Yaan máaxoʼobeʼ taak u yojéeltkoʼob

Wa jach maʼalob beetaʼabik Adaneʼ, ¿Baʼaxten túun kʼebanchaji?

Le ka beetaʼab Adán tumen Dioseʼ tsʼaʼab u páajtalil tiʼ u yéeyik baʼax ken u beete. Le páajtalil tsʼaʼabtiʼaʼ maʼ táan u yeʼesik wa maʼ maʼalob bix beetaʼabikiʼ. Maʼ unaj xan u tuʼubultoʼoneʼ chéen Dios jach mix bikʼin ken u beet baʼax maʼ maʼalobiʼ (Deuteronomio 32:3, 4; Salmo 18:30; Marcos 10:18). Mix máak jeʼel u páajtal u beetik baʼax maʼalob jach jeʼex u beetik Diosoʼ. Bey túunoʼ le yáax wíinikoʼ minaʼan kʼeban tu wíinklil ka beetaʼabi, baʼaleʼ utiaʼal ka pʼáatak mantatsʼ beyoʼ, kʼaʼabéet kaʼach u béeykuntik le baʼax oʼolal beetaʼaboʼ.

¿Baʼaxten beetaʼab Adán tumen Dios? Beetaʼab utiaʼal ka yanak máakoʼob yaan u naʼatoʼob yéetel u páajtalil u yéeykoʼob baʼax ken u beetoʼob. Wa tu juunaloʼob ku chʼaʼatuklikoʼob kaʼach u beetkoʼob baʼax ku yaʼalik Dioseʼ ku yeʼeskoʼob u yaabiltmoʼob. Dioseʼ tu beetaj wíinik yéetel u páajtalil u síijil tu puksiʼikʼal baʼax ken u beete, maʼ tu beetaj jeʼex le robotoʼoboʼ (Deuteronomio 10:12, 13; 30:19, 20). Wa maʼ u tsʼaʼabal kaʼach u páajtalil tiʼ Adán u yéeyik baʼax ken u beeteʼ, jeʼel u páajtal u yaʼalaʼal maʼ maʼalob bix beetaʼabikeʼ. Baʼaleʼ ¿bix úuchik u meyaj le páajtalil tsʼaʼabtiʼoʼ? Le Bibliaoʼ ku yaʼalikeʼ Adaneʼ maʼ tu yuʼubaj tʼaaniʼ, tu jaantaj «u yich u cheʼil u kʼaj óolilalil uts yéetel kʼaas» jeʼex tu beetil u yatanoʼ (Génesis 2:17; 3:1-6).

Le ka beetaʼab Adaneʼ, ¿yaan wa baʼax tu binetaj u tsʼaʼabaltiʼ tumen Dios utiaʼal ka u kan u yéey baʼax maʼalob? Minaʼan. Táanil tiʼ u kʼebantal Adaneʼ Jéeobaeʼ tu yilaj «sen maʼalob» tuláakal le baʼax u beetmaj way Luʼumeʼ, ichileʼ táakaʼan Adán yéetel Evaiʼ (Génesis 1:31). Le oʼolal le ka kʼebanchajeʼ, Dioseʼ maʼ tu yaʼalaj wa úuch tumen maʼ maʼalob bix úuchik u beetkiʼ. Baʼaxeʼ tu yaʼalaj tiʼ Adán anchaj u culpai (Génesis 3:17-19). Le yáax máakoʼ maʼ péeksaʼab tumen u yaabilaj tiʼ Dios utiaʼal ka u beet tuláakal le baʼax aʼalaʼabtiʼoʼ.

Beoraaʼ tuukulnakoʼon tiʼ Jesús, letiʼ kaʼacheʼ utúul máak jeʼex Adaneʼ. Letiʼeʼ minaʼan mix baʼal ichil u wíinklil jeʼel u beetik u lúubul tiʼ baʼaloʼob kʼaastakeʼ, tumen u kiliʼich muukʼ Dios beet u síijil (Lucas 1:30, 31; 2:21; 3:23, 38). Baʼaleʼ Jesuseʼ maʼ tu beetaj jeʼex Adaneʼ, letiʼeʼ tu juunal tu chʼaʼatuklaj u chúukpajal u yóol tiʼ Dios le ka tu aktáantaj yaʼab talamiloʼoboʼ. Lelaʼ ku yeʼesikeʼ tiʼ Adán anchaj u culpai le úuchik u kʼebantaloʼ, tumen tu juunal tu yéeyaj u bin tu contra le baʼax u yaʼalmaj Diosoʼ.

Baʼaleʼ ¿baʼaxten tu beetaj beyoʼ? ¿Tu tuklaj wa ta tʼaan maas maʼalob kun bin tiʼ? Maʼatech, le apóstol Pablooʼ ku yaʼalikeʼ «Adaneʼ maʼ tuʼusiʼ» (1 Timoteo 2:14). U jaajileʼ tu juunal tu chʼaʼatuklaj u jaantik u yich le cheʼ tu jaantaj xan u yatanoʼ. Letiʼeʼ maas kʼaʼanan tu yilil u beetik baʼax utstutʼaan u yatan ke ka u beet baʼax ku yaʼalik Dios. Le ka tsʼaʼab u yich le cheʼ tiʼ tumen Evaoʼ, unaj u tukultik kaʼach yaan u náachtal tiʼ Dios yoʼolal le baʼax ken u beetoʼ. Letiʼeʼ maʼ u jach yaabilmaj Diosiʼ le oʼolal maʼ chúukpaj u yóol le ka aʼalaʼabtiʼ tumen u yatan ka u jaant u yich le cheʼoʼ.

Adaneʼ kʼebanchaj táanil tiʼ u yantal u paalal le oʼolal tu máansajtoʼon xan le kʼebanoʼ. Baʼaleʼ jeʼex letiʼeʼ toʼon xaneʼ yaan u páajtalil k-yéeyik baʼax ken beete. Le oʼolaleʼ maas maʼalob ka tuukulnakoʼon tiʼ u yutsil ku yeʼesiktoʼon Jéeobaoʼ yéetel ka k-il maas yaabiltik. U jaajileʼ chéen letiʼ ku náajmatik ka k-adorarte yéetel ka k-beet baʼax ku yaʼaliktoʼon yéetel tuláakal k-puksiʼikʼal (Salmo 63:6; Mateo 22:36, 37).