Kaʼans a paalaleʼex

Letiʼeʼ taakchaj u yáantaj

¿A WILMAJ wa utúul máax jach kʼojaʼan?... ¿Taakchaj wa a wáantik?... ¿Kux túun wa yaanal tuʼux u taal yéetel yaanal u religión? ¿Láayliʼ wa xan jeʼel u taaktal a wáantikeʼ?... Óoliʼ tres mil jaʼaboʼob bejlaʼeʼ, anchaj tu kaajil Israel utúul chan chʼúupal taakchaj u yáantik u yéet máakil. Koʼox ilik baʼax úuchi.

Le chan chʼúupalaʼ tiʼ kajaʼan kaʼach tu luʼumil Israeleʼ. Le israelitaʼoboʼ mantatsʼ táan kaʼach u baʼateloʼob yéetel le sirioʼoboʼ (1 Reyes 22:1). Utéenjeakileʼ le táan u baʼateʼel le sirioʼob yéetel le israelitaʼoboʼ, tu bisoʼob u palitsiltoʼob le chan chʼúupalaʼ, ka tu tsʼáajoʼob u meyajt u yatan Naamán, u nojchil u soldadoiloʼob Siria. Tiʼ le máakaʼ yaan kaʼach lepra tiʼ, upʼéel yaayaj kʼojaʼanil ku beetik u lukʼul u tsʼúutsʼukal u bakʼel máak.

Le chan chʼúupalaʼ tu yaʼalaj tiʼ u xunáan bix jeʼel u páajtal u yutstal u yíichameʼ. Tu yaʼalajtiʼ: «Wa ka xiʼik in tsʼuulil u yil le [profeta] yaan tu kaajil Samariaoʼ, jeʼel u yutschajal tiʼ le [lepraoʼ]». Yoʼolal le baʼax tu yaʼalaj le chan chʼúupalaʼ, Naamaneʼ jach tu creertaj jeʼel u páajtal u tsʼaʼakaleʼ. Bey túunoʼ Naamaneʼ tu kʼáataj tiʼ Ben-hadad u reyil Siria ka chaʼabak u bin u yil Eliseo. Letiʼ túun yéetel jujuntúul tiʼ u j-meyajoʼobeʼ bin u yiloʼob Eliseo; utiaʼal lelaʼ anchaj u viajaroʼob óoliʼ 150 kilómetros.

Yáaxeʼ bin u yiloʼob Jehoram, u reyil Israel, ka tu yeʼesoʼobtiʼ upʼéel carta tuʼux ku kʼáatik Ben-hadad tiʼ Jehoram ka u yáant Naamán. Baʼaleʼ Jehorameʼ maʼ u tsʼaamaj u fe tiʼ Jéeobaiʼ mix tiʼ le baʼaxoʼob ku yaʼalik le profeta Eliseooʼ. Baʼaxeʼ tu tuklajeʼ Ben-hadadeʼ chéen u kʼáat baʼateʼel tu yéetel. Eliseoeʼ tu yojéeltaj le baʼax úuchaʼ, le oʼolaleʼ tu yaʼalaj tiʼ le rey Jehoramoʼ: «Túuxt le máak utiaʼal u yilenoʼ». Le profeta Eliseooʼ u kʼáat kaʼach u yeʼes tiʼ Naamaneʼ, tiʼ Jéeobaeʼ yaan u páajtalil u tsʼakik le kʼojaʼanil yantiʼoʼ (2 Reyes 5:1-8).

Le ka kʼuch Naamán tu yotoch Eliseo yéetel u carroʼobeʼ, Eliseoeʼ tu túuxtaj utúul u j-meyaj aʼaliktiʼ: Xeen ka ichkíinakech siete utéenel tu áalkab jaʼil Jordán, beyoʼ yaan a wutstal. Naamaneʼ jach pʼuʼuji, tumen letiʼeʼ táan kaʼach u páaʼtik ka jóokʼok Eliseo kʼamik yéetel ka u jiʼi u kʼab teʼ tuʼux yaan le lepra tiʼoʼ utiaʼal ka utsak. Baʼaleʼ chéen tu túuxtaj utúul u j-meyaj utiaʼal kʼamik. Le oʼolal Naamaneʼ jach pʼuʼuji yéetel tu tuklaj u suut tu kaajal (2 Reyes 5:9-12).

 Wa teech utúul tiʼ u j-meyajoʼob Naamaneʼ, ¿baʼax jeʼel a beetik kaʼacheʼ?... Letiʼobeʼ tu yaʼaloʼob tiʼ Naamán: In tsʼuulil, wa Eliseo ka u kʼáattech ka a beet upʼéel baʼal jach talameʼ, ¿máasaʼ jeʼel a beetik kaʼacheʼ? Le oʼolaleʼ, wa chéen tu yaʼalajtech ka xiʼikech ichkíil utiaʼal a wutstaleʼ, ¿baʼaxten maʼ ta beetik? Naamaneʼ tu beetaj le baʼax aʼalaʼabtiʼoʼ, ka «bineʼ ka tu tʼubajuba siete utéenel tu yáalkab jaʼil Jordán, [...] u bakʼel túuneʼ sutchaj bey u bakʼel juntúul táankelem paaleʼ, ka pʼáat maʼalobil».

Naamán túuneʼ suunaj u yil Eliseoeʼ, ka tu yaʼalajtiʼ: «¡Bejelaʼeʼ jach in wojeleʼ tiʼ tuláakal le luʼumaʼ minaʼan uláakʼ [Dios], chéen tu luʼumil Israel!». Tu yaʼalaj xan tiʼ Eliseoeʼ «maʼ bíin suunak u kʼub tóokbil baʼalcheʼob mix kíimsbil baʼalcheʼob tiʼ uláakʼ [diosoʼob], wa maʼ chéen tiʼ Yuumtsil [Jéeobaiʼ]» (2 Reyes 5:13-17).

¿A kʼáat wa xan a wáant wa máax utiaʼal ka kaambalnak tiʼ le baʼaxoʼob ken u beet Jéeoba, jeʼex tu beetil le chan chʼúupaloʼ?... Le ka taal Jesús way Luʼumeʼ, utúul máak yaan kaʼach lepra tiʼeʼ jach tu creertaj jeʼel u tsʼaʼakal tumen Jesuseʼ, ka tu yaʼalajtiʼ: Wa teech a kʼáateʼ jeʼel u páajtal a tsʼáaik in toj óolaleʼ. ¿A wojel wa baʼax tu yaʼalaj Jesús tiʼ?... «¡In kʼáat!» Ka túun tu tsʼakaj, jeʼel bix úuchik u tsʼaʼakal Naamán tumen Jéeobaeʼ (Mateo 8:2, 3).

¿A wojel wa maʼ kun xáantaleʼ Jéeobaeʼ yaan u tsʼakik tuláakal le kʼojaʼaniloʼoboʼ yéetel maʼ kun kaʼa kíimil mix máak?... (2 Pedro 3:13; Apocalipsis 21:3, 4.) Wa a wojel le baʼaloʼobaʼ, maʼ xaaneʼ taak a tsikbaltik tiʼ uláakʼ máakoʼob le baʼaloʼob jach jatsʼutstakaʼ.

[U tsolajil le oochel teʼ táan juʼun 25]

Kʼáatchiʼob:

[U tsolajil le oochel teʼ táan juʼun 25]

❍ ¿Bix úuchik u yáantaʼal Naamán, u nojchil le soldadoʼob, tumen le chan chʼúupal palitsiltaʼanoʼ?

❍ ¿Baʼaxten maʼ tu yóotik kaʼach Naamán u beet le baʼax aʼalaʼab tiʼ tumen Eliseooʼ? ¿Baʼax beet u kʼexpajal u tuukul?

❍ Wa a kʼáat a beet jeʼex le chan chʼúupaloʼ, ¿baʼax unaj a beetik?

❍ ¿Baʼax tu beetaj Jesús utéenjeakil, yéetel baʼaxten jach jatsʼuts le kuxtal ken u tsʼáatoʼon Dios maʼ kun xáantaloʼ?