Yaan máaxoʼobeʼ taak u yojéeltkoʼob

U j-jaajkunajoʼob Jéeobaeʼ, ¿ku oraroʼob wa utiaʼal u tsʼakikoʼob máak?

▪ U j-jaajkunajoʼob Jéeobaeʼ (testigos de Jehová), mix juntéen orarnakoʼob utiaʼal u tsʼakikoʼob wa máax. Jeʼex Jesuseʼ, u yoojloʼobeʼ le meyaj maas kʼaʼanaʼanoʼ, letiʼe u kʼaʼaytikoʼob u maʼalob péektsilil u Reino Diosoʼ. U yoojloʼob xaneʼ, le baʼax chíikbesik máax u jaajil cristianoʼoboʼ, maʼ letiʼe u orarkoʼob wa máax utiaʼal u tsʼakikoʼoboʼ.

Teʼ yáax siglooʼ Jesuseʼ yoʼolal u chʼaʼa óotsilileʼ ku tsʼaakankil kaʼachi. Le baʼax tu beetaʼ jach ku líiʼsik k-óol tumen k-ojel le ken u beet u Reyil tiʼ u Reino Dioseʼ, «mix juntúul kajnáal bíin u yaʼal: Kʼojaʼanen» (Isaías 33:24).

Baʼaleʼ ¿kux túun le u tsʼaʼakal máak yéetel le oración ku beetaʼal teʼ kʼiinoʼobaʼ? Le máaxoʼob ku yaʼalikubaʼob cristianoʼob, bey xan le yanoʼob ichil uláakʼ religionoʼoboʼ, ku yaʼalikoʼobeʼ ku beetkoʼob milagroʼob utiaʼal u tsʼakikoʼob máak. Jesuseʼ tu yaʼaleʼ yaan u yantal máakoʼob kun aʼalik táan u beetkoʼob milagroʼob tu kʼaabaʼ. Baʼaleʼ Jesuseʼ yaan u yaʼaliktiʼob: «Mix bikʼin in kʼaj óolteʼex; ¡tselabaʼex tin táan, teʼex ta beetajeʼex baʼaloʼob kʼaastak!» (Mateo 7:22, 23). Jeʼex k-ilkoʼ, ¿ku yáantaʼaloʼob wa tumen Dios utiaʼal u tsʼakikoʼob máak jeʼex u yaʼalikoʼoboʼ?

Utiaʼal k-ketik le baʼax ku beetik le máakoʼob teʼ kʼiinoʼobaʼ, koʼox ilik baʼax ku yaʼalik le Biblia yoʼolal bix úuchik u tsʼakik Jesús le máakoʼoboʼ. Lelaʼ yaan u yáantkoʼon k-il wa Dios áantkoʼob utiaʼal ka u tsʼakoʼob le máakoʼob jeʼex u yaʼalikoʼoboʼ.

Yáaxeʼ, Jesuseʼ maʼ meyajnaj le u páajtalil u tsʼakik máak chéen utiaʼal ka tsaypachtaʼak tumen yaʼab máakoʼoboʼ. Tsʼoʼoleʼ yaʼab tiʼ le milagroʼoboʼ maʼ tu beetaj tu táan yaʼab máakoʼobiʼ. Yaʼab u téenel tu yaʼalaj tiʼ le máaxoʼob tu tsʼakoʼ maʼ u tsikbaltikoʼob tiʼ mix máak (Lucas 5:13, 14).

U kaʼapʼéeleʼ, Jesuseʼ mix juntéen tu cobrartaj le milagroʼob tu beetoʼ (Mateo 10:8). Tu tsʼakaj tuláakal le kʼojaʼanoʼob ku binoʼob kaʼach tu yiknaloʼ. Tsʼoʼoleʼ maʼ tsa wa yaan u fejoʼob ka tsʼaʼakikoʼobiʼ (Lucas 6:19; Juan 5:5-9, 13). Letiʼeʼ hasta tu kaʼa kuxkíintaj jujuntúul tiʼ le máakoʼobaʼ (Lucas 7:11-17; 8:40-56; Juan 11:38-44).

Jesuseʼ maʼ tu beetaj milagroʼob chéen utiaʼal ka ilaʼak jach yaan u páajtaliliʼ. Baʼaxeʼ le meyaj maas kʼaʼanaʼan tu yilaj u beetkoʼ letiʼe u kʼaʼaytik le maʼalob péektsiloʼ. Le oʼolal tu yaʼalaj tiʼ u disipuloʼob ka u kaʼansoʼob uláakʼ máakoʼob yéetel ka u kaʼansoʼob xan tiʼobeʼ chéen u Reino Dios ken u taas toj óolal (Mateo 28:19, 20).

Jeʼex k-ojliloʼ jujuntúul tiʼ le yáax cristianoʼoboʼ béeychaj u beetkoʼob jejeláas baʼaloʼob, jeʼex le u tsʼakikoʼob máakoʼ, baʼaleʼ xuʼuli (1 Corintoiloʼob 12:29, 30; 13:8, 13). Teʼ kʼiinoʼobaʼ le máaxoʼob tsaypachtik Cristooʼ, maʼ kʼaj óolaʼanoʼob tumen ku tsʼakikoʼob máakiʼ, baʼaxeʼ tu yoʼolal le yaabilaj yaan ichiloʼoboʼ (Juan 13:35). Mix junpʼéel milagro u beet u paklan yaabiltkuba yaʼab máakoʼob jejeláas u razaʼob yéetel jejeláas tuʼux u taaloʼob.

U j-jaajkunajoʼob Jéeobaeʼ jach u paklan yaabiltmubaʼob le oʼolal maʼatech u yóotkoʼob u beetoʼob loob tiʼ uláakʼ j-Jaajkunajoʼob, mix tiʼ uláakʼ máakoʼob, kex u maasil táan u paklan baʼateloʼoboʼ. Tiʼ tuláakal yóokʼol kaab kʼaj óolaʼanoʼob tumen ku yeʼeskoʼob yaabilaj jeʼex le tu yeʼesaj Cristooʼ. ¿Máasaʼ junpʼéel nojoch milagro u biskuba yaʼab máakoʼob jejeláas u razaʼob yéetel jejeláas tuʼux u taaloʼob? Lelaʼ junpʼéel baʼal ku béeytal chéen yéetel u espíritu santo Dios. ¿Baʼaxten maʼ ta bin tiʼ junpʼéel tiʼ le muchʼtáambaloʼob ku beetik u j-jaajkunajoʼob Jéeoba utiaʼal ka a wil bix u biskubaʼoboʼ?

[U tsolajil le oochel teʼ táan juʼun 21]

Le máakoʼob ku yaʼalikoʼob ku tsʼaakankiloʼoboʼ, ¿ku yáantaʼaloʼob wa tumen Dios?