Utiaʼal le máax xokik le revistaaʼ

YÉETEL kiʼimak óolal k-tsʼáaik a wojéelteʼ, desde teʼ jaʼabaʼ le revistaaʼ yaan u yantal kʼeexoʼob tiʼ bix u jóoʼsaʼal. Táanil tiʼ k-tsoliktech baʼax kʼeexiloʼob kun antaleʼ, k-kʼáat aʼaltech baʼax maʼ tu kʼexpajal.

Le revistaaʼ láayliʼ yaan u kʼaabaʼtik, U Pʼíich Tulumil Kanan. Táan u kʼaʼaytik u Reino Jéeoba. Le beetikeʼ, láayliʼ yaan u nojbeʼenkúuntik Jéeoba, le jaajil Diosoʼ yéetel yaan u líiʼsik u yóol le máaxoʼob xokikoʼ yéetel le jatsʼuts baʼaloʼob ku yaʼalik ken beet u Reino Diosoʼ. Le xookoʼob yanoʼob teʼ táan juʼunoʼob 5 tak 9 teʼ revistaaʼ, yaan u tsolkoʼob baʼax le u Reino Diosoʼ yéetel baʼax kʼiin ken taalak. Tsʼoʼoleʼ jeʼex tsʼoʼok u beetik ich yaʼab jaʼaboʼobeʼ, le revistaaʼ láayliʼ yaan u yáantik máak utiaʼal ka u tsʼáa u fe tiʼ Jesucristo, yaan u kaʼansik baʼax ku yaʼalik le Bibliaoʼ, yéetel láayliʼ yaan u tʼaan tiʼ le baʼaxoʼob u yaʼalmaj le Biblia yaan u yúuchloʼob teʼ kʼiinoʼobaʼ.

¿Baʼax túun kʼeexiloʼob kun antal teʼ revistaaʼ? * Yaʼab tiʼ le xookoʼob ken u taasoʼ yaan u beetik u tuukul máak. Le xook ku kʼaabaʼtik «¿A wojel wa?» yaan u tsoliktoʼon uláakʼ baʼaxoʼob kʼaʼabéet k-ojéeltik utiaʼal k-maas naʼatik le tsikbaloʼob yaan teʼ Bibliaoʼ. Le xook ku kʼaabaʼtik «Ilawil a natsʼkaba tiʼ Dios», yaan u yeʼesik baʼax jeʼel k-kanik tiʼ Jéeoba yoʼolal le baʼax ku yaʼalik jujumpʼéel tekstoʼob teʼ Bibliaoʼ. Le xook ku kʼaabaʼtik «Kʼáatchiʼob ku beetaʼal», yaan u núukik le kʼáatchiʼob ku beetaʼal tumen yaʼab máakoʼob yoʼolal wa baʼax ku yaʼalik le Bibliaoʼ. Upʼéel kʼáatchiʼ yaʼab máax beetikeʼ, letiʼe jeʼelaʼ: «¿Tu puksiʼikʼal máak wa yaan u Reino Dios?» Teʼ táan juʼun 13 ken a wil u núukil le kʼáatchiʼaʼ.

Jujumpʼéel xookoʼob ken u taas le revistaaʼ beetaʼan utiaʼal u yutsil le familiaʼoboʼ. Le xook ku kʼaabaʼtik «Tsolnuʼukoʼob utiaʼal le familiaʼoboʼ», yaan u tʼaan tiʼ le talamiloʼob ku máansik le familiaʼoboʼ yéetel yaan u yeʼesik bix jeʼel u yáantaʼal máak tumen le Biblia utiaʼal u yutskíintikoʼoboʼ. Yaan mesoʼobeʼ le revistaaʼ yaan u taasik le xook ku kʼaabaʼtik «Kaʼans a paalaleʼex», lelaʼ beetaʼan utiaʼal ka u xok le taatatsiloʼob yéetel u paalaloʼoboʼ. Yaan xan mesoʼob kun jóokʼol upʼéel xook ku kʼaabaʼtik «Utiaʼal xiʼipalaloʼob yéetel chʼúupalaloʼob», le xookaʼ yaan u taasik kʼáatchiʼob utiaʼal u yáantik le xiʼipalaloʼob yéetel chʼúupaloʼob ka tuukulnakoʼob tiʼ jujumpʼéel tekstoʼob yaan teʼ Bibliaoʼ.

Le revistaaʼ yaan u taasik uláakʼ xookoʼob, jeʼex le ku kʼaabaʼtik: «Jach yanchaj u fejoʼob», le xookaʼ yaan u líiʼsik k-óol utiaʼal ka yanaktoʼon upʼéel fe jeʼex le yanchaj tiʼ le máaxoʼob ku yúuchul tʼaan teʼ Bibliaoʼ. Teʼ táan juʼun 18 tak 21 teʼ revistaaʼ, yaan a wilik upʼéel jatsʼuts tsikbal ku beetaʼal tu yoʼolal profeta Elías, tuʼux jeʼel u páajtal k-kanik bix jeʼel u yantaltoʼon upʼéel fe jeʼex le anchaj tiʼoʼ. Yaan xan u jóokʼol upʼéel xook ku kʼaabaʼtik «Upʼéel carta tsʼíibtaʼan tumen...», teʼ xook jeʼelaʼ le misioneroʼob yéetel uláakʼ u j-jaajkunajoʼob Jéeoba jejeláas tuʼux kajaʼanoʼobeʼ yaan u tsikbalkoʼob jujumpʼéel tiʼ le baʼaxoʼob uchaʼantiʼoboʼ. Le xook ku kʼaabaʼtik «U kaʼansajoʼob Jesús» yaan u tʼaan tiʼ u kaʼansajiloʼob le Biblia upʼéel bix maʼ talam u naʼataʼaliʼ.

K-ojleʼ le revista U Pʼíich Tulumil Kananaʼ yaan u seguer u yutstal tu yich u xoʼokol tumen le máaxoʼob ku yeʼeskoʼob tsiikil tiʼ le baʼax ku yaʼalik le Biblia yéetel jach u kʼáat u yojéeltoʼob baʼax jach tu jaajil ku kaʼansik. K-tuklikeʼ yaan u yáantaʼaloʼob tumen le revistaaʼ u kanoʼob le baʼaxoʼob ku kaʼansik le Bibliaoʼ.

Le máaxoʼob jóoʼsik le revistaaʼ

[Tsolajiloʼob]