiik maas tiʼ 80 años yaantiʼeʼ tu yaʼalaj: «Yaʼab u téenel tsʼoʼok in xokik u Evangelioil Mateo, chéen baʼaleʼ le bix tsʼaʼabik le joʼol xookoʼob yéetel le bix tsʼíibtaʼaniloʼ tsʼoʼok u yáantken in maas naʼat le kaʼansaj tu beetaj Jesús teʼ puʼukoʼ». Juntúul kiik x-lóoʼbayaneʼ tu yaʼalaj xan: «Ka kulajen in xokeʼ, pʼis úuchik in tsʼoʼoksikeʼ ka líikʼen». Le kiikaʼ ku yaʼalik xaneʼ kex suuk u xook ich japonés jeʼex suuk k-xook toʼoneʼ, yaʼab máakeʼ maas uts tu tʼaan u xook jeʼex tsʼíibtaʼanil le túumben libroaʼ.

¿Baʼax utsiloʼob jeʼel u jóoʼsik máak tiʼ junpʼéeliliʼ Evangelioeʼ? Yaʼab japoniloʼobeʼ maʼ yaʼab baʼax u yojloʼob tu yoʼolal le Bibliaoʼ, chéen baʼaleʼ taak u xokikoʼob. Uláakʼoʼobeʼ mix juntéen anchajaʼak tiʼob junpʼéel Biblia, chéen baʼaleʼ yéetel le túumben libroaʼ yaan u béeytal u xokikoʼob kex chéen junjaatsiʼ.

¿Baʼaxten yéeyaʼab u Evangelioil Mateo? Tumen u maas yaʼabil le japoniloʼoboʼ ken u yuʼuboʼob u yúuchul tʼaan tiʼ le Bibliaoʼ ku tuukuloʼob tiʼ Jesús. Le oʼolal yéeyaʼab u Evangelioil Mateo tumen tiʼ ku yaʼalik tiʼ baʼax chʼiʼibalil taal Jesusiʼ, baʼax kʼiin ka síiji, tiʼ u Kaʼansajil le Puʼukoʼ yéetel tiʼ le profecíaʼob ku tʼaanoʼob tiʼ u tsʼook kʼiinoʼoboʼ. Le baʼaloʼobaʼ jach uts tu tʼaan u yuʼubik le japoniloʼoboʼ.

 Le ka tu kʼamaj le sukuʼunoʼob le túumben libroaʼ, tu séebaʼanil káaj u kʼaʼaytikoʼob joonaj joonajil bey xan ken u beetoʼob revisitaʼob. Juntúul kiikeʼ ku yaʼalik: «Bejlaʼeʼ maas chéen chʼaʼabil k-kʼaʼaytik u Tʼaan Dios tiʼ le máakoʼoboʼ. Teʼ kʼiin t-kʼamoʼ tin pʼataj junpʼéel tiʼ juntúul máakiʼ».

¿Bix u kʼaʼaytik le sukuʼunoʼob u libroil Mateooʼ? Yaʼab japoniloʼobeʼ suuk u meyajtiʼob tʼaanoʼob jeʼex «junpuliʼ maʼ a sen chiʼichnaktaleʼex yoʼolal u kʼiinil sáamal», «[maʼ] a pulkeʼex a perlaʼex tu táan kʼéekʼenoʼob» yéetel «le nuʼunutʼ joonajoʼ» (Mat. 6:34; 7:6, 13). Le máakoʼoboʼ ku jaʼakʼal u yóoloʼob ken u yuʼuboʼob Jesús aʼalmil le tʼaanoʼobaʼ. Ken u yojéeltoʼob tiaʼan tu Evangelioil Mateoeʼ, jujuntúuloʼobeʼ ku yaʼalikoʼob: «Úuch taakak in xokik le Biblia kex chéen juntéenoʼ».

Ken suunak le sukuʼunoʼob u xíimbaltoʼob le máaxoʼob tu kʼamoʼob u libroil Mateooʼ, ku yilkoʼobeʼ yanoʼobeʼ tsʼoʼok u káajsik u xokikoʼob wa hasta tsʼoʼok u láaj xokikoʼob. Juntúul nojoch máak yaan kex 60 años tiʼeʼ tu yaʼalaj tiʼ juntúul sukuʼun: «Yaʼab u téenel tsʼoʼok in xokik yéetel tsʼoʼok u jach líiʼsik in wóol. ¿Jeʼel wa u páajtal a maas kaʼansikten baʼax ku yaʼalik le Bibliaoʼ?».

Le libroaʼ táan xan u meyaj utiaʼal u yúuchul kʼaʼaytaj teʼ tuʼux yaʼab u máan máakoʼoboʼ. Juntúul kiik táan u kʼaʼaytaj tuʼux yaʼab u máan máakeʼ tu tsʼáaj u correo electrónico tiʼ juntúul x-chʼúupal tu kʼamaj le libroaʼ. Junpʼéel hora u pʼateʼ, le x-chʼúupaloʼ tu túuxtaj junpʼéel correo tiʼ yéetel tu yaʼalajtiʼeʼ tsʼoʼok u káajal u xokik yéetel taak u seguer u kaanbal. Ka máan junpʼéel semanaeʼ káaj u tsʼaʼabal xook tiʼ yéetel maʼ xáanchaj ka káaj u bin muchʼtáambaliʼ.

Le múuchʼuliloʼob yaan Japonoʼ tsʼoʼok u túuxtaʼaltiʼob maas tiʼ junpʼéel millón seiscientos mil copiaʼob tiʼ le libro Le Bibliaoʼ: u Evangelioil Mateo. Yéetel cada meseʼ ku tʼoxkoʼob u milesiliʼ. Tu tʼaaniloʼob u káajbal le libroaʼ ku yaʼalik baʼaxten beetaʼabi, ku yaʼalik: «K-kʼáat óoltik ka áantajnak le libro utiaʼal u maas kaanbal le máakoʼob tiʼ le baʼax ku yaʼalik le Bibliaoʼ».