¿A wojel wa?

¿Baʼax meyajiloʼob ku beetik kaʼach Jesús bey carpinteroileʼ?

Jesuseʼ tiʼ José tu kanaj le meyajaʼ. Le oʼolal le ka káaj u kʼaʼaytaj le yaan «treinta jaʼaboʼob» tiʼoʼ kʼaj óolaʼan bey carpinteroeʼ, maʼ chéen bey «u paal» le carpinterooʼ (Lucas 3:23; Mateo 13:55; Marcos 6:3).

Maʼ xaaneʼ le tuʼux kajakbal kaʼachoʼ jach yaʼab u meyaj baʼaloʼob beetaʼan yéetel cheʼ utiaʼal u arartaʼal le luʼumoʼ. Tsʼoʼoleʼ le carpinteroʼoboʼ ku beetkoʼob mesaʼob, sillaʼob, kʼáancheʼob, baúloʼob, joonajoʼob, ventanaʼob, trancaʼob yéetel vigaʼob de cheʼ. Bey túunoʼ jeʼel u páajtal k-aʼalikeʼ ku táakpajloʼob utiaʼal u beetaʼal upʼéel naj.

Utiaʼal u chʼakkoʼob le cheʼoboʼ ku meyajtiʼob le báatoʼ, lelaʼ upʼéel baʼax tu chʼaʼachiʼitaj Juan Bautista tiʼ upʼéel kettʼaan. Le ken tsʼoʼokok kaʼach u chʼakkoʼob le cheʼoboʼ yaan kaʼapʼéel baʼax jeʼel u páajtal u beetkoʼobeʼ: u beetkoʼob u vigasi teʼeloʼ wa u biskoʼob u xotoʼob tu talleroʼob. Le oʼolal le máaxoʼob beetik le meyajaʼ jach kʼaʼabéet yaan u muukʼoʼob (Mateo 3:10). Isaíaseʼ tu yaʼalaj uláakʼ baʼaxoʼob ku meyaj tiʼ le carpinteroʼob tu kʼiiniloʼ: «Ku chʼaʼik u [pʼisib] utiaʼal u jóokʼesik u pʼiisiloʼob, ku chíikultik yéetel tsʼíib bix u najmal u póolik, ku tsʼoʼokoleʼ ku machik u nuʼukul póol cheʼeʼ ku póolik» (Isaías 44:13). Le arqueologoʼoboʼ tsʼoʼok u yilkoʼobeʼ úuchileʼ meyajnaj xan tiʼ le máakoʼob serruchoʼob, martilloʼob beetaʼan yéetel tuunich bey xan clavos de bronce (Éxodo 21:6; Isaías 10:15; Jeremías 10:4). Le oʼolal jeʼel u páajtal k-aʼalikeʼ meyajnaj xan le nuʼukuloʼob tiʼ Jesusaʼ.

¿Máaxoʼob le «j-kanan taakʼinoʼob» tu yaʼalaj Jesusoʼ, yéetel bix le meyaj ku beetkoʼob kaʼachoʼ?

Tiʼ upʼéel kettʼaaneʼ Jesuseʼ tʼaanaj tiʼ utúul palitsil maʼ tu meyajtaj le taakʼin tsʼaʼabtiʼ tumen u tsʼuuliloʼ. Le oʼolal le tsʼuuloʼ tu yaʼalajtiʼ: «U náajmal kaʼach a [tsʼáaik] in taakʼin tiʼ le j-kanan taakʼinoʼob, utiaʼal ken taalakeneʼ, kin kʼamik baʼax in tiaʼal yéetel [u] náajalil» (Mateo 25:27, LTN).

Teʼ kʼiinoʼob jeʼeloʼ minaʼan nukuch bancoʼob jeʼex le yanoʼob bejlaʼoʼ. Baʼaleʼ yaan kaʼach «j-kanan taakʼinoʼob»; letiʼobeʼ ku boʼotikoʼob u interesi le taakʼin ku tsʼaʼabal u líiʼsoʼoboʼ yéetel ku tsʼáaikoʼob xan taakʼin majáantbil, baʼaleʼ ku cobrarkoʼob xan u interesi. Le libro The Anchor Bible Dictionary ku yaʼalikeʼ desde teʼ siglo 4 táanil tiʼ u taal Cristooʼ suuk kaʼach u majáantaʼal taakʼin ku cobrartaʼal u interesi. Teʼ jaʼaboʼob tuʼux anchaj jeetsʼelil tiʼ le romailoʼoboʼ, le interés suuk u cobrartaʼal cada jaʼab yoʼolal le taakʼin tsʼaʼan majáantbiloʼ ku chukik 4 tak 6%.

U jaajileʼ le Ley tu tsʼáaj Dios tiʼ le israelitaʼoboʼ ku yaʼalik maʼ unaj u cobrartaʼal interés ken tsʼaʼabak majáantbil taakʼiniʼ (Éxodo 22:25). Baʼaleʼ le baʼax aʼalaʼabaʼ maʼ xaaneʼ chéen unaj u beetaʼal yéetel le máaxoʼob óotsiltakoʼoboʼ. Kex beyoʼ, le kettʼaan tu yaʼalaj Jesusoʼ ku yeʼesikeʼ teʼ kʼiinoʼob jeʼeloʼ le «j-kanan taakʼinoʼo[boʼ]» suuk kaʼach u boʼotikoʼob u interesi le taakʼin ku tsʼaʼabal u líiʼsoʼoboʼ. Lelaʼ ku yeʼesiktoʼoneʼ ken kaʼansajnak kaʼach Jesuseʼ ku tʼaan tiʼ baʼax kʼaj óolaʼan tumen le máaxoʼob chʼenxikintkoʼ.