Utúul taatatsil utiaʼal le máaxoʼob minaʼan u taataʼoboʼ
Ilawil a natsʼkaba tiʼ Dios
Utúul taatatsil utiaʼal le máaxoʼob minaʼan u taataʼoboʼ
J ÉEOBA «kajakbal ichil u [temploeʼ] letiʼ u taata le j-maʼ taataʼoboʼ» (Salmo 68:5). ¿Máasaʼ jach jatsʼuts baʼax ku yaʼalik le Biblia tu yoʼolal Jéeobaoʼ? Letiʼeʼ jach ku kanáantik yéetel ku yáantik le máaxoʼob ku mixbaʼalkúuntaʼaloʼoboʼ, ichil le máakoʼobaʼ tiaʼan le máaxoʼob kimen utúul tiʼ u taataʼoboʼ. Le Ley tu tsʼáaj tiʼ le israelitaʼoboʼ ku yeʼesik jach u yaabilmaj le máaxoʼob beyaʼ. Koʼox ilik baʼax ku yaʼalik Éxodo 22:22-24, tuʼux ku yáax chíikpajal le tʼaan «j-maʼ taataʼoboʼ».
Le Leyoʼ ku yaʼalik: «Maʼ a loobiltik le [...] j-maʼ taataʼoboʼ» (versículo 22). Yéetel le tʼaanoʼobaʼ Jéeobaeʼ maʼ táan kaʼach u kʼáatiktiʼob ka u yeʼesoʼob yaabilaj tiʼ le máaxoʼob minaʼan u taataʼoboʼ, baʼaxeʼ táan kaʼach u yaʼaliktiʼob ka u beetoʼob beyoʼ. Ken kíimik u taata le paalaloʼob kaʼachoʼ ku pʼáatal mix máak áantkoʼob yéetel mix máak kanáantikoʼob. Le oʼolaleʼ Dioseʼ tu yaʼaleʼ maʼ unaj kaʼach u «loobiltaʼaloʼobiʼ» wa jeʼex u yaʼalik uláakʼ Bibliaʼobeʼ «u beetaʼal u muʼyajoʼob» «u maltratartaʼaloʼob» wa «u beetaʼal u sen meyajoʼob». Koʼox ilik tak baʼax kun úuchul kaʼach wa maʼ u beetaʼal le baʼax tu yaʼalaj Diosaʼ.
Le Ley kaʼachoʼ ku yaʼalik xan: «Tumen wa ikil a loobiltikoʼob letiʼob ku kʼáatikoʼob teen áantajeʼ, teneʼ bíin xiʼiken utiaʼal in wáantoʼob» (Versículo 23). Teʼ versiculoaʼ Dioseʼ tu tʼanaj cada utúul tiʼ le máaxoʼob yanoʼob ichil le kaajoʼ. Lelaʼ ku yeʼeskeʼ tuláakal le máaxoʼob yanoʼob ichil le kaaj unaj u beetkoʼob kaʼach le baʼax tu yaʼalaj Diosaʼ. Ku yeʼesik xaneʼ Jéeobaeʼ ku yilik yéetel ku chʼenxikintik le máaxoʼob kimen utúul tiʼ u taataʼoboʼ (Salmo 10:14; Proverbios 23:10, 11).
¿Baʼax túun ku yúuchul wa ku maltratartaʼal utúul máax kimen u taata yéetel ku kʼáatik u yáantaj Jéeoba? Jéeobaeʼ ku yaʼalik: «Bíin túun in lukʼes a kuxtaleʼex yéetel talam pʼuʼujul, yéetel xan u yej máaskab» (Versículo 24). Upʼéel libroeʼ ku yaʼalikeʼ le tʼaanoʼob meyajnaj teʼ versiculoaʼ letiʼe tʼaanoʼob ku meyaj tiʼ máak ken jach pʼuʼujkoʼ yéetel wa ka suʼutuk jach jeʼex yanil ich hebreooʼ u kʼáat u yaʼaleʼ, «yaan u chokotal in niʼ». Tsʼoʼoleʼ le máax kun castigartik le máax ku loobiltik utúul máax minaʼan u taataeʼ, maʼ chéen utúul juez israelitaiʼ baʼaxeʼ, Dios (Deuteronomio 10:17, 18).
Jéeobaeʼ maʼatech u kʼexpajal u tuukul (Malaquías 3:6). Láayliʼ u yaabiltmaj le máaxoʼob minaʼan u taataʼoboʼ (Santiago 1:27). Le oʼolaleʼ maʼ unaj k-tuʼubsik lelaʼ: u maltratartaʼal le mejen paalaloʼob minaʼan u taataʼoboʼ ku beetik u pʼuʼujul Jéeoba, u Taata le máaxoʼob minaʼan u taataʼoboʼ. Le máaxoʼob maʼatech u yeʼeskoʼob yaabilaj tiʼ le mejen paalaloʼobaʼ maʼ kun púutsʼloʼob tiʼ «u pʼujaʼanil Yuumtsil» (Sofonías 2:2). Yaan u yilkoʼobeʼ jach «yaayaj baʼal u lúubul máak tu kʼab le kuxaʼan Jajal Diosoʼ» (Hebreob 10:31).