¿Ta xokaj wa u tsʼook revistailoʼob U Pʼíich Tulumil Kanan? Wa beyoʼ, ilawil wa jeʼel a núukik le kʼáatchiʼobaʼ:

¿Baʼaxoʼob kun luʼsbil ken taalak le xuʼulsajiloʼ?

Ichil le baʼaloʼobaʼ tiaʼan le gobiernoʼoboʼ, le guerraʼoboʼ, le kʼasaʼaniloʼ, le máaxoʼob uts tu tʼaan u beetkoʼob baʼaloʼob kʼaastakoʼ yéetel le religionoʼob ku beetkoʼob baʼaloʼob maʼ maʼalobtak tu táan Dios yéetel ku tuskoʼob le máakoʼoboʼ (1/5, táan juʼun 3 tak 5).

¿Máax le Gog tiʼ u luʼumil Magog ku yaʼalik u libroil Ezequieloʼ?

Gog tiʼ u luʼumil Magogueʼ maʼ Satanasiʼ. Maʼ xaaneʼ junmúuchʼ kaajoʼob yaan u yóotik u xuʼulsoʼob u kaajal Dios ken káajak le nojoch muʼyajiloʼ (15/5, táan juʼun 29 yéetel 30).

¿Máakalmáak le seis baʼaloʼob jeʼel u yáantik máak utiaʼal u kiʼimaktal u yóol kex tsʼoʼok u chʼíijiloʼ?

Le Bibliaoʼ ku yaʼalikeʼ unaj k-eʼesik 1) kabal óolal, 2) maʼalob tuukul, 3) maʼ u chʼíikil máak u tukult baʼax maʼ tu páajtal u beetik, 4) utsil, 5) k-bisikba yéetel tuláakal yéetel 6) k-tsʼáaik u diosboʼotikil. Wa ku yantal tiʼ máak le jatsʼuts modosoʼobaʼ yaan u páajtal u kiʼimaktal u yóol kex tsʼoʼok u chʼíijil (1/6, táan juʼun 8 tak 10).

¿Bix tu yeʼesil u yutsil Jesús yoʼolal le milagroʼob tu beetoʼ?

Ka bin tiʼ junpʼéel boda tu kaajil Canaeʼ, Jesuseʼ tu sutaj «maʼalob vino[il]» 380 litros jaʼ. Uláakʼ juntéeneʼ tu tséentaj maas tiʼ cinco mil máakoʼob (Mat. 14:14-21; Juan 2:6-11). Le kaʼapʼéel milagroʼobaʼ ku yeʼesikeʼ Jesuseʼ jach uts jeʼex u Taataeʼ (15/6, táan juʼun 4 yéetel 5).

¿Baʼaxten k-ojel jeʼel u páajtal k-lúubul utsil tiʼ Dios kex j-kʼebanoʼoneʼ?

Job, Lot, David yéetel uláakʼ máaxoʼob meyajt Dioseʼ yaan tuʼux fallarnajoʼob. Chéen baʼaleʼ le máakoʼobaʼ lúuboʼob utsil tiʼ Dios tumen jach u kʼáat u beetoʼob baʼax ku yaʼalik. Tu yeʼesoʼob jach tu jaajil arrepentirnajoʼob yéetel u kʼáat u yutskíint u kuxtaloʼob. Bey jeʼel u páajtal k-beetik xan toʼonoʼ (1/7, táan juʼun 12 yéetel 13).

¿Tuláakal wa le máaxoʼob yanoʼob ichil le Nojoch Babilonia kun xuʼulsbiloʼoboʼ?

Maʼatech. Zacarías 13:4 tak 6, ku yeʼesikeʼ tak le máaxoʼob nuʼuktik le religionoʼoboʼ yaan u náachtaloʼob yéetel yaan u yaʼalikoʼob mix juntéen táakpajoʼob ichil le religionoʼob maʼatech u kaʼanskoʼob u jaajiloʼ (15/7, táan juʼun 15 yéetel 16).

¿Baʼaxten tu yaʼalaj Barak jeʼel u bin baʼateʼel chéen wa ku bin Débora tu yéeteleʼ?

Barak kaʼacheʼ jach yaan u fe. Tu lugar u kʼáatik tiʼ Dios u nuʼukulil baʼateleʼ, tu kʼáataj ka xiʼik juntúul u profeta Jéeoba tu yéeteloʼob utiaʼal ka líiʼsaʼak u yóoloʼob (Jue. 4:6-8; 5:7) (1/8, táan juʼun 13).

¿Tiʼ baʼaxoʼob jeʼel u páajtal u tuukul máax meyajtik Jéeobaeʼ?

Jeʼel u páajtal u tuukul tiʼ le baʼaxoʼob u beetmaj Jéeobaoʼ, tiʼ le baʼax ku yaʼalik le Bibliaoʼ, tiʼ le oracionoʼ yéetel tiʼ u kuxtal Jesús tu kʼubaj t-oʼolaloʼ (15/8, táan juʼun 10 tak 13).

Juntúul sukuʼun wa juntúul kiik maʼ tsʼokaʼan u beeleʼ, ¿yéetel máax maʼ unaj u biskubaiʼ?

Kex k-kʼáat eʼes jatsʼuts modos tiʼ u maasil máakoʼobeʼ maʼ unaj k-bisikba yéetel máaxoʼob maʼatech u meyajtikoʼob Jéeobaiʼ mix yéetel le máaxoʼob maʼ u kʼubmoʼob u kuxtaloʼob tiʼ letiʼiʼ (1 Cor. 15:33) (15/8, táan juʼun 25).

¿Baʼax beet u pʼáatal minaʼan u fe apóstol Pedro, yéetel baʼax áant utiaʼal u kaʼa antal u fe?

Apóstol Pedroeʼ tu yeʼesaj yaan u fe le ka káaj u xíimbal yóokʼol le jaʼoʼ (Mat. 14:24-32). Chéen baʼaleʼ le ka tu yilaj le kʼaʼamkach iikʼoʼ sajakchaji. Pero ka tsʼoʼokeʼ tu chʼikaj u paakat tiʼ Jesús yéetel tu yóotaj ka áantaʼak (15/9, táan juʼun 16 yéetel 17).

Jeʼex u yaʼalik Baʼaxoʼob 28:4, ¿baʼaxten u kajnáaliloʼob Maltaeʼ tu tukloʼob juntúul j-kíimsaj wíinik le apóstol Pablooʼ?

Maʼ xaaneʼ tumen le ka chiʼib Pablo tumen juntúul kaaneʼ, tu tukloʼobeʼ táan u castigartaʼal tumen Dike wa Dicea, u diosail le justiciaoʼ. Tumen ku tuklaʼaleʼ le diosaaʼ chéen ku castigartik máax beetmil baʼax kʼaas (1/10, táan juʼun 9).

¿Baʼax ku kaʼansiktoʼon le úuchik u náayal u yóol Martaoʼ?

Juntéenjeakileʼ Martaeʼ náay u yóol le táan u beetik junpʼéel janaloʼ. Jesuseʼ tu yaʼalajtiʼeʼ María, u yíitsʼineʼ, tu yéeyaj u maas maʼalobil tumen pʼáat u yuʼub u kaʼansaj. Toʼoneʼ unaj k-kanáantik maʼ u náayal k-óol yéetel baʼaloʼob maʼ kʼaʼanaʼantak ka tak pʼáatak maʼ táan k-meyajtik Diosiʼ (15/10, táan juʼun 18 tak 20).