Le ken yanak le iikʼ t-contraoʼ

LE ka tu tsikbaltaj Marcos le talamiloʼob tu aktáantaj u disipuloʼob Jesús le tiaʼanoʼob tu kʼáaʼnáabil Galileaoʼ, tu yaʼaleʼ pʼáat «istikia u bisikoʼob le cheemoʼ, tumen le iikʼoʼ aktáan tiʼob u taal». Le tiaʼan Jesús tu jáal le kʼáaʼnáaboʼ tu yilaj le talamil ku máansik u disipuloʼoboʼ, ka túun bin xíimbalil yóokʼol le jaʼ tak ka kʼuch yiknaloʼoboʼ. Le ka naʼak ichil le cheemoʼ le iikʼoʼ jetsʼlaji (Marcos 6:48-51).

Marcoseʼ tu yaʼalaj xaneʼ utéenjeakeʼ, «taal jumpʼéel kʼaʼamkach iik». Jesús túuneʼ « tu kʼeyaj le iikʼoʼ [...] ka chʼéen túun le iikʼoʼ ka pʼáat tuláakal jach jejetsʼki» (Marcos 4:37-39).

Kex bejlaʼa maʼatech k-ilik u beetaʼal baʼaloʼob beyaʼ, láayliʼ yaʼab baʼaloʼob jeʼel k-kanik tiʼobeʼ. Tumen láaj kʼeban máakoʼon yéetel kuxaʼanoʼon tiʼ kʼiinoʼob tuʼux jach yaʼab u yúuchul baʼaloʼob kʼaastakeʼ, yaan kʼiineʼ k-aktáantik jujumpʼéel tiʼ le talamiloʼobaʼ (2 Timoteo 3:1-5). Yaan horaeʼ tumen jach nojoch le talamil k-aktáantikoʼ maʼ xaaneʼ jeʼel k-ilik bey upʼéel kʼaʼamkach iikʼ ku tsʼáaikuba t-contraeʼ. Baʼaleʼ yaan máax jeʼel u yáantkoʼoneʼ. Jesuseʼ ku yaʼalik: «Koʼoteneʼex tiʼ teen, tuláakaleʼex máaxeʼex kaʼananeʼex tiʼ a meyajeʼex yéetel aal a kuucheʼex, teen bíin in beet a jeʼeleʼex» (Mateo 11:28).

Kex jach yaʼab talamiloʼob k-máansik yaan horaeʼ, jeʼel u páajtal u yantaltoʼon jeetsʼelileʼ. ¿Bixi? Letiʼe ken k-tukult jach yaan u béeytal le baʼaxoʼob ku yaʼalik Jéeobaoʼ (ket yéetel Isaías 55:9-11; Filiposiloʼob 4:5-7).