TU AÑOIL 1870, u chan múuchʼ máakoʼob yanoʼob Allegheny, yaan bejlaʼa Pittsburgh Pensilvaniaeʼ, káaj u xokikoʼob le Bibliaoʼ. Ka káajoʼobeʼ Charles Russell nuʼuktikoʼob, letiʼobeʼ tu xakʼaltoʼob le kaʼansaj ku tʼaan tiʼ u kuxtal Jesús tu kʼubaj t-oʼolaloʼ yéetel baʼax yaan u yil yéetel baʼax u tukulmaj Jéeoba utiaʼal le Luʼumaʼ. ¡Jach wal kiʼimakchaj u yóoloʼob ka tu kanoʼob u kuxtal Jesús tu kʼuboʼ ku tsʼáaik u páajtalil u salvarkuba tak le máaxoʼob mix juntéen u yuʼuboʼob u yúuchul tʼaan tiʼ letiʼoʼ! Yoʼolal le baʼax tu kanoʼobaʼ káaj u kʼiinbeskoʼob u kʼiinil kíimik Jesús (1 Cor. 11:23-26).

Russelleʼ káaj u jóoʼsik le revista Zionʼs Watch Toweroʼ, teʼ revistaaʼ tu yaʼaleʼ u kuxtal Jesús tu kʼuboʼ ku yeʼesik le nojoch yaabilaj ku yuʼubik Dios t-oʼolaloʼ. Tu yaʼalaj xaneʼ u kʼiiniloʼob le Kʼaʼajsajiloʼ «junpʼéel temporada especial», le oʼolal tu líiʼsaj u yóol le máakoʼob xokik utiaʼal ka u kʼiinbesoʼob tu kaajil Pittsburgh wa jeʼel tuʼuxak ka yanakoʼobeʼ yéetel kex chéen junpʼíitoʼob. Tu yaʼalaj xaneʼ «kex tak chéen kaʼatúul wa óoxtúul máakoʼob junpʼéeliliʼ baʼax ku creertikoʼob ka u muchʼubaʼob» wa kex chéen juntúuleʼ, maʼalob baʼax ku beetkoʼob tumen «jach tu jaajil junmúuchʼ yaniloʼob yéetel Yuumtsil».

Cada añoeʼ bin u maas yaʼabtal máaxoʼob ku binoʼob teʼ Kʼaʼajsajil tu kaajil Pittsburghoʼ. Le invitación beetaʼaboʼ ku yaʼalik: «Wayeʼ yaan a wilik máaxoʼob utsoʼob yéetel jach yaan u kiʼimaktal a wóol». Le j-Xoknáaloʼob tiʼ le Biblia yanoʼob kaʼach teʼ bandaoʼ ku kʼamkoʼob le sukuʼunoʼob tu yotochoʼoboʼ yéetel ku tsʼáaikoʼob baʼal u jaant le máaxoʼob náach u taaloʼoboʼ. Tu añoil 1886, óoliʼ tu kʼiiniloʼob le Kʼaʼajsajiloʼ anchaj junpʼéel nojoch muchʼtáambal xáanchaj jujunpʼéel kʼiinoʼob. Le revista Watch Toweroʼ tu yaʼalaj: «Ken taalakecheʼ chup a puksiʼikʼal yéetel yaabilaj tu yoʼolal Yuumtsil, a sukuʼunoʼob yéetel tu yoʼolal le jaajiloʼ».

Le j-Xoknáaloʼob tiʼ le Bibliaoʼ máan yaʼab años táan u beetkoʼob asambleaʼob tu kaajil Pittsburgh utiaʼal le máaxoʼob ku binoʼob teʼ Kʼaʼajsajil tumen jach yaan u fejoʼob tiʼ u kuxtal Jesús tu kʼuboʼ. Letiʼobeʼ jujunpʼíitil úuchik u bin u yaʼabtaloʼob. Tsʼoʼoleʼ joʼopʼ u maas yaʼabtal tuʼuxoʼob ku beetaʼal le Kʼaʼajsajiloʼ yéetel joʼopʼ u maas yaʼabtal le máaxoʼob ku binoʼoboʼ. Ray Bopp, juntúul máax yaan ichil le eclesia (wa ichil le múuchʼuliloʼ) yaan tu kaajil Chicagooʼ, tu yaʼaleʼ desde tu añoil 1910, teʼ Kʼaʼajsajiloʼ ku bisik yaʼab horaʼob u máansaʼal le waaj yéetel le vino ichil le u cientosil máakoʼob ku binoʼoboʼ, tumen óoliʼ tuláakal máax jaantik le waaj yéetel ukʼik le vinooʼ.

¿Baʼax yéetel ku beetaʼal kaʼach le waaj yéetel le vinooʼ? Kex ojéelaʼan tu Ookʼin Janal Yuumtsil meyajnaj vino tiʼ Jesuseʼ, ichil junpʼéel tiempoeʼ le revista Watch Toweroʼ tu yaʼaleʼ maas maʼalob ka meyajnak u kʼaab uva wa chakbil pasitas utiaʼal maʼ u taaktal u yuʼukʼul tumen le máaxoʼob séeb jeʼel u kaʼa lúubloʼob tiʼ káaltalileʼ. Chéen baʼaleʼ yaan xan vino utiaʼal le máaxoʼob ku tuklikoʼob le unaj u meyaj utiaʼal le Kʼaʼajsajiloʼ. Ka máan kʼiineʼ le j-Xoknáaloʼob tiʼ le Bibliaoʼ tu naʼatoʼobeʼ le baʼax unaj u meyaj utiaʼal u chíikbesik u kʼiʼikʼel Jesusoʼ letiʼe vino maʼ xaʼakʼtaʼan yéetel mix baʼaloʼ.

 Le Kʼaʼajsajiloʼ ku beetik u tuklik máak baʼax u kʼáat u yaʼal u kuxtal Cristo tu kʼuboʼ. Pero tiʼ jujunpʼéel múuchʼulileʼ le táan le discursooʼ tuláakal le máaxoʼob yanoʼoboʼ lubaʼan u yóoloʼob yéetel ken tsʼoʼokok le Kʼaʼajsajiloʼ ku láaj binoʼob, mix baʼal ku yaʼalikoʼob. Le oʼolal le libro Jehová jóoʼsaʼab 1934, tu yaʼaleʼ le Kʼaʼajsajiloʼ maʼ unaj «yaachajaʼan u yóol máak» táan u kʼiinbesikiʼ, baʼaxeʼ unaj u kʼiinbesaʼal yéetel «kiʼimak óolal». Tsʼoʼoleʼ maʼ unaj u chʼíikiloʼob chéen tuukul tiʼ úuchik u kíimsaʼal Jesusiʼ, baʼaxeʼ tiʼ úuchik u káajal u gobernar tu añoil 1914.

Tu añoil 1935, ilaʼab máax le «junmúuchʼ yaʼabkach máakoʼob» ku yaʼalik Apocalipsis 7:9. Lelaʼ tu beetaj u kʼexpajal bix u yilaʼal le Kʼaʼajsajiloʼ. Tumen kaʼacheʼ ku yaʼalaʼaleʼ le máakoʼob u kʼubmaj u kuxtaloʼob tiʼ Jéeobaoʼ chéen junmúuchʼoʼob, pero maʼ u tsʼaamaj u yóoloʼob kʼaʼaytajiʼ. Chéen baʼaleʼ 1935, kʼuch naʼatbileʼ maʼ chéen junmúuchʼoʼobiʼ, baʼaxeʼ u milesil máakoʼob u tsʼaamaj u yóol u meyajtoʼob Dios yéetel táan u páaʼtik u kuxtaloʼob way Luʼumeʼ. Maʼ úuch tiʼ lelaʼ le sukuʼun Russell Poggenseeoʼ, tu yaʼalaj: «Jéeobaeʼ maʼ meyajnaktiʼ u kiliʼich muukʼ utiaʼal u beetik u taaktal in bin kaʼaniʼ». Letiʼ bey xan uláakʼ sukuʼunoʼobeʼ xuʼul u jaantkoʼob le waaj yéetel u yukʼikoʼob le vinooʼ, pero maʼ xuʼul u binoʼob teʼ Kʼaʼajsajiloʼ.

Tu temporadail le Kʼaʼajsajiloʼ ku chʼaʼtuklaʼal u maas kʼaʼaytaʼal le maʼalob péektsiloʼ, beyoʼ le máaxoʼob ku táakpajloʼoboʼ ku yeʼeskoʼob jach kʼaʼanaʼan u yilkoʼob u kuxtal Jesús tu kʼuboʼ. Tu añoil 1932, le Bulletinoʼ tu yaʼaleʼ le cristianoʼoboʼ maʼ unaj u yaʼalaʼaltiʼob «u kiliʼichiloʼob le Kʼaʼajsajiloʼ» tumen maʼatech u jóokʼloʼob kʼaʼaytaj, chéen ku binoʼob teʼ muchʼtáambaloʼ. Letiʼobeʼ unaj kaʼach «u tsʼaamaj u yóoloʼob meyaj», kʼaʼabéet u tsʼáaik u yóol u kaʼansoʼob baʼax ku yaʼalik le Bibliaoʼ. Tu añoil 1934, le Bulletinoʼ tu beetaj le kʼáatchiʼaʼ: «¿Yaan wa k-chukik mil u túulaloʼon tu temporadail le Kʼaʼajsajiloʼ?», le Bulletinoʼ tu yaʼaleʼ jach kʼaʼabéet «precursor auxiliaroʼob» utiaʼal le kʼaʼaytajoʼ. Tsʼoʼoleʼ ka tʼaanaj tu yoʼolal le yéeyaʼanoʼoboʼ, le Informadoroʼ tu yaʼalaj: «Maas yaan u kiʼimaktal u yóoloʼob wa ku kʼaʼaytikoʼob le Reinooʼ». * Ka máan kʼiineʼ le máaxoʼob kun pʼáatloʼob kuxtal way Luʼumoʼ láayliʼ kiʼimakchaj u yóoloʼob úuchik u kʼaʼaytikoʼob le Reinooʼ.

Utiaʼal le j-Jaajkunajoʼoboʼ, le Kʼaʼajsajiloʼ letiʼe baʼax maas kʼaʼanaʼan ichil le añooʼ. Le beetkeʼ kex maʼ chéen chʼaʼabileʼ ku yilik u binoʼob. Tu añoil 1930, Pearl English yéetel Ora, u kiikeʼ, tu xíimbaltoʼob 20 leguas (80 kilómetros) utiaʼal u binoʼob teʼ Kʼaʼajsajiloʼ. Ka kʼaʼal tu carcelil China le sukuʼun Harold Kingoʼ tu tsʼíibtaj poemaʼob yéetel kʼaayoʼob tu yoʼolal le Kʼaʼajsajiloʼ, utiaʼal u beetik le waajoʼ meyajnajtiʼ arroz yéetel utiaʼal u beetik le vinooʼ meyajnajtiʼ box grosellas. Tsʼoʼoleʼ le sukuʼunoʼob yanoʼob Europa del Este, Centroamérica yéetel Áfricaoʼ tsʼoʼok u kʼiinbeskoʼob le Kʼaʼajsajil kex táan guerra wa táan u chʼaʼpachtaʼaloʼoboʼ. Kex jeʼel tuʼuxak kajaʼanoʼon wa kex maʼ chéen chʼaʼabil le kuxtal tuʼux kajaʼanoʼonoʼ, tuláakloʼon k-tsʼáaik nojbeʼenil tiʼ Jéeoba yéetel Jesús tu temporadail le Kʼaʼajsajiloʼ.