Le baʼaxoʼob tu kaʼansaj Jesús yoʼolal u Reino Diosoʼ

«Jesuseʼ máan tiʼ yaʼabkach kaajoʼob yéetel tiʼ mejen kajtaliloʼob, [...] táan u tsʼáaik kʼaj óoltbil u [reino] Jajal Dios.» (LUCAS 8:1)

UTÉENJEAKILEʼ Jesuseʼ tu yaʼalaj: «Tiʼ u chiʼ máak ku jóokʼol tuláakal baʼax yaan tu puksiʼikʼal» (Mateo 12:34). Le baʼax tu yaʼalaj Jesusaʼ upʼéel baʼal jach jaaj, tumen wa yaan baʼax jach jatsʼuts k-ilkeʼ mantatsʼ táan k-tʼaan tu yoʼolal. Le baʼaxoʼob tu tsikbaltaj Jesús ka taal way Luʼumeʼ tu yeʼeseʼ jach kʼaʼanan u yilik u tʼaan tiʼ u Reino Dios.

¿Baʼax u Reino Dios? Upʼéel gobierno tsʼaʼan tumen Dios yéetel yaan utúul rey nuʼuktik. Le Reinoaʼ letiʼe baʼax maas tu kʼaʼaytaj Jesusoʼ lelaʼ k-aʼalik tumen maas tiʼ ciento diez utéenel ku chíikpajal teʼ kampʼéel Evangelioʼoboʼ. ¿Bix jeʼel u páajtal k-maas kaambal tiʼ le Reino yéetel tiʼ le baʼax ken u beet t-oʼolaloʼ? Letiʼe ken k-xok le baʼaxoʼob tu beetaj yéetel tu yaʼaloʼ.

¿Máax u reyil u Reino Dios? Maʼ wíinikoʼob yéeyiʼ, baʼaxeʼ Dios yéeymil. Yéetel Jesuseʼ tu yaʼaleʼ letiʼ yéeyaʼan tumen Dios utiaʼal ka u beet u reyil.

Jesuseʼ u yojel kaʼacheʼ le Bibliaoʼ tsʼokaʼaniliʼ u yaʼalik le Mesías aʼalaʼan u taaloʼ, letiʼ ken u beet u reyil upʼéel Reino minaʼan xuʼulul tiʼ (2 Samuel 7:12-14; Daniel 7:13, 14; Mateo 26:63, 64). Bey túunoʼ le ka tu yaʼalaj letiʼ le Mesías aʼalaʼan kun taaloʼ tu yeʼesaj letiʼ le rey yéeyaʼan tumen Diosoʼ (Juan 4:25, 26). Le oʼolaleʼ yaʼab utéenel tu yaʼalaj le tʼaan «in [reinooʼ]» (Juan 18:36).

Jesuseʼ tʼaanaj xan tiʼ u jaats máakoʼob kun reinaroʼob tu yéetel (Lucas 22:28-30). Tumen maʼ yaʼaboʼobeʼ Jesuseʼ tu yaʼaleʼ u «chan muchʼ taman[oʼob]», yéetel tu yaʼalajtiʼob: «Le Taataoʼ tu yóoltaj u tsʼáateʼex le [reinooʼ]» (Lucas 12:32, LTN). U libroi Apocalipsiseʼ ku yaʼalikeʼ tuláakal le máaxoʼob kun gobernaroʼob yéetel Jesusoʼ 144,000 utúulaloʼob (Apocalipsis 5:9, 10; 14:1).

¿Tuʼux yaan le Reinooʼ? Le ka tʼaanaj yéetel Poncio Pilatoeʼ, Jesuseʼ tu yaʼalaj: «In [reinoeʼ] maʼ yóokʼol kabiliʼ» (Juan 18:36). Jeʼex k-ilkoʼ u Reino Dioseʼ maʼ kun gobernartbil tumen wíinikoʼob. Le Reinoaʼ teʼ kaʼan kun antaloʼ le oʼolal Jesuseʼ yaʼab utéenel tu yaʼaleʼ, «u [reinoi] kaʼan» (Mateo 4:17; 5:3, 10, 19, 20). *

Jesuseʼ u yojel kaʼacheʼ ken u tsʼoʼokbes le meyaj túuxtaʼab u beet way Luʼumeʼ yaan u suut teʼ kaʼanoʼ. Tiʼ ken u preparart upʼéel kúuchil utiaʼal le máaxoʼob kun bin kaʼan gobernar tu yéeteloʼ (Juan 14:2, 3).

 ¿Baʼax ken u béeykunt le Reinooʼ? Ka tu kaʼansaj u disipuloʼob orareʼ tu yaʼalaj: «Taalak a [reino]. Beetaʼak baʼax a kʼáat way luʼumeʼ jeʼel bix u beetaʼal teʼ kaʼanoʼ» (Mateo 6:9, 10). Le baʼax u tukulmaj Dios u beetikoʼ táan u béeytal teʼ kaʼanoʼ, yéetel le Reinooʼ letiʼe baʼax kun meyaj xan utiaʼal u béeykuntik way Luʼumeʼ. Baʼaleʼ utiaʼal u béeytal lelaʼ yaʼab baʼaloʼob kun kʼexpajal way Luʼumeʼ.

¿Baʼaxoʼob kun luʼsbil way Luʼumeʼ? Jeʼex tu yaʼalil Jesusoʼ u Reino Dioseʼ yaan u xuʼulsik tuláakal le baʼax kʼaasoʼ. ¿Bix ken u beetil? Yaan u xuʼulsik tiʼ tuláakal le máaxoʼob kʼasaʼanoʼoboʼ (Mateo 25:31-34, 46). Bey kun xuʼulul tiʼ le kʼasaʼaniloʼ. Jeʼex tu kaʼansil Jesusoʼ chéen yaan u pʼáatal máaxoʼob «kabal u yóol u puksiʼikʼaloʼob», utsoʼob, ku chʼaʼikoʼob óotsilil, «sak u puksiʼikʼaloʼob» yéetel maʼatech u baʼateloʼob (Mateo 5:5-9).

Jeʼex tu yaʼalil Jesuseʼ u Reino Dioseʼ yaan u beetik k-kajtal tiʼ upʼéel kúuchil jach jatsʼuts tuʼux maʼ kun antal máaxoʼob kʼaskúuntik. Le tiaʼan Jesús teʼ cheʼ táan u muʼyajoʼ, aʼalaʼab tiʼ tumen le máak tsʼaʼan tu tséel le tʼaanoʼobaʼ: «Kʼaʼajsen le ken okokech ta reino». Letiʼeʼ tu núukajtiʼ: «Bejlaʼeʼ tu jaajil kin waʼaliktech: Yaan a wantal tin wéetel teʼ Paraísooʼ» (Lucas 23:42, 43, NM). Jeʼex k-ilkoʼ u Reino Dioseʼ yaan u sutik le Luʼum paraísoi jeʼex le yaan kaʼach tu jardinil Edenoʼ.

¿Baʼax uláakʼ ken u beet tu yoʼolal le wíinikoʼoboʼ? Jesuseʼ maʼ chéen tu yaʼalaj baʼaxoʼob ken u beet u Reino Diosiʼ, baʼaxeʼ tu yeʼesaj. Letiʼeʼ tu tsʼakaj yaʼab máaxoʼob kʼojaʼanoʼob, yéetel leloʼ tu yeʼesaj le baʼaxoʼob ken u beet ken joʼopʼok u reinaroʼ. Jeʼex tu yaʼalil Mateoeʼ, «Jesuseʼ tu xíimbaltaj tuláakal u luʼumil Galilea, táan u kaʼambesaj tiʼ u sinagogailoʼob. Táan u tseʼektik u maʼalob péektsilil u [reino] Jajal Dios, táan xan  u tsʼakik tuláakal kʼojaʼaniloʼob yéetel kʼiʼinamil yaan tiʼ le máakoʼoboʼ» (Mateo 4:23).

Jesuseʼ tu tsʼakaj jejeláas kʼojaʼaniloʼob. Jeʼex utéenjeakeʼ, tu beetaj u paakat utúul máak chʼóop desde ka síiji (Juan 9:1-7, 32, 33). Uláakʼ utéeneʼ chéen úuchik u machik utúul máakeʼ tu tsʼakaj le lepra yaan kaʼach tiʼoʼ (Marcos 1:40-42). Yéetel ka «taasaʼab tu yiknal Jesús juntúul máak kóok yéetel too[teʼ]» tu yeʼesaj jeʼel u páajtal u beetik u «yuʼubaj le kóokoʼoboʼ yéetel u tʼaan le tootoʼoboʼ» (Marcos 7:31-37).

Le Rey yéeyaʼan tumen Diosoʼ, béeychaj tak u kuxkíintik le máaxoʼob kimenoʼoboʼ. Le Bibliaoʼ ku tʼaan tiʼ óoxtúul máakoʼob kaʼa kuxkíintaʼaboʼob tumen Jesús: u hijo utúul koʼolel kimen u yíicham, utúul chan chʼúupal yaan doce jaʼaboʼob tiʼ yéetel Lázaro, u amigo (Lucas 7:11-15; 8:41-55; Juan 11:38-44).

Jesuseʼ tu yeʼesaj tiʼ le apóstol Juan le baʼaxoʼob ken u tsʼáa tiʼ le máaxoʼob kun antaloʼob yáanal u Reino Diosoʼ: «Ile, Jajal Dios kajakbal bejlaʼeʼ ichil máakoʼob. Yaan u kajtal tu yéeteloʼob, letiʼobeʼ u kaajaloʼob Jajal Dios, Jajal Dioseʼ yaan u yantal tu yéeteloʼob utiaʼal u [Diosintkoʼob]. Jajal Dios kun choʼik tuláakal u jaʼil u yichoʼob, maʼ túun yantal kíimil, mix okʼol, mix yaj óolal, mix kʼiʼinamil, tumen tuláakal baʼax yaan kaʼacheʼ tsʼoʼok u máan» (Apocalipsis 1:1; 21:3, 4). ¿Máasaʼ jach ku kiʼimakkúuntik k-óol k-ojéeltik maʼ kun xáantaleʼ yaan u xuʼulsaʼal tiʼ le muʼyajil yéetel tiʼ le kíimiloʼ? Ken kʼuchuk le kʼiin jeʼeloʼ yaan u béeytal le baʼax k-kʼáatik ken orarnakoʼonoʼ: yaan u béeytal le baʼax u kʼáat Dios teʼ Luʼumaʼ jeʼex u yúuchul teʼ kaʼanoʼ.

¿Baʼax kʼiin ken taalak? Jesuseʼ tu yaʼaleʼ yaan u yúuchul u jaats baʼaloʼob kun chíikbesik tsʼoʼok u tsʼaʼabal utiaʼal reinar. ¿Baʼax kʼiin ken káajak lelaʼ? Letiʼeʼ tu yaʼalaj upʼéel profecía kun áantkoʼon k-ojéelte: tiʼ tuláakal yóokʼol kaabeʼ yaan u yúuchul nukuch looboʼob, jeʼex baʼateltáambaloʼob, wiʼijiloʼob, u tíitkuba luʼum, kʼojaʼaniloʼob yéetel jach yaan u yantal máakoʼob kʼasaʼantakoʼob (Mateo 24:3, 7-12; Lucas 21:10, 11). Le baʼaloʼob tu yaʼalaj Jesusoʼ káaj u yilaʼaloʼob tu jaʼabil 1914, le jaʼab xan ka anchaj le yáax Nojoch Baʼateltáambaloʼ (I Guerra Mundial). ¿Baʼax ku yeʼesik lelaʼ? Ku yeʼesikeʼ Jesuseʼ táan u beetik u Reyil teʼ kaʼanoʼ. Le oʼolaleʼ jach maʼ kun xáantal ken taalak u Reino Dios yéetel ken béeychajak le baʼax u tukulmaj utiaʼal le Luʼumaʼ. *

Baʼaleʼ ¿baʼax yaan yil u Reino Dios yéetel u kuxtal cada utúul tiʼ toʼon? Leloʼ yaan baʼax yil yéetel bix k-kʼamik u kaʼansajoʼob Jesús.

[Tsolajiloʼob]