Ilawil a natsʼkaba tiʼ Dios

Minaʼan uláakʼ Taatatsil jeʼex letiʼeʼ

Mateo 3:16, 17

¿MÁASAʼ jach yaʼab baʼax ku taal tu tuukul máak ken u yuʼub le tʼaan «taatatsiloʼ»? U jaajileʼ utúul taatatsil u yaabilmaj u paalaleʼ yaʼab baʼax ku beetik utiaʼal ka xiʼik utsil tiʼ u paalal tak ken nuukchajkoʼob. Le oʼolal jach maʼalob ka u yaʼal le Bibliaoʼ, Jéeobaeʼ «k-Yuum» wa k-Taata (Mateo 6:9). Baʼaleʼ ¿bix Letiʼ? Utúul taatatsileʼ chíikaʼan bix u modos yoʼolal bix u tʼanik u paalal, le oʼolaleʼ utiaʼal k-ilik bix Jéeobaeʼ, koʼox ilik baʼax tu yaʼalaj tiʼ Jesús le ka tsʼoʼok u yokjaʼoʼ.

Óoliʼ tu mesil octubre tu jaʼabil 29 teʼ yáax siglooʼ, Jesuseʼ bin utiaʼal ka okjaʼanak tu áalkab jaʼi Jordán. Le Bibliaoʼ ku yaʼalik baʼax úuchi: «Le ka tsʼoʼok u tsʼaʼabal u yokjaʼ Jesuseʼ, jóokʼ tiʼ le jaʼoʼ. Ka téek jeʼepaj le kaʼanoʼ, ka tu yilaj Jesús u yéemel u Kiliʼich Pixan Yuum Jajal Dios bey juntúul palomaeʼ táan u taal tu yóokʼol. Ka jóokʼ teʼ kaʼanoʼ jumpʼéel tʼaan ku yaʼalikeʼ: Lelaʼ in paal in yaabilaj, tu yoʼolal máax jach kiʼimak in wóol» (Mateo 3:16, 17). * Jéeoba Dios aʼal le jatsʼuts tʼaanoʼobaʼ, yéetel jach ku yeʼeskoʼob baʼax clasei taatatsil letiʼ. Koʼox ilik óoxpʼéel baʼaxoʼob tu yaʼalaj tiʼ u Hijo.

Yáaxeʼ, le ka tu yaʼalaj «Lelaʼ in paal», bey ka u yaʼal kaʼach: «Jach kiʼimak in wóol tumen in hijoech». Le hijotsiloʼob túunoʼ unaj yojéelkoʼob bix u yuʼubkuba u taataʼob tu yoʼolaloʼob yéetel unaj xan u yuʼubkubaʼob kʼaʼabéetoʼob ichil le familiaoʼ. Le maʼalob taatatsiloʼob túunoʼ ku beetkoʼob u yuʼubkuba maʼalobil u paalaloʼob. ¿Bix a tuklik tu yuʼubiluba Jesús, ka aʼalaʼabtiʼ tumen u Taata jach kiʼimak u yóol tu yoʼolal?

Le ka tu yaʼalaj tiʼ u hijo «in yaabilaj», Jéeobaeʼ tu yeʼesaj xan jach bukaʼaj u yaabiltmi. U jaajileʼ, tu yaʼalajtiʼ: «In yaabilmech». Jeʼex k-ilkoʼ utúul taatatsil ku líiʼsik maʼalob u paalaloʼobeʼ ku yaʼaliktiʼob yéetel ku yeʼesiktiʼob jach u yaabilmoʼob. Jesuseʼ jach wal kiʼimakchaj u yóol ka tu yuʼubaj u yaʼalaʼaltiʼ yaabiltaʼan tumen u Taataeʼ.

Tu tsʼoʼokeʼ, Jéeobaeʼ tu yaʼalaj tiʼ Jesús: «tu yoʼolal máax jach kiʼimak in wóol». Tiʼ uláakʼ tʼaanoʼobeʼ tu yaʼalajtiʼ: «In Paal jach kiʼimak in wóol tu yoʼolal baʼax tsʼoʼok a beetik». Jeʼex Jéeobaeʼ, utúul taatatsil jach u yaabilmaj u paalaleʼ jach ku yilik u yaʼaliktiʼob jach kiʼimak u yóol yoʼolal baʼax maʼalob tsʼoʼok u beetkoʼob. Le paalaloʼoboʼ jach ku líikʼil u yóoloʼob ken aʼalaʼaktiʼob beyaʼ. Jesuseʼ bey wal tu yuʼubiluba le ka tu yojéeltaj maʼalob u yilaʼal tumen u Taata le baʼax tsʼoʼok u beetkoʼ.

Jeʼex k-ilkoʼ, minaʼan uláakʼ Taatatsil jeʼex Jéeobaeʼ. ¿Utstatʼaan wa ka yanak utúul a taata jeʼex letiʼeʼ? Techeʼ jeʼel a kʼuchul a bisaba maʼalob tu yéeteleʼ. Wa ka kaambal tu yoʼolal Jéeoba, bey xan wa ka kʼubik a wóol tiʼ letiʼ yéetel wa ka wilik a beetik baʼax utstutʼaaneʼ, letiʼeʼ yaan u natsʼkuba tiʼ teech. Le Bibliaoʼ ku yaʼalik: «Natsʼabaʼex tiʼ Jajal Dios, letiʼ xaneʼ bíin u natsʼuba tiʼ teʼex» (Santiago 4:8). Yaan a wuʼuykaba jach kanáantaʼanech wa ka yantal náatsʼ tiʼ Jéeoba, le maas maʼalob taatatsil jeʼel u yantaltoʼonoʼ.

[Tsolajiloʼob]