1. ¿Bix u meyajtoʼon teʼ kʼaʼaytaj le oración ku chíikpajal tiʼ Mateo 6:9 tak 13?

YAʼAB máakeʼ u yojel u oracionil le padrenuestro ku chíikpajal tiʼ Mateo 6:9 tak 13. Le oracionaʼ suuk u meyajtoʼon utiaʼal k-kʼaʼaytaj bey xan utiaʼal k-kaʼansik tiʼ le máakoʼoboʼ u Reino Dioseʼ junpʼéel gobierno ken u sut Paraísoil le Luʼumaʼ. Tsʼoʼoleʼ k-eʼesik xan tiʼobeʼ kʼaʼabéet u ‹kiliʼichkúuntaʼal wa u santificartaʼal u kʼaabaʼ› Dios (Mat. 6:9, tsolajil).

2. Jesuseʼ, ¿tu kaʼansaj wa unaj k-kanik de memoriail baʼax ken k-aʼal ichil k-oración?

² Jesuseʼ, ¿tu kaʼansaj wa unaj k-kanik de memoriail u oracionil le padrenuestro jeʼex u beetik yaʼab máakoʼoboʼ? Maʼatech, letiʼeʼ tu yaʼalaj: «Ken orarnakech túuneʼ maʼ a babal aʼalik junpʼéeliliʼ baʼal» (Mat. 6:7). Uláakʼ juntéen ka tu kaʼansaj tiʼ u disipuloʼob bix unaj u oraroʼobeʼ meyajnajtiʼ u oracionil le padrenuestrooʼ, pero yaanal tʼaanoʼob meyajnajtiʼ (Luc. 11:1-4). Jeʼex túun k-ilkoʼ Jesuseʼ maʼ tu yaʼalaj ka k-kan de memoriail  u oracionil le padrenuestrooʼ, baʼaxeʼ tu kaʼansaj baʼaxoʼob jeʼel u páajtal k-kʼáatik ken orarnakoʼoneʼ.

3. ¿Tiʼ baʼax kʼáatchiʼiloʼob unaj k-tuukul le táan k-xakʼaltik le xookaʼ?

³ Teʼ xook bey xan tiʼ le ku segueroʼ yaan k-xakʼaltik u oracionil le padrenuestrooʼ. Le táan k-xakʼaltikoʼ maʼalob ka tuukulnakoʼon tiʼ le kʼáatchiʼobaʼ: «U oracionil le padrenuestrooʼ, ¿bix jeʼel u yáantken utiaʼal in maas maʼalobkíintik bix in orareʼ? ¿Táan wa in tsʼáaik ichil in kuxtal le baʼax ku kaʼansik le oracionaʼ?».

4. 1) ¿Baʼax ku kʼaʼajsiktoʼon le tʼaan ‹k-Taataoʼ›? 2) ¿Bix u kʼuchul u beetuba k-Taata Jéeoba?

⁴ Ka tu káajsaj u oracionil le padrenuestrooʼ, Jesuseʼ tu yaʼalaj: «K-Taata». Lelaʼ ku kʼaʼajsiktoʼoneʼ Jéeobaeʼ u Taata tuláakal le sukuʼunoʼob yéetel kiikoʼob yanoʼob tuláakal yóokʼol kaaboʼ (1 Ped. 2:17). Le sukuʼunoʼob yéeyaʼanoʼob utiaʼal u binoʼob kaʼanoʼ yaan u máataʼaloʼob tumen Jéeoba utiaʼal ka kʼuchuk u beetubaʼob u paalal (Rom. 8:15-17). Le máaxoʼob kun pʼáatloʼob kuxtal way Luʼumoʼ yaan xan u páajtal u yaʼalikoʼob tiʼ Jéeoba ‹Taata›, tumen letiʼ tsʼaamil u kuxtaloʼob yéetel ku tsʼáaik baʼax kʼaʼabéettiʼob. Chéen baʼaleʼ yaan u kʼuchul u beetubaʼob «u paalal Dios» tak ken tsʼoʼokok u pʼáatal minaʼan u kʼebanoʼob yéetel wa ku chúukpajal u yóoloʼob tiʼ Jéeoba ken tsʼoʼokok le Mil añosoʼ (Rom. 8:21; Apo. 20:7, 8).

5, 6. ¿Baʼax jach kʼaʼabéet u kaʼansik le taatatsiloʼob tiʼ u paalaloʼoboʼ, yéetel baʼax unaj u beetik cada hijotsil? (Ilawil le foto yaan tu káajbal le xookaʼ.)

⁵ Le taatatsiloʼoboʼ unaj u kaʼansik u paalaloʼob orar utiaʼal ka u yiloʼob Jéeoba bey juntúul taatatsileʼ. Juntúul superintendente tiʼ circuito yaan tu luʼumil Sudáfricaeʼ, ku yaʼalik: «Desde le kʼiin ka síij k-hijaʼobeʼ sáamsamal kin orar tu yéeteloʼob de noche, chéen jaʼaliʼ wa maʼ kulaʼanen ku pʼáatal maʼ in orar tu yéeteloʼobeʼ. In hijaʼobeʼ ku yaʼalikoʼobeʼ maʼ kʼajaʼantiʼob baʼax kin waʼalik ken orarnakeniʼ. Chéen baʼax kʼajaʼantiʼobeʼ le oracionoʼ jach kʼaʼabéet yéetel jatsʼuts kaʼach u yilkoʼob u oraroʼob tiʼ Jéeoba, tumen ku yuʼubikoʼob kanáantaʼanoʼob. Chéen pʼel úuchik u páajtal u oraroʼob tu juunaloʼobeʼ, tin waʼalajtiʼob ka orarnakoʼob utiaʼal ka in wuʼuy baʼax ku tuklikoʼob yoʼolal Jéeoba bey xan wa u yaabiltmoʼob. Lelaʼ tu yáanten in wil baʼax yaan tu tsʼuʼ u puksiʼikʼaloʼob. Yoʼolal lelaʼ páajchaj xan in kaʼansiktiʼobeʼ jeʼel u páajtal u yaʼalikoʼob ichil u oracionoʼob uláakʼ baʼaloʼob ku chʼaʼchiʼitaʼal ichil le padrenuestrooʼ, beyoʼ ken orarnakoʼobeʼ u yojloʼob baʼax ken u yaʼaloʼob».

⁶ U hijas le sukuʼunaʼ seguernaj u yaabiltikoʼob Jéeoba tak ka nuukchajoʼob. Bejlaʼeʼ tsʼokaʼan u beeloʼob yéetel u tsʼaamaj u yóol u meyajtoʼob Jéeoba yéetel u yíichamoʼob. Jeʼex túun k-ilkoʼ le taatatsiloʼoboʼ jach kʼaʼabéet u kaʼanskoʼob tiʼ u paalal u creertoʼob yaan Dios yéetel u yiloʼob bey u amigoʼobeʼ. Chéen baʼaleʼ cada hijotsil unaj u yilik u kanáantik maʼ u xuʼulul u yaabiltik Jéeoba (Sal. 5:11, 12; 91:14).

7. 1) ¿Baʼax jatsʼuts privilegioil yaantoʼon? 2) ¿Baʼax maʼ unaj k-beetkiʼ?

⁷ Toʼoneʼ yaantoʼon u jatsʼuts privilegioil k-ojéeltik u kʼaabaʼ Dios yéetel k-antal ichil le «kaaj bisik u kʼaabaʼoʼ» (Bax. 15:14; Isa. 43:10). Toʼoneʼ k-orar tiʼ Jéeoba  utiaʼal ka «kiliʼichkúuntaʼak [u] kʼaabaʼ». Unaj xan k-kʼáatiktiʼ ka u yáantoʼon utiaʼal maʼ k-aʼalik wa k-beetik junpʼéel baʼal jeʼel u taasik suʼtsilil tiʼ u kʼaabaʼeʼ. Toʼoneʼ maʼ k-kʼáat k-beet jeʼex jujuntúul máakoʼob teʼ yáax siglooʼ, tumen letiʼobeʼ maʼ tu beetoʼob baʼaxoʼob ku kaʼanskoʼobiʼ. Le apóstol Pablooʼ tu yaʼalaj: «Ta woʼolaleʼexeʼ le j-táanxel luʼumiloʼoboʼ táan u pochʼkoʼob u kʼaabaʼ Dios» (Rom. 2:21-24).

8, 9. Aʼal junpʼéel baʼax eʼesik Jéeobaeʼ ku yáantik le máaxoʼob kiliʼichkúuntik u kʼaabaʼoʼ.

⁸ Tiʼ tuláakal baʼax k-beetkeʼ k-ilik k-kiliʼichkúuntik u kʼaabaʼ Jéeoba. Juntúul kiik kajaʼan Noruega yéetel dos años yaan tiʼ u hijo ka kíim u yíichameʼ, tu yaʼalaj: «Jach muʼyajnajen ka kíim in wíicham. Sáamsamal yéetel óoliʼ láaj hora tin orar kaʼach tiʼ Jéeoba utiaʼal ka u yáanten in aguantart le baʼax kin muʼyajtikoʼ. Teneʼ in kʼáat kaʼach in beet baʼax uts tu tʼaan Jéeoba, maʼ in kʼáat kaʼach in beet u paʼajal u suʼtal tumen Satanasiʼ. In kʼáat kaʼach in kiliʼichkúunt u kʼaabaʼ Jéeoba yéetel in kʼáat ka u kʼaj óolt in hijo u papá teʼ Paraísooʼ» (Pro. 27:11).

⁹ ¿Núukaʼab wa u oración le kiikaʼ? Núukaʼabi. U biskuba yéetel le sukuʼunoʼob bey xan le kiikoʼoboʼ le áant utiaʼal u líikʼil u yóol. Ka máan cinco añoseʼ letiʼeʼ kaʼa tsʼoʼok u beel yéetel juntúul anciano. Bejlaʼeʼ u hijoeʼ veinte años yaantiʼ yéetel tsʼoʼok u yokjaʼ. Le kiikoʼ ku yaʼalik: «Jach kiʼimak in wóol tumen in wíichameʼ tu yáanten in líiʼs in hijo».

10. ¿Bix ken u kiliʼichkúuntil u kʼaabaʼ Dios tu chúukaʼanil?

¹⁰ Jéeobaeʼ yaan u xuʼulsik tuláakal le máaxoʼob taasik suʼtsilil tiʼ u kʼaabaʼ yéetel maʼ u kʼáatoʼob antal yáanal u gobernacionoʼ, ken tsʼoʼokok túuneʼ Jéeobaeʼ yaan u kiliʼichkúuntik u kʼaabaʼ tu chúukaʼanil (xok Ezequiel 38:22, 23). Teʼ kʼiinoʼob jeʼeloʼ tuláakal máak kun luʼsbil u kʼeban, tsʼoʼoleʼ tuláakal le wíinikoʼob bey xan le angeloʼoboʼ chéen Jéeoba ken u adorartoʼob yéetel yaan u kiliʼichkúuntikoʼob u kʼaabaʼ. Ken tsʼoʼokkeʼ ‹Dioseʼ yaan u kʼuchul u beetuba tuláakal baʼal utiaʼal tuláakal máak› (1 Cor. 15:28).

11, 12. ¿Baʼax tu yáantaj Jéeoba u naʼat u kaajal tu añoil 1876?

¹¹ Táanil tiʼ u suut Jesús teʼ kaʼanoʼ, u disipuloʼobeʼ tu kʼáatoʼobtiʼ: «Yuumtsil, ¿yaan wa a jel tsʼáaik u Reino Dios tu luʼumil Israel teʼ kʼiinoʼobaʼ?». Jesuseʼ tu yaʼalajtiʼobeʼ maʼ u kʼiinil u yojéeltikoʼob baʼax kʼiin ken káajak u gobernar u Reino Diosiʼ. Tu yaʼalajtiʼobeʼ maas maʼalob ka u tsʼáa u yóoloʼob kʼaʼaytaj (xok Baʼaxoʼob 1:6-8). Chéen baʼaleʼ tu kaʼansajtiʼob ka u kʼáatoʼob ka taalak u Reino Dios yéetel maʼ u náayal u yóoloʼob mientras táan u páaʼtkoʼob. Le oʼolaleʼ tak bejlaʼa táan k-kʼáatik ka taalak le Reinooʼ.

¹² Ka náatsʼ u kʼiinil u káajal u gobernar Jesús teʼ kaʼanoʼ, Jéeobaeʼ tu yáantaj u kaajal u naʼat baʼax kʼiin ken úuchuk. Tu añoil 1876, Charles Russelleʼ tu jóoʼsaj junpʼéel xook tu kʼaabaʼtaj: «¿Baʼax kʼiin ken tsʼoʼokok u kʼiinil le gentiloʼoboʼ?». Teʼeloʼ tu yaʼaleʼ le profecíaʼob tiʼ le «siete jaʼaboʼob» tu yaʼalaj Danieloʼ igual yéetel «le kʼiinoʼob tsʼaʼan tiʼ le kaajoʼob» tu yaʼalaj Jesús tu profecíaoʼ. Le xookoʼ tu tsoleʼ le profecíaʼobaʼ yaan u béeytaloʼob 1914 (Dan. 4:16; Luc. 21:24). *

13. ¿Baʼax úuch 1914, yéetel baʼax tu yeʼesaj le baʼaxoʼob káaj u yúuchloʼ?

 ¹³ Tu añoil 1914, káaj le guerra tu luʼumil Europaoʼ yéetel maʼ xáanchaj ka kʼiʼitpaj tiʼ tuláakal yóokʼol kaabiʼ. Lelaʼ tu beetaj u sen antal wiʼijil. Yéetel le táan u taal u tsʼoʼokol le guerra 1918, anchaj junpʼéel clase seʼen tu kíimsaj maas yaʼab máakoʼob ke le guerraoʼ. Tuláakal le baʼaloʼobaʼ letiʼe «chíikulal» wa le señal tu yaʼalaj Jesusoʼ. Lelaʼ tu yeʼeseʼ Jesuseʼ káaj u reinar 1914 (Mat. 24:3-8; Luc. 21:10, 11). Letiʼeʼ «jóokʼ táan u tsʼáanchaʼatik u enemigoʼob, jóokʼ utiaʼal u tsʼáanchaʼatikoʼob tu chúukaʼanil» (Apo. 6:2). Jesuseʼ tu luʼsaj Satanás yéetel u demonioʼob teʼ kaʼanoʼ ka tu puloʼob way Luʼumeʼ. Bey úuchik u káajal u béeytal le profecíaaʼ: «¡Óotsil tiʼ le Luʼumoʼ bey xan tiʼ le kʼáaʼnáaboʼ!, tumen le Kʼaasilbaʼaloʼ tsʼoʼok u yéemel ta wiknaleʼex yéetel jach pʼujaʼan tumen u yojel chéen junpʼíit kʼiin pʼaataltiʼ» (Apo. 12:7-12).

14. 1) ¿Baʼaxten unaj u seguer k-kʼáatik ka taalak u Reino Dios? 2) ¿Baʼax meyajil kʼaʼabéet k-beetik?

¹⁴ U profecíail le capítulo 12 tiʼ Apocalipsisoʼ, ku yáantkoʼon k-naʼat baʼaxten káaj u yúuchul baʼaloʼob kʼaastak way Luʼum ka káaj u reinar Jesús teʼ kaʼanoʼ. Kex Jesús táan u gobernar teʼ kaʼanoʼ, le yóokʼol kaabaʼ Satanás nuʼuktik. Chéen baʼaleʼ maʼ kun xáantaleʼ Jesuseʼ yaan ‹u tsʼáanchaʼatik Satanás tu chúukaʼanil› yéetel yaan u luʼsik tuláakal baʼax beetik  u muʼyaj máak way Luʼumeʼ. Chéen baʼaleʼ mientras u kʼuchul u kʼiinil u yúuchleʼ, unaj u seguer k-kʼáatik ka taalak u Reino Dios yéetel unaj k-tsʼáaik k-óol k-kʼaʼayt le Reinoaʼ. Tsʼoʼoleʼ unaj k-tsʼoʼokbesik le profecía tu yaʼalaj Jesusaʼ: «U maʼalob péektsilil le Reinoaʼ yaan u kʼaʼaytaʼal tiʼ tuláakal yóokʼol kaab utiaʼal ka ojéeltaʼak tumen u kajnáaliloʼob tuláakal kaajoʼob, ken tsʼoʼokkeʼ letiʼ túun ken taalak u xuul» (Mat. 24:14).

15, 16. ¿Chéen wa yaan yéetel k-kʼáatik ka taalak u Reino Dios? Tsole.

¹⁵ Walajki seis mil añosaʼ, ku beetaʼal baʼax u kʼáat Dios way Luʼumeʼ. Teʼ kʼiinoʼob jeʼeloʼ Jéeobaeʼ tu yaʼaleʼ tuláakal baʼal «sen maʼalob» (Gén. 1:31). Chéen baʼaleʼ Satanaseʼ bin tu contra baʼax ku yaʼalik Dios, desde teʼ kʼiin jeʼeloʼ maas yaʼab máak maʼ tu beetik baʼax maʼalob. Pero teʼ kʼiinoʼobaʼ óoliʼ ocho millones máakoʼob táan u meyajtikoʼob Jéeoba. Letiʼobeʼ maʼ chéen ku kʼáatkoʼob ka beetaʼak baʼax u kʼáat Dios way Luʼumeʼ, baʼaxeʼ ku yilik u beetkoʼob baʼax ku yaʼalik. Ku tsʼáaikoʼob xan ichil u kuxtaloʼob le baʼax ku kaʼansik Diosoʼ yéetel ku kaʼanskoʼob tiʼ uláakʼ máakoʼob baʼax ken u beet u Reino.

¹⁶ Juntúul kiik yaan ochenta años tiʼ, okjaʼanaj 1948 yéetel tu beetaj u misionerail tu luʼumil Áfricaeʼ, tu yaʼalaj: «Teneʼ mantatsʼ kin orar utiaʼal u kʼaʼaytaʼal le maʼalob péektsil tiʼ le máaxoʼob kabal u yóoloʼoboʼ yéetel kin kʼáatik xan ka áantaʼakoʼob u kʼaj óoltoʼob Jéeoba antes u taal le xuʼulsajoʼ. Táanil tiʼ in kʼaʼaytaj tiʼ wa máaxeʼ kin kʼáatik tiʼ Jéeoba ka u tsʼáaten naʼat utiaʼal in kʼuchul tu puksiʼikʼal. Tsʼoʼoleʼ kin kʼáatik xan tiʼ ka u yáantoʼon utiaʼal k-kaʼansik maʼalob le máaxoʼob táan u xookoʼoboʼ». Le kiikaʼ tsʼoʼok u yáantik yaʼab máakoʼob u meyajtoʼob Dios. ¿Yaan wa máaxoʼob a kʼaj óol tsʼoʼok u chʼíijloʼob jach u kʼubmaj u yóoloʼob u meyajtoʼob Jéeoba? (Xok Filiposiloʼob 2:17.)

17. Techeʼ, ¿bix a wuʼuyikaba yoʼolal le baʼaxoʼob ken u beet Dios maʼ kun xáantaloʼ?

¹⁷ Toʼoneʼ yaan k-seguer k-kʼáatik ka beetaʼak baʼax u kʼáat Jéeoba way Luʼumeʼ, tak ken kʼuchuk u kʼiinil u xuʼulsik u enemigoʼob. Ken kʼuchuk le kʼiinaʼ le Luʼumaʼ yaan u suut Paraísoil yéetel u millonesil máakoʼob kun kaʼa kuxkíintbiloʼob. Jesuseʼ tu yaʼaleʼ «yaan u kʼuchul u kʼiinileʼ, tuláakal le máaxoʼob yanoʼob ichil le muknaloʼoboʼ yaan u yuʼubikoʼob u tʼaan yéetel yaan u jóokʼloʼob» (Juan 5:28, 29). ¡Chéen tukult bukaʼaj kun kiʼimaktal k-óol ken k-il u kaʼa kuxkíintaʼal le máaxoʼob k-yaabiltmoʼ! Tsʼoʼoleʼ Dioseʼ «yaan xan u choʼik tuláakal u jaʼil u yich» wíinik (Apo. 21:4). Ichil le máaxoʼob kun kaʼa kuxkíintbiloʼoboʼ táakaʼan «le kʼasaʼanoʼob» wa le máaxoʼob junpuliʼ maʼ tu kʼaj óoltoʼob Jéeoba yéetel Jesusoʼ. ¿Máasaʼ jach yaan u kiʼimaktal k-óol ken k-kaʼanstiʼob baʼax uts tu tʼaan Dios utiaʼal ka yanaktiʼob «kuxtal minaʼan u xuul»? (Bax. 24:15; Juan 17:3.)

18. ¿Baʼax óoxpʼéel baʼaloʼob jach kʼaʼabéet tiʼ tuláakal máak?

¹⁸ Maʼ kun xáantaleʼ yaan u taal u Reino Dios, yaan u kiliʼichkúuntaʼal u kʼaabaʼ yéetel tuláakal máak kun adorartik jeʼex u kʼáat letiʼoʼ. Dioseʼ yaan u tsʼáaik le baʼax maas kʼaʼabéet tiʼ máak ken u beet le óoxpʼéel baʼaloʼob k-kʼáatik teʼ padrenuestrooʼ. Teʼ xook ku segueroʼ yaan k-ilik uláakʼ baʼaloʼob tu yaʼalaj Jesús ka k-kʼáat ken orarnakoʼon.