1, 2. 1) Techeʼ, ¿baʼax ka tsʼíiboltik a wilik teʼ Paraísooʼ? (Ilawil le dibujo yaan tu káajbal le xookaʼ.) 2) ¿Baʼax kun maas taasiktoʼon kiʼimak óolal teʼ túumben luʼumoʼ?

TOʼONEʼ jach táan k-páaʼtik le «kuxtal minaʼan u xuuloʼ». Le apóstol Pablooʼ tu yaʼaleʼ letiʼe «kuxtal jach tu jaajil kuxtaloʼ» (xok 1 Timoteo 6:12, 19). Yaʼab tiʼ toʼoneʼ k-ojleʼ le kuxtalaʼ teʼ kun antal teʼ Paraíso way Luʼumoʼ. ¡Chéen tukult bukaʼaj jatsʼutsil wa ken aajkech sáamsamal kiʼimak a wóol yéetel mix baʼal yajtech! (Isa. 35:5, 6.) ¡Chéen tukult xan bukaʼaj kun kiʼimaktal a wóol ken a máans tiempo yéetel a láakʼtsiloʼob, a amigoʼob bey xan le máaxoʼob kun kaʼa kuxkíintbiloʼoboʼ! (Juan 5:28, 29; Bax. 24:15.) Yaan u yantaltech tiempo utiaʼal a kanik a beet túumben baʼaloʼob, tsʼoʼoleʼ le baʼaloʼob a wojel a beet kaʼachoʼ yaan u maas maʼalobtal bix ken a beetil. Maʼ xaaneʼ yaan a maas kanik baʼaloʼob tu yoʼolal le cienciaoʼ, yaan a kanik a pax wa baʼax instrumentoil yéetel yaan a kanik a beet u planosil a wotoch.

² Le baʼaloʼob ken k-il teʼ Paraísooʼ jach jatsʼutstak, chéen baʼaleʼ baʼax kun maas taasiktoʼon kiʼimak óolaleʼ letiʼe k-meyajtik Jéeobaoʼ. ¡Chéen tukult bukaʼaj jatsʼutsil ken eʼesaʼak tsiikil tiʼ u kʼaabaʼ Jéeoba yéetel ken ilaʼak bey Rey tumen tuláakal  máakeʼ! (Mat. 6:9, 10.) Yaan xan u kiʼimaktal k-óol ken k-il bix kun bin u pʼáatal perfectoil tuláakal máak jeʼex u tukultmil Dios desde tu káajbaloʼ. Tsʼoʼoleʼ ken úuchuk lelaʼ yaan u páajtal k-bisikba jach maʼalob yéetel Dios (Sal. 73:28; Sant. 4:8).

3. ¿Baʼaxten unaj k-preparartikba desde bejlaʼeʼ?

³ Toʼoneʼ k-creertik yaan u beetik Jéeoba tuláakal le jatsʼuts baʼaloʼobaʼ, tumen «utiaʼal Dioseʼ tuláakal baʼal jeʼel u páajtaleʼ» (Mat. 19:25, 26). Wa k-kʼáat kuxtal teʼ túumben luʼumoʼ desde bejlaʼa kʼaʼabéet ‹k-chich machikba› tiʼ le kuxtal minaʼan u xuuloʼ. Toʼoneʼ k-ojel jach chéen minaʼan u yorail u taal le xuʼulsajiloʼ, le oʼolal k-eʼesik ichil k-kuxtal táan k-páaʼtik. Kʼaʼabéet k-beetik tuláakal le ku páajtal bejlaʼa utiaʼal k-preparartikba kuxtal teʼ túumben luʼumoʼ. Koʼox ilik bix jeʼel k-beetkeʼ.

4. ¿Bix jeʼel k-preparartikba desde bejlaʼa utiaʼal k-kuxtal teʼ túumben luʼumoʼ? Tsol yéetel junpʼéel ejemplo.

⁴ ¿Bix jeʼel k-preparartikba utiaʼal k-kuxtal teʼ túumben luʼumoʼ? Wa táan k-tuklik k-bin kajtal tiʼ uláakʼ luʼumileʼ yaan u káajal k-ilik jujunpʼéel baʼaloʼob kʼaʼabéet k-beetik. Maʼ xaaneʼ yaan u káajal k-kanik le idioma ku tʼaʼanloʼ, le baʼaxoʼob suuk u beetaʼaloʼ yéetel k-túuntik tak le baʼaxoʼob suuk u jaantaʼaloʼ. Toʼon xaneʼ kʼaʼabéet u káajal k-preparartikba utiaʼal k-kuxtal teʼ túumben luʼumoʼ, junpʼéel bix jeʼel k-beetkeʼ letiʼe ka kuxlakoʼon bey men cuenta tiaʼanoʼonoʼ. Koʼox ilik jujunpʼéel baʼaloʼob jeʼel u páajtal k-beetik desde bejlaʼeʼ.

5, 6. K-beetik baʼax ku yaʼaliktoʼon u kaajal Jéeoba desde bejlaʼeʼ, ¿bix ken u yáantoʼon teʼ túumben luʼumoʼ?

⁵ Teʼ yóokʼol kaabaʼ Satanaseʼ u kʼáat ka k-tukult jeʼel u páajtal k-beetik jeʼel baʼaxak k-kʼáateʼ. Yaʼab máak tuklikeʼ chéen tu juunaloʼob unaj u chʼaʼtuklikoʼob baʼax ken u beetoʼob yéetel maʼ kʼaʼabéet u yuʼubikoʼob u tʼaan Diosiʼ. Chéen baʼaleʼ lelaʼ tsʼoʼok u beetik u muʼyaj yaʼab máak yéetel maʼ kiʼimak u yóoloʼobiʼ (Jer. 10:23). Pero Jéeobaeʼ juntúul Rey jach u yaabiltmoʼon. ¡Bukaʼaj wal jatsʼutsil le kuxtal kun antal teʼ túumben luʼum ken beetaʼak tumen tuláakal máak baʼax uts tu tʼaan Diosoʼ!

⁶ Teʼ túumben luʼumoʼ, toʼoneʼ yéetel kiʼimak óolal ken k-beet baʼax ku yaʼalik Jéeoba, yaan k-áantaj utiaʼal u suʼutul Paraísoil le luʼumaʼ yéetel yaan k-kaʼansik le máaxoʼob kun kaʼa kuxkíintbiloʼoboʼ. Jéeobaeʼ yaan u tsʼáaik yaʼab meyaj k-beete. Pero ¿kux túun wa le máaxoʼob kun nuʼuktikoʼon ku yaʼalikoʼobtoʼon ka k-beet junpʼéel baʼax maʼ uts t-tʼaaniʼ? ¿Yaan wa k-beetik baʼax ku yaʼalikoʼob? ¿Yaan wa a disfrutartik yéetel a tsʼáaik a wóol a beet le meyaj kun tsʼaabiltechoʼ? Utiaʼal k-kuxtal teʼ túumben luʼumoʼ, desde bejlaʼa unaj k-beetik baʼax ku yaʼaliktoʼon u kaajal Jéeobaeʼ.

7, 8. 1) ¿Baʼaxten unaj k-kanik k-uʼuy u tʼaan le máaxoʼob nuʼuktikoʼonoʼ? 2) ¿Baʼax meyajiloʼob tsʼoʼok u tsʼaʼabal tiʼ jujuntúul sukuʼunoʼob? 3) Teʼ túumben luʼumoʼ kex jeʼel tuʼuxak ka kajlakoʼoneʼ, ¿bix ken k-uʼuyba?

⁷ Utiaʼal k-preparartikba kuxtal teʼ túumben luʼumoʼ, kʼaʼabéet k-kanik múul meyaj yéetel kiʼimak óolal yéetel u kaajal Jéeoba bey xan yéetel u maasil sukuʼunoʼob. Por ejemploeʼ ken tsʼaʼabaktoʼon junpʼéel túumben meyaj k-beeteʼ unaj k-ilik k-múul meyaj yéetel k-disfrutartik. Wa k-kanik k-uʼuy u tʼaan le máaxoʼob nuʼuktikoʼon desde bejlaʼoʼ, bey xan ken k-beetil teʼ túumben luʼumoʼ (xok Hebreoʼob 13:17). Ka ook le israelitaʼob teʼ luʼum aʼalaʼan u tsʼaʼabaltiʼoboʼ, aʼalaʼab  tiʼ cada juntúul tuʼux kun kajtal (Núm. 26:52-56; Jos. 14:1, 2). Toʼoneʼ maʼ k-ojel tuʼux kun aʼalbiltoʼon ka kajlakoʼon teʼ túumben luʼumoʼ. Pero wa k-kanik múul meyajeʼ yéetel kiʼimak óolal ken k-beet baʼax ken u yaʼaltoʼon Jéeoba kex jeʼel tuʼuxak ka kajlakoʼoneʼ.

⁸ ¡Chéen tukult bukaʼaj jatsʼutsil ken k-meyajt Dios yáanal u nuʼuktaj le Reinooʼ! Le oʼolaleʼ desde bejlaʼa unaj k-múul meyaj yéetel u kaajal Jéeoba yéetel k-beetik jeʼel baʼaxak meyajil ka u yaʼaltoʼoneʼ. Yaan horaeʼ ku kʼáataʼaltoʼon ka k-beet yaanal meyaj ichil u kaajal Jéeoba. Por ejemploeʼ jujuntúul betelitaʼob yaan Estados Unidoseʼ túuxtaʼaboʼob bey precursoroʼobeʼ. Tsʼoʼoleʼ jujuntúul superintendenteʼob tiʼ circuitoeʼ tu yoʼolal u edaboʼob wa yoʼolal uláakʼ baʼaloʼobeʼ tsʼoʼok u túuxtaʼaloʼob bey precursor especialoʼobeʼ. Letiʼobeʼ kiʼimak u yóoloʼob yéetel le túumben meyaj tsʼaʼantiʼoboʼ yéetel ku bendecirtaʼaloʼob tumen Jéeoba. Wa k-kʼáatik u yáantaj Jéeoba utiaʼal k-beetik tuláakal le ku páajtal utiaʼal k-meyajtik yéetel k-disfrutartik le meyaj tsʼaʼantoʼon k-beetoʼ, yaan u kiʼimaktal k-óol yéetel yaan u bendecirtikoʼon Jéeoba (xok Proverbios 10:22). Koʼox tuklikeʼ teʼ túumben luʼumoʼ, uts ta tʼaan a kajtal tiʼ junpʼéel lugar, chéen baʼaleʼ ¿baʼax jeʼel a beetik wa ku yaʼalaʼaltech ka xiʼikech kajtal táanxel tuʼux tumen le máaxoʼob u tsʼaamaj Jéeoba utiaʼal u nuʼuktoʼonoʼ? Teʼ kʼiinoʼob jeʼeloʼ kex jeʼel tuʼuxak ka kajlakoʼoneʼ yaan u kiʼimaktal k-óol. Toʼoneʼ yaan k-tsʼáaik u graciasil tiʼ Dios ikil u chaʼik k-kuxtal teʼ túumben luʼumoʼ (Neh. 8:10).

9, 10. 1) ¿Baʼaxten yaan u kʼaʼabéettal k-eʼesik paciencia teʼ túumben luʼumoʼ? 2) ¿Bix jeʼel k-eʼesik paciencia bejlaʼeʼ?

⁹ Teʼ túumben luʼumoʼ yaan u kʼaʼabéettal xan k-eʼesik paciencia. Maʼ xaaneʼ yaan k-ilkeʼ jujuntúul máakoʼobeʼ tsʼoʼok u kuxkíintaʼal u láakʼtsiloʼob yéetel u amigoʼob, chéen baʼaleʼ toʼoneʼ láayliʼ táan k-tsʼíiboltik u kuxkíintaʼal máaxoʼob k-yaabiltmeʼ. Wa ka úuchuk lelaʼ, ¿yaan wa u kiʼimaktal k-óol yéetel le máaxoʼob tsʼoʼok u kuxkíintaʼal u láakʼtsiloʼob yéetel k-eʼesik pacienciaoʼ? (Rom. 12:15). Wa desde bejlaʼa k-páaʼtik yéetel paciencia u béeytal baʼax u yaʼalmaj Jéeobaeʼ, teʼ túumben luʼumoʼ yaan xan u yantaltoʼon paciencia (Ecl. 7:8).

¹⁰ Jeʼel u páajtal xan k-preparartikba utiaʼal k-kuxtal teʼ túumben luʼum wa k-eʼesik paciencia utiaʼal k-naʼatik junpʼéel kaʼansaj tsʼoʼok u kʼexpajloʼ. ¿K-xakʼalxoktik wa utiaʼal k-naʼatik? Wa ku talamtal k-naʼatikeʼ, ¿k-eʼesik wa paciencia? Wa desde bejlaʼa k-beetik beyaʼ, cada ken u yaʼaltoʼon Jéeoba teʼ Paraíso ka k-beet junpʼéel túumben baʼaloʼ maʼ kun talamtal k-beetik (Pro. 4:18; Juan 16:12).

11. ¿Baʼaxten desde bejlaʼa kʼaʼabéet k-kanik k-perdonart u maasileʼ?

¹¹ Uláakʼ bix jeʼel k-preparartikba utiaʼal k-kuxtal teʼ túumben luʼumoʼ letiʼe ka k-kan perdonaroʼ. Ichil le mil años kun gobernar Cristooʼ yaan u bisik tiempo u pʼáatal máak perfecto (Bax. 24:15). ¿Yaan wa k-eʼesik yaabilaj yéetel k-perdonartik u maasil? Wa desde bejlaʼa k-kanik k-perdonart u maasil yéetel k-kanik k-bisba tu yéeteloʼobeʼ, maʼ xan kun talamtal k-beetik teʼ túumben luʼumoʼ (xok Colosasiloʼob 3:12-14).

12. ¿Baʼaxten desde bejlaʼa unaj k-preparartikba utiaʼal k-kuxtal teʼ túumben luʼumoʼ?

¹² Teʼ túumben luʼumoʼ, maʼ xaaneʼ maʼ kun antaltoʼon tuláakal baʼax k-kʼáat teʼ hora k-kʼáatoʼ wa maʼ xaaneʼ yaan u kʼaʼabéettal k-páaʼtik u yantaltoʼon. Le oʼolal desde bejlaʼeʼ unaj u kiʼimaktal k-óol yéetel  baʼax yaantoʼon. Bey túunoʼ tuláakal le jatsʼuts modosoʼob ku kaʼansiktoʼon Jéeoba ka k-eʼes bejlaʼoʼ yaan u kʼaʼabéettaltoʼon. Jeʼex k-ilkoʼ wa k-kanik k-eʼes jatsʼuts modosoʼob desde bejlaʼeʼ, yaan k-eʼesik táan k-preparartikba utiaʼal k-kuxtal teʼ túumben luʼumoʼ (Heb. 2:5; 11:1). Tsʼoʼoleʼ yaan k-eʼesik jach k-kʼáat kuxtal teʼ túumben luʼum tuʼux tuláakal máak kun beetik baʼax uts tu tʼaan Jéeobaoʼ.

13. ¿Baʼax ken k-tsʼáa k-óol k-beet teʼ túumben luʼumoʼ?

¹³ Teʼ túumben luʼumoʼ, yaan u yantaltoʼon le baʼaxoʼob kʼaʼabéet utiaʼal u kiʼimaktal k-óoloʼ. Chéen baʼaleʼ le baʼax maas ken u taastoʼon kiʼimak óolaloʼ letiʼe k-bisikba yéetel Jéeobaoʼ (Mat. 5:3). Toʼoneʼ yaan k-tsʼáaik k-óol k-meyajt Jéeoba yéetel lelaʼ yaan u taasiktoʼon kiʼimak óolal (Sal. 37:4). Wa desde bejlaʼa táan k-tsʼáaik táanil ichil k-kuxtal k-meyajtik Jéeobaeʼ, táan k-preparartikba utiaʼal k-kuxtal teʼ túumben luʼumoʼ (xok Mateo 6:19-21).

14. Le táankelem paalaloʼoboʼ, ¿baʼax jeʼel u páajtal u beetkoʼobeʼ?

¹⁴ ¿Bix jeʼel k-maas meyajtik Jéeoba yéetel kiʼimak óolaleʼ? Letiʼe ken k-il baʼaxoʼob jeʼel u páajtal k-beetik utiaʼal k-maas meyajtikoʼ. Wa táankelmecheʼ tukult bix jeʼel a kʼubik a kuxtal utiaʼal a maas meyajtik Jéeobaeʼ. ¿Baʼaxten maʼ ta kaxtik teʼ publicacionoʼob le jejeláas bix jeʼel u páajtal a maas meyajtikoʼ? Por ejemploeʼ jeʼel u páajtal a beetik a precursorileʼ wa uláakʼ meyajoʼob jeʼex lelaʼ. * Maʼalob xan ka tsikbalnakech yéetel le sukuʼunoʼob úuch joʼopʼok u xupkubaʼob u meyajtoʼob Jéeobaoʼ. Wa ka tsʼáaik a wóol a meyajt desde bejlaʼeʼ letiʼeʼ yaan u yáantkech utiaʼal a meyajtik teʼ túumben luʼumoʼ.

15. ¿Baʼax jeʼel u páajtal a beetik utiaʼal a maas meyajtik Jéeobaeʼ?

¹⁵ Yaʼab bix jeʼel u páajtal k-meyajtik Jéeobaeʼ. Por ejemploeʼ wa yaan tiʼ baʼax k-ilik jeʼel u páajtal k-maas maʼalobkíintik k-kʼaʼaytajeʼ, maʼalob ka k-beete. Jeʼel u páajtal xan k-ilik k-maas naʼatik jujunpʼéel kaʼansajoʼob yaan teʼ Bibliaoʼ yéetel k-ilik k-tsʼáaik ichil k-kuxtal. Tsʼoʼoleʼ jeʼel u páajtal k-maas maʼalobkíintik bix k-xookeʼ, bix k-discursar wa k-comentar. Jeʼex túun k-ilkoʼ wa ka wilik bix jeʼel a maas meyajtik Jéeoba desde bejlaʼeʼ maas yaan u yantaltech kiʼimak óolal, tsʼoʼoleʼ yaan u  prepararkech utiaʼal a kuxtal teʼ túumben luʼumoʼ.

16. ¿Baʼaxten u meyajtaʼal Jéeobaeʼ letiʼe baʼax maas maʼalob jeʼel u páajtal u beetaʼaloʼ?

¹⁶ Mientras táan a prepararkaba utiaʼal a kuxtal teʼ túumben luʼumoʼ, ¿yaan wa baʼax maas maʼalob táan a peʼertik? Minaʼan. A meyajtik Jéeobaeʼ letiʼe baʼax maas maʼalob jeʼel u páajtal a beetik ichil a kuxtaloʼ. Toʼoneʼ maʼatech k-meyajtik Jéeoba chéen tumen táan k-obligartaʼal tumen wa máax mix tumen chéen k-kʼáat ka u salvartoʼon tiʼ le nojoch muʼyajiloʼ. Wa maʼalob yaniloʼon tu táan Jéeobaeʼ yaantoʼon kiʼimak óolal ichil k-kuxtal. Lelaʼ letiʼe baʼax u kʼáat desde ka tu beetaj wíinikoʼ. U yaabiltikoʼon Dios yéetel u nuʼuktik k-kuxtaleʼ letiʼe baʼax maas maʼalob jeʼel u yantaltoʼonoʼ (xok Salmo 63:1-3). Toʼoneʼ k-ojleʼ wa k-meyajtik Jéeoba yéetel tuláakal k-puksiʼikʼaleʼ yaan u yantaltoʼon kiʼimak óolal. Le máaxoʼob úuch joʼopʼok u meyajtikoʼob Diosoʼ ku yaʼalikoʼobeʼ minaʼan uláakʼ baʼal maas maʼalob tiʼ lelaʼ (Sal. 1:1-3; Isa. 58:13, 14).

17. ¿Baʼax kun maas kʼaʼabéettal k-beetik teʼ túumben luʼumoʼ?

¹⁷ Teʼ Paraísooʼ yaan u yantaltoʼon tiempo utiaʼal k-beetik baʼaxoʼob uts t-tʼaan yéetel utiaʼal k-náaysik k-óol. Jéeobaeʼ tu beetoʼon utiaʼal ka k-disfrutart le kuxtalaʼ yéetel u yaʼalmeʼ yaan u tsʼáaiktoʼon tuláakal baʼax k-tsʼíiboltik (Ecl. 2:24; Sal. 145:16). U jaajileʼ kʼaʼabéet k-náaysik k-óol yéetel k-jeʼelel, chéen baʼaleʼ le baʼax maas kʼaʼanaʼanoʼ letiʼe k-bisikba yéetel Jéeobaoʼ. Lelaʼ bey xan ken k-beetil teʼ túumben luʼumoʼ. Le oʼolaleʼ koʼox kaxtik «táanil u Reino Dios» yéetel tuukulnakoʼon tiʼ le utsiloʼob ken k-kʼam ikil k-meyajtik Jéeobaoʼ (Mat. 6:33).

18. ¿Bix jeʼel k-eʼesik táan k-preparartikba utiaʼal k-kuxtal teʼ túumben luʼumoʼ?

¹⁸ ¡Chéen tukult bukaʼaj kiʼimak óolal kun antaltoʼon teʼ túumben luʼumoʼ! Wa k-kʼáat ka yanaktoʼon «le kuxtal jach tu jaajil kuxtaloʼ» kʼaʼabéet u káajal k-preparartikba desde bejlaʼeʼ. Koʼoneʼex eʼesik le jatsʼuts modos táan u kaʼansiktoʼon Jéeobaoʼ, koʼoneʼex tsʼáaik k-óol teʼ kʼaʼaytajoʼ yéetel koʼoneʼex uʼuyik le kiʼimak óolal ku taasik k-tsʼáaik táanil ichil k-kuxtal k-meyajtik Jéeobaoʼ. Toʼoneʼ k-ojleʼ teʼ túumben luʼumoʼ Jéeobaeʼ yaan u tsʼáaiktoʼon tuláakal le baʼaxoʼob tsʼoʼok u prometertikoʼ. Bey túunoʼ desde bejlaʼeʼ beet bey men cuenta tiaʼanech teʼ túumben luʼumoʼ.