KA TSʼOʼOK u yokjaʼ Andreaeʼ, * káaj u sen pʼuʼujul u yíicham. Andreaeʼ ku yaʼalik: «Letiʼeʼ maʼ tu chaʼik kaʼach in bin muchʼtáambal tsʼoʼoleʼ tu prohibirtajten in waʼalik u kʼaabaʼ Dios. Tak chéen ka u yuʼub in waʼalik u kʼaabaʼ Jéeobaeʼ, ku pʼuʼujul».

Maʼ chéen chʼaʼabil úuchik u kaʼansik Andrea tiʼ u paalal baʼaxoʼob ku yaʼalik Jéeobaiʼ. Letiʼeʼ ku yaʼalik: «Tin wotocheʼ prohibirtaʼan kaʼach in adorartik Jéeoba. Le oʼolal kin taʼakikinba utiaʼal in kaʼansik tiʼ in paalal le baʼax ku yaʼalik le Bibliaoʼ, tsʼoʼoleʼ maʼ tu páajtal mix in biskoʼob muchʼtáambal».

Le baʼax úuch tiʼ Andreaoʼ ku yeʼesikeʼ junpʼéel tiʼ le baʼaxoʼob jeʼel u beetik maʼ u chúukpajal u yóol máakeʼ letiʼe u prohibirtaʼal toʼon k-meyajtik Dios tumen juntúul k-láakʼtsiloʼ. Uláakʼ baʼaloʼob jeʼel u beetkoʼob maʼ u chúukpajal k-óoleʼ, letiʼe kʼojaʼaniloʼoboʼ, u kíimil juntúul k-hijo wa k-núup bey xan le u xuʼulul u meyajtaʼal Jéeoba tumen juntúul k-láakʼtsiloʼ.

¿Baʼax jeʼel u yáantkoʼon utiaʼal k-aktáantik le baʼaloʼob tsʼoʼok k-aʼalikaʼ? Le apóstol Pablooʼ, tu yaʼalaj: «Kʼaʼabéet u chúukpajal a wóoleʼex» (Heb. 10:36). ¿Baʼax jeʼel u yáantkoʼon utiaʼal ka chúukpajak k-óoleʼ?

Le oracionoʼ jeʼel u yáantkoʼon utiaʼal u chúukpajal k-óoleʼ. Lelaʼ bey u yeʼesik le baʼax úuch tiʼ Ana utiaʼal junpʼéel lunes de tardeoʼ. U yíicham, le máax yéetel tsʼoʼok treinta años tsʼoʼokok u beeloʼ chéen de repente ka kíimi. Anaeʼ ku yaʼalik: «Le ka bin tu meyajeʼ maʼ kaʼa suunajiʼ, tsʼoʼoleʼ chéen 52 años yaantiʼ».

¿Bix úuchik u aktáantik Ana le baʼax úuchtiʼoʼ? Letiʼeʼ anchaj u kaʼa okol meyaj, lelaʼ le áante tumen teʼ meyaj ku beetkoʼ minaʼan kaʼach tiempo utiaʼal u tuukul tiʼ yaanal baʼal. Kex beyoʼ maʼ xuʼul u muʼyaj yoʼolal le baʼax úuchtiʼoʼ. Letiʼeʼ ku yaʼalik: «Tin waʼalaj tiʼ Jéeoba jach baʼax kin muʼyajtik yéetel tin kʼáat óoltaj tiʼ ka u yáanten». ¿Uʼuyaʼab wa u oración tumen Jéeoba? Anaeʼ u yojel uʼuyaʼabi. Letiʼeʼ ku yaʼalik: «Le jeetsʼelil ku taal tiʼ Diosoʼ jach tu yáanten tumen wa maʼeʼ jeʼel kaʼach u chokotal in pooleʼ. Teneʼ jach in wojel yaan u kaʼa kuxkíintaʼal in wíicham tumen Jéeoba» (Fili. 4:6, 7).

Le Dios ku yuʼubik k-oracionoʼ u yaʼalmaj yaan u yáantik le máaxoʼob meyajtik utiaʼal u chúukpajal u yóoloʼob tiʼ letiʼoʼ (Sal. 65:2). ¿Máasaʼ lelaʼ ku yeʼesikeʼ Dioseʼ maʼ ken u pʼatoʼon t-juunal? ¿Máasaʼ ku yáantkoʼon xan k-il tak toʼon jeʼel u chúukpajal k-óol kex yaan baʼax k-aktáantikeʼ?

Jéeobaeʼ jach ku yáantkoʼon xan yéetel le múuchʼuliloʼ. Teʼ yáax siglo le ka chʼaʼpachtaʼab le sukuʼunoʼob yaan Tesalónicaoʼ, le apóstol Pablooʼ tu yaʼalajtiʼob: «Seguernak a paklan líiʼsik a wóoleʼex yéetel a paklan muʼukʼaʼankúuntik a wóoleʼex jach jeʼex táan a beetkeʼexoʼ» (1 Tes. 2:14; 5:11). Le sukuʼunoʼobaʼ páajchaj u chúukpajal u yóoloʼob kex táan u chʼaʼpachtaʼaloʼob tumen jach tu yaabiltubaʼob yéetel tu paklan áantubaʼob. Le baʼax tu beetoʼoboʼ ku kaʼansiktoʼon baʼax unaj k-beetik utiaʼal u chúukpajal k-óol.

K-bisikba yéetel le sukuʼunoʼob teʼ múuchʼuliloʼ jeʼel u yáantkoʼon utiaʼal k-beetik «le baʼaxoʼob ku meyajoʼob utiaʼal u paklan líiʼsik u yóol máakoʼ» (Rom. 14:19). Lelaʼ maases kʼaʼabéet k-beetik wa jach yaj baʼax ku yúuchultoʼon. Pabloeʼ yaʼab baʼaxoʼob tu muʼyajtaj, pero Jéeoba áant utiaʼal u chúukpajal u yóol. Yaan horaeʼ tiʼ Jéeobaeʼ meyajnaj le sukuʼunoʼob yanoʼob teʼ múuchʼulil utiaʼal u líiʼsik u yóol Pablooʼ. Juntéenjeak ka tu túuxtaj saludos Pablo tiʼ le sukuʼunoʼob yanoʼob Colosasoʼ, tu yaʼalaj: «Letiʼobeʼ jach tsʼoʼok u líiʼskoʼob in wóol» (Col. 4:10, 11). Le yaabilaj tu yuʼubaj le sukuʼunoʼob yoʼolal Pablooʼ le péeksoʼob utiaʼal u líiʼskoʼob u yóol yéetel u yáantkoʼob le ka kʼaʼabéetchajtiʼoʼ. Maʼ xaaneʼ techeʼ tsʼoʼok xan a wáantaʼal yéetel u líiʼsaʼal a wóol tumen le sukuʼunoʼob teʼ múuchʼuliloʼ.

Jéeobaeʼ ku yáantkoʼon xan yéetel le ancianoʼob yanoʼob teʼ múuchʼuliloʼ. Le sukuʼunoʼobaʼ ‹bíin béeyakoʼob bey taʼakbesajil tiʼ iikʼ yéetel tiʼ chak ikʼaleʼ, bey u bejiloʼob luʼum utiaʼal u yúuchul jóoyab tiʼ tikin luʼumeʼ, bey u boʼoy junpʼéel nojoch tuunich tu chúumuk desiertoeʼ› (Isa. 32:2). ¿Máasaʼ jach ku líiʼsik k-óol k-ojéeltik lelaʼ? ¿Tsʼoʼok wa a jóoʼsik u yutsil le áantaj ku tsʼáaik le ancianoʼoboʼ? Le áantaj ku tsʼáaikoʼoboʼ jach jeʼel u yáantkech utiaʼal u chúukpajal a wóoleʼ.

U jaajileʼ le ancianoʼoboʼ maʼatech u beetkoʼob milagroʼob. Letiʼobeʼ j-kʼeban máakoʼob yéetel ‹ku muʼyajoʼob jeʼex k-muʼyajoʼ› (Bax. 14:15). Kex beyoʼ jach ku yáantkoʼon ken orarnakoʼob t-oʼolal (Sant. 5:14, 15). Juntúul sukuʼun italiano, máan yaʼab años táan u muʼyajtik junpʼéel kʼojaʼanil ku kʼaabaʼtik distrofia musculareʼ, ku yaʼalik: «Le ancianoʼoboʼ ku taal u xíimbaltenoʼob yéetel jach u yaabiltmenoʼob, lelaʼ tsʼoʼok u yáantken utiaʼal u chúukpajal in wóol». Jeʼex túun k-ilkoʼ Jéeobaeʼ u tsʼaamaj le ancianoʼob utiaʼal ka u yáantoʼonoʼoboʼ.

Yaan uláakʼ baʼaloʼob jeʼel u yáantkoʼon utiaʼal u chúukpajal k-óoleʼ. Junpʼéeleʼ letiʼe maʼ u xuʼulul k-tsʼáaik k-óol k-meyajt Jéeobaoʼ. Koʼox ilik baʼax úuch tiʼ Juan, letiʼeʼ 39 años yaantiʼ ka aʼalaʼab yaan cáncer tiʼ. Ka aʼalaʼab yaan le kʼojaʼanil tiʼaʼ, tu yaʼalaj: «Baʼaxten tiʼ teen, si jach jovenen todavía». Teʼ kʼiinoʼob jeʼeloʼ Juaneʼ yaan juntúul u chan hijo de tres años. Juaneʼ ku yaʼalik: «In wataneʼ aparte tiʼ u kanáantik in hijoeʼ kʼaʼabéet xan u kanáantken yéetel u bisken tin consultaʼob». Juaneʼ ken tsʼaʼabak quimioterapias tiʼeʼ ku lúubul u muukʼ yéetel maʼ tu xuʼulul u taakil u xej. U tsʼookeʼ u papá Juaneʼ jach tsʼoʼok kaʼach u tʼúubul u kʼojaʼanil yéetel kʼaʼabéet kaʼach u kanáantaʼal.

¿Baʼax áant Juan yéetel u familia utiaʼal u chúukpajal u yóol? Letiʼeʼ ku yaʼalik: «Kex yaan hora jach minaʼan in muukʼeʼ kin wilik maʼ u xuʼulul k-tsʼáaik k-óol k-meyajt Jéeoba. Toʼoneʼ k-bin tiʼ tuláakal le muchʼtáambaloʼoboʼ, cada semana k-jóokʼol kʼaʼaytaj yéetel k-ilik u yantaltoʼon le Adoración ich Familiaoʼ». Juaneʼ tu tsʼáaj cuentaeʼ junpʼéel baʼax áant utiaʼal u chúukpajal u yóoleʼ letiʼe maʼ u xuʼulul u meyajtik Jéeobaoʼ. ¿Yaan wa baʼax consejoil ku tsʼáaik Juan tiʼ le máaxoʼob táan u muʼyajoʼob yoʼolal wa baʼaxoʼ? Letiʼeʼ ku yaʼalik: «Ken tsʼoʼokok u yaʼalaʼaltech yaantech wa baʼax kʼojaʼanileʼ maʼ tu páajtal a creertik yéetel yaʼab baʼaloʼob ku máan ta tuukul, pero ken tsʼoʼokkeʼ le yaabilaj ku yeʼesiktoʼon Jéeoba yéetel le muukʼ ku tsʼáaiktoʼonoʼ ku beetik u jéetsʼel k-tuukul. Jéeobaeʼ jeʼel u yáantkech utiaʼal ka chúukpajak a wóol jeʼex úuchik u yáantkenoʼ».

Jeʼex tsʼoʼok k-ilkoʼ Jéeobaeʼ jeʼel u yáantkoʼon utiaʼal u chúukpajal k-óol k-aktáant jeʼel baʼaxakeʼ. Unaj k-orar tiʼ Jéeoba, unaj k-bisikba yéetel le sukuʼunoʼob yaan teʼ múuchʼuliloʼ, unaj k-kʼáatik áantaj tiʼ le ancianoʼoboʼ yéetel maʼ unaj u xuʼulul k-tsʼáaik k-óol k-meyajt Jéeobaiʼ. Wa k-beetik beyoʼ yaan u chúukpajal k-óol jeʼex tu yaʼalil le apóstol Pablooʼ.