Le oracionoʼ

2 ¿Tiʼ máax unaj k-orar?

TEʼ KʼIINOʼOBAʼ yaʼab máak tuklikeʼ tiʼ jeʼel máaxak jeʼel u páajtal u orareʼ, tumen tuláakal le oracionoʼoboʼ ku kʼuchul tu yiknal Dios. Lelaʼ letiʼe baʼax ku yaʼalik le máaxoʼob ku tuklikoʼob tuláakal le religionoʼob maʼalobtak tu táan Diosoʼ. Baʼaleʼ ¿jaaj wa lelaʼ?

U jaajileʼ le Bibliaoʼ ku yaʼalikeʼ yaʼab tiʼ le oracionoʼoboʼ maʼatech u beetaʼal tiʼ máax unaj. Úuchjeak, le ka tsʼíibtaʼab le Bibliaoʼ, suuk u orar máak tiʼ imagenoʼob. Baʼaleʼ Dioseʼ yaʼab u téenel tu yaʼalaj tiʼ u kaajal maʼ u beetik. Teʼ Salmo 115:4-6, ku yaʼalikeʼ le imagenoʼoboʼ «yaan u xiknoʼob, pero maʼ tu páajtal u yuʼubikoʼob mix baʼal». Lelaʼ ku yeʼesik junpʼéel baʼal jach jaaj, maʼ tu páajtal u orar máak tiʼ juntúul dios maʼ tu yuʼubik mix baʼal.

Koʼox ilik junpʼéel baʼal ku yaʼalik le Biblia yoʼolal Elíasoʼ. Letiʼeʼ juntúul profeta jach chúukpaj u yóol, tu múul chʼaʼtuklaj yéetel u profetaʼob Baal u beetkoʼob lelaʼ: cada juntúuleʼ yaan kaʼach u orar tiʼ u dios yéetel le dios kun núukikeʼ, letiʼ u jaajil. U profetaʼob Baaleʼ tu beetoʼob le baʼax tu chʼaʼtukloʼoboʼ ka káaj u oraroʼob. Xáanchaj táan u oraroʼob baʼaleʼ maʼ núukaʼabtiʼobiʼ. Le Bibliaoʼ ku yaʼalik: «Mix junpʼéel voz uʼuyaʼabi, mix máak núuktiʼob. Mix máak beet u cuentailoʼob» (1 Reyes 18:29). ¿Bey wa xan úuch tiʼ Elíasoʼ?

Maʼatech, tumen chéen pʼelak tsʼoʼokik u orareʼ, Dioseʼ tu beetaj u yéemel kʼáakʼ teʼ kaʼanoʼ ka eel le siibal tu tsʼáaj Elíasoʼ. ¿Baʼax u jelaʼanil le oración tu beetoʼ? Lelaʼ ku chíikpajal tu tsʼíibil 1 Reyes 18:36, 37. Kex ich hebreo chéen óoliʼ treinta tʼaanoʼob yaantiʼ le oracionaʼ, óoxtéen tu chʼaʼchiʼitaj u kʼaabaʼ Dios: Jéeoba.

¿Baʼaxten maʼalob le bix úuchik u oraroʼ? Kʼaʼajaktoʼoneʼ Baaleʼ (u kʼáat u yaʼal «yuumil» wa «tsʼuulil») u kʼaabaʼ u dios le cananeoʼoboʼ, yéetel jejeláas bix kʼaj óolaʼanil kaʼachi. Baʼaleʼ le kʼaabaʼ Jéeobaoʼ, chéen letiʼe ku meyaj utiaʼal u chʼaʼchiʼitaʼaloʼ. Jéeobaeʼ tu yaʼalaj: «Teneʼ Jéeobaen, letiʼe in kʼaabaʼoʼ. Tiʼ mix máak ken in chaʼa u tsʼaʼabal le adoración unaj u tsʼaʼabaltenoʼ» (Isaías 42:8).

Jeʼex k-ilkoʼ, ¿jeʼel wa u páajtal u yaʼalaʼal chéen tiʼ juntúuliliʼ dios orarnaj Elías yéetel u profetaʼob Baaleʼ? Maʼ. Le adoración ku tsʼaʼabal tiʼ Baaloʼ táakaʼan u tóokaʼal máakoʼob bey xan u beetaʼal kʼaakʼas baʼaloʼob yaan yil yéetel u múul chital juntúul xiib yéetel juntúul koʼolel. Le baʼaloʼobaʼ ku beetik kaʼach u kʼastal u tuukuloʼob yéetel ku mixbaʼalkúuntkoʼob. Baʼaleʼ le adoración ku tsʼaʼabal kaʼach tiʼ Jéeobaoʼ jach limpio yéetel maʼatech u obligartik máak u beet baʼax kʼaas. Lelaʼ ku yeʼesikeʼ le oracionoʼob ku beetaʼal tiʼ Jéeobaoʼ maʼ tu páajtal u núukaʼal tumen Baal. Lelaʼ bey jeʼex ka a túuxt junpʼéel carta tiʼ juntúul a amigoeʼ, baʼaleʼ ku kʼuchul tiʼ juntúul máax yaanal bix u kʼaabaʼ yéetel jach kʼasaʼan.

 Le máaxoʼob ku oraroʼob tiʼ Jéeobaoʼ, táan u beetkoʼob tiʼ le Máax beet tuláakal baʼaloʼ yéetel tiʼ u Taata tuláakal wíinik. * Le profeta Isaíasoʼ tu yaʼalaj juntéenjeak ich oración: «Jéeoba Dios, teech k-Taataech» (Isaías 63:​16). Tiʼ letiʼ xan ku tʼaan Jesús ka tu yaʼalaj tiʼ u disipuloʼob: «Teneʼ yaan in bin tu yiknal in Taata, letiʼeʼ a Taataʼex xan, in Dios yéetel a Dioseʼex xan» (Juan 20:17). Bey túunoʼ wa Jéeoba u Taata Jesuseʼ, tiʼ letiʼ xan orarnaji yéetel tiʼ letiʼ xan unaj kaʼach u orar u disipuloʼob (Mateo 6:9).

Baʼaleʼ ¿ku yaʼalik wa le Biblia ka orarnak máak tiʼ Jesús, tiʼ María, tiʼ le santoʼob wa tiʼ le angeloʼoboʼ? Maʼatech, chéen unaj u orar máak tiʼ Jéeoba. Koʼox ilik kaʼapʼéel baʼax eʼesik. Yáaxeʼ, tumen le oracionoʼ junpʼéel bix u adorartaʼal Dios, yéetel jeʼex u yaʼalik le Bibliaoʼ chéen unaj k-adorartik Jéeoba (Éxodo 20:5). U kaʼapʼéeleʼ, tumen chéen letiʼ uʼuyik le oracionoʼoboʼ (Salmo 65:2). Kex yaan tiʼ máaxoʼob tsʼoʼok u tsʼáaik jejeláas meyajoʼobeʼ, yaan junpʼéel maʼ u tsʼáa tiʼ mix máakiʼ: le u yuʼubik le oracionoʼoboʼ.

Bey túunoʼ utiaʼal ka uʼuyaʼak k-oración tumen Jéeobaeʼ, tiʼ letiʼ unaj k-orar. Le Bibliaoʼ ku yaʼalik: «Tuláakal máax kun chʼaʼchiʼitik u kʼaabaʼ Jéeobaeʼ yaan u salvartaʼal» (Hechos 2:21). ¿U kʼáat wa túun u yaʼal ku yuʼubik tuláakal le oracionoʼob tuʼux ku chʼaʼchiʼitaʼal u kʼaabaʼoʼ? ¿Wa yaan uláakʼ baʼax kʼaʼabéet?

[Tsolajil]

[U tsolajil le oochel teʼ táan juʼun 5]

Jeʼex tu yeʼesil Elíasoʼ, maʼ tuláakal le oracionoʼob ku yuʼubik Diosoʼ