¿Baʼax u Reino Dios?

¿TIʼ BAʼAX jach tʼaanaj Jesús le ka taal way Luʼumeʼ? Letiʼeʼ jach tʼaanaj tiʼ u Reino Dios (Lucas 4:43). Le máaxoʼob uʼuy u tsikbaloʼ yaʼab u téenel tu yuʼuboʼob u tʼaan tiʼ le Reinoaʼ. ¿Tu naʼatoʼob wa tiʼ baʼax táan kaʼach u tʼaan Jesús? ¿Tu kʼáatoʼob wa tiʼ baʼax le Reinooʼ? Maʼatech. Teʼ Evangelioʼoboʼ maʼatech u yaʼalaʼal wa tu kʼáatoʼob. ¿U yojloʼob wa túun jach baʼax u Reino Dios?

U jaajileʼ, le Kiliʼich Tsʼíiboʼob ku xokaʼal kaʼach tumen le judíoʼoboʼ, ku tʼaanoʼob tiʼ le Reinooʼ, yéetel ku jach tsolik baʼaxiʼ yéetel baʼaxoʼob ken u beete. Jeʼex le judíoʼoboʼ, toʼon xaneʼ jeʼel u páajtal k-kanik teʼ Biblia baʼax le Reinooʼ. Koʼox tʼaan tiʼ siete baʼaloʼob ku yaʼalik le Biblia yoʼolal le Reinooʼ. Le yáax óoxpʼéeloʼ ojéelaʼan kaʼach tumen le judíoʼoboʼ tak le maʼiliʼ taalak Jesús way Luʼumoʼ. Le uláakʼ óoxpʼéeloʼ tsʼaʼab ojéelbil tumen Jesús yéetel tumen u apostoloʼob teʼ yáax siglooʼ. Le u tsʼookoʼ maʼ sen úuch kʼuchuk ojéelbiliʼ.

1. U Reino Dioseʼ upʼéel gobierno mix bikʼin kun xuʼulul. Le yáax profecía teʼ Bibliaoʼ ku yaʼalikeʼ Dioseʼ tu tuklaj u tsʼáaik utúul máax utiaʼal u salvartik le máaxoʼob ken u yuʼuboʼob tʼaanoʼ. Le máax tsʼaʼabaʼ letiʼe «chʼiʼibal» ku yaʼalaʼal teʼ Bibliaoʼ, yéetel aʼalaʼabeʼ yaan u yutskíintik tuláakal le talmiloʼob anchaj úuchik u tsʼáaikuba Adán, Eva yéetel Satanás tu contra Diosoʼ (Génesis 3:15). Ka máan kʼiineʼ, aʼalaʼab tiʼ rey David upʼéel baʼal jatsʼuts yoʼolal le «chʼiʼibal» wa Mesíasoʼ; aʼalaʼabtiʼeʼ yaan u kʼuchul u beetuba Reyil tiʼ upʼéel Reino mix bikʼin kun xuʼulul (2 Samuel 7:12-14).

2. U Reino Dioseʼ yaan u xuʼulsik tuláakal u gobierno wíinik. Tiʼ le profeta Danieloʼ tsʼaʼab u yil ichil upʼéel wayakʼ bix kun antal jejeláas nukuch gobiernoʼob teʼ yóokʼol kaabaʼ, yéetel bejlaʼa táan u yúuchul le baʼax tsʼaʼab u yiloʼ. Uʼuy a wuʼuy bix u taal u tsʼoʼokol le baʼax tu yilajaʼ: «Tu kʼiiniloʼob [...] [le gobiernoʼob yanoʼob teʼ tsʼook kʼiinoʼobaʼ], u [Diosil] kaʼaneʼ bíin u líikʼes jumpʼéel [reino] mix bikʼin bíin xuʼulsaʼakiʼ, bíin pʼáatak utiaʼal minaʼan u xuul, mix bíin tʼonkíintaʼak tumen mix jumpʼéel múuchʼ kaaj, baʼaleʼ yaan u xuʼulsik jumpuliʼ tuláakal le uláakʼ [reinoʼoboʼ]». Jeʼex u yaʼalik le tekstoaʼ yaan u láaj xuʼulsaʼal le reinoʼob wa gobiernoʼob yaan teʼ yóokʼol kaab paʼteʼ yéetel le baʼateloʼob yéetel le kʼaasil ku beetkoʼoboʼ. Jeʼel bix u yaʼalik le  profecía tu yaʼalaj Danielaʼ, u Reino Dioseʼ maʼ kun xáantal ken gobernarnak tu yóokʼol tuláakal le Luʼumaʼ (Daniel 2:44, 45). Chéen letiʼe gobierno kun yantalaʼ. *

3. U Reino Dioseʼ yaan u xuʼulsik baʼateloʼob, kʼojaʼaniloʼob, wiʼijil yéetel kíimil. Le profecíaʼob yanoʼob teʼ Bibliaoʼ ku yeʼeskoʼob baʼax ken u beet u Reino Dios ken u gobernart le Luʼumaʼ. Yaan u beetik le baʼax maʼ páatak u beetaʼal tumen wíinikoʼoboʼ yéetel mix bikʼin kun páajtal u beetikoʼoboʼ. ¡Yaan u láaj xuʼulsik tuláakal u nuʼukulil baʼateʼel! Le Bibliaoʼ ku yaʼalik: «[Dioseʼ yaan] u tsʼáaik xuul tiʼ le baʼateloʼob tuláakal tuʼux yóokʼol kaab» (Salmo 46:9). Maʼ kun kʼaʼabéettal doctoroʼob mix hospitaloʼob tumen maʼ kun yantal mix upʼéel kʼojaʼanil. «Mix juntúul kajnáal bíin u yaʼal: Kʼojaʼanen.» (Isaías 33:24.) Mix máak kun kʼojaʼantal mix kun kíimil yoʼolal wiʼijil. Le Bibliaoʼ ku yaʼalik: «Ka yanak yaʼabkach baʼal jaantbil teʼ kaajoʼoboʼ» (Salmos 72:16). Tsʼoʼoleʼ le kíimil, le k-maas nojoch enemigooʼ yaan u luʼsaʼal utiaʼal mantatsʼ. Maʼ ku kaʼa antal cementerioʼob mix le muʼyajil ku taasik u kíimil utúul máax k-yaabilmaj. Dioseʼ «bíin u xuʼuls jumpuliʼ le kíimiloʼ, bíin u choʼo u jaʼil u yich tuláakal máak» (Isaías 25:8).

4. Dios yéey máax ken u beet u Reyil u Reino. Le Mesíasoʼ maʼ chéen tu juun tu yéeyubaiʼ, mix chéen wíinikoʼob yéeyiʼ. Baʼaxeʼ Jéeoba Dios yéeye. Le tʼaan Mesías yéetel Cristooʼ bey u yeʼeskoʼob, tumen le kaʼapʼéel tʼaanoʼobaʼ u kʼáat u yaʼaloʼob «Yéeyaʼan». Bey túunoʼ Jéeoba yéey Jesús utiaʼal u beet u Reyil. Dioseʼ tu yaʼalaj tu yoʼolal Jesús: «Jeʼel in palitsilaʼ, [...] letiʼ máax in yéeymaj, tiʼ máax kin kiʼimak óoltaʼal. Tsʼoʼok in tsʼáaik in pixan tiʼ utiaʼal ka u taas [justicia] tiʼ tuláakal múuchʼ kaajoʼob» (Isaías 42:1; Mateo 12:17, 18). U jaajileʼ chéen Dios u yojel jach baʼax Gobernantei kʼaʼabéettoʼon.

5. U Reyil u Reino Dioseʼ tsʼoʼok u yeʼesik jach utúul maʼalob rey. Jesús le Nazarenooʼ, tu yeʼesaj letiʼ le Mesías aʼalaʼan kun taaloʼ. Letiʼeʼ síij ichil le chʼiʼibal tuʼux tu yaʼalaj Dios kun taaloʼ (Génesis 22:18; 1 Crónicas 17:11; Mateo 1:1). Ka taal way Luʼumeʼ, Jesuseʼ tu tsʼoʼokbesaj yaʼab tiʼ le profecíaʼob úuch tsʼíibtaʼakoʼoboʼ. Tsʼoʼoleʼ desde teʼ kaʼanoʼ uʼuyaʼab u yaʼalaʼal letiʼ le Mesíasoʼ. Dioseʼ tʼaanajeʼ ka tu yaʼalaj u Hijo; le angeloʼob xanoʼ tu yaʼalajoʼob letiʼ le Mesías aʼalaʼan kun taaloʼ. Tsʼoʼoleʼ, le yaʼab milagroʼob tu beetaj Jesús tu táan u milesi máakoʼoboʼ, tu chíikbesaj tsʼaʼan páajtalil tiʼ tumen Dios. * Jesús túuneʼ yaʼab u téenel tu yeʼesaj yaan u beetkuba utúul jach maʼalob gobernante. Tiʼ letiʼeʼ maʼ chéen yaan kaʼach u páajtalil u yáantik le máakoʼoboʼ, baʼaxeʼ taakchaj xan u beetik (Mateo 8:1-3). Letiʼeʼ tu yilaj u yáantik tuláakal máak, tu chʼaʼaj óotsilil, maʼ tu chʼaʼaj saajkil u aktáant talamiloʼobiʼ yéetel maʼ tu taasuba noj baʼaliliʼ. Le baʼax tu beetaj le ka taal way Luʼumeʼ tsʼíibtaʼab teʼ Biblia utiaʼal u páajtal u xokaʼal tumen tuláakal máak.

6. Tu Reino Dioseʼ yaan u gobernar 144,000 máakoʼob yéetel Cristo. Jesuseʼ tu yaʼaleʼ u apostoloʼob yéetel uláakʼ máakoʼobeʼ yaan u gobernaroʼob tu yéetel teʼ kaʼanoʼ. Letiʼeʼ tu yaʼaleʼ le múuchʼ máakoʼobaʼ u «chan múuchʼ taman» (Lucas 12:32, LTN). Tiʼ apóstol Juan xaneʼ tsʼaʼab u yojéelteʼ le múuchʼ máakoʼobaʼ 144,000 utúulaloʼob. Teʼ kaʼanoʼ letiʼobeʼ yaan u gobernaroʼob yéetel Cristo yéetel yaan u beetik u reyiloʼob yéetel u sacerdoteiloʼob (Apocalipsis 5:9, 10; 14:1, 3).

7. U Reino Dioseʼ tsʼoʼok u káajal u gobernar teʼ kaʼanoʼ yéetel taʼaytak u káajal u gobernar way Luʼumeʼ. Lelaʼ upʼéel tiʼ le  baʼaxoʼob maas jatsʼutstak jeʼel k-kanik tu yoʼolal le Reinooʼ. Le Bibliaoʼ yaʼab tuʼux ku yeʼesik tsʼoʼok u tsʼaʼabal u beet u Reyil Jesús teʼ kaʼanoʼ. Letiʼeʼ táan u gobernar teʼ kaʼanoʼ, yéetel maʼ kun xáantaleʼ yaan xan u gobernartik le Luʼumaʼ yéetel yaan u béeykuntik le baʼaxoʼob aʼalaʼan tumen le Biblia ken u beetoʼ. Baʼaleʼ ¿baʼax eʼesik táan u gobernar u Reino Dios teʼ kʼiinoʼobaʼ? ¿Baʼax kʼiin ken káajak u gobernar yóokʼol le Luʼumaʼ?

[Tsolajiloʼob]