Kʼáatchiʼob ku beetaʼal

¿Tu puksiʼikʼal máak wa yaan u Reino Dios?

Yaʼab máakoʼobeʼ bey u creerkoʼoboʼ. Tak le Enciclopedia Católicaoʼ ku yaʼalik: «Le u reino Diosoʼ [...] tiʼ ku reinar t-puksiʼikʼaleʼ». Lelaʼ letiʼe baʼax ku kaʼansaʼal tumen yaʼab religionoʼob. Baʼaleʼ ¿jach wa tu jaajil ku yeʼesik le Biblia tu puksiʼikʼal máak yaan u Reino Diosoʼ? ¿Baʼaxten ku creertaʼal lelaʼ?

Yaan máaxoʼob tuklikeʼ Jesús kaʼans tu puksiʼikʼal máak yaan u Reino Dios. Maʼ xaaneʼ ku yaʼalikoʼobeʼ letiʼeʼ tu yaʼalaj: «U reino Dioseʼ tiʼ yaan chúumuk teʼexeʼ» (Lucas 17:21, NM). Uláakʼ Bibliaʼobeʼ ku yaʼalikoʼob beyaʼ: «U reino Jajal Dioseʼ ichileʼex yaan». Baʼaleʼ le Bibliaʼobaʼ, ¿maʼalob wa u traducirkoʼob le baʼax tu yaʼalaj Jesusoʼ? ¿Tu yóotaj wa u yaʼal Jesús u Reino Dioseʼ tu puksiʼikʼal máak yaan?

Yáaxeʼ, ¿baʼax u kʼáat u yaʼal le tʼaan puksiʼikʼaloʼ? Teʼ Bibliaoʼ le tʼaan puksiʼikʼaloʼ yaan horaeʼ ku meyaj utiaʼal u yúuchul tʼaan tiʼ jach máaxoʼon ichiloʼon, tiʼ k-tuukuloʼob, tiʼ baʼaxoʼob k-uʼuyik yéetel tiʼ baʼax túulchʼintkoʼon k-beet upʼéel baʼal. Le oʼolaleʼ yaʼab máaxoʼobeʼ jatsʼuts u yuʼubkoʼob tiʼ yaan tu puksiʼikʼaloʼob u Reino Dioseʼ, tumen ku yaʼalkoʼobeʼ le kun áantoʼob utiaʼal ka u kʼex u kuxtaloʼob yéetel utiaʼal ka u beetubaʼob maas maʼalob máakil. Baʼaleʼ ¿jaaj wa le baʼax ku creerkoʼobaʼ?

Le Bibliaoʼ ku yaʼalik: «Minaʼan uláakʼ baʼal ku tuus yéetel sen kʼasaʼaneʼ jeʼel bix u puksiʼikʼal wíinikeʼ» (Jeremías 17:9). Jesús xaneʼ tu yaʼalaj: «Tiʼ u puksiʼikʼal máakoʼob ku jóokʼol le kʼaakʼas [tuukuloʼoboʼ], le ookoloʼ, le j-kíimsaj wíinikiloʼ, le nupkʼebaniloʼ; le ookoliloʼoboʼ u tsʼíiboltaʼal baʼax utiaʼal yaanal máakoʼ, le loobiloʼoboʼ» (Marcos 7:20-22). Tukult lelaʼ: ¿Baʼaxten jach yaʼab u beetaʼal baʼax kʼaas? ¿Maʼ wa tu kʼeban puksiʼikʼal máak ku tsʼíiboltik u beetik baʼax maʼ maʼalobiʼ? Le beetikeʼ, ¿bix jeʼel xan u yantal tu kʼeban puksiʼikʼal máak u jach maʼalob Reino Dioseʼ? Jeʼex maʼ tu páajtal u yantal uvaʼob tu matai kʼiʼixeʼ, u Reino Dioseʼ maʼ tu páajtal u yantal tu puksiʼikʼal kʼeban wíinik (Mateo 7:16).

Tsʼoʼoleʼ, ¿tiʼ máaxoʼob tu yaʼalaj Jesús le tʼaanoʼob yaan Lucas 17:21? Le versículo 20 ku yaʼalik: «Le fariseoʼoboʼ tu kʼáatchiʼitoʼob tiʼ Jesús baʼax kʼiin ken taalak u [reino] Jajal Dios. Letiʼ túuneʼ tu núukajtiʼob» (Lucas 17:20). Le fariseoʼoboʼ jach u pʼekmoʼob Jesús, yéetel letiʼeʼ tu yaʼaleʼ le kʼasaʼan máakoʼobaʼ maʼ kun ookloʼob tu Reino Dios (Mateo 23:13). Le beetikeʼ, ¿bix jeʼel u yantal tu puksiʼikʼaloʼob le Reinooʼ wa maʼ kun ookloʼobiʼ? ¿Máasaʼ maʼ tu béeytal? Koʼox ilik baʼax le tu yóotaj u yaʼal Jesusoʼ.

Yaʼab Bibliaʼobeʼ ku traducirkoʼob le baʼax tu yaʼalaj Jesusoʼ jeʼex u yaʼalik le Biblia Traducción del Nuevo Mundo. Ku yaʼalikoʼobeʼ, le Reinooʼ «tiʼ yaan chúumuk teʼexeʼ». Teʼ kʼiin jeʼeloʼ, ¿bix yanik kaʼach u Reino Dios chúumuk tiʼ le máakoʼoboʼ, yéetel tak chúumuk tiʼ le fariseoʼoboʼ? Jéeobaeʼ tu yéeyaj Jesús utiaʼal ka u beetuba Reyil tiʼ le Reinooʼ. Le Rey yéeyaʼanaʼ, yanchaj chúumuk tiʼ le máakoʼob le táan u kaʼansiktiʼob yaʼab baʼaloʼob tu yoʼolal le Reinooʼ yéetel tu beetaj tak milagroʼob utiaʼal u yeʼesik baʼax ken u beet le Reinooʼ. Le oʼolal jeʼel u páajtal u yaʼalaʼal tiʼ yaan kaʼach u Reino Dios chúumuk tiʼobeʼ.

Jeʼex túun k-ilkaʼ le Bibliaoʼ maʼ tu kaʼansik wa u Reino Dioseʼ upʼéel baʼax jeʼel u yantal tu puksiʼikʼal máakeʼ. Baʼaxeʼ, jeʼex tu yaʼalaj le profetaʼoboʼ, upʼéel gobierno yaan u yutskíintik tuláakal le yóokʼol kaabaʼ (Isaías 9:6, 7; Daniel 2:44).