Ilawil a natsʼkaba tiʼ Dios

«Jach maʼalob in wojelil baʼax ku mukʼyajtikoʼob»

Éxodo 3:1-10

«KILIʼICH, kiliʼich, kiliʼich Yuumtsil [Jéeoba].» (Isaías 6:3.) Le tʼaanoʼobaʼ ku yeʼeskoʼobeʼ Jéeobaeʼ utúul Dios jach santo yéetel jach minaʼan mix baʼal kʼaas tiʼ. ¿U kʼáat wa túun u yaʼaleʼ Dioseʼ jach upuliʼ maʼ u yaabiltmoʼoniʼ? ¿Jeʼel wa u yeʼesik yaabilaj tiʼ máaxoʼob kʼebanoʼob wa letiʼ utúul Dios jach santo yéetel jach minaʼan mix baʼal kʼaas tiʼeʼ? Tu libroi Éxodo 3:1-10, ku chíikpajal upʼéel tsikbal anchaj tiʼ Moisés yéetel Jéeoba. Le baʼax tu tsikbaltoʼobaʼ jach jeʼel u líiʼsik k-óoleʼ.

Utéenjeakeʼ le táan u kanáantik u tamanoʼobeʼ Moiseseʼ tu yilaj ukúul chan cheʼ ku tóochʼ u kʼáakʼil, «baʼaleʼ maʼ tu jáabal» (versículo 2). Moiseseʼ tumen u kʼáat u yil baʼaxten maʼ tu jáabal le chan cheʼoʼ joʼopʼ u náatsʼal utiaʼal ka u yile. Baʼaleʼ Jéeobaeʼ tʼaanaj tu chiʼ utúul angeleʼ ka tu yaʼalaj tiʼ Moisés: «Maʼ a náatsʼal. Pit a xanab, tumen le kúuchil ka peʼechakʼtikaʼ kiliʼich.» (versículo 5.) Jeʼex k-ilkoʼ le luʼum ku peʼechaʼtik kaʼach Moisesoʼ santo tumen tiʼ yaan kaʼach le Dios jach santooʼ.

¿Baʼaxten táan kaʼach u tʼaan Jéeoba yéetel Moisés? Jéeobaeʼ tu yaʼalajtiʼ: «Tsʼoʼok in maʼalob ilik bix u mukʼyaj in kaajal yaan tu luʼumil Egiptooʼ. Tsʼoʼok in wuʼuyik u jajakʼ iikʼoʼob ikil u loobiltaʼaloʼob tumen u j-mayoloʼob, jach maʼalob in wojelil baʼax ku mukʼyajtikoʼob.» (Versículo 7.) Jeʼex k-ilkoʼ Dioseʼ táan kaʼach u yilik le baʼaxoʼob ku muʼyajtik le máaxoʼob meyajtikoʼ yéetel jach yaachaj xan u yóol. Le oʼolaleʼ letiʼeʼ tu yaʼalaj: «Jach maʼalob in wojelil baʼax ku mukʼyajtikoʼob». Upʼéel libroeʼ ku yaʼalikeʼ le tʼaan «jach maʼalob in wojelil» ku chíikpajal teʼ tekstooʼ «ku tsʼáaik xan naʼatbil u chʼaʼabal óotsilil, u kanáantaʼal yéetel u yaabiltaʼal wa máax». U jaajileʼ le baʼax tu yaʼalaj Jéeoba tiʼ Moisesoʼ ku yeʼesikeʼ letiʼeʼ jach u yaabilmaj u kaajal.

Jéeobaeʼ maʼ chéen tu chʼaʼaj óotsilil tiʼ u kaajaliʼ, baʼaxeʼ tu yilaj xan u yáantik. Letiʼeʼ tu tuklaj u jóoʼskoʼob tu kaajil Egipto ka u «bisoʼob tiʼ jumpʼéel nojoch yéetel maʼalob luʼum tuʼux ku yáalkab leche yéetel kaab» (versículo 8). Le oʼolaleʼ tu yaʼalaj tiʼ Moisés: «Jóokʼes in kaajal le israelitaʼob tu luʼumil Egiptooʼ» (versículo 10). Letiʼeʼ tu beetaj jeʼex aʼalaʼabiktiʼoʼ, yéetel tu jaʼabil 1513 táanil tiʼ u taal Cristoeʼ tu jóoʼsaj u kaajil Israel tu luʼumil Egipto.

Jéeobaeʼ láayliʼ maʼ kʼexpajak bix u tuukuleʼ. Le oʼolaleʼ le máaxoʼob meyajtikoʼ jeʼel u páajtal u confiaroʼob tiʼeʼ, tumen u yojloʼob yaan u yáantaʼaloʼob yéetel yaan u yuʼubaʼal u oracionoʼob. Jéeoba xaneʼ jach u yojel baʼax ku muʼyajtikoʼob. Yéetel jeʼex úuchjeakileʼ maʼ chéen ku chʼaʼik óotsilil tiʼ le máaxoʼob meyajtikoʼ, baʼaxeʼ ku yilik u yáantikoʼob. ¿Baʼaxten bey u beetikoʼ? Tumen jeʼex u yaʼalik le Bibliaoʼ letiʼeʼ jach ku kanáantik máaxoʼob meyajtik (1 Pedro 5:7).

Jach ku líiʼsik k-óol k-ojéeltik Jéeobaeʼ utúul Dios jach ku chʼaʼiktoʼon óotsilil. Kex tumen kʼeban wíinkoʼoneʼ, letiʼeʼ ku yáantkoʼon k-bis upʼéel kuxtal limpio tu táan (1 Pedro 1:15, 16). Lelaʼ bey u yeʼesik le baʼax úuch tiʼ utúul koʼolel meyajtik Diosoʼ. Letiʼeʼ jach ku lúubul u yóol kaʼachi yéetel ku yuʼubik mix baʼal u biilal, baʼaleʼ jach líikʼ u yóol úuchik u xokik le baʼax aʼalaʼab tiʼ Moisés tumen Jéeobaoʼ. Letiʼeʼ tu yaʼalaj: «Wa Jéeoba tu beetaj u suut santoi le luʼumoʼ, láayliʼ jeʼel u páajtal u yáantkeneʼ. In tuukul tiʼ lelaʼ jach tsʼoʼok u yáantken».

¿A kʼáat wa a maas kʼaj óolt Jéeoba le Dios jach santo, yéetel ka a bisaba jach maʼalob tu yéeteloʼ? Lelaʼ maʼ upʼéel baʼal maʼ tu páajtal k-beetkiʼ tumen «letiʼeʼ yojel yéetel baʼax beetaʼanoʼon: maʼalob u yojelil[eʼ], toʼoneʼ maʼay luʼumoʼon» (Salmo 103:14).