Baʼax jeʼel u yáantkoʼon k-naʼat le Bibliaoʼ

2. Maʼ chʼaʼik en cuentai le baʼaxoʼob maʼ maʼalobtak ku yaʼalaʼaloʼ

¿Tsʼoʼok wa a wuʼuyik u yúuchul tʼaan kʼaas tu yoʼolal utúul máax maʼ kʼaj óoliʼ? ¿Bix lúubik tech ka ta kʼaj óoltaj? Maʼ xaaneʼ yoʼolal le baʼax ta wuʼuyoʼ talamchaj a wilik le jatsʼuts modos yantiʼoʼ. Óoliʼ bey xan yúuchul tiʼ yaʼab máakoʼob yéetel le Bibliaoʼ.

LE APÓSTOL Pablooʼ u yojel kaʼach baʼax talamiloʼob jeʼel u taasik u xokik máak le Biblia wa tsʼoʼok u yaʼalaʼal baʼaloʼob maʼ jaajtak tiʼoʼ. Lelaʼ letiʼe baʼax úuch tiʼ jujuntúul judíoʼob teʼ yáax siglooʼ, le oʼolal ka tʼaanaj Pablo tu yoʼolaloʼobeʼ tu yaʼalaj: «Yantiʼob jumpʼéel nojoch kʼub óolal tiʼ Jajal Dios, chéen baʼaleʼ u kʼub óolaloʼobeʼ maʼ u chʼaʼamaj u muukʼ tiʼ jumpʼéel chúukaʼan kʼaj óolaliʼ» (Romailoʼob 10:2).

Yoʼolal le baʼaxoʼob maʼ maʼalobtak aʼalaʼabtiʼoboʼ, le Judíoʼoboʼ kex jach u yojloʼob baʼax ku yaʼalik le Kiliʼich Tsʼíiboʼob ich Hebreo yoʼolal le Mesíasoʼ maʼ tu kʼamoʼobiʼ. Kex tuláakal le profecíaʼob ku yeʼeskoʼob kaʼach Jesús letiʼe Mesíasoʼ, le baʼaxoʼob maʼ maʼalobtak aʼalaʼantiʼoboʼ le beet maʼ u yilkoʼob wa jaaj le baʼax ku yaʼalik le Bibliaoʼ.

¿Baʼax k-kanik tiʼ le baʼax úuchtiʼoboʼ? Ku kaʼansiktoʼoneʼ unaj k-xokik le Biblia utiaʼal k-ilik wa jaaj le baʼaxoʼob maʼ maʼalobtak ku yaʼalaʼal tu yoʼolaloʼ. K-beetik beyaʼ yaan u yáantkoʼon k-naʼat tubeel le baʼaxoʼob ku kaʼansikoʼ.

 Utúul profesor jach ku xokik baʼaloʼob yaan yil yéetel religión kajaʼan Carolina del Norteeʼ, (Estados Unidos) tu yaʼaleʼ le Bibliaoʼ «chéen máakoʼob tsʼíibteʼ yéetel tu tsʼíibtoʼob chéen baʼax ku tuklikoʼob, jujumpʼéel xan tiʼ le baʼaxoʼob ku yaʼalikoʼ ku bin tu contra u maasil baʼaxoʼob ku kaʼansikoʼ, yéetel le tsolnuʼukoʼob ku tsʼáaikoʼ maʼ tu yáantik máak». Baʼaleʼ wa k-ilik le Biblia bey upʼéel libro «chéen máakoʼob tsʼíibtoʼ», ¿máasaʼ chéen le baʼaxoʼob kun utstal t-tʼaan ken k-beetoʼ?

Baʼaleʼ le Bibliaoʼ ku yaʼaliktoʼon ka k-xakʼalxokt le baʼaxoʼob ku yaʼalik jeʼex tu beetil le bereailoʼob tu kʼiiniloʼob Pablooʼ. Letiʼobeʼ maʼ chéen tu jáan kʼamoʼob le maʼalob péektsil tsʼaʼabtiʼob tumen le yáax cristianoʼoboʼ, baʼaxeʼ jeʼex u yaʼalik le Bibliaoʼ ku «kaxtikoʼob sáamsamal tiʼ le Kiliʼich Tsʼíiboʼoboʼ utiaʼal u yilikoʼob wa jaaj baʼax ku yaʼalaʼal tiʼob» (Beetaʼanoʼob [Hechos] 17:11). Wa k-kʼáat naʼat tubeel le baʼax ku yaʼalik le Bibliaoʼ kʼaʼabéet k-beetik jeʼex le bereailoʼoboʼ. Le oʼolaleʼ utiaʼal k-naʼatik tubeel le baʼax ku yaʼalik le Bibliaoʼ unaj k-xokik utiaʼal k-ilik wa jaaj le baʼaxoʼob maʼ maʼalobtak ku yaʼalaʼal tu yoʼolaloʼ.