¿Baʼax kʼiin ken taalak u Reino Dios?

«YUUMTSIL, ¿bin [wa] a kaʼa sut le [reino] tiʼ Israel tiʼ le kʼiinoʼobaʼ?» (Hechos 1:6, LTN.) Le kʼáatchiʼ tu beetaj le apostoloʼoboʼ ku yeʼesik jach u kʼáat u yojéeltoʼob kaʼach baʼax kʼiin ken u tsʼáa u Reino Jesús. Kex tsʼoʼok u máan maas tiʼ dos mil jaʼaboʼob tiʼ leloʼ, láayliʼ yaan yaʼab máaxoʼob ku jach tuklikoʼob: «¿Baʼax kʼiin ken taalak u Reino Dios?».

Jesuseʼ jach tʼaanaj tu yoʼolal le Reinooʼ, le oʼolal jeʼel u núukik le kʼáatchiʼ ku beetaʼalaʼ. Yéetel bey tu beetiloʼ, tumen jach tʼaanaj tiʼ u kʼiiniloʼob «ken taalak u Paal máak» (Mateo 24:37). Le u taalbalaʼ yaan u yil yéetel u káajal u reinar u Reino Diosoʼ. ¿Baʼax túun le u taalbal Cristooʼ? Koʼox ilik kampʼéel baʼaxoʼob ku yaʼalik le Biblia yoʼolal le u taalbaloʼ.

1. Cristoeʼ «taal» wa káaj u gobernar tsʼokaʼaniliʼ u máan kʼiin kíimik. Utéenjeakileʼ, Jesuseʼ tu ketuba yéetel utúul máak «bin táanxel luʼum utiaʼal ka beetaʼak [reyil]» (Lucas 19:12). ¿Bix úuchik le baʼax tu yaʼalajoʼ? Letiʼeʼ bin teʼ «táanxel luʼum», le ka bin teʼ kaʼan le ka tsʼoʼok u kaʼa kuxkíintaʼaloʼ. Yéetel jeʼex úuchik u yaʼalik tiʼ uláakʼ kettʼaaneʼ, «ku tsʼoʼokol u máan yaʼab kʼiinoʼobeʼ» yaan u suut yéetel jach yaʼabach páajtalil (Mateo 25:19).

Ka máan jujumpʼéel jaʼaboʼob suunak Jesús teʼ kaʼanoʼ, le apóstol Pablooʼ tu tsʼíibtaj: «[Jesuseʼ] tu kʼubaj tu yoʼolal le kʼebanoʼoboʼ chéen jumpʼéeliliʼ kíimsbil siibal utiaʼal kʼiinoʼob minaʼan u xuul, ku tsʼoʼokoleʼ ka kulaj tu x-noʼoj Jajal Dios. Tiʼ ku páaʼtaj tak ken tsʼaʼabak u [enemigoʼob] yáanal u yook» (Hebreob 10:12, 13). Bey túunoʼ, le ka kʼuch teʼ kaʼanoʼ, Jesuseʼ tu páaʼtaj yaʼab jaʼaboʼob tak le ka tsʼaʼab le Reino tiʼ tumen Jéeobaoʼ, le Reino úuch aʼalaʼak u tsʼaʼabaltiʼoʼ. Bey úuchik u «taal» wa u káajal u gobernar Cristo teʼ kaʼanoʼ. Baʼaleʼ ¿ilaʼab wa tumen wíinikoʼob le baʼax úuchaʼ?

 2. Maʼ jach yéetel u yich máak ken u yil tsʼoʼok u káajal u gobernar Jesusiʼ. Kʼaʼajseʼ Jesuseʼ tʼaanaj tiʼ le chíikulal kun eʼesik tsʼoʼok u káajal u gobernaroʼ (Mateo 24:3). Tuukulnen tiʼ lelaʼ: wa chíikaʼan kun ilbil u káajal u gobernareʼ, ¿máasaʼ maʼ tu kʼaʼabéettal mix upʼéel chíikulal? Koʼox ketik beyaʼ. Tukulteʼ táan a bin a wil le kʼáaʼnáaboʼ. Maʼ xaaneʼ le táan a bin teʼ bejoʼ ka wilik yaʼab letreroʼob ku yeʼeskoʼobtech tuʼux yaan le kʼáaʼnáaboʼ, baʼaleʼ le ken kʼuchkech tu jáal le kʼáaʼnáab yéetel le ken a wil le yaʼabach jaʼoʼ, ¿yaan wa a páaʼtik a wilik upʼéel nojoch letrero ka u yaʼaltech: «Lelaʼ letiʼe kʼáaʼnáaboʼ»? ¿Máasaʼ maʼ? Maʼ kʼaʼabéettech upʼéel letrero ka u yaʼaltechiʼ, tumen táan a wilik.

Baʼaleʼ Jesuseʼ tu yaʼalaj baʼax kun eʼesik tsʼoʼok u káajal u gobernar, tumen u yojel maʼ jach yéetel u yich máak ken u yiliʼ. U jaajileʼ, le chíikulal tu tsʼáajoʼ ku yáantkoʼon k-naʼat upʼéel baʼax úuch teʼ kaʼanoʼ. Le beetkeʼ, letiʼeʼ tu yaʼalaj: «U taalbal u [reino] Jajal Dioseʼ maʼ jumpʼéel baʼal ku páajtal u yilaʼaliʼ» (Lucas 17:20). Baʼaleʼ ¿baʼaxoʼob túun kun eʼesik tsʼoʼok u káajal u gobernar Cristo?

3. Ka káaj u gobernar Cristo teʼ kaʼanoʼ, káaj xan u maas yantal talamiloʼob way Luʼumeʼ. Jesuseʼ tu yaʼaleʼ ken káajak u beetik u Reyil teʼ kaʼanoʼ, teʼ luʼumaʼ yaan u yantal baʼateloʼob, wiʼijiloʼob, yaayaj kʼojaʼaniloʼob, yaan u sen yantal loobil yéetel yaan u jach tíitkuba luʼum (Mateo 24:7-12; Lucas 21:10, 11). ¿Baʼaxten yaan u yúuchul le baʼaloʼobaʼ? Le Bibliaoʼ ku yaʼalikeʼ Satanás, «le máax ku tusbel way yóokʼol kaabeʼ», jach pʼujaʼan tumen u yojel chéen upʼíit kʼiin pʼaataltiʼ desde ka káaj u gobernar Cristo teʼ kaʼanoʼ (Juan 12:31; Apocalipsis 12:9, 12). Teʼ kʼiinoʼobaʼ yaʼab baʼax eʼesik jach pʼujaʼan Satanás yéetel táan u gobernar Cristo. Le baʼaloʼobaʼ tu jaʼabil 1914 ka káaj u yilaʼal u sen yúuchul tiʼ tuláakal yóokʼol kaab, yéetel tak le historiadoroʼob aʼalik kʼexpaj le yóokʼol kaab teʼ jaʼab jeʼeloʼ.

Maʼ xaaneʼ ka tuklikeʼ le baʼaxoʼob ku yúuchlaʼ chéen baʼaloʼob kʼaastak ku taasik, baʼaleʼ maʼ beyiʼ. U jaajileʼ le baʼaxoʼob ku yúuchlaʼ ku yeʼeskoʼob u Reino Dios tu kʼab Cristoeʼ tsʼoʼok u káajal u gobernar teʼ kaʼanoʼ. Maʼ kun xáantaleʼ, le Reinoaʼ yaan u gobernartik tuláakal le Luʼumaʼ. Baʼaleʼ ¿bix jeʼel u páajtal u yojéeltik máak wa jach tu jaajil yaan le Reinoaʼ, yéetel baʼax unaj u beetik utiaʼal u tsʼáaikuba yáanal u gobernación?

4. Le táan u gobernar Jesusoʼ, yaan xan u kʼaʼaytaʼal maʼalob baʼaloʼob tuláakal yóokʼol kaab. Jesuseʼ tu yaʼaleʼ «jeʼel bix úuchik tu kʼiiniloʼob Noeeʼ, bey xan bíin úuchuk» le ken káajak u gobernar (Mateo 24:37-39). * Noeeʼ maʼ chéen tu beetaj upʼéel arcaiʼ: tu kʼaʼaytaj xan tiʼ le máakoʼob ka u tojkíint  u kuxtaloʼoboʼ (2 Pedro 2:5). Tu yaʼalajtiʼob táan u taal upʼéel Búulkabal. Jesuseʼ tu yaʼaleʼ tu kʼiiniloʼob táan u gobernareʼ u disipuloʼobeʼ yaan beetkoʼob upʼéel meyaj jeʼex le tu beetaj Noeoʼ. Letiʼeʼ tu yaʼalaj: «U maʼalob péektsil le [reinooʼ] bíin [kʼaʼaytaʼak] tiʼ tuláakal yóokʼol kaab, utiaʼal ka kʼaj óoltaʼak tumen tuláakal kaajoʼob; letiʼ túun ken taalak u xuul» (Mateo 24:14).

Jeʼex t-ilij teʼ xook yaan táanil tiʼ lelaʼ, u Reino Dioseʼ yaan u xuʼulsik tuláakal u gobiernoiloʼob le yóokʼol kaabaʼ. Tiʼ tuláakal máak táan u kʼaʼaytaʼaleʼ u Reino Dioseʼ maʼ kun xáantal ken káajak u gobernartik tuláakal le Luʼumaʼ. Yéetel le kʼaʼaytajaʼ, ku tsʼaʼabal tiʼ tuláakal máak u páajtalil u salvarkuba yéetel u tsʼáaikuba yáanal u Reino Dios. Techeʼ, ¿baʼax túun ken a beete?

Techeʼ, ¿yaan wa a kʼamik le utsiloʼob ken u taas u Reino Diosoʼ?

Le baʼax tu kʼaʼaytaj Jesusoʼ tu líiʼsaj u yóol le máaxoʼob uʼuyoʼ. Úuchileʼ, le ka tu tsʼáajuba Adán yéetel Eva tu contra Dioseʼ, letiʼeʼ tu yaʼalaj yaan u tsʼáaik upʼéel gobierno utiaʼal u béeykuntik le baʼax u tukulmaj desde tu káajbaloʼ. ¿Baʼax u tukulmaj Jéeoba kaʼachi? Ka kuxlak mantatsʼ le máakoʼob tiʼ upʼéel paraíso way Luʼumeʼ. ¿Maʼ wa utstatʼaan a wojéeltik tsʼoʼok u káajal u gobernar teʼ kaʼan le Reino úuch aʼalaʼak yaan u yantaloʼ? Jeʼex k-ilkaʼ, u Reino Dioseʼ maʼ talam u naʼataʼal baʼaxiʼ; upʼéel gobierno.

Le Rey u tsʼaamaj Diosoʼ táan u gobernar chúumuk tiʼ u enemigoʼob (Salmo 110:2). Teʼ yóokʼol kaab náachchajaʼan tiʼ Diosaʼ, Jesuseʼ táan u kaxtik le máaxoʼob u kʼáatoʼob u kʼaj óoltoʼob Dios yéetel u kʼáat u adorartoʼob tiʼ «pixan yéetel tiʼ jaaj» (Juan 4:24). Tiʼ tuláakal máax táan u tsʼaʼabal u páajtalil u kuxtal mantatsʼ tu yáanal u Reino Dios, jeʼel tuʼuxak u taaleʼ, jeʼel bukaʼaj u jaʼabileʼ, kex ayikʼal wa kex óotsil (Beetaʼanoʼob 10:34, 35). Ilawil a wantal tu yáanal le Reinoaʼ. Ilawil a maas kaambal tiʼ u Reino Dios, tumen wa ka beetkeʼ yaan a kuxtal utiaʼal mantatsʼ tu yáanal le maʼalob gobiernoaʼ (1 Juan 2:17).

[Tsolajiloʼob]

[U tsolajil le oochel teʼ táan juʼun 8]

Le baʼaloʼob kʼaastak ku yúuchul sáamsamaloʼ ku yeʼesik táan u náatsʼal u kʼiinil u yilaʼal maʼalob baʼaloʼob

[U tsolajil le oochel teʼ táan juʼun 8]

U fotoi le tsʼoonoʼ utiaʼal: U.S. Army photo