1, 2. Desde úuchjeakil tak bejlaʼeʼ, ¿baʼax maʼ xuʼuluk u beetik le máaxoʼob meyajtik Jéeobaoʼ?

LE MÁAXOʼOB meyajtik Jéeobaoʼ u yojloʼob jach ku béeytal tuláakal le profecíaʼoboʼ. Jeʼex Jeremíaseʼ jach táan kaʼach u páaʼtik u xuʼulsaʼal Judá tumen le babilonioʼoboʼ, le profecíaaʼ béeychaj tu añoil 607 táanil tiʼ u taal Jesús (Jer. 25:8-11). Isaíaseʼ tu profetizarteʼ yaan u kaʼa suut le judíoʼob tu kaajil Judaoʼ, le oʼolal tu yaʼaleʼ kiʼimak u yóol le máaxoʼob ku páaʼtkoʼob u yúuchul le baʼaloʼobaʼ (Isa. 30:18). Miqueas xaneʼ jach táan u páaʼtik kaʼach u béeychajal u promesaʼob Jéeoba (Miq. 7:7). Le máaxoʼob meyajt Dios úuchjeakiloʼ xáanchaj xan táan u páaʼtkoʼob u chíikpajal le Mesías wa Cristo aʼalaʼan kun taaloʼ (Luc. 3:15; 1 Ped. 1:10-12). *

² Bejlaʼa xaneʼ maʼ xuʼuluk k-páaʼtik u béeytal le profecíaʼob ku tʼaanoʼob tiʼ le Reinooʼ. Jesús, u Reyil le Reinooʼ, maʼ kun xáantal ken u salvart le máaxoʼob meyajtik Dios tiʼ le kʼasaʼan yóokʼol kaabaʼ. Letiʼeʼ yaan u xuʼulsik le kʼasaʼan máakoʼoboʼ bey  xan le baʼaxoʼob beetik u muʼyaj máakoʼ (1 Juan 5:19). Lelaʼ maʼ kun xáantal ken úuchuk, le oʼolal kʼaʼabéet k-páaʼtik le kʼiinaʼ, maʼ unaj u náayal k-óoliʼ.

3. ¿Baʼax jeʼel u káajal k-tuklik wa tsʼoʼok u yúuchtal joʼopʼok k-páaʼtik u taal le xuʼulsajiloʼ?

³ Toʼoneʼ jach táan k-páaʼtik u béeytal u voluntad Dios way Luʼumeʼ (Mat. 6:10). Chéen baʼaleʼ wa tsʼoʼok u yúuchtal joʼopʼok k-páaʼtik u taal le xuʼulsajiloʼ, maʼ xaaneʼ jeʼel u káajal k-tuklikeʼ: «Chéen de maas ka seguernak in páaʼtik u taal le xuʼulsajiloʼ si maʼ tun séeb taal».

4. ¿Baʼaxten ‹maʼ unaj u náayal k-óoliʼ›?

⁴ Jesuseʼ tu yaʼalaj tiʼ u disipuloʼob: «Maʼ u náayal a wóoleʼex» (Mat. 24:42). Tsʼoʼoleʼ tu yaʼalaj xan tiʼob: «Maʼ a weenleʼex» (Luc. 21:34-36). Jeʼex k-ilkoʼmaʼ unaj u náayal k-óoliʼ, unaj k-páaʼtik u kʼuchul u kʼiinil le xuʼulsajiloʼ. U kaajal Jéeobaeʼ mantatsʼ ku kʼaʼajsiktoʼon ka ‹k-páaʼt yéetel ka k-tsʼáa t-tuukul u kʼuchul u kʼiinil Jéeoba› yéetel ka tuukulnakoʼon tiʼ le baʼax ken u tsʼáatoʼon teʼ túumben luʼumoʼ (xok 2 Pedro 3:11-13).

5. ¿Baʼax uláakʼ eʼesiktoʼon maʼ unaj u náayal k-óoliʼ?

⁵ Wa teʼ yáax siglo maʼ unaj kaʼach u náayal u yóol u disipuloʼob Jesusoʼ, bejlaʼeʼ maas maʼ unaj u náayal k-óoliʼ. ¿Baʼaxten? Tumen le chíikulaloʼob tu yaʼalaj Jesusoʼ ku yeʼesikeʼ letiʼeʼ káaj u reinar desde 1914 yéetel kuxaʼanoʼon tu tsʼook kʼiinoʼob. Por ejemploeʼ Jesuseʼ tu yaʼaleʼ le yóokʼol kaabaʼ yaan u bin u maas kʼastal yéetel yaan u kaʼansaʼal tuláakal tuʼux le baʼaxoʼob ken u beet le Reinooʼ, lelaʼ táan béeytal teʼ kʼiinoʼobaʼ (Mat. 24:3, 7-14). Jesuseʼ maʼ tu yaʼalaj bukaʼaj tiempo kun xáantal u tsʼook kʼiinoʼobiʼ, le oʼolaleʼ maʼ unaj u náayal k-óoliʼ. Le xuʼulsajiloʼ chéen minaʼan u yorail ken taalak.

6. ¿Baʼaxten k-ojel yaan u maas kʼastal u máakiloʼob le yóokʼol kaab ken náatsʼak u kʼiinil le xuʼulsajiloʼ?

⁶ ¿U kʼáat wa túun u yaʼal yaan u láaj kʼastal u máakiloʼob le yóokʼol kaab táanil tiʼ u taal le xuʼulsajiloʼ? Le Bibliaoʼ ku yaʼalikeʼ «tu tsʼook kʼiinoʼobeʼ» le máakoʼoboʼ yaan u bin u maas kʼastaloʼob (2 Tim. 3:1, 13; Mat. 24:21; Apo. 12:12).

7. Jeʼex u yaʼalik Mateo 24:37 tak 39, ¿bix yanil le yóokʼol kaab ken taalak «le nojoch yaayaj óolaloʼ»?

⁷ Yaan máax tuklikeʼ táanil tiʼ «le nojoch yaayaj óolaloʼ» tiʼ cada kaaj kun antal guerra, tiʼ tuláakal máak kun tsaʼayal junpʼéel kʼaakʼas kʼojaʼanil yéetel jach tuláakal máak kun kíimil yéetel wiʼij (Apo. 7:14). Wa ka úuchuk beyaʼ, ¿máasaʼ tuláakal máak jeʼel u creertik le profecíaʼob yaan teʼ Bibliaoʼ? Chéen baʼaleʼ Jesuseʼ tu yaʼaleʼ tu tsʼook kʼiinoʼobeʼ yaʼab máakoʼob maʼ ken u tsʼáaʼob cuenta wa taʼaytak u taal le xuʼulsajiloʼ tumen letiʼobeʼ chʼiikiloʼob tiʼ baʼaxoʼob suuk u beetkoʼob. Le oʼolal ken kʼuchuk u kʼiinil le xuʼulsajiloʼ naayal u yóoloʼob (xok Mateo 24:37-39). Jeʼex k-ilkoʼ maʼ unaj k-tuklik wa kʼaʼabéet u maas peortal le baʼaxoʼob ku yúuchul teʼ yóokʼol kaab utiaʼal ka taalak «le nojoch yaayaj óolaloʼ», tumen wa maʼeʼ tuláakal máak jeʼel u creertik jach taʼaytak u taal le xuʼulsajiloʼ (Luc. 17:20; 2 Ped. 3:3, 4).

8. ¿Baʼax ku yeʼesiktoʼon le chíikulaloʼob tu yaʼalaj Jesusoʼ?

⁸ Jesuseʼ tu yaʼalaj tiʼ u disipuloʼob le chíikulaloʼob kun eʼesik tiʼ baʼax tiempoil kuxaʼanoʼoboʼ. Le oʼolaleʼ maʼ unaj u náayal k-óoliʼ (Mat. 24:27, 42). Desde 1914 joʼopʼok u yilaʼal u béeytal le jejeláas  chíikulaloʼob tu yaʼalaj Jesusoʼ. Lelaʼ ku yeʼesiktoʼoneʼ bejlaʼeʼ kuxaʼanoʼon tu tsʼook kʼiinoʼob. Jéeobaeʼ tsʼoʼok u listokíintkuba utiaʼal u xuʼulsik u kʼasaʼan yóokʼol kaab Satanás.

9. ¿Baʼaxten maʼ unaj u xuʼulul k-creertik jach taʼaytak u taal le xuʼulsajiloʼ?

⁹ ¿Baʼaxten maʼ unaj u xuʼulul k-creertik jach taʼaytak u taal le xuʼulsajiloʼ? Tumen k-kʼáat uʼuy u tʼaan Jesucristo yéetel tumen táan k-ilik u béeytal le baʼaxoʼob tu yaʼalaj kun úuchul tu tsʼook kʼiinoʼoboʼ. Toʼoneʼ jach k-creertik taʼaytak u taal le xuʼulsajiloʼ tumen táan k-ilik u béeytal le profecíaʼob ku yaʼalik le Bibliaoʼ, maʼ chéen tumen k-creertik jeʼel baʼaxak ka aʼalaʼaktoʼoneʼ. Jeʼex túun k-ilkoʼ maʼ unaj u náayal k-óoliʼ.

10, 11. 1) ¿Baʼaxten tu yaʼalaj Jesús tiʼ u disipuloʼob ‹maʼ u náayal u yóoloʼob›? 2) ¿Baʼax tu yaʼalaj Jesús tiʼ u disipuloʼob kʼaʼabéet u beetkoʼob wa ku tuklikoʼob maʼ tu séeb taal le xuʼulsajiloʼ? (Ilawil le dibujo yaan tu káajbal le xookaʼ.)

¹⁰ Yaʼab tiʼ toʼoneʼ úuch joʼopʼok k-meyajtik Jéeoba yéetel úuch joʼopʼok k-páaʼtik u kʼuchul u kʼiinil le xuʼulsajiloʼ. Kex jeʼel bukaʼaj tiempo joʼopʼok k-páaʼtikeʼ, maʼ unaj u náayal k-óoliʼ. Unaj listoʼon ken taalak Jesús u xuʼuls u kʼasaʼan yóokʼol kaab Satanás. Lelaʼ bey u yeʼesik le baʼax tu yaʼalaj tiʼ u disipuloʼobaʼ: «Maʼ u xuʼulul a paakateʼex yéetel maʼ a weenleʼex, tumen maʼ a wojleʼex baʼax kʼiin ken kʼuchuk le kʼiin aʼalaʼanoʼ. Lelaʼ bey jeʼex juntúul máak ku bin táanxel luʼumileʼ; táanil tiʼ u bineʼ tu kʼubéentaj u yotoch tiʼ u palitsiloʼob, tiʼ cada juntúuleʼ tu tsʼáaj meyaj u beete, tu yaʼalaj xan tiʼ le j-kanan joonaj maʼ u náayal u yóoloʼ. Le oʼolaleʼ, maʼ u náayal a wóoleʼex, tumen maʼ a wojleʼex baʼax kʼiin ken taalak u Yuumil le najoʼ, wa ken tsʼoʼokok u tʼúubul Kʼiin, wa chúumuk áakʼab, wa ken kʼaaynak le tʼeeloʼ, wa le táan u taal u sáastaloʼ. Beyoʼ, ken téek kʼuchkeʼ maʼ u yilik wa táan a weenleʼex. Baʼaleʼ le baʼax kin waʼalikteʼexaʼ tiʼ tuláakal xan kin waʼalik: Maʼ a weenleʼex» (Mar. 13:33-37).

¹¹ Le ka kʼuch u naʼat le máaxoʼob meyajtik Dios tu añoil 1914 ka káaj u reinar Jesuseʼ, tu tsʼáajoʼob cuentaeʼ chéen minaʼan u yorail ken taalak le xuʼulsajiloʼ. Le oʼolaleʼ tu tsʼáaj u yóoloʼob u kaʼansoʼob tiʼ uláakʼ máakoʼob baʼax ken u beet u Reino Dios. Jesuseʼ tu yaʼaleʼ maʼ xaaneʼ letiʼeʼ yaan u taal «le táan u taal u sáastaloʼ». Le oʼolaleʼ, ¿baʼax kun kʼaʼabéettal u beetik le disipuloʼoboʼ? Jesuseʼ tu yaʼalaj: «Maʼ u náayal a wóoleʼex». Bey túunoʼ wa k-ilik bey tsʼoʼok u jach xáantal joʼopʼok k-páaʼtik u taal le xuʼulsajiloʼ, maʼ unaj k-tuklik wa yaʼab u bin u taaliʼ bey xan wa maʼ kun taal teʼ kʼiinoʼob kuxlikoʼonaʼ.

12. ¿Baʼax tu kʼáataj Habacuc tiʼ Jéeoba, yéetel baʼax núukaʼabtiʼ?

¹² Ka tsʼoʼok u kʼaʼaytik le profeta Habacuc yaan u xuʼulsaʼal Jerusalenoʼ chúukpaj u yóol u páaʼt u kʼuchul u kʼiinil u yúuchul. Yaan profetaʼob anchaj xan táanil tiʼ letiʼeʼ xáanchaj táan u kʼaʼaytikoʼob yaan u xuʼulsaʼal Jerusalén. Le profeta Habacukoʼ tu yilaj jach táaj kʼaschaj u modos le máakoʼoboʼ. Letiʼeʼ tu kʼáat óoltaj tiʼ Jéeoba: «Yuumtsil, ¿baʼax kʼiin bíin a chʼenxikint in sen awat kʼáat óolalaʼ?». Kex maʼ tu yaʼalaj Jéeoba tiʼ Habacuc baʼax kʼiin u xuʼulsik Jerusaleneʼ, tu yaʼalaj: «Bíin kʼuchuk jach u kʼiinil u béeytal». Tu tsʼookeʼ tu yaʼalajtiʼ: «Techeʼ páaʼte» (xok Habacuc 1:1-4; 2:3).

13. Wa ka náakak u yóol Habacukeʼ, ¿baʼax kaʼach jeʼel u tuklikeʼ, yéetel baʼax jeʼel u yúuchultiʼeʼ?

¹³ Chéen tukult wa ka náakak u yóol  Habacuc u páaʼt u xuʼulsaʼal Jerusalén yéetel ka u yaʼal: «Tsʼoʼok u sen xáantal joʼopʼok in páaʼtik u xuʼulsaʼal Jerusalén. Maʼ tun séeb xuʼulsbil. Baʼax tiaʼal ku seguer in kʼaʼaytik. Beetaʼak tumen uláakʼ máakoʼob». Wa ka tuukulnak kaʼach Habacuc beyaʼ, ¿baʼax jeʼel u yúuchultiʼeʼ? Tsʼoʼok kaʼach u xuʼulul u kʼaʼamal tumen Jéeobaeʼ. Tsʼoʼoleʼ wa ka náayak u yóol kaʼacheʼ bejlaʼa tsʼoʼok u peʼertik tak u kuxtaleʼ.

14. Teʼ túumben luʼumoʼ, ¿baʼax oʼolal ken k-tsʼáa gracias tiʼ Jéeoba?

¹⁴ Tukleʼ tiaʼanech teʼ túumben luʼumoʼ. Ta wilaj bix úuchik u béeytal tuláakal le profecíaʼob tu yaʼalaj Jéeoba yoʼolal u tsʼook kʼiinoʼoboʼ. Beoraaʼ techeʼ maas ka confiar tiʼ letiʼ yéetel ka creertik yaan u béeytal u maasil profecíaʼob u yaʼalmoʼ (xok Josué 23:14). Le tiaʼanech teʼ túumben luʼumoʼ yaan wal a jach tsʼáaik u graciasil tiʼ Jéeoba úuchik u taasik le xuʼulsajil jach tu kʼiiniloʼ yéetel úuchik u yaʼaliktech maʼ u náayal a wóol (Bax. 1:7; 1 Ped. 4:7).

15, 16. ¿Baʼaxten kʼaʼabéet k-tsʼáaik k-óol kʼaʼaytaj teʼ tsʼook kʼiinoʼobaʼ?

¹⁵ U kaajal Jéeobaeʼ mantatsʼ táan u yaʼaliktoʼon maʼ u náayal k-óol. Lelaʼ ku yeʼesikeʼ unaj k-tsʼáaik táanil ichil k-kuxtal k-meyajtik Dios yéetel k-kʼaʼaytik baʼax ken u beete. Toʼoneʼ k-ojleʼ le chíikulaloʼob tu yaʼalaj Jesusoʼ táan u béeytaloʼob yéetel maʼ kun xáantal ken taalak le xuʼulsajiloʼ. Le oʼolaleʼ k-tsʼáaik yáax táanil k-meyajtik Jéeoba yéetel k-kaʼansik tiʼ uláakʼ máakoʼob le baʼax ken u beet u Reinooʼ (Mat. 6:33; Mar. 13:10).

¹⁶ U yóokʼol kaab Satanaseʼ jach taʼaytak u xuʼulsaʼal, le oʼolaleʼ ken k-kaʼans tiʼ uláakʼ máakoʼob le baʼax ku yaʼalik Diosoʼ táan k-áantkoʼob utiaʼal maʼ u xuʼulsaʼaloʼob. Tu añoil 1945, búul junpʼéel barco ku kʼaabaʼtik Wilhelm Gustloff. Le ka úuch lelaʼ u milesil máakoʼob kíimoʼob. Juntúul kiik yéetel u yíicham tu salvartubaʼobeʼ ku yaʼalikoʼobeʼ le táan u búulul le barcooʼ tu yuʼuboʼob u yawat juntúul koʼolel. Letiʼeʼ táan kaʼach u yaʼalik: «¡In maletas! ¡In maletas! ¡In alhajas! Tuláakal in alhajaseʼ tiaʼan tu chan cuartoil le barcooʼ. ¡Tsʼoʼok in peʼertik tuláakal in nuʼukul!». Chéen baʼaleʼ uláakʼ máakoʼob ku viajaroʼob teʼ barcooʼ tu yiloʼobeʼ le baʼax maas kʼaʼabéetoʼ letiʼe u salvartaʼal u kuxtal u maasil máakoʼoboʼ. Bejlaʼa xaneʼ yaʼab máakoʼob kʼaʼabéet u salvartaʼal u kuxtaloʼob. Jeʼex le máakoʼob tu yáantoʼob u maasil máakoʼob utiaʼal maʼ u búululoʼoboʼ, toʼon xaneʼ k-ojleʼ jach kʼaʼabéet k-áantik le máakoʼob utiaʼal ka u salvartubaʼoboʼ.

17. ¿Baʼax maʼ unaj u tuʼubultoʼoniʼ?

 ¹⁷ Bejlaʼeʼ táan k-ilik bix u béeytal le profecíaʼoboʼ yéetel k-ojel jach taʼaytak u xuʼulsaʼal le kʼasaʼan yóokʼol kaabaʼ. Toʼoneʼ táan k-páaʼtik u tsʼáaikuba «le diez baakoʼob» yéetel «le tsʼíitsʼik baʼalcheʼ» tu contra le Nojoch Babilonia wa le religionoʼob maʼatech u kaʼanskoʼob u jaajiloʼ (Apo. 17:16). Toʼoneʼ maʼ unaj k-tuklik wa yaʼab u bin u yúuchul lelaʼ. Maʼ unaj u tuʼubultoʼoneʼ Dioseʼ yaan u tsʼáaik tu tuukuloʼob u xuʼulskoʼob le religionoʼob maʼatech u kaʼanskoʼob u jaajiloʼ, lelaʼ chéen minaʼan u yorail ken úuchuk (Apo. 17:17). Jeʼex k-ilkoʼ taʼaytak u xuʼulsaʼal u kʼasaʼan yóokʼol kaab Satanás. Le oʼolaleʼ koʼoneʼex beetik le baʼax tu yaʼalaj Jesusaʼ: «Jach kanáantabaʼex utiaʼal maʼ u sen chuʼupul a puksiʼikʼaleʼex ikil u píitmáan a jaanleʼex, ikil u píitmáan a wukʼuleʼex, bey xan yoʼolal u chiʼichnakiloʼob le kuxtalaʼ, utiaʼal maʼ u beetik u jaʼakʼal a wóoleʼex ken téek taalak le kʼiin ta wóokʼoleʼex ichil u chan súutuk bey junpʼéel léecheʼ» (Luc. 21:34, 35; Apo. 16:15). Koʼoneʼex ilik maʼ u náayal k-óol yéetel koʼox tsʼáaik k-óol k-meyajt Jéeoba. Wa k-beetik lelaʼ Jéeobaeʼ yaan u salvartikoʼon (Isa. 64:4).

18. ¿Baʼax kʼáatchiʼil kun núukbil teʼ xook ku segueroʼ?

¹⁸ Mientras táan k-páaʼtik u kʼuchul u kʼiinil u xuʼulsaʼal tiʼ le kʼasaʼan yóokʼol kaabaʼ, toʼoneʼ unaj k-beetik le baʼax tu yaʼalaj Judasaʼ: «In yaabilaj sukuʼuneʼex, teʼexeʼ muʼukʼaʼanchajak a wóoleʼex tu yoʼolal le kiliʼich fe yaanteʼexoʼ, orarneneʼex xan yéetel kiliʼich muukʼ, utiaʼal ka pʼáatkeʼex tiʼ u yaabilaj Dios le táan a páaʼtkeʼex u chʼaʼabalteʼex óotsilil tumen k-Yuumtsil Jesucristooʼ, bey xan utiaʼal ka yanakteʼex le kuxtal minaʼan u xuuloʼ» (Jud. 20, 21). ¿Bix jeʼel k-eʼesik jach tu jaajil táan páaʼtik u yantal le túumben luʼum yéetel táan k-tsʼíiboltik k-kuxtaloʼ? Lelaʼ letiʼe ken k-il teʼ xook ku segueroʼ.