U kaʼansajoʼob Jesús

U Reino Dios

¿Baʼax u Reino Dios?

Upʼéel gobierno kun gobernar yóokʼol tuláakal le Luʼumaʼ. Jesuseʼ tu yaʼalaj: «Teʼexeʼ payalchiʼineneʼex beyaʼ: [...] Taalak a [reino]. Beetaʼak baʼax a kʼáat way luʼumeʼ jeʼel bix u beetaʼal teʼ kaʼanoʼ» (Mateo 6:9, 10; Daniel 2:44).

¿Máaxoʼob kun gobernaroʼobiʼ?

Jesuseʼ síij utiaʼal u beetuba Gobernantei tiʼ u Reino Dios. Utúul angeleʼ tu yaʼalaj tiʼ María: «Jajal Dios Yuumtsil kun beetik [reyil] jeʼel bix David u taataeʼ, [...] u jalaʼachileʼ mix bikʼin bíin xuʼuluk» (Lucas 1:30-33). Jeʼex úuchik u yaʼalik tiʼ u apostoloʼobeʼ, Jesuseʼ yaan kaʼach u yéeyik jujuntúul tiʼ u disipuloʼob utiaʼal ka gobernarnakoʼob tu yéetel. Tu yaʼalajtiʼob: «Teʼex máax yanchajaʼaneʼex tin wéetel mantatsʼ tiʼ in túuntaj óolaloʼob. Le beetikeʼ teen kin tsʼáaikteʼex jumpʼéel [reino] jeʼel bix tsʼaʼanil tiʼ teen tumen in Taataeʼ» (Lucas 22:28, 29; Daniel 7:27). Le máaxoʼob kun gobernaroʼob yéetel Jesusoʼ 144,000 utúulaloʼob (Apocalipsis 5:9, 10; 14:1).

¿Desde tuʼux kun gobernar?

U Reino Dioseʼ desde teʼ kaʼan kun gobernaroʼ. Jesuseʼ tu yaʼalaj tiʼ u disipuloʼob: «Ku tsʼoʼokol in bin yéetel in nuʼuktik teʼex jumpʼéel kúuchil [teʼ kaʼanoʼ] yaan in suut tu kaʼatéen utiaʼal ka in biseʼex tin wéetel, utiaʼal ka yanakeʼex tiʼ le kúuchil tuʼux kin wantal tenoʼ. [...] Tumen teneʼ táan in bin tuʼux yaan le Taataoʼ» (Juan 14:2, 3, 12; Daniel 7:13, 14).

¿Baʼax ken u beet u Reino Dios tiʼ le kʼasaʼanoʼoboʼ?

Jesuseʼ yaan u xuʼulsik le kʼasaʼan máakoʼoboʼ. Ka tʼaanaj tiʼ baʼax ken u beeteʼ, tu yaʼalaj: «Le ken taalak u Paal Máak jeʼel bix [rey], bakʼpachtaʼan tumen tuláakal u angeloʼobeʼ, bíin kulak tu jalaʼach kʼáancheʼ.  Bíin muchʼlak tu táaneʼ u kajnáaliloʼob tuláakal kaajoʼob, letiʼ túuneʼ bíin u jatsláantoʼob. [...] [Le kʼasaʼanoʼoboʼ] bíin xiʼikoʼob tiʼ le [xuʼulsajil] minaʼan u xuuloʼ, yéetel le máaxoʼob toj u kuxtaloʼoboʼ bíin xiʼikoʼob tiʼ le kuxtal minaʼan u xuuloʼ» (Mateo 25:31-34, 46).

¿Máaxoʼob kun gobernartbiloʼob way Luʼum tumen le Reinooʼ?

Jesucristoeʼ tu yaʼalaj: «Kiʼ u yóoloʼob le máaxoʼob kabal u yóol u puksiʼikʼaloʼoboʼ, tumen bíin u tiaʼaltoʼob le luʼumaʼ» (Mateo 5:5; Salmo 37:29; 72:8). Leʼ Luʼumaʼ yaan u chuʼupul yéetel máakoʼob tsʼoʼok u kanik u paklan yaabiltubaʼob. Jesuseʼ tu yaʼalaj tiʼ u disipuloʼob: «Kin tsʼáaik tiʼ teʼex le túumben aʼalmajtʼaanaʼ: Yaabiltabaʼex ta baatsileʼex. Jeʼel bix in yaabiltmaʼexeʼ teʼexeʼ unaj a yaabiltkabaʼex ta baatsileʼex. Wa ka yaabiltkabaʼex ta baatsileʼexeʼ tuláakal yóokʼol kaab kun u kʼaj óolteʼ teʼexeʼ in j-kaambaleʼex» (Juan 13:34, 35).

¿Baʼax ken u beet u Reino Dios yoʼolal wíinikoʼob?

Jesuseʼ yaan u tsʼakik tuláakal le kʼojaʼaniloʼoboʼ. Ka taal way Luʼumeʼ, tu tsikbaltaj u Reino Dios tiʼ le máakoʼoboʼ «bey xan tu tsʼáaj toj óolal tiʼ le máaxoʼob kʼojaʼanoʼoboʼ» (Lucas 9:11). Apóstol Juaneʼ le ka tsʼaʼab u yil Jesús teʼ kaʼanoʼ, tu yaʼalaj: «Tin wilaj jumpʼéel túumben kaʼan yéetel jumpʼéel túumben luʼum; [...] tin wuʼuyaj jumpʼéel kʼaʼamkach tʼaan ku taal teʼ kaʼanoʼ ka tu yaʼalaj: Ile, Jajal Dios kajakbal bejelaʼeʼ ichil máakoʼob [...]. Jajal Dios kun choʼik tuláakal u jaʼil u yichoʼob, maʼ túun yantal kíimil» (Apocalipsis 21:1-4).

U Reino Dioseʼ yaan u sutik paraísoi tuláakal le Luʼumaʼ. Utúul máak chʼuykíintaʼab tu tséel Jesuseʼ, táanil tiʼ u kíimsaʼaleʼ tu yaʼalajtiʼ: «Kʼaʼajsen ken ookkech ta reino». Jesús túuneʼ tu núukajtiʼ: «Tu jaajil kin waʼalik tiʼ teech bejlaʼeʼ, yaan a wantal tin wéetel teʼ Paraísooʼ» (Lucas 23:42, 43, NM; Isaías 11:4-9).

[U tsolajil le oochel teʼ táan juʼun 9]

Wa a kʼáat a wojéelt u maasileʼ, xok u 8 xookil le libro ¿Baʼax jach tu jaajil ku kaʼansik le Bibliaoʼ?*

[U tsolajil le oochel teʼ táan juʼun 9]

* Beetaʼan tumen u j-jaajkunajoʼob Jéeoba.