¿Jeʼel wa u páajtal k-naʼatik le Bibliaoʼ?

«Tin wotocheʼ suukaʼan kaʼach u xoʼokol le Biblia utiaʼal domingosoʼ. Kex in wojel tiʼ Dios u taaleʼ, maʼ jach utstintʼaan in xokikiʼ tumen yaʼab baʼaxoʼob maʼ tin naʼatik.» (Steven, kajaʼan Gran Bretaña)

«Le yanten 17 jaʼaboʼoboʼ káaj in xokik, baʼaleʼ tin wilaj jach talam u xoʼokol, le oʼolal tin pʼataj.» (Valvanera, kajaʼan España)

«Tumen catolicaeneʼ in wojel kaʼach kʼaʼabéet in láaj xokik le Biblia kex chéen utéen ichil in kuxtaloʼ. Óoxpʼéel jaʼaboʼob tu bisajten in láaj xokik baʼaleʼ kex beyoʼ maʼ tin naʼataj mix baʼaliʼ.» (Jo-Anne, kajaʼan Australia)

MINAʼAN uláakʼ libro jeʼex le Bibliaoʼ. Le libroaʼ jach yaʼab u koʼonol, jach tiʼ yaʼab máaxoʼob yaan, sutaʼan tiʼ yaʼab jejeláas tʼaanoʼob yéetel jejeláas bix jóoʼsaʼaniloʼob. Kex beyoʼ yaʼab máakoʼobeʼ talam u yilik u naʼatkoʼob baʼax ku yaʼalik. ¿Bey wa xan u yúuchultechoʼ?

Le máax beet u tsʼíibtaʼaloʼ, ¿maʼ wa u kʼáat kaʼach ka k-naʼatiʼ?

Táanil tiʼ k-núukikeʼ, kʼaʼabéet k-ojéeltik máax beet u tsʼíibtaʼal le Bibliaoʼ. Tiʼ 2 Timoteoeʼ 3:16 jach tʼáalkab u yaʼalik: «Tuláakal Kiliʼich Tsʼíibeʼ Jajal Dios tsʼáa tiʼ tuukul utiaʼal ka tsʼíibtaʼak». ¿U kʼáat wa Dios ka u naʼat tuláakal máak le baʼax kiaʼalik le Bibliaoʼ? ¿Wa tu beetaj utiaʼal ka naʼataʼak chéen tumen le máaxoʼob kaʼanchajaʼan u xookoʼob bey xan le ku nuʼuktajoʼob ichil le religionoʼoboʼ?

Le versiculoʼobaʼ yaan u núukikoʼob lelaʼ:

«Le nuʼukbeʼen tʼaan kin tsʼáaik teʼex bejlaʼaʼ, maʼ sen talam a tiaʼaleʼexiʼ, jeʼel u páajtal a tsʼoʼokbesikeʼexeʼ.» (Deuteronomio 30:11.)

«A tʼaanoʼobeʼ ku sáasilkunaj yéetel ku tsʼáaik u naʼat le máaxoʼob kabal u naʼatoʼoboʼ.» (Salmo 119:130.)

«Tiʼ le súutukoʼ sen kiʼimakchaj u yóol Jesús tu yoʼolal [espíritu santo] ka tu yaʼalaj: Kin kiʼikiʼtʼantikech in Taata, u Yuumtsil kaʼan yéetel luʼum, tumen le baʼaloʼob ta weʼesaj tiʼ le mejen paalaloʼoboʼ ta taʼakaj tiʼ le kaambalnajoʼob yéetel kaʼanal u naʼatoʼoboʼ.» (Lucas 10:21.)

Jeʼex túun k-ilkoʼ le máax beet u tsʼíibtaʼal le Bibliaoʼ u kʼáat ka k-naʼate. Baʼaleʼ, yaʼab máakoʼobeʼ kex ku beetkoʼob tuláakal le ku páajtaleʼ maʼ tu jach naʼatkoʼob. ¿Yaan wa túun baʼax jeʼel u yáantkoʼobeʼ? Yaan. Teʼ tuláakʼ xookoʼoboʼ yaan k-ilik óoxpʼéel baʼaxoʼob ken u yáantoʼon k-naʼat baʼax ku yaʼalik le Bibliaoʼ.