Le oracionoʼ

5 ¿Baʼax hora yéetel tuʼux unaj k-orar?

ÓOLIʼ tuláakal le religionoʼob jach kʼaj óolaʼanoʼoboʼ ku yaʼalikoʼob u yorail yéetel tuʼux unaj u orar máak. Baʼaleʼ ¿bey wa u yaʼalik le Biblia unaj u beetaʼaloʼ?

Le Bibliaoʼ ku yaʼalik baʼax súutukiloʼob maʼalob ka orarnak máak. Juntéenjeakeʼ Jesuseʼ orarnaj táanil tiʼ u janal (Lucas 22:17). U disipuloʼobeʼ ku oraroʼob xan cada ken u muchʼubaʼob u adorartoʼob Dios. Baʼaleʼ lelaʼ desde úuch káajak u beetaʼal. Tumen tsʼokaʼaniliʼ kaʼach u káajal u beetaʼal tu sinagoga le judíoʼoboʼ bey xan tu temploil Jerusalén, le temploaʼ u kʼáat Dios ka kʼaj óoltaʼak kaʼach bey «u najil [oración] utiaʼal tuláakal kaajoʼob» (Marcos 11:17).

Dioseʼ uts tu tʼaan u yilik u muchʼtal le máaxoʼob meyajtik utiaʼal u múul oraroʼob jeʼex u yaʼalik le Bibliaoʼ. Le oracionoʼ jeʼel u péekskoʼon k-beet junpʼéel baʼax talam k-ilkeʼ (Hebreos 13:18, 19). Le oʼolal u j-jaajkunajoʼob Jéeobaeʼ (testigos de Jehová) ku oraroʼob tiʼ tuláakal le muchʼtáambaloʼob ku yantaltiʼoboʼ. Wa a kʼáat a wuʼuy u oracionoʼobeʼ, jeʼel u páajtal a bin teʼ Najil Reino tuʼux ku muchʼkubaʼoboʼ.

Baʼaleʼ le Bibliaoʼ maʼatech u yaʼalik wa chéen tiʼ junpʼéeliliʼ hora wa tiʼ junpʼéeliliʼ tuʼux unaj k-orar. Baʼaxeʼ ku yaʼalikeʼ le máaxoʼob meyajt Dios úuchjeakiloʼ orarnajoʼob tiʼ jejeláas súutukiloʼob yéetel jejeláas tuʼuxoʼob. Jesuseʼ tu yaʼalaj: «Kéen orarnakecheʼ, ooken chéen ta juunal ta cuarto, kéen tsʼoʼokok a kʼalik le joonajoʼ orarnen tiʼ a Taata yaan teʼ kaʼanoʼ. A Taata túun ku páajtal u yilik tuláakal baʼaleʼ yaan u boʼotiktech» (Mateo 6:6).

¿Máasaʼ ku taasiktoʼon kiʼimak óolal k-ojéeltik jeʼel u yuʼubaʼal k-oracionoʼob tumen Dios, jeʼel baʼaxak hora yéetel jeʼel tuʼuxak ka yanakoʼoneʼ? Jesuseʼ mantatsʼ tu kaxtaj u súutukil utiaʼal u orar tu juunal. juntéenjeakeʼ táanil tiʼ u chʼaʼtuklik u beetik junpʼéel baʼal jach kʼaʼanaʼaneʼ tu máansaj junpʼéel túulis áakʼab táan u orar (Lucas 6:12, 13).

Baʼaleʼ yanchaj uláakʼ xiiboʼob yéetel koʼoleloʼob meyajt Dios orarnajoʼob tiʼ letiʼ táanil tiʼ u chʼaʼtuklik baʼax ken u beetoʼob wa le táan u aktáantkoʼob talamiloʼ. Yanoʼobeʼ orarnajoʼob chéen ichil u tuukuloʼob, uláakʼoʼobeʼ kʼaʼam, yanoʼobeʼ junmúuchʼ úuchik u oraroʼob yéetel uláakʼoʼobeʼ tu juunaloʼob, baʼaleʼ u maas kʼaʼanaʼanileʼ orarnajoʼob tiʼ Dios. Jéeobaeʼ ku yaʼaliktoʼon: «Maʼ u jáawal a orareʼex» (1 Tesalonicenses 5:17). ¿Máasaʼ jach jatsʼuts le baʼax ku yaʼaliktoʼonaʼ? Letiʼeʼ jeʼel u yuʼubkoʼon jeʼel jaytéen ka orarnakoʼoneʼ.

Baʼaleʼ yaʼab máaxoʼob maʼatech u jach creertikoʼob wa jeʼel u yáantik máak le oracionoʼ. Maʼ xaaneʼ tak teech tuklik lelaʼ.

[U tsolajil le oochel teʼ táan juʼun 9]

Jeʼel u páajtal k-orar tiʼ Dios jejeláas súutukiloʼob yéetel jejeláas tuʼuxeʼ