Yaan máaxoʼobeʼ taak u yojéeltkoʼob

¿Maʼalob wa u yilik Dios u yantal maas tiʼ utúul u núup máak?

U jaajileʼ maʼ. Teʼ tu jardinil Edenoʼ Jéeoba Dioseʼ tu yaʼalaj chéen utúul u yatan máak unaj u yantal. Ka máan kʼiineʼ Jesús xaneʼ bey tu yaʼalil tiʼ u disipuloʼob unaj u beetkoʼoboʼ (Génesis 2:18-24; Mateo 19:4-6).

Baʼaleʼ ¿baʼaxten túun anchaj máakoʼob jeʼex Abraham, Jacob, David yéetel Salomón anchaj maas tiʼ utúul u yatnoʼoboʼ? Táanil tiʼ k-ilik u núukil le kʼáatchiʼaʼ, koʼox ilik teʼ Biblia le talamiloʼob anchaj tiʼ Abraham yéetel Jacob úuchik u yantal maas tiʼ utúul u yatanoʼoboʼ (Génesis 16:1-4; 29:18–30:24). Koʼox ilik xan baʼax úuch tiʼ Salomón tumen maʼ tu beetaj le baʼax ku yaʼalik le Ley tsʼaʼab tiʼ Moisesaʼ: «Mix xan unaj u yantal yaʼab koʼoleloʼob tiʼ [le reyoʼ], tu yoʼolal maʼ u pʼatik in beel» (Deuteronomio 17:15, 17). Le Bibliaoʼ ku yaʼalikeʼ letiʼeʼ anchaj 700 u yatnoʼob. Lelaʼ le beet u xuʼulul u meyajtik Jéeoba (1 Reyes 11:1-4). Le baʼax ku yaʼalik le Bibliaaʼ ku yeʼesik yaʼab talamiloʼob ku taasik le u yantal yaʼab u núup máakoʼ.

Tu yoʼolal lelaʼ maʼ xaaneʼ jeʼel u tukultik máakeʼ ¿baʼaxten túun tu chaʼaj Dios u yantal maas tiʼ utúul u yatan le máaxoʼob meyajt úuchjeakiloʼ? Koʼox ketik beyaʼ: ¿máasaʼ yaan kʼiineʼ kex maʼ jatsʼuts k-ilik upʼéel meyajeʼ maʼatech k-jáan pʼatik? Óoliʼ bey xan tu beetil Jéeoba yéetel le máaxoʼob yaʼab u yatnoʼoboʼ. Kex maʼ t-jach naʼatik baʼaxteneʼ baʼaleʼ letiʼeʼ yaan baʼax oʼolal tu chaʼaj u beetaʼal leloʼ, tumen le bix u tuukul letiʼoʼ maas maʼalob (Isaías 55:8, 9). Koʼox ilik baʼaxten maʼ xaan tu chaʼaj u beetaʼaliʼ.

Kʼaʼajak toʼoneʼ tu jardinil Edeneʼ Dioseʼ tʼaanaj tiʼ upʼéel «chʼiʼibal» kun xuʼulsik tiʼ Satanás. Ka máan kʼiineʼ tu yaʼalaj xan tiʼ Abraham yaan u yaʼabtal u paalal yéetel tu chʼiʼibaleʼ tiʼ kun taal le chʼiʼibal aʼalaʼanoʼ (Génesis 3:15; 22:18). Satanaseʼ utiaʼal u yilik maʼ u béeytal le baʼax aʼalaʼanoʼ, joʼopʼ u yilik bix jeʼel u xuʼulsik tiʼ u kaajil Israeleʼ. Le baʼax taak u beetik kaʼachoʼ letiʼe u náachkuntik le Israelitaʼob tiʼ Jéeobaoʼ, le oʼolal yaʼab utéenal tu beetaj u lúubloʼob tiʼ kʼeban.

Utiaʼal u kanáantik maʼ u lúubul le israelitaʼob tiʼ baʼax kʼaasoʼ, Jéeobaeʼ mantatsʼ tu túuxtaj u profetaʼob utiaʼal áantkoʼob. Baʼaleʼ Jéeobaeʼ u yojel maʼ chéen chʼaʼabil u tsʼoʼokbeskoʼob tak le baʼaxoʼob maʼ jach talam jeʼex le maʼ u adorarkoʼob beetbil diosoʼoboʼ (Éxodo 32:9). Wa ku talamtal kaʼach u beetkoʼob lelaʼ, maas jeʼel u talamtal u yilkoʼob u yantal chéen utúul u yatnoʼobeʼ tumen lelaʼ maʼ upʼéel baʼal suukaʼan kaʼachiʼ. Tumen Jéeoba jach u yojel baʼax ku tuklik wíinikeʼ, tu yilaj maas maʼalob maʼ u jáan xuʼulsik tiʼ le baʼax suukaʼan u beetaʼalaʼ. Wa ka u xuʼuls kaʼacheʼ, chéen chʼaʼabil ken u yil Satanás u náachkuntik le israelitaʼob tiʼ Jéeobaoʼ.

Úuchik u chaʼik Jéeoba u yantal yaʼab u yatnoʼobeʼ yaan xan utsiloʼob tu taasaj. Yáaxeʼ béeychaj u séeb yaʼabtal le israelitaʼob utiaʼal u kanáantaʼal le chʼiʼibal tuʼux kun taal le Mesíasoʼ. Tsʼoʼoleʼ tiʼ talam kʼiinoʼob jeʼex ken úuchuk baʼateloʼoboʼ, ku tsʼáaik u páajtalil tiʼ le koʼoleloʼob u kanáantaloʼob tumen le xiiboʼoboʼ.

Jeʼex túun tsʼoʼok k-ilkoʼ maʼ Jéeoba tsʼáa ka yanak yaʼab u yatan máakiʼ. Yéetel kex tu chaʼaj u yúuchul lelaʼ tu tsʼáaj xan Leyoʼob utiaʼal maʼ u pʼaʼatal le atantsiloʼob chéen yoʼolal jeʼel baʼaxakoʼ (Éxodo 21:10, 11; Deuteronomio 21:15-17). Le ka tu chʼaʼa tuklaj Jéeoba u xuʼulsikeʼ, Jesuseʼ tu tsʼáaj u yojéelt le máaxoʼob meyajtikoʼ. Le ka tʼaanaj Jesús yoʼolal le tsʼoʼokol beeloʼ letiʼeʼ tu kʼaʼajsaj tiʼ u disipuloʼobeʼ chéen utúul u yatan máak unaj u yantal (Marcos 10:8). Kex áantajnaj le Ley tsʼaʼab tiʼ Moisés úuchjeakiloʼ, le ley tu tsʼáaj Cristooʼ maas maʼalob (Galaciailoʼob 6:2).