Jesucristo: maʼatech u tuʼubsaʼal u kaʼansaj

«Le baʼax eʼesik jach tu jaajil yanchaj utúul máak jach yaan u naʼat tu kaajil Capernaumoʼ, * es ke tak bejlaʼa ku kʼaʼajsaʼal tumen le máakoʼoboʼ.» (GREGG EASTERBROOK, ESCRITOR)

U YÉEYIK máak bix ken u yaʼalil upʼéel baʼaleʼ, jeʼel u kʼuchul tu puksiʼikʼal máakeʼ, jeʼel u tsʼáaik esperanzaeʼ yéetel jeʼel u beetik u kʼexik u kuxtal máakeʼ. Le baʼaxoʼob tu yaʼalaj Jesusoʼ tsʼoʼok u kʼexik u kuxtal yaʼab máakoʼob, lelaʼ upʼéel baʼax mix máak uláakʼ u beete. Utúul máax tu yuʼubaj u kaʼansajiloʼob le Sermón del Monte tu tsʼáaj Jesusoʼ, ka máan kʼiineʼ tu tsʼíibtaj: «Le ka tsʼoʼok u tʼaan Jesuseʼ, le máakoʼoboʼ jakʼaʼan u yóoloʼob tu yoʼolal u kaʼansaj» (Mateo 7:28).

Teʼ kʼiinoʼobaʼ, yaʼab máakoʼob jach u kʼaj óoloʼob le baʼaxoʼob tu kaʼansaj Jesusoʼ. Koʼox ilik jujumpʼéel tiʼ le baʼaxoʼob tu kaʼansoʼ:

«Maʼ tu páajtal a meyajtikeʼex Jajal Dios wa táan a meyajtikeʼex le taakʼinoʼ.» (Mateo 6:24.)

«Beeteʼex mantatsʼ tiʼ uláakʼ máakoʼob le baʼax a kʼáateʼex ka u beetoʼob tiʼ teʼexoʼ.» (Mateo 7:12.)

«Tsʼaʼex túun tiʼ César baʼax utiaʼal César, tsʼaʼex xan tiʼ Yuum Jajal Dios baʼax utiaʼal Jajal Dios.» (Mateo 22:21.)

«Yaan [maas] kiʼimak óolal u tsʼaʼabal wa baʼax tiʼ u kʼaʼamal wa baʼax.» (Beetaʼanoʼob [Hechos] 20:35.)

Baʼaleʼ le baʼaxoʼob tu kaʼansoʼ maʼ chéen tu yaʼalaj utiaʼal u kʼaʼajsaʼaliʼ. Baʼaxeʼ le baʼax tu yaʼaloʼ tiʼ Dios u taal, ku beetik u yantal u biilal u kuxtal máak yéetel ku kaʼansik baʼax ken u beet u Reino Dios utiaʼal u xuʼulsik le muʼyajiloʼ. Teʼ tuláakʼ xookoʼoboʼ yaan k-ilik jujumpʼéel tiʼ le baʼaxoʼob tu kaʼansaj Jesusoʼ yéetel baʼaxten «tak bejlaʼa ku kʼaʼajsaʼal tumen le máakoʼoboʼ».

[Tsolajiloʼob]