Tin kanaj in maas yaabilt in kuxtal

MIX BIKʼIN KUN TUʼUBULTEN LE BAʼAX ÚUCH TU KʼIINIL 16 TIʼ ABRIL TIʼ 2007. Teneʼ tiʼ in taʼakmibaj kaʼach tu óoxpʼéel pisoi le nojoch naj tuʼux yaan le Instituto Politécnico yéetel Universidad Estatal tiʼ Virginia, yaan Estados Unidosoʼ. Teʼ kʼiin jeʼeloʼ, tin kanaj tu kaʼatéen u kʼaʼananil in tsʼáaik gracias sáamsamal tumen kuxaʼanen.

Teneʼ tiaʼanen kaʼach tin oficinaeʼ, jach in kaʼaj kaʼach éemel in chʼaʼa le juʼunoʼob túuxtaʼanten teʼ kaʼapʼéel pisooʼ, ka taal utúul profesor u yaʼalten ka xiʼiken in wil baʼax úuch tiʼ u computadora. Jach taʼaytak túun in wokol tu oficina yaan láayliʼ teʼ óoxpʼéel pisooʼ, ka t-uʼuyaj u káajal u yúuchul tsʼoon teʼ kaʼapʼéel pisooʼ. Ka jáan ookoʼon tu oficinaeʼ, t-kʼalaj le jooloʼ ka t-tsʼáaj u seguro. Upuliʼ maʼ k-ojel kaʼach baʼax táan u yúuchliʼ. Jach táaj sajakchajoʼon. Joʼopʼ k-tuklik baʼax kun úuchultoʼon. Ten túuneʼ binen mochtal tu tiʼits le oficinaoʼ ka tin kʼáataj tiʼ Jéeoba yéetel tuláakal in muukʼ ka u yáanten.

Le táan in páaʼtik in wilik baʼax kun úuchloʼ, kʼaʼajten le baʼax úuchten quince jaʼabjeak, le táan in meyaj bey mecanicoeʼ. Upʼéel kʼiineʼ, jóop le gasolina ku bisaʼal tiʼ upʼéel chan balde tumen utúul in wéet meyajoʼ, letiʼ túuneʼ jach sajakchajeʼ ka tu píikchʼintaj le baldeoʼ, le gasolina túunoʼ wéek tin wóokʼoleʼ ka tu tóokaj desde tin wich tak tin nakʼ. Tiʼ helicóptero bisaʼaben teʼ hospital tuʼux ku bisaʼal le máaxoʼob jach nojoch úuchik u chuʼujloʼoboʼ, óoxpʼéel mes yéetel táanchumuk táan u yilaʼal wa yaan in kuxtal wa maʼ. Tuláakaleʼ cinco meses tu bisaj in tsʼakaʼal, tsʼoʼoleʼ ka suunajen tin wotoch jach kiʼimak in wóol tumen kuxaʼanen. Le baʼax úuchaʼ tu kaʼansajten in jach yaabilt in kuxtal cada kʼiin ku máan. Ka úuchten le jeʼeloʼ teneʼ tsʼokaʼaniliʼ in beetkimba utúul u j-jaajkunaj Jéeobaeʼ (testigo de Jehová). Baʼaleʼ desde ka úuchten leloʼ, tin chʼaʼatuklaj in maas aprovechartik le súutukiloʼob yanten utiaʼal in maas meyajtik Jéeoba Dios, le máax siimaiten le kuxtaloʼ (Salmo 90:12; Isaías 43:10).

Yoʼolal le baʼax úuchtenoʼ maʼ páajchaj u seguer in meyaj bey mecanicoeʼ, le oʼolal tin kanaj in wutskíint computadoraʼob. Ka máan kʼiineʼ ooken meyaj teʼ universidadoʼ, le oʼolal tiaʼanen le ka káaj u sen úuchul le tsʼoonoʼ.

Maʼ t-tuklaj wa teʼ piso yaan kabaloʼ táan kaʼach u yúuchul upʼéel jach nojoch loob maʼ kun tuʼubsbil tu luʼumil Estados Unidos. Utúul máakeʼ tu kíimsaj 32 máakoʼob, ka tsʼoʼokeʼ ka tu kíimsuba xan. Veinte minutos káajak k-uʼuyik u sen wáakʼal le tsʼoonoʼ ka t-uʼuyaj tsʼoʼok u kʼuchul le policíaʼob teʼ pasillooʼ. T-tʼanoʼobeʼ ka tu bisoʼonoʼob tiʼ upʼéel tuʼux maʼ u yúuchultoʼon loob.

Le baʼax jach kʼaas úuchaʼ tu kaʼansajteneʼ u kuxtal wíinikeʼ jach séeb jeʼel u tsʼoʼokoleʼ yéetel maʼ u yojel máak baʼax kʼiin ken úuchkiʼ (Santiago 4:14). Le oʼolal baʼax maas maʼalob ka k-beeteʼ, letiʼe ka k-kʼub óol tiʼ Jéeoba, le Máax tiʼ u taal le kuxtaloʼ, yéetel k-tsʼáaik u graciasi tiʼ yoʼolal le kuxtal ku síiktoʼon sáamsamaloʼ (Salmo 23:4; 91:2).

[U tsolajil le oochel teʼ táan juʼun 22]

AP Photo/The Roanoke Times, Alan Kim