Yáax tuus: Yaan baʼax ku pʼáatal kuxaʼanil tiʼ máak ken kíimik

¿Bix úuchik u yantal le tuusaʼ? «Le yáax cristianoʼob káaj u kaʼanskoʼob baʼaloʼob maʼ jaajtakoʼ, ku creerkoʼob kaʼacheʼ yaan baʼax ku pʼáatal kuxaʼanil tiʼ máak ken kíimik jeʼex u kaʼansik le griegoʼoboʼ. Ku tuklikoʼobeʼ le kʼiin ku káajal u formar utúul chaambaleʼ, Dioseʼ ku tsʼáaik le alma tu wíinkliloʼ.» (The New Encyclopædia Britannica, 1988.)

¿Baʼax ku kaʼansik le Bibliaoʼ? «Le máax [wa le alma, NM] ku kʼebanchajleʼ letiʼ bíin kíimik.» (Ezequiel 18:4.)

Le Bibliaoʼ ku yeʼesik bix úuchik u beetik Dios le yáax wíinikoʼ: «Yuumtsil túuneʼ tu pataj wíinik yéetel luʼum, tu yustaj u niʼ ka tu tsʼáaj kuxtal tiʼ. Bey chúunik u kuxtal [wa kʼuch u beetuba almai le wíinikoʼ, NM]» (Génesis 2:7).

Le tʼaan ich hebreo néfesch, ku suʼutul almaoʼ, u kʼáat u yaʼaleʼ upʼéel «baʼax ku chʼaʼik yiikʼ». Le ka beetaʼab Adán tumen Dioseʼ maʼ tsʼaʼab ichil u wíinklil upʼéel baʼax ka pʼáatak kuxaʼanil ken kíimikiʼ, baʼaxeʼ tu tsʼáaj le muukʼ kʼaʼabéettiʼ utiaʼal u kuxtaloʼ, lelaʼ ku béeytal ikil u chʼaʼik u yiikʼ. Bey túunoʼ ken tʼaanak le Biblia tiʼ le almaoʼ táan u tʼaan tiʼ u kuxtal utúul wíinik. ¿Baʼax túun ku yúuchul tiʼ le alma wa ku lukʼul u muukʼil le kuxtal tiʼoʼ? Jeʼex tsʼoʼok k-ilkoʼ ku kíimil (Génesis 3:19; Ezequiel 18:20).

Le ka joʼopʼ u creertaʼal yaan baʼax ku pʼáatal kuxaʼanil tiʼ máak ken kíimikeʼ tu beetaj u yantal uláakʼ kʼáatchiʼob. ¿Tuʼux ku bin le alma ken kíimik máakoʼ? ¿Baʼax ku yúuchul tiʼ u alma le kʼasaʼan máakoʼoboʼ? Le baʼaloʼob jeʼelaʼ tu beetaj u creertaʼaleʼ, ken kíimik le kʼasaʼanoʼoboʼ ku castigartaʼaloʼob teʼ infiernooʼ.

Xok le tekstoʼobaʼ: Eclesiastés 3:19; Mateo 10:28, NM; Beetaʼanoʼob [Hechos] 3:23.

U JAAJIL:

Ken kíimik máakeʼ, mix baʼal ku pʼáatal kuxaʼanil tiʼ.