U Kaʼansajoʼob Jesús

Le religión ku kaʼansik u jaajiloʼ

¿Ku kʼamik wa Dios tuláakal religión?

▪ Jesuseʼ ku yaatal u yóol u yilik kaʼach bix u tuʼusul le máakoʼob tumen le escribaʼob yéetel le fariseoʼoboʼ. Le oʼolal tu yaʼalaj tiʼ u disipuloʼob ka u kanáantubaʼob «tiʼ le tuus máakoʼob [...] ku taaloʼob [...] jeʼel bix tamanoʼobeʼ, baʼaleʼ tu puksiʼikʼaloʼobeʼ beyoʼob chakmoʼoleʼ» (Mateo 7:15). Yaʼab máakoʼob u yojloʼobeʼ yaʼab religionoʼob tsʼoʼok u táakpajal tiʼ u beetaʼal baʼaloʼob kʼaastak.

Tiʼ upʼéel oración tu beetaj Jesús tiʼ Dioseʼ tu yaʼalaj: «A maʼalob péektsileʼ letiʼ le jaajoʼ» (Juan 17:17). Bey túunoʼ Dioseʼ maʼatech u kʼamik mix upʼéel religión ku kaʼansik baʼaloʼob minaʼan teʼ Bibliaoʼ. Yoʼolal lelaʼ Jesuseʼ tu yaʼalaj tiʼ le escribaʼob yéetel le fariseoʼob le baʼax tu yaʼalaj Diosaʼ: «Chéen kunel u [adorarkenoʼob], tumen u kaʼansajoʼobeʼ chéen u kaʼansaj máakoʼob» (Mateo 15:9).

¿Yaan wa upʼéel religión kaʼansik u jaajil?

▪ Le ka tsikbalnaj Jesús yéetel utúul samaritanaeʼ tu yaʼalajtiʼ: «Maʼ a wojeleʼex baʼax ka [adorarkeʼexiʼ]». Tumen u yojel maʼatan u kaʼansaʼal u jaajil tiʼ le samaritanoʼoboʼ, tu yaʼalajtiʼeʼ yaan u kʼuchul u kʼiinil u adorartaʼal «le Taataoʼ tiʼ [espíritu] yéetel tiʼ jaaj, tumen le máaxoʼob jach tu jaajil yóoloʼob ku [adorarkoʼoboʼ]. Le Taata xanoʼ bey u kʼáat ka u beet le máaxoʼob [adorartikoʼ]» (Juan 4:22, 23). Bey túunoʼ wa yaan máaxoʼob adorartik Dios tu jaajileʼ, u kʼáat u yaʼaleʼ yaan upʼéel religión kaʼansik u jaajil.

Le religionaʼ letiʼe tu kaʼansaj Jesusoʼ. Letiʼeʼ tu yaʼalaj: «Teneʼ maʼ tin beetik mix baʼal chéen tu juunal in wóolal. Baʼaleʼ kin waʼalik chéen le baʼax tu kaʼansajten le Taataoʼ» (Juan 8:28). Tu yaʼalaj xan: «Teen le bejoʼ, teen le jaajoʼ yéetel teen le kuxtaloʼ. Chéen tin woʼolaleʼ ku páajtal u taal máak tiʼ le Taataoʼ» (Juan 14:6). Le oʼolaleʼ wa chéen upʼéel bej natsʼik máak tiʼ Dioseʼ, u kʼáat u yaʼaleʼ chéen upʼéel religión kaʼansik u jaajil.

 ¿Bix jeʼel k-kʼaj óoltik u jaajil religioneʼ?

▪ Le máaxoʼob yanoʼob ichil le jaajil religionoʼ ku beetkoʼob le kampʼéel baʼaxoʼob tu beetaj Jesusaʼ.

1. Jesuseʼ tu yaʼalaj tiʼ Jéeoba: «Tin tsʼáaj u yojéeltoʼob máaxech» (Juan 17:26). Le máaxoʼob yanoʼob ichil le jaajil religionoʼ ku meyajtiʼob u kʼaabaʼ Dios.

2. Jesuseʼ tu kʼaʼaytaj u Reino Dios yéetel tu yaʼalaj tiʼ u disipuloʼob ka u kʼaʼaytoʼob xan joonaj joonai. Tu yaʼalajtiʼob: «Le ken kʼuchukeʼex tiʼ jumpʼéel kaaj wa tiʼ jumpʼéel kajtalileʼ, kaxteʼex teʼeloʼ juntúul máak ku náajmatik a wantaleʼex tu yotoch». Ka máan kʼiineʼ tu yaʼalaj xan: «Xeeneʼex túun tiʼ u kajnáaliloʼob tuláakal kaajoʼobeʼ ka a beeteʼexoʼob j-kaambaloʼob» (Mateo 10:7, 11; 28:19). Bejlaʼeʼ le máaxoʼob yanoʼob ichil le jaajil religionoʼ láayliʼ ku kʼaʼaytikoʼob u Reino Dioseʼ.

3. Jesuseʼ maʼ tu yoksuba ich politicaiʼ. U disipuloʼobeʼ bey xan tu beetiloʼoboʼ le oʼolal tu yaʼalaj: «Maʼ yóokʼol kabiloʼobiʼ jeʼel bix teen maʼ yóokʼol kaabileneʼ» (Juan 17:14). Le oʼolaleʼ le máaxoʼob yanoʼob ichil le religión kaʼansik u jaajiloʼ maʼ unaj u yokskubaʼob tiʼ politicaiʼ.

4. Jesuseʼ yaʼab baʼaloʼob tu beetaj tu yoʼolal u yaabilaj. Tu yaʼalaj tiʼ u disipuloʼob: «Wa ka yaabiltkabaʼex ta baatsileʼexeʼ tuláakal yóokʼol kaab kun u kʼaj óolteʼexeʼ in j-kaambaleʼex» (Juan 13:35). Lelaʼ u kʼáat u yaʼaleʼ le máaxoʼob yanoʼob ichil le religión kaʼansik u jaajiloʼ u yaabiltmubaʼob yéetel maʼatech u táakpajloʼob tiʼ baʼateltáambaloʼob.

¿Baʼax utsiloʼob ku taasik u yantal máak ichil le jaajil religionoʼ?

▪ Yáax kʼaʼabéet u kʼaj óoltik máak Dios utiaʼal u yantal ichil le religión kaʼansik u jaajiloʼ. U beetik máak beyaʼ ku yáantaj utiaʼal u maʼalobkíintik u kuxtal yéetel u maas yaabiltik Jéeoba. Yéetel Jéeobaeʼ ku yaʼalik u tsʼáaik kuxtal minaʼan u xuul tiʼ le máaxoʼob yaabiltikoʼ. Tak Jesuseʼ bey tu yaʼalil yéetel le tʼaanoʼobaʼ: «Le kuxtal minaʼan u xuuloʼ letiʼ lelaʼ: ka u kʼaj óoltoʼob teech chéen juntúuliliʼ Jajal Dios» (Juan 17:3).

Utiaʼal a wojéeltik u maasileʼ ilawil u quince xookil le libroaʼ ¿Baʼax jach tu jaajil ku kaʼansik le Bibliaoʼ?, beetaʼan tumen u j-jaajkunajoʼob Jéeoba.

[U tsolajil le oochel teʼ táan juʼun 16]

«Kanáantabaʼex tiʼ le tuus máakoʼob [...] ku taaloʼob tiʼ teʼex jeʼel bix tamanoʼobeʼ, baʼaleʼ tu puksiʼikʼaloʼobeʼ beyoʼob chakmoʼoleʼ.» (Mateo 7:15)