Upʼéel baʼax táan u kʼáataʼal tuláakal tuʼux
Upʼéel baʼax táan u kʼáataʼal tuláakal tuʼux
MÁANS ta tuukuleʼ u millonesi máakoʼob táan u kʼáatkoʼob upʼéeliliʼ baʼal tiʼ le Máax beetmil tuláakal baʼaloʼ. Baʼaleʼ, maʼ yaʼab tiʼ letiʼob u yojloʼob jach baʼax le ku kʼáatkoʼoboʼ. ¿Jeʼel wa u yúuchul upʼéel baʼal beyaʼ? Jeʼeleʼ; sáamsamal u yúuchul. ¿Baʼax le ku kʼáatik tuláakal le máakoʼobaʼ? Táan u kʼáatkoʼob ka taalak u Reino Dios.
Ku tuklaʼaleʼ yaan óoliʼ treintaisiete mil religionoʼob ku yaʼalkoʼob táan u beetkoʼob baʼax u kʼáat Cristo. Tsʼoʼoleʼ yaan maas tiʼ dos mil millonesi máakoʼob ichil le religionoʼobaʼ. Yaʼab tiʼ letiʼobeʼ ku beetkoʼob le oración kʼaj óolaʼan bey le padrenuestrooʼ. Techeʼ, ¿a wojel wa le oracionaʼ? Le oración tu kaʼansaj Jesús tiʼ u disipuloʼoboʼ, ku káajal beyaʼ: «K-Yuum yanech teʼ kaʼanoʼ, kiliʼichkúunsaʼak a kʼaabaʼ. Taalak a [reino]. Beetaʼak baʼax a kʼáat way luʼumeʼ jeʼel bix u beetaʼal teʼ kaʼanoʼ» (Mateo 6:9, 10).
Le oracionaʼ úuch joʼopʼok u beetaʼal, yéetel láayliʼ ku beetaʼal tumen máaxoʼob jach u kʼubmaj u yóoloʼob tiʼ u religionoʼobeʼ. Yéetel ku beetkoʼob ken yanakoʼob yéetel u familiaʼob wa le tiaʼanoʼob chéen tu juunaloʼoboʼ, le táan u bin utsil tiʼob wa le táan u bin kʼaasil tiʼoboʼ. Letiʼobeʼ jach yéetel u jaajil u yóoloʼob ku beetkoʼob le oracionaʼ. Yaʼab máaxoʼob xaneʼ tsʼoʼok u kanik u yaʼaloʼob de memoriai le oracionaʼ, baʼaleʼ maʼatech u tuukuloʼob tiʼ jach baʼax u kʼáat u yaʼale. Tsʼoʼoleʼ yaʼab xan uláakʼ máakoʼob kʼáatik ka taalak u Reino Dios, maʼ chéen le máaxoʼob ku yaʼalikoʼob ku creertikoʼob Cristooʼ.
Ku kʼáataʼal tumen máaxoʼob yanoʼob tiʼ jejeláas religionoʼob
Le judíoʼoboʼ suuk u beetkoʼob upʼéel oración ken kíimik wa máax. Kex óoliʼ mix baʼal yaan u yil yéetel le kíimil mix yéetel le muʼyajiloʼ, le oracionaʼ suuk u beetaʼal tumen le judíoʼob ken u máansoʼob wa baʼax talamiloʼ, u kʼaabaʼ le oracionaʼ qaddish. Le oracionaʼ ku yaʼalik: «Ka u tsʼáa [Dios] u Reino ichil tuláakal u kʼiiniloʼob a kuxtal [...], ka u tsʼáa séebaʼan». * Uláakʼ úuchben oración ku beetik le judíoʼoboʼ ku tʼaan tiʼ le baʼax ken u beet u Reino le Mesías ku taal tu chʼiʼibal Davidoʼ.
Tak máaxoʼob minaʼan u fejoʼob tiʼ Cristoeʼ u kʼáatoʼob ka taalak u Reino Dios. Jeʼex u yaʼalik upʼéel periódico tiʼ Indiaeʼ, teʼ siglo 19, utúul u nojchil upʼéel religioneʼ tu yilaj u muchʼik le máaxoʼob yanoʼob ichil le religión hindú, islam yéetel le máaxoʼob ku yaʼalikoʼob u tsʼaamaj u fejoʼob tiʼ Cristooʼ, letiʼeʼ tu yaʼalaj: «Le u Reino Diosoʼ maʼ kun taal wa maʼ tu kanik u bisuba le tuláakal le religionoʼoboʼ». U directorai upʼéel escuela tuʼux ku yúuchul kaʼansaj tiʼ u religioni islám, tu luʼumil Australiaeʼ, maʼ úucheʼ tu tsʼíibtaj tiʼ upʼéel periódico: «Jeʼex tuláakal le musulmanoʼoboʼ, teneʼ kin creertik yaan u suut Jesús yéetel yaan u tsʼáaik u Reino Dios».
Jeʼex k-ilkoʼ, teʼ kʼiinoʼobaʼ u millonesi máakoʼob táan u páaʼtikoʼob yéetel táan u kʼáatikoʼob ka taalak u Reino Dios. Baʼaleʼ yaan xan baʼax táan u yúuchul teʼ kʼiinoʼobaʼ.
Maʼ xaaneʼ techeʼ a wojleʼ toʼon u j-jaajkunajoʼon Jéeoba (testigos de Jehová) k-jóoʼsik le revistaaʼ, k-bin joonaj joonaj utiaʼal k-kaʼansik tiʼ le máakoʼob baʼax ku yaʼalik le Bibliaoʼ. Teʼ kʼiinoʼobaʼ tiʼ tuláakal yóokʼol kaab k-beetik le meyajaʼ, tiʼ 236 luʼumiloʼob yéetel ichil maas tiʼ 400 tʼaaniloʼob. Le baʼax k-kʼaʼaytikoʼ u Reino Dios. Tsʼoʼoleʼ, tak u kʼaabaʼ le revistaaʼ ku yeʼesik le baʼax k-kʼaʼaytikoʼ, u kʼaabaʼeʼ U Pʼíich Tulumil Kanan. Táan u kʼaʼaytik u Reino Jéeoba. Toʼoneʼ k-kʼáatik tiʼ le máakoʼob wa ku oraroʼob utiaʼal ka taalak le Reinooʼ. Yaʼab tiʼ letiʼobeʼ ku yaʼalikoʼob ku beetkoʼob. Baʼaleʼ, ken k-kʼáattiʼob baʼax le Reinooʼ, yaʼabeʼ ku yaʼalik «maʼ in wojliʼ», wa maʼ tu kaxkoʼob bix jeʼel u tsolkoʼobeʼ.
¿Baʼaxten yaʼab máax kʼáatik ka taalak u Reino Dios kex maʼ u yojloʼob baʼaxiʼ? ¿Talam wa u naʼataʼal baʼax u Reino Dios? Maʼatech. Teʼ Bibliaoʼ jach maʼalob u tsoʼolol baʼax le Reinooʼ. Tsʼoʼoleʼ, le baʼaxoʼob ku yaʼalik yoʼolal le Reinooʼ jeʼel u beetik u yantaltech jeetsʼelil teʼ kʼiinoʼob jach yaan talamiloʼobaʼ. Tuláakʼ xookoʼ, yaan k-ilik bix u tsolik le Biblia le maʼalob baʼaloʼob ken u beet u Reino Diosoʼ. Yaan xan k-ilik baʼax kʼiin ken taalak le Reino ku kʼáataʼaloʼ.
[Tsolajiloʼob]
^ xóot’ol 6 Jeʼex tu oracionil le padrenuestrooʼ, teʼ oración qaddish ku kʼáataʼal xan ka kiliʼichkúuntaʼak u kʼaabaʼ Dios. Maʼ jach ojéelaʼan wa tu kʼiiniloʼob Jesús ka káaj xan u beetaʼal le oracionaʼ, baʼaleʼ maʼ unaj u jaʼakʼal k-óol k-ojéeltik óoliʼ keet le kaʼapʼéel oracionoʼobaʼ. Jesuseʼ maʼ tu yilaj u kaʼansik upʼéel oración jelaʼan tiʼ u maasiliʼ. Le baʼax tu yaʼalaj teʼ padrenuestrooʼ tiaʼan u tuukulil teʼ Kiliʼich Tsʼíiboʼob kʼaj óolaʼan tumen le judíoʼoboʼ. Le ka tu kaʼansaj Jesús le padrenuestrooʼ tu kʼaʼajsaj tiʼ le judíoʼob le baʼax unaj u kʼáatkoʼob kaʼach tak maʼiliʼ taalak way Luʼumoʼ.