Le Máax beetmailoʼonoʼ ku náajmatik ka k-nojbeʼenkúunte
Ilawil a natsʼkaba tiʼ Dios
Le Máax beetmailoʼonoʼ ku náajmatik ka k-nojbeʼenkúunte
«¿BAʼAX oʼolal beetaʼab wíinik?» Maʼ xaaneʼ techeʼ tsʼoʼok xan a tuukul tiʼ le kʼáatchiʼaʼ. Le máaxoʼob ku creerkoʼob tiʼ evolución u taal wíinikeʼ maʼ tu páajtal u núukikoʼob. Baʼaleʼ le máaxoʼob ku creerkoʼob tiʼ Jéeoba Dios «yaan u sayabil le kuxtaloʼ», ku páajtal u núukikoʼob (Salmo 36:9). Letiʼobeʼ u yojloʼobeʼ Jéeobaeʼ yaan baʼax oʼolal tu beetaj wíinik jeʼex u yaʼalik Apocalipsis 4:11. Teʼ versículo tu tsʼíibtaj apóstol Juanoʼ koʼox ilik bix u tsolik baʼaxten beetaʼab wíinik.
Juaneʼ tu yilaj u múuchʼ angeloʼob táan u kʼayikoʼob: «Yuumtsil yéetel k-Jajal Dios, techeʼ [ka] náajmatik a kʼamik nojbeʼenil, tsiikil bey xan páajtalil; tumen teech ta beetaj tuláakal baʼaloʼob, tu yoʼolal a wóolajeʼ yanoʼob yéetel beetaʼaboʼob». Le oʼolaleʼ chéen Jéeoba ku náajmatik k-adorartik yéetel k-nojbeʼenkúuntik, tumen letiʼ beetmil tuláakal baʼal. Wa beyoʼ, ¿baʼax unaj u beetik tuláakal máak?
Le tekstooʼ ku yaʼalikeʼ Jéeobaeʼ ku náajmatik u kʼamik nojbeʼenil, tsiikil bey xan páajtalil. Baʼaleʼ kex minaʼan uláakʼ máax jeʼel bix Dios ka u náajmat le baʼaloʼobaʼ, u maas yaʼabil le máakoʼoboʼ maʼ u kʼáat u creertoʼob wa letiʼ tsʼaamil u kuxtaloʼobiʼ. U maʼalobileʼ, tiʼ tuláakal yóokʼol kaabeʼ yaʼab xiiboʼob yéetel koʼoleloʼob ku kʼaj óolkoʼob u jatsʼuts modos Dios yoʼolal le baʼaxoʼob u beetmajoʼ (Romailoʼob 1:20). Yoʼolal lelaʼ ku tsʼáaikoʼob nojbeʼenil yéetel tsiikil tiʼ. Yéetel tuláakal tuʼuxeʼ ku kʼaʼaytikoʼob Jéeoba beet tuláakal baʼal le oʼolal ku náajmatik ka k-nojbeʼenkúunte yéetel ka k-eʼes tsiikil tiʼ (Salmo 19:1, 2; 139:14).
Tsʼoʼoleʼ le máaxoʼob meyajtikoʼ maʼ chéen ku tsʼáaikoʼob nojbeʼenil yéetel tsiikil tiʼiʼ, ku tsʼáaikoʼob xan páajtalil wa muukʼ tiʼ. Baʼaleʼ¿bix jeʼel u tsʼaʼabal páajtalil tiʼ le Dios yaan tuláakal páajtalil tiʼoʼ? (Isaías 40:25, 26.) Úuchik u beetkoʼon jeʼex letiʼeʼ, yantoʼon u chan pʼíit tiʼ le páajtalil yantiʼoʼ (Génesis 1:27). Le oʼolaleʼ wa jach tu jaajil k-kʼáat tsʼáa u nib óolalil tiʼ Dios yoʼolal le baʼaxoʼob u beetmaj t-oʼolaloʼ, yaan k-xupik k-muukʼ utiaʼal k-nojbeʼenkúuntik yéetel k-eʼesik tsiikil tiʼ. Maʼ ken k-xup k-muukʼ chéen utiaʼal k-kaxtik utsil, baʼaxeʼ yaan k-xupik utiaʼal k-meyajtik Dios (Marcos 12:30).
¿Baʼaxten túun kuxaʼanoʼon? Le u tsʼook jaats tiʼ Apocalipsis 4:11 ku yaʼalikeʼ Dios beet tuláakal baʼal, tu yoʼolal letiʼeʼ yanoʼon. Ichil uláakʼ tʼaanoʼobeʼ Jéeoba óot ka yanakoʼon. Le oʼolaleʼ k-kuxtaleʼ ku pʼáatal minaʼan u beelal wa k-chʼíikil kaxt chéen k-utsil. Bey túunoʼ, wa k-kʼáat ka yanak u beelal k-kuxtal yéetel ka yanaktoʼon kiʼimak óolaleʼ kʼaʼabéet k-kanik baʼax u kʼáat Dios ka k-beete yéetel k-ilik beetik (Salmo 40:8).
[U tsolajil le oochel teʼ táan juʼun 23]
NASA, ESA yéetel A. Nota (STScI)