Le meyaj tsʼaʼan tiʼ María tumen Diosoʼ

LE TÁAN kaʼach u kʼaʼaytaj Jesús tu táan yaʼab máakoʼoboʼ utúul koʼoleleʼ chéen ka tu kʼaʼam aʼalaj: «¡Kiʼ yóol le koʼolel tu [síijsechoʼ] yéetel tu tséentajechoʼ!». Wa Jesús u kʼáat kaʼach ka adorartaʼak u maama tumen u disipuloʼobeʼ, lelaʼ jach u súutukil kaʼach utiaʼal u yaʼalik ka u beetoʼob. Baʼaleʼ maʼ tu beetiʼ, baʼaxeʼ tu yaʼalaj: «¡[Maas] kiʼimak yóol le máaxoʼob ku yuʼubikoʼob yéetel ku beetikoʼob baʼax ku yaʼalik Jajal Dios[oʼ]!» (Lucas 11:27, 28).

U jaajileʼ, Jesuseʼ mix utéen tu tsʼáaj tsikbeʼen kʼaabaʼob tiʼ u maama mix xan tu yaʼalaj tiʼ u disipuloʼob ka u tsʼaʼob nojbeʼenil tiʼiʼ. Baʼaleʼ ¿baʼaxten túun yaʼab máakoʼob adorartik María? Koʼox ilik baʼax ku yaʼalik le Biblia yoʼolal le baʼaxoʼob suukaʼan u creertaʼal yoʼolal Maríaoʼ.

Jach kʼambeʼen yéetel kiʼikiʼtʼantaʼan ichil le koʼoleloʼoboʼ

Táanil tiʼ u yaʼalik tiʼ María baʼax meyajil kun tsʼaabiltiʼ tumen Dioseʼ, le ángel Gabrieloʼ tu yaʼalajtiʼ:«¡Kin tsikikech, jach kʼambeʼenchajaʼanech! Yuumtsil yaan ta wéetel» (Lucas 1:28). Tuláakʼ Bibliaʼobeʼ bey u chíikpajal le tekstoaʼ: «Dios ka u salvartech, chuupech yéetel nojbeʼenil, Yuumtsileʼ tiaʼan ta wéeteleʼ». Utéenjeak xan ka bin xíimbaltbil Elisabet tumen Maríaeʼ, letiʼeʼ tu yaʼalajtiʼ: «Tsʼoʼok u jach kiʼtʼantikech Jajal Dios ichil tuláakal koʼoleloʼob, yéetel tsʼoʼok xan u kiʼtʼantik a paal kun síijiloʼ» (Lucas 1:42). ¿Le baʼaxoʼob aʼalaʼab tiʼ Maríaoʼ ku tsʼáaik wa naʼatbil kʼaʼabéet u adorartaʼal?

U jaajileʼ maʼ. Kex tiʼ le catolicoʼob ku meyaj le baʼax tu yaʼalaj Gabriel yéetel Elizabet utiaʼal u rezaroʼob tiʼ Maríaoʼ, le Bibliaoʼ maʼatech u kaʼansik wa unaj u beetik máak lelaʼ. Le baʼaxoʼob tu yaʼalaj Gabriel yéetel Elizabetoʼ ku yeʼesik jach nojoch baʼal úuchik u yilkoʼob u síijsaʼal u Hijo Dios tumen María, baʼaleʼ upuliʼ maʼ tu tsʼáajoʼob naʼatbil wa unaj u orar máak tiʼiʼ. Tsʼoʼoleʼ mix tuʼux teʼ Biblia ku yaʼalik wa unaj u beetaʼal lelaʼ.  Jesús xaneʼ ka tu kaʼansaj u disipuloʼob orareʼ tu yeʼesaj máax tiʼ unaj u yúuchul orar, letiʼeʼ tu káajsaj u orar beyaʼ: «K-Yuum yanech teʼ kaʼanoʼ» (Mateo 6:9).

Táan u gobernar teʼ kaʼanoʼ

Yaʼab máaxoʼob xan aʼalikeʼ bejlaʼeʼ Maríaeʼ u «Reinai kaʼan». Baʼaleʼ mix tuʼux teʼ Biblia ku chíikpajal u yaʼalaʼal tiʼ María beyoʼ. Baʼaxeʼ ku yaʼalikeʼ letiʼeʼ tsʼaʼan upʼéel nojoch meyaj u beet teʼ kaʼanoʼ. ¿Baʼax túun meyajil tsʼaʼantiʼ?

Jesuseʼ tu yaʼaleʼ jujuntúul tiʼ u disipuloʼobeʼ yaan u gobernaroʼob tu yéetel teʼ kaʼanoʼ (Lucas 22:28-30). Le máaxoʼob yéeyaʼanoʼobaʼ ku kaʼansaʼaloʼob tumen Jesús utiaʼal ka u beetubaʼob sacerdoteʼob tiʼ Dios, yéetel yaan u reinaroʼob yóokʼol u kajnáaliloʼob le Luʼumaʼ (Apocalipsis 5:10). Le Bibliaoʼ ku yáantkoʼon k-ileʼ Maríaeʼ utúul tiʼ le máaxoʼob tsʼaʼan le jatsʼuts meyaj tiʼaʼ. ¿Baʼaxten k-aʼalik beyoʼ?

Teʼ yáax xook ku taasik le revistaaʼ, t-ileʼ ka tsʼoʼok u kíimil Cristoeʼ, María, u yíitsʼnoʼob Jesús yéetel u disipuloʼobeʼ mantatsʼ «ku múuchʼ payalchiʼob». Utéenjeakeʼ, óoliʼ ciento veinte máakoʼob tu muchʼubaʼob utiaʼal orar, ichiloʼobeʼ tiaʼan jujuntúul «koʼoleloʼobiʼ» (Beetaʼanoʼob [Hechos] 1:12-15). Le Bibliaoʼ ku yaʼalikeʼ tu kʼiinil le Pentecostesoʼ tuláakloʼob tiaʼanoʼob «tiʼ jumpʼéeliliʼ kúuchil», ka tu wekaj u kiliʼich muukʼ Dios tu yóokʼoloʼob utiaʼal ka páatchajak u tʼaanoʼob ich jejeláas tʼaanoʼob (Beetaʼanoʼob 2:1-4).

Úuchik u weʼekel le kiliʼich muukʼ tu yóokʼol María bey xan yóokʼol u maasil koʼoleloʼob u muchʼmubaʼob teʼ súutuk jeʼeloʼ, ku yeʼeskeʼ María bey xan u maasiloʼoboʼ yéeyaʼaboʼob utiaʼal ka xiʼikoʼob gobernar yéetel Jesús teʼ kaʼanoʼ. Tuláakal lelaʼ ku yeʼeskeʼ Maríaeʼ tiaʼan beora yéetel Jesús teʼ kaʼanoʼ (Romailoʼob 8:14-17). ¿Baʼax túun meyajil ken u beet letiʼ yéetel le u maasil yéeyaʼaboʼob utiaʼal u béeytal le baʼax u tukulmaj Diosoʼ?

Yaan u táakpajal utiaʼal u taasaʼal nukuch utsiloʼob

Le Bibliaoʼ ku yaʼalikeʼ 144,000 máakoʼob kun kaʼa kuxkíintbiloʼob teʼ kaʼan utiaʼal u meyajoʼob yéetel Jesús bey sacerdoteʼob, juezoʼob yéetel reyoʼoboʼ (Apocalipsis 14:1, 4; 20:4, 6). Yéetel u yáantajoʼobeʼ, le máaxoʼob ku beetkoʼob baʼax u kʼáat Diosoʼ yaan u kʼamkoʼob tuláakal le utsiloʼob ku taasik le u kuxtal Jesús tu kʼuboʼ, yaan u páajtal u chúukaʼan adorarkoʼob Dios yéetel yaan u láaj luʼsaʼal le kʼeban tu wíinkliloʼob yéetel tu tuukuloʼoboʼ (Apocalipsis 21:1-4). Le máaxoʼob meyajtik Jéeobaoʼ jach táan u tsʼíiboltkoʼob u kʼuchul le kʼiin jeʼeloʼ. *

Úuchjeakileʼ tsʼaʼab upʼéel nojoch meyaj tiʼ María tumen Dios yéetel bejlaʼeʼ láayliʼ tsʼaʼan xan upʼéel nojoch meyaj tiʼeʼ. Jeʼex k-ilkoʼ tuláakal máax jeʼel u páajtal u kaambal tiʼ Mariaeʼ tumen letiʼeʼ jach tu yaabiltaj u paalal, maʼ tu taasuba nojbaʼaliliʼ, tu beetaj baʼax aʼalaʼabtiʼ yéetel jach chúukpaj u yóol u aktáant le nukuch talmiloʼob tu máansoʼ. Baʼaleʼ maʼ chéen unaj k-kaambal tiʼ letiʼ yoʼolal le jatsʼuts modos tu yeʼesoʼ, kʼaʼabéet xan k-jach eʼesik tsiikil tiʼ tumen letiʼ síijs u Hijo Dios yéetel yaan u táakpajal utiaʼal u taasaʼal utsil tiʼ tuláakal wíinik.

Baʼaleʼ yaan uláakʼ baʼax maas maʼalob jeʼel u páajtal k-kanik tiʼ Maríaeʼ, letiʼeʼ jach chéen Jéeoba Dios ku adorartik, jeʼex u beetik u maasil máaxoʼob u kʼubmaj u yóoloʼob tiʼ Diosoʼ. Letiʼeʼ tiaʼan xan ichil le máaxoʼob kun gobernar yéetel Cristo teʼ kaʼan ku kʼaʼam aʼalikoʼob: «Le kiʼikiʼitʼaanoʼ, le tsiikiloʼ, le nojbeʼeniloʼ yéetel le páajtaliloʼ tsʼaʼabak tiʼ [Jéeoba Dios] le máax kulukbal teʼ jalaʼach kʼáancheʼoʼ yéetel tiʼ [Jesucristo] le j-tamanoʼ utiaʼal jaʼaboʼob minaʼan u xuul» (Apocalipsis 5:13; 19:10).

[Tsolajiloʼob]

[U tsolajil le oochel teʼ táan juʼun 10]

Yanaktoʼon le jatsʼuts modosoʼob anchaj tiʼ Maríaoʼ