Eʼes kiʼimak a wóol ikil u yeʼesik u yutsil Jéeoba

PAX ICH

JÉEOBA Dioseʼ jach uts (Sant. 1:17). U yutsileʼ ku yilaʼal tiʼ tuláakal le baʼaxoʼob u beetmoʼ jeʼex tiʼ le bukaʼaj estrellaʼob k-ilik teʼ kaʼanoʼ bey xan le jatsʼuts paakʼaloʼob yaan way Luʼumaʼ (Sal. 65:12, 13; 147:7, 8; 148:3, 4).

Le Salmo 104, junpʼéel jatsʼuts kʼaay tuʼux ku alabartaʼal Jéeoba. Le kʼaayaʼ ku yeʼesik bukaʼaj yaabiltaʼanil Jéeoba tumen le salmista yoʼolal u nojoch utsiloʼ. Maʼ xaaneʼ ken a xok le salmoaʼ bey xan a wuʼuyikabaoʼ. Le versículo 33, ku yaʼalik: «[Mientras] yaan teen kuxtaleʼ bíin in kʼay kʼaayoʼob tiʼ Yuumtsil» (Sal. 104:33).

MINAʼAN ULÁAKʼ MÁAX JACH UTS JEʼEX JÉEOBAEʼ

Jéeobaeʼ u kʼáat ka k-eʼes utsil jeʼex u beetik letiʼoʼ. Lelaʼ bey u yeʼesik le baʼax tu tsʼíibtaj le apóstol Pablooʼ: «Tiʼ le máaxoʼob ayikʼaloʼob teʼ yóokʼol kaabaʼ aʼaltiʼob maʼ unaj u kaʼantal u yichoʼobiʼ yéetel maʼ unaj u kʼubik u yóoloʼob tiʼ le ayikʼaliloʼob ku xuʼululoʼoboʼ, baʼaxeʼ tiʼ Dios le máax tsʼáaiktoʼon tu chúukaʼanil tuláakal le baʼaxoʼob taasiktoʼon kiʼimak óolaloʼ. Aʼaltiʼob ka u beetoʼob baʼax uts, ka yaʼabchajak le baʼaloʼob maʼalobtak ku beetkoʼoboʼ, mantatsʼ ka u síiʼob baʼaloʼob tiʼ u maasil yéetel ka u beetoʼob jeʼex u síijil tu puksiʼikʼaloʼobeʼ, utiaʼal beyoʼ ka yanaktiʼob le ayikʼalil ku suut bey junpʼéel maʼalob chuunpakʼ utiaʼal le kʼiinoʼob kun taaloʼoboʼ, utiaʼal xan ka páajchajak u chich machkubaʼob tiʼ le kuxtal jach tu jaajil kuxtaloʼ» (1 Tim. 6:17-19).

Teʼ tu kaʼapʼéel carta tu túuxtaj tiʼ le corintoiloʼoboʼ, Pabloeʼ tu yaʼalaj bix unaj u yuʼubikuba máak ken u tsʼáa u donación: «Cada juntúuleʼ u beet jeʼex tsʼoʼok u chʼaʼtuklik ichil u puksiʼikʼaleʼ, maʼ yéetel kʼuuxiliʼ mix bey táan u obligartaʼaleʼ, tumen Dioseʼ u yaabiltmaj le máax ku síik wa baʼax yéetel kiʼimak óolaloʼ» (2 Cor. 9:7). Ka tsʼoʼok u yaʼalik lelaʼ, Pabloeʼ tu tsoleʼ le baʼax ku síik máakoʼ maʼ chéen ku taasik utsil yéetel ku meyaj tiʼ le máax kʼamkoʼ, baʼaxeʼ ku taasik utsil tak tiʼ le máax síikoʼ tumen Dioseʼ ku bendecirtik (2 Cor. 9:11-14).

Tu tsʼoʼokbal u cartaeʼ Pabloeʼ tu yaʼalaj máakalmáak le maas nojoch baʼax eʼesik u yutsil Diosoʼ, tu yaʼalaj: «Tsʼaʼabak gracias tiʼ Dios tu yoʼolal le sen nojoch siibal ku tsʼáaikoʼ» (2 Cor. 9:15). Le nojoch siibal tu yaʼalaj Pabloaʼ letiʼe baʼaloʼob jatsʼutstak ku tsʼáaik Dios tiʼ u kaajal yoʼolal Jesusoʼ. ¿Máasaʼ le baʼaxoʼob tsʼoʼok u tsʼáaiktoʼon Jéeobaoʼ maʼ tu páajtal u keʼetel yéetel mix baʼal?

Toʼoneʼ jeʼel u páajtal k-tsʼáaik gracias tiʼ Jéeoba yéetel tiʼ Jesús yoʼolal le baʼaxoʼob tsʼoʼok u beetkoʼob t-oʼolaloʼ bey xan le ken u beetoʼob maʼ kun xáantaloʼ. ¿Bix jeʼel u páajtal k-beetik lelaʼ? Letiʼeʼ ken k-tsʼáa k-tiempo, k-muukʼ yéetel k-taakʼin utiaʼal k-áantaj ichil u kaajaloʼ, kex wa chéen junpʼíit baʼax yaantoʼon bey xan wa maʼeʼ láayliʼ jeʼel u páajtal k-áantajeʼ (1 Cró. 22:14; 29:3-5; Luc. 21:1-4).

Le bix jeʼel a wáantaj utiaʼal u yúuchul kʼaʼaytajoʼ

Jeʼex tu kʼiiniloʼob Pabloeʼ, bejlaʼeʼ yaʼab máax ku «jóoʼs[ik] junpáayil» le bukaʼaj ku páajtal utiaʼal u tsʼáaik teʼ caja ku kʼaabaʼtik «Utiaʼal le meeyjil kʼaʼaytajoʼ» (Obra mundial) (1 Cor. 16:2). Cada meseʼ le múuchʼuliloʼoboʼ ku túuxtikoʼob tu najil Betel le taakʼin ku siʼibiloʼ. Wa a kʼáateʼ, jeʼel u páajtal xan a túuxtik u taatsʼ tiʼ u j-jaajkunajoʼob Jéeobaeʼ. Wa a kʼáat a wojéelt bix u kʼaabaʼ le tuʼux unaj a túuxtikoʼ, tʼaanen tu najil Betel ilik le kʼaʼaytaj ku beetaʼal tuʼux kajaʼanechoʼ. Jeʼel u páajtal a wilik u direccionil teʼ www.pr418.com/yua. Le siibaloʼob ken k-il beoraaʼ u taatsʼ jeʼel u páajtal u túuxtaʼaleʼ:

BAʼALOʼOB KU SIʼIBIL

U depositartaʼal taakʼin tiʼ u najil Betel tiʼ junpʼéel banco, lelaʼ jeʼel xan u páajtal u depositaraʼal yéetel u tarjetail débito wa yéetel u tarjetail crédito. Tiʼ jujunpʼéel luʼumiloʼobeʼ jeʼel u páajtal u meyaj le página jw.org utiaʼal u depositartaʼaloʼ wa uláakʼ página tsʼaʼan tumen u najil Beteloʼ.
U síik máak taakʼin, alhajaʼob wa uláakʼ baʼaloʼob yaan u tojol. Unaj u túuxtik máak junpʼéel carta tuʼux ku yaʼalik siibil u beetik.

TAAKʼIN MAJÁANTAʼAN

U tsʼáaik máak taakʼin, baʼaleʼ jeʼel u páajtal a kaʼa chʼaʼik wa ku kʼaʼabéettaleʼ.
Unaj u túuxtik máak junpʼéel carta tuʼux ku yaʼalik chéen táan u tsʼáaik majáantbil.

SIIBALOʼOB KU CHʼAʼTUKLAʼAL BIX KUN TSʼAABIL

Beoraaʼ koʼoneʼex ilik uláakʼ bix jeʼel u tsʼáaik u siibal máak utiaʼal u maas kʼaʼaytaʼal le maʼalob péektsiloʼ. Wa a kʼáat a tsʼáa a siibal jeʼex ken k-il teʼ kabalaʼ, táanil unaj a tʼaan tu najil Betel utiaʼal a wojéeltik wa jeʼel u páajtaleʼ. Tumen maʼ junpʼéeliliʼ baʼax ku kʼáatik le gobiernoʼoboʼ, jach unaj a kʼáatik u yáantaj juntúul máax u yojel tiʼ baʼaloʼob beyaʼ, tumen beyoʼ jeʼel u páajtal a yéeyik bix maas maʼalob a tsʼáaik a siibaleʼ.

Seguroʼob: Jeʼel u páajtal u yaʼalaʼal ka cobrartaʼak junpʼéel seguro de vida wa junpʼéel pensión tumen u j-jaajkunajoʼob Jéeobaeʼ.

Taakʼin oksaʼan banco: Le taakʼin ku tsʼaʼabal tiʼ máak ken jubilartaʼakoʼ jeʼel u páajtal u yoksaʼal banco utiaʼal ka cobrartaʼak u interesil tumen u j-jaajkunajoʼob Jéeobaeʼ. Jeʼel u páajtal xan u beetaʼal yéetel u reciboil le taakʼin oksaʼan banco (certificado de depósito) utiaʼal ka cobrartaʼak u interesil. Tsʼoʼoleʼ jeʼel xan u páajtal u cobrartaʼal le taakʼin tumen u j-jaajkunajoʼob Jéeoba wa ku kíimil u yuumiloʼ, baʼaleʼ unaj u beetaʼal jeʼex u yaʼalik le bancooʼ.

Le reciboʼob ku tsʼáaik junpʼéel empresa ken tsʼaʼabak taakʼin u majáantoʼ: Leloʼobaʼ jeʼel u páajtal u siʼibil tiʼ u j-jaajkunajoʼob Jéeobaeʼ. Tsʼoʼoleʼ jeʼel xan u tsʼaʼabal u páajtalil tiʼ u cobrartik le taakʼin ken kíimik u yuumiloʼ.

Terrenoʼob yéetel najoʼob: Jeʼel u páajtal u pʼaʼatal tiʼ u j-jaajkunajoʼob Jéeoba utiaʼal ka meyajnak jeʼel bix kʼaʼabéeteʼ. Baʼaleʼ wa yaan máax kajakbaleʼ jeʼel u páajtal u pʼáatal kajtal tak ken kíimkeʼ.

Donacionoʼob tuʼux ku kʼamik máak jujunpʼéel utsiloʼob: Lelaʼ taakʼin wa u documentosil junpʼéel terrenoʼob ku donartaʼal tiʼ u j-jaajkunajoʼob Jéeoba, yoʼolal lelaʼ le máax ku donaroʼ ku kʼamik jujunpʼéel utsiloʼob cada año mientras kuxaʼan. Le máax tsʼáaik le donacionoʼob beyaʼ jeʼel u menoskíintaʼal le impuestoʼob ku boʼotik cada añooʼ.

Testamentoʼob yéetel u cobrartaʼal interés: Jeʼel u páajtal u pʼaʼatal taakʼin yéetel terrenoʼob tiʼ u j-jaajkunajoʼob Jéeobaeʼ, baʼaleʼ leloʼ unaj u beetaʼal yéetel junpʼéel testamento tu táan juntúul notario. Tsʼoʼoleʼ jeʼel xan u páajtal u yoksaʼal taakʼin teʼ banco utiaʼal ka u cobrart u interesiloʼ (fideicomiso).

Jeʼex u yaʼalik le jaats «siibaloʼob ku chʼaʼtuklaʼal bix kun tsʼaabiloʼ», le siibaloʼob tsʼoʼok k-aʼalikaʼ unaj u chʼaʼtuklaʼal tubeel. Utiaʼal u yáantaʼal le máaxoʼob u kʼáat u tsʼáa u donacionoʼob beyaʼ, u j-jaajkunajoʼob Jéeobaeʼ u beetmoʼob ich inglés yéetel ich español le folleto Donaciones planificadas para favorecer el servicio del Reino en todo el mundo. Le folletoaʼ ku tsolik tubeel jejeláas bix jeʼel u páajtal u donartaʼal taakʼin, terrenoʼob wa uláakʼ baʼaloʼobeʼ. Maʼ xaaneʼ jujunpʼéel tiʼ le baʼaxoʼob ku yaʼalikoʼ maʼ tu meyaj teʼ luʼumil tuʼux yanechoʼ, tumen tiʼ cada luʼumileʼ yaanal ley ku tsʼáaik le gobiernooʼ. Wa taak a tsʼáaik a donacioneʼ, ken tsʼoʼokok a xokik le folletooʼ kaxt u yáantaj juntúul máax u yojel tiʼ leyoʼob. Tu yoʼolal le siibaloʼob beyaʼ yaʼab máakeʼ tsʼoʼok u yáantaj utiaʼal u kaʼansaʼal yéetel u yáantaʼal yaʼab máak tiʼ tuláakal yóokʼol kaab, tsʼoʼoleʼ le máaxoʼob ku tsʼáaik u donacionoʼob beyaʼ yaʼab utsiloʼob ku kʼamkoʼob tu táan le autoridadoʼoboʼ. Wa yaan le folleto teʼ luʼumil tuʼux kajaʼanechoʼ jeʼel u páajtal a kʼáatik junpʼéel tiʼ u secretarioil le múuchʼuliloʼ.

Wa a kʼáat a wojéelt u maasileʼ jeʼel u páajtal a tʼaan tu najil Beteleʼ.

Maʼ xaaneʼ jeʼel u yutstal xan ta wicheʼ

Donacionoʼob ku beetaʼal ich Internet

LE MÁAX KU KANANOʼ (UTIAʼAL LE MÚUCHʼULILOʼ)