Yaan máaxoʼobeʼ taak u yojéeltkoʼob

¿Dios wa bisik le mejen paalaloʼob utiaʼal ka u beet u angeliloʼob teʼ kaʼanoʼ?

Ken kíimik utúul chan paaleʼ, u amigoʼob le taatatsiloʼob yéetel u láakʼtsiloʼoboʼ maʼ xaaneʼ utiaʼal u líiʼskoʼob u yóoleʼ jeʼel u yaʼalikoʼobeʼ, «Dios bise tumen kʼaʼabéet uláakʼ ángel tiʼ». Baʼaleʼ ¿jaaj wa le baʼax ku creertaʼalaʼ?

Wa Dios beetik u kíimil le mejen paalal tumen kʼaʼabéet uláakʼ ángel tiʼ teʼ kaʼanoʼ, u kʼáat u yaʼaleʼ kʼasaʼan yéetel minaʼan u yaabilaj. Baʼaleʼ le Bibliaoʼ ku yaʼalikeʼ Dioseʼ maʼ beyiʼ (Job 34:10). Ku yaʼalikeʼ Dioseʼ yaabilaj (1 Juan 4:8). Wa utúul taatatsil yaan u yaabilajeʼ, ¿máasaʼ maʼ tu chʼaʼik u paalal yaanal máax chéen utiaʼal u maas yaʼabtal utiaʼaliʼ? Lelaʼ ku yeʼesikeʼ yoʼolal u nojoch yaabilajeʼ, Dioseʼ mix utéen jeʼel u beetik upʼéel baʼal utiaʼal u muʼyaj máakeʼ.

A tuklikeʼ, ¿kʼaʼabéet wa uláakʼ angeloʼob tiʼ Dios teʼ kaʼanoʼ? Le Bibliaoʼ ku yaʼalikeʼ tuláakal baʼax ku beetik Dioseʼ jach maʼalob (Deuteronomio 32:4). Le oʼolaleʼ letiʼeʼ tu beetaj le bukaʼaj angeloʼob tu tuklaj kʼaʼabéettiʼoʼ (Daniel 7:10). ¿Máasaʼ leloʼ ku yeʼesikeʼ Dioseʼ ken u beet wa baʼaxeʼ jach maʼalob u beetik? Baʼaleʼ ¿maʼ wa le Bibliaoʼ ku yaʼalikeʼ Dioseʼ u yéeymaj máakoʼob utiaʼal u binoʼob gobernar teʼ kaʼan ken tsʼoʼokok u kíimloʼoboʼ? Leloʼ jaaj, baʼaleʼ maʼatech u yaʼalik wa letiʼe mejen paalaloʼob ku kíimloʼoboʼ (Apocalipsis 5:9, 10).

Le baʼax u tukulmaj kaʼach Dios utiaʼal le mejen paalaloʼoboʼ, ku yeʼesik xan maʼatech u bisik teʼ kaʼan utiaʼal u beet u angeliloʼoboʼ. Teʼ tu jardinil Edenoʼ Dioseʼ tu yaʼalaj tiʼ Adán yéetel Eva: «Yaʼabchajak a paalaleʼex; chupeʼex le yóokʼol kaaboʼ, méekʼtanteʼex xan» (Génesis 1:28). Le mejen paalaloʼoboʼ jach kʼaʼabéetoʼob utiaʼal u béeytal le baʼax u tukulmaj Dios utiaʼal le Luʼumaʼ. Dioseʼ mix utéen tu tukultaj u bisik le mejen paalaloʼob utiaʼal ka u beet u angeliloʼob teʼ kaʼanoʼ. Le Bibliaoʼ ku yaʼalikeʼ le paalaloʼoboʼ «u siibalil u ayikʼalil Yuumtsil» (Salmos 127:3). Wa Jéeoba, le Máax jach yaan u yaabilaj tsʼoʼok u síik le mejen paalal tiʼ le taatatsiloʼoboʼ, ¿jeʼel wa u kaʼa tokik tiʼobeʼ? Maʼatan.

Ken kíimik utúul chan paaleʼ, jach ku beetik u muʼyaj yéetel u yaatal u yóol le taatatsiloʼoboʼ. Baʼaleʼ ¿baʼax esperanza yaan tiʼ le máaxoʼob tsʼoʼok u kíimil u mejen paaloʼoboʼ? Le Bibliaoʼ ku yaʼalikeʼ Dioseʼ yaan u kaʼa kuxkíintik u millonesi máakoʼob utiaʼal u kuxtaloʼob tiʼ upʼéel jatsʼuts paraíso way Luʼumeʼ. ¡Chéen tukult bukaʼaj jaʼtsil le ken kaʼa kuxkíintaʼak le mejen paalaloʼob utiaʼal u kaʼa antaloʼob yéetel máax u yaabiltmoʼoboʼ! (Juan 5:28, 29.) Jeʼex tsʼoʼok k-ilkoʼ, Dioseʼ u kʼáat ka nuukchajak le mejen paalaloʼob utiaʼal ka kuxlakoʼob ich kiʼimak óolal way Luʼum yéetel ka kaambalnakoʼob tiʼoʼ. Bey túunoʼ, le mejen paalaloʼob tsʼoʼok u kíimloʼoboʼ maʼatech u bisaʼaloʼob tumen Dios utiaʼal u beet u angeliloʼob, baʼaxeʼ yaan u kaʼa kuxkíintaʼaloʼob way Luʼumeʼ. Ken kʼuchuk le kʼiin jeʼeloʼ Dioseʼ yaan u kanáantikoʼon yéetel tuláakloʼon ken k-adorart utiaʼal kʼiinoʼob minaʼan u xuul.