Maʼ u tuʼubultech a tsʼáaik u diosboʼotikil

«Raquel:

Diosboʼotik yoʼolal tuláakal le baʼaxoʼob tsʼoʼok a beetik tin woʼolaloʼ. Maʼ xaaneʼ maʼ a tsʼáa cuentaiʼ, baʼaleʼ le baʼaxoʼob tsʼoʼok a waʼalikten yéetel le a biskaba tin wéeteloʼ jach tsʼoʼok u líiʼsik in wóol. Jennifer, le máax jach yaabiltmilechoʼ.»

¿BIX a wuʼuyikaba ken tsʼaʼabaktech diosboʼotik wa gracias yoʼolal upʼéel baʼax ta beetaj? ¿Máasaʼ jach ku kiʼimaktal a wóol? Tuláakloʼon uts t-tʼaan ka chʼaʼabak en cuentai baʼax k-beetik (Mateo 25:19-23).

Le máaxoʼob suuk u tsʼáaikoʼob diosboʼotikeʼ maas maʼalob u biskubaʼob yéetel u maasil. Baʼaleʼ maʼ chéen leloʼ, ku beetkoʼob jeʼex tu beetil Cristo, le máax jach tu chʼaʼaj en cuenta le maʼalob baʼaloʼob tu beetaj u maasiloʼ (Marcos 14:3-9; Lucas 21:1-4).

Baʼaleʼ teʼ kʼiinoʼobaʼ óoliʼ mix máak ku tsʼáaik u diosboʼotikil le baʼax ku beetaʼal tu yoʼolaloʼ. Le Bibliaoʼ úuchiliʼ u yaʼal «tiʼ u tsʼook jaʼaboʼobeʼ» le máakoʼoboʼ maʼ ken u tsʼaʼob diosboʼotik (2 Timoteo 3:1, 2). Le oʼolal kʼaʼabéet k-kanáantikba utiaʼal maʼ u yúuchultoʼon jeʼex letiʼoboʼ.

Baʼaleʼ le taatatsiloʼoboʼ, ¿bix jeʼel u kaʼansik u paalaloʼob utiaʼal ka u tsʼaʼob diosboʼotikeʼ? ¿Tiʼ máaxoʼob kʼaʼabéet k-tsʼáaik diosboʼotik? ¿Baʼaxten kʼaʼabéet k-tsʼáaik kex u maasil maʼatech u beetkoʼob?

U tsʼáaik máak diosboʼotikichil u yotoch

Yaʼab taatatsiloʼobeʼ jach yaʼab meyaj ku beetkoʼob utiaʼal u tsʼáaikoʼob baʼax kʼaʼabéet tiʼ u familiaʼob, baʼaleʼ yaan horaeʼ ku yuʼubikoʼob bey maʼatech u chʼaʼabal en cuenta le baʼaxoʼob ku beetkoʼoboʼ. ¿Baʼax túun jeʼel u páajtal u beetkoʼobeʼ?

1) Eʼeseʼextiʼob bixi. Le mejen paalaloʼoboʼ maas séeb u kankoʼob wa baʼax wa ku yeʼesaʼaltiʼob bix u beetaʼal. Ka tʼaanaj le Biblia tiʼ utúul maamatsil jach meeyjil tiʼ u úuchben kaajil Israeleʼ, tu yaʼalaj: «Ku yutsil tʼantaʼal tumen u paalal». ¿Bix úuchik u kanik u tsʼaʼob diosboʼotik le paalaloʼobaʼ? Le u tsʼook baʼax ku yaʼalik le versiculooʼ ku tsʼáaik naʼatbileʼ tiʼ u taata tu kanoʼob (Proverbios 31:28). Le ken u yil le paalaloʼob bix u paklan tsʼáaik diosboʼotik u taataʼobeʼ, ku kankoʼobeʼ le máax tsʼáaikoʼ maʼalob u tuukul, le máax tiʼ ku tsʼaʼabaloʼ ku kiʼimaktal u yóol yéetel ku beetik u biskubaʼob maas maʼalob.

Utúul taatatsil ku kʼaabaʼtik Stepheneʼ, ku yaʼalik: «Utiaʼal in kaʼansik tiʼ in hijaʼob u kʼaʼabéetil u tsʼaʼabal diosboʼotikeʼ mantatsʼ kin tsʼáaik u diosboʼotikil tiʼ in watan yoʼolal le janal ku beetkoʼ. Letiʼobeʼ tsʼoʼok u yilkoʼob bix in beetik, le oʼolal bejlaʼeʼ bey xan u beetkoʼoboʼ». Techeʼ, ¿ka tsʼáaik wa u diosboʼotikil tiʼ a núup yoʼolal baʼaxoʼob ku beetik? ¿Ka tsʼáaik wa u diosboʼotikil tiʼ a paalal yoʼolal le baʼaxoʼob ku beetkoʼob, kex deporsi unaj u beetkoʼoboʼ?

2) Kaʼanseʼexoʼob. U kanik máak u tsʼáa diosboʼotikeʼ jeʼel u páajtal u keʼetel yéetel bix u nojochtal upʼéel chan paakʼaleʼ, tumen jujumpʼíitil u kanaʼal. Baʼaleʼ le taatatsiloʼoboʼ, ¿bix jeʼel u kaʼansik u paalaloʼob u tsʼaʼob diosboʼotikeʼ? Rey Salomoneʼ tu yaʼalaj kʼaʼabéet u kaʼansaʼal tiʼ le paalaloʼob u tukloʼob baʼaxten unaj u beetkoʼoboʼ. Letiʼeʼ tu yaʼalaj: «Le máak [toj] u  kuxtaleʼ ku tukultik baʼax bíin u núuke» (Proverbios 15:28).

Ken siʼibik wa baʼax tiʼ a paalaleʼ, ¿ku tsʼáaikoʼob wa u diosboʼotikil? ¿Ku tuukuloʼob wa tiʼ le baʼax anchaj u beetik yéetel tiʼ le utsil ku yeʼesik le máax síiktiʼoboʼ? Wa ka kaʼansik a paalaloʼob tuukul tiʼ le baʼaloʼobaʼ, yaan u jóokʼol tu puksiʼikʼaloʼob u tsʼáaikoʼob u diosboʼotikil. María, yaan óoxtúul u paalaleʼ, ku yaʼalik: «Ken siʼibik wa baʼax tiʼ k-paalaleʼ, kex ku kʼaʼabéettal k-jóoʼsik u súutukil utiaʼal k-tsoliktiʼob yaan máax tuukulnaj tu yoʼolaloʼob yéetel jach yaabiltaʼanoʼobeʼ, ken k-beeteʼ ku kanikoʼob baʼaxten kʼaʼabéet u tsʼáaikoʼob diosboʼotik.

Le maʼalob taatatsiloʼoboʼ maʼatech u chaʼik tiʼ u paalaloʼob u tuklikoʼob deporsi ku náajaltikoʼob ka siʼibiktiʼob wa baʼax tumen u maasil. * Le baʼax ku yaʼalik Proverbios 29:21 yoʼolal bix unaj u tratartaʼal le palitsiloʼob úuchiloʼ, láayliʼ maʼalob utiaʼal u líiʼsaʼal le paalaloʼob bejlaʼoʼ: «Máax ku chaʼik [tiʼ] u palitsil u beet[ik] baʼax u kʼáat líikʼbal tu chichnileʼ, tu pachalileʼ yaan u yoʼtik».

Tak le paalaloʼob maas mejentak jeʼel u kanikoʼob u tsʼaʼob diosboʼotikoʼ. ¿Bix jeʼel u kaʼansaʼaltiʼobeʼ? Linda, yaan xan óoxtúul u paalaleʼ, ku yaʼalik baʼax ku beetik yéetel u yíicham utiaʼal u yáantkoʼob: «Ken k-tsʼíibt upʼéel chan juʼun utiaʼal k-tsʼáaik diosboʼotik tiʼ wa máaxeʼ, k-aʼalik xan tiʼ k-mejen paalal ka u bonoʼob wa baʼaxiʼ, wa ka u tsʼíibtoʼob u kʼaabaʼobiʼ». Kex maʼ jach u yojloʼob boon yéetel kex maʼ jach jatsʼuts u tsʼíib le paalaloʼoboʼ, u táakbesaʼaloʼobeʼ jeʼel u kaʼansiktiʼob u tsʼaʼob diosboʼotikeʼ.

3) Maʼ u xuʼulul a kaʼanskeʼexoʼob. Tumen kʼeban máakoʼoneʼ, maases k-tuukul chéen tiʼ toʼon le oʼolal yaan kʼiineʼ ku talamtaltoʼon k-tsʼáaik diosboʼotik (Génesis 8:21; Mateo 15:19). Baʼaleʼ le Bibliaoʼ ku yaʼaliktoʼon: «Kʼaʼabéet a túumbenkunskeʼex u muukʼil a tuukuleʼex, yéetel kʼaʼabéet a búukintkeʼex le túumben wíinikil beetaʼan jeʼel bix u kʼáat Dioseʼ» (Efesios 4:23, 24, NM).

Baʼaleʼ yaʼab taatatsiloʼobeʼ tsʼoʼok u yilkoʼob maʼ chéen chʼaʼabil u yáantaʼal le paalal u búukintoʼob «le túumben wíinikil[oʼ]». Stephen, le máax tiʼ tsʼoʼok k-yáax tʼaaneʼ, ku yaʼalik: «K-ilik kaʼach bey tsʼoʼok u jach xáantal maʼ tu kanik k-hijaʼob u tsʼaʼob diosboʼotik chéen tu juunaloʼobeʼ». Baʼaleʼ letiʼobeʼ maʼ xuʼul u kaʼansik u paalaloʼobiʼ. Stepheneʼ ku yaʼalik xan: «Kʼaʼabéetchaj u chúukpajal k-óol, baʼaleʼ ka tsʼoʼokeʼ tu kanoʼob u tsʼaʼob diosboʼotik. Leloʼ jach ku beetik u kiʼimaktal k-óol».

Tiʼ k-amigoʼob yéetel tiʼ k-vecinoʼob

Maʼ xaaneʼ yaan kʼiineʼ ku pʼáatal maʼatech k-tsʼáaik diosboʼotik, lelaʼ ku yúuchul tumen ku tuʼubultoʼon maʼ tumen wa maʼ k-kʼáatiʼ. Baʼaleʼ ¿jach wa kʼaʼabéet u tsʼáaik máak diosboʼotik? ¿Maʼ wa chéen yaan yéetel ka kiʼimakchajak u yóol máakiʼ? Utiaʼal k-naʼatik tubeeleʼ koʼox ilik upʼéel baʼax ku yaʼalik le Bibliaoʼ.

Utéenjeak ka bin Jesús Jerusaleneʼ, tu yilaj diez máakoʼob yaan lepra tiʼob. Le ka ilaʼab tumen le máakoʼobaʼ «tu yawtajoʼob: ¡Jesús, j-kaʼambesaj, chʼaʼatoʼon óotsilil! Le ka ilaʼaboʼob tumen Jesuseʼ, aʼalaʼabtiʼob: Xeen a weʼesabaʼex tiʼ le j-kʼiinoʼoboʼ. Kaʼalikil táan u binoʼobeʼ ka tojchaj u yóoloʼob. Juntúul tiʼobeʼ, le ka tu yilaj tsʼoʼok u tojtal u yóoleʼ, suunaj táan u kiʼikiʼtʼantik Jajal Dios yéetel kʼaʼam tʼaan. Ka xolaj tu táan Jesús ka chinlaj tak luʼum utiaʼal u tsʼáaik nib óolal [wa gracias] tiʼ. Le máakaʼ samariail» (Lucas 17:11-16).

¿Baʼax tu beetaj Jesús? ¿Tu yaʼalaj wa mix baʼaltiʼ maʼ suunaj uláakʼoʼob u tsʼaʼob u diosboʼotikiloʼ? Le Bibliaoʼ ku yaʼalikeʼ Jesuseʼ tu yaʼalaj: «¿Maʼ wa diez le máaxoʼob utschajoʼoboʼ? Kux le nueve, ¿tuʼux yanoʼob? ¿Maʼ yanchaj máax suut utiaʼal u nojbeʼenkúuns Jajal Dios, wa maʼ letiʼe táanxel luʼumilaʼ?» (Lucas 17:17, 18).

Le nueve máakoʼobaʼ maʼ kʼasaʼan máakoʼobiʼ, tumen tu yeʼesoʼob yaan u fejoʼob tiʼ Jesús yéetel bin u yeʼesubaʼob tiʼ leʼ sacerdoteʼob tu kaajil Jerusalén jeʼex úuchik u yaʼalaʼaltiʼoboʼ. Letiʼobeʼ jach kiʼimakchaj u yóoloʼob úuchik u tsʼakaʼaloʼob.  Baʼaleʼ maʼ tu tsʼáajoʼob u diosboʼotikiliʼ, leloʼ tu beetaj u yaatal u yóol Cristo. ¿Baʼax k-kanik tiʼ leloʼ? ¿Baʼax k-meentik ken beetaʼaktoʼon upʼéel uts? ¿Tu séebaʼanil wa k-tsʼáaik u diosboʼotikil? Maʼ xaaneʼ jeʼel u páajtal k-tsʼíibtik upʼéel chan juʼun wa k-beetik uláakʼ wa baʼax utiaʼal k-tsʼáaik u diosboʼotikileʼ.

Le Biblia La Palabra de Dios para Todos tiʼ 1 Corintios 13:5, ku yaʼalikeʼ le máax yaan u yaabilajeʼ «ku yeʼesik tsiikil yéetel maʼatech u kaxtik chéen u yutsil». Lelaʼ ku yeʼesikeʼ ken u tsʼáa diosboʼotik máakeʼ maʼ chéen táan u yeʼesik tsiikiliʼ, táan xan u yeʼesik yaabilaj. Le u tsikbalil le diez máakoʼob yaan lepra tiʼoboʼ, ku kaʼansiktoʼoneʼ le máaxoʼob u kʼáatoʼob lúubul utsil tiʼ Cristoeʼ kʼaʼabéet u péeksaʼaloʼob tumen u yaabilajoʼob u tsʼaʼob diosboʼotik. Bey xan kʼaʼabéet u beetkoʼob yéetel tuláakal máak, kex yaanal luʼumil u taal, yaanal u raza wa yaanal u religión.

Le oʼolal maʼalob ka k-tukult lelaʼ: «¿Tsʼoʼok wa u yúuchtal in tsʼáa diosboʼotik tiʼ utúul in vecino, utúul in wéet meyaj wa in wéet xook, tiʼ utúul doctor, utúul j-koonol wa tiʼ utúul máax tu beetaj upʼéel baʼax maʼalob tin woʼolal?». Utiaʼal a wilik wa yaan kʼiin ku tuʼubultech a tsʼáaik diosboʼotikeʼ, ichil kaʼapʼéel kʼiineʼ xok jaytéen ka tsʼáaik diosboʼotik wa jaytéen ka beetik uláakʼ wa baʼax utiaʼal a tsʼáaik.

Baʼaleʼ tiʼ Jéeoba maas unaj k-tsʼáaik gracias, tumen letiʼ tsʼáaiktoʼon «tuláakal maʼalob yéetel utsil chúukaʼan siibal» (Santiago 1:17). Le oʼolaleʼ, unaj k-tuklik baʼaxoʼob ku beetik t-oʼolal yéetel k-ilik wa táan k-tsʼáaik u graciasi tiʼ (1 Tesalonicailoʼob 5:17, 18.)

¿Baʼaxten unaj k-tsʼáaik diosboʼotik kex u maasil maʼ u beetkoʼob?

Bejlaʼeʼ óoliʼ tuláakal máak maʼatech u tsʼáaik diosboʼotik. ¿Baʼaxten túun toʼoneʼ unaj k-beetik? Koʼox ilik baʼaxten.

Wa k-tsʼáaik diosboʼotik tiʼ le máaxoʼob maʼatech u beetkoʼoboʼ yaan k-beetik jeʼex Jéeoba Dios, le Máax beetmailoʼonoʼ. Kex yaʼab máakoʼob maʼatech u tsʼáaikoʼob u graciasi le baʼaxoʼob ku beetik tu yoʼolaloʼoboʼ, letiʼeʼ maʼ tu xuʼulul u yeʼesik u yaabilaj tiʼob (Romailoʼob 5:8; 1 Juan 4:9, 10). Maʼ tu xuʼulul u beetik «u jóokʼol kʼiin tu yóokʼol kʼaakʼas máakoʼob yéetel tu yóokʼol utsil máakoʼob» yéetel «ku túuxtik cháak tu yóokʼol máaxoʼob toj u kuxtaloʼob yéetel tu yóokʼol máaxoʼob maʼ toj u kuxtaloʼobiʼ». Le oʼolaleʼ, maʼ tu xuʼulul k-tsʼáaik diosboʼotik kex u maasil maʼatech u beetkoʼob, beyoʼ yaan k-eʼesik u paalaloʼon le k-Taata yaan teʼ kaʼanoʼ (Mateo 5:45).

[Tsolajiloʼob]

[U tsolajil le oochel teʼ táan juʼun 13]

Ichil kaʼapʼéel kʼiineʼ xok jaytéen ka tsʼáaik diosboʼotik wa ka beetik uláakʼ wa baʼax utiaʼala tsʼáaik

[U tsolajil le oochel teʼ táan juʼun 13]

Tsʼáa diosboʼotik,beyoʼ a paalaleʼ yaan u kankoʼob bix unaj u beetkoʼob

[U tsolajil le oochel teʼ táan juʼun 13]

Tak le mejen paalaloʼob jeʼel u kankoʼob u tsʼaʼob diosboʼotikeʼ