Yaan máaxoʼobeʼ taak u yojéeltkoʼob

Le baʼaxoʼob k-muʼyajtikoʼ ¿Dios wa beetik utiaʼal u castigarkoʼon?

Ken joʼopʼok u muʼyaj máakeʼ, maʼ xaaneʼ ku tuklikeʼ Dios castigartik. Ken jáan tsaʼayak upʼéel kʼojaʼanil, ken úuchuktoʼon upʼéel loob wa ken kíimik utúul k-láakʼtsileʼ, maʼ xaaneʼ k-tuklikeʼ Dios beetik. Techeʼ ¿bey wa xan a tuklikoʼ?

Wa beyoʼ jeʼel u kiʼimaktal a wóol a wojéeltikeʼ Dioseʼ maʼ u kʼáat ka muʼyajnakoʼoniʼ. Le ka beetaʼab Adán yéetel Evaeʼ tsʼaʼaboʼob tiʼ upʼéel jatsʼuts paraíso ku «kʼaabaʼtik Edén», teʼeloʼ maʼ kun muʼyajoʼob yéetel maʼ kun antal talamil kaʼach tiʼob (Génesis 2:15).

Baʼaleʼ, Adán yéetel Evaeʼ maʼ tu yuʼuboʼob u tʼaan Diosiʼ, le oʼolal tu peʼertoʼob u páajtalil u kuxtaloʼob ich kiʼimak óolal. Le baʼax tu beetoʼobaʼ maʼ chéen tiʼ letiʼob tu taasaj talmiliʼ, baʼaxeʼ tak tiʼ tuláakal u paalaloʼob. ¿Baʼaxten? Utiaʼal k-naʼatikeʼ, koʼox tuklikeʼ wa utúul taatatsil maʼ u kʼáat u boʼot u rentai le naj tuʼux kajaʼan yéetel u familiaoʼ, maʼ chéen letiʼ kun jóoʼsbil yéetel kun antal talmil tiʼiʼ, baʼaxeʼ tuláakal u familia. Lelaʼ ku yeʼesikeʼ le baʼax tu beetaj Adán yéetel Evaoʼ letiʼe baʼax beetik u muʼyaj máak bejlaʼoʼ (Romailoʼob 5:12). Job, utúul máax jach chúukpaj u yóol u meyajt Dios úuchjeakileʼ, tu yaʼaleʼ «wa ka páatak u pʼiʼisil tuláakal» u muʼyajiloʼobeʼ, «jeʼel u máan u aalil» tiʼ u arenai le kʼáaʼnáaboʼ (Job 6:2, 3).

Uláakʼ baʼax oʼolal k-muʼyajeʼ letiʼe ikil k-chʼaʼatuklik k-beetik baʼax maʼ maʼaloboʼ. Koʼox aʼalikeʼ tumen maʼ ta tsʼáaj cuentaeʼ ka manik upʼéel naj tuʼux jach séeb jeʼel u yeleleʼ. Wa ka beetik beyoʼ ¿máasaʼ jeʼel u yúuchul wa baʼax loobil tiʼ a familiaeʼ? Yéetel wa ku yúuchuleʼ, ¿máasaʼ maʼ tu páajtal a waʼalik wa Dios castigartkech? Le oʼolaleʼ táanil tiʼ k-beetik wa baʼaxeʼ unaj k-chʼaʼatuklik tubeel, le Bibliaoʼ ku yaʼalik: «Le j-maʼ tuukuloʼ ku éejemtik tuláakal baʼax ku yaʼalaʼaltiʼ; le máax uts u tuukuloʼ ku táan óoltik tuʼux ku tsʼik u yook» (Proverbios 14:15).

Kex bejlaʼa tuláakloʼon k-muʼyaj yoʼolal le talamiloʼoboʼ, Dioseʼ u chʼaʼatukulmaj u láaj luʼsik maʼ kun xáantal. Le ken u béeykunt lelaʼ, maʼ kun kaʼa antal muʼyajiloʼob tiʼ mix máak. Le muʼyajil yéetel le kíimiloʼ yaan u xuʼulsaʼaloʼob (Apocalipsis 21:4). Le Biblia xanoʼ ku yaʼalikeʼ mix máak ken u peʼert u yotoch wa u yich u paakʼaloʼob yoʼolal le baʼateltáambaloʼoboʼ wa yoʼolal uláakʼ loobiloʼob ku yúuchul. Baʼaxeʼ tuláakal kun kiʼimaktal u yóol tumen yaan u yilik «u yich u meyajoʼob» (Isaías 65:21-25).

Baʼaleʼ, le maʼ u luʼs Dios le baʼaxoʼob beetik k-muʼyajoʼ, ¿baʼax jeʼel k-beetik utiaʼal k-aktáantkoʼob yéetel utiaʼal k-kanáantikbaeʼ? Le Bibliaoʼ ku yaʼaliktoʼon: «Okes a wóol tiʼ Yuumtsil yéetel tuláakal a puksiʼikʼal maʼ a walab óoltik le naʼat yaan tiʼ techoʼ» (Proverbios 3:5). Bey túunoʼ unaj k-kaxtik u yáantaj yéetel u nuʼuktaj Dios. Yéetel unaj k-ilik beetik le baʼaxoʼob ku yaʼalik le Bibliaoʼ. Beyoʼ yaan k-chʼaʼatuklik k-beetik baʼaloʼob maʼalobtak yéetel maʼ kun jach antaltoʼon muʼyajiloʼob (Proverbios 22:3).