Ilawil a natsʼkaba tiʼ Dios

«Bíin wal a pakten yéetel yaakunajeʼ, tumen teech beetmajilen»

U KÍIMIL juntúul máax k-yaabiltmeʼ junpʼéel baʼax jach ku beetik u yaatal u yóol k-puksiʼikʼal. Le oʼolaleʼ jach ku kiʼimakkúuntik k-óol k-ojéeltik Jéeobaeʼ ku naʼatik bix k-uʼuyikba. Letiʼeʼ jach u kʼáat u kaʼa kuxkíint le máaxoʼob kimenoʼob yéetel le nojoch páajtalil yaantiʼoʼ. Le jatsʼuts baʼax ken u beetaʼ letiʼe baʼax ku chíikpajal teʼ Job 14:13-15.

Job, juntúul máax jach muʼukʼaʼan u fejeʼ, tu aktáantaj yaʼab talamiloʼob ichil u kuxtal jeʼex: u yilik u kíimil u paalal, u peʼertik u ayikʼaliloʼob yéetel u tsaʼayal junpʼéel kʼaakʼas kʼojaʼanil tiʼ. Tumen jach táan u muʼyaj yéetel jach yaj tu yóoleʼ, tu yaʼalaj tiʼ Dios: «¡Kexiʼ wa ka páajchajak a taʼakiken teʼ Seoloʼ[!]» (versículo 13, NM). Le tʼaan Seol ku chíikpajal teʼelaʼ maʼ junpʼéel kúuchil yaantiʼ junpʼéel tuʼuxiʼ chéen junpʼéel bix u yaʼalaʼal bey yaan tuʼux táan u jeʼelel le kimenoʼoboʼ. Bey túunoʼ Jobeʼ ku tuklik kaʼacheʼ wa ku kíimileʼ yaan u xuʼulul tuláakal u muʼyajiloʼob. Yéetel yaan u kanáantaʼal bey junpʼéel tesoro taʼakaʼan tumen Dioseʼ. *

¿U tukulmaj wa Job u pʼáatal kaʼach utiaʼal mantatsʼ teʼ Seoloʼ? Maʼ, tumen tu yaʼalaj tiʼ Dios: «[¡]Bíin a waʼal baʼax kʼiin in kʼaʼajal tiʼ teech!». Letiʼeʼ u yojleʼ maʼ kun tuʼubsbil tumen Jéeoba le oʼolal tu yaʼalaj yaan u kʼuchul u kʼiinil u kʼaʼajsaʼal. Tsʼoʼoleʼ u yojel xan kʼaʼabéet u páaʼtik u kʼuchul u kʼiinil u líiʼsaʼal. Baʼaleʼ ¿tak baʼax kʼiin unaj u páaʼtaj? Letiʼeʼ tu yaʼalaj: «Tak ken kʼuchuk u kʼiinil in wutstal [wa in jáalkʼabtaʼal]» (versículo 14). Bey túunoʼ Jobeʼ yaan u kʼuchul u kʼiinil u jáalkʼabtaʼal teʼ Seol, le ken kaʼa kuxkíintaʼakoʼ.

¿Baʼaxten jach ku creertik Job yaan u kʼuchul le kʼiinaʼ? Letiʼeʼ jach u yojel kaʼach baʼax ku yuʼubik le Máax beetoʼon yoʼolal le máaxoʼob meyajtik tsʼoʼok u kíimloʼoboʼ. Letiʼeʼ tu yaʼalaj tiʼ Dios: «Techeʼ bíin a tʼanen, teen xaneʼ bíin in núuk a tʼaan» (Versículo 15). Jobeʼ jach u yojel kaʼacheʼ Jéeoba beetmil. Tumen Dios beet u nojochtal ichil u jobnel u maama. Jéeoba tsʼáa u kuxtal, le oʼolal chéen letiʼ jeʼel u sutik tiʼeʼ (Job 10:8, 9; 31:15).

Le xookaʼ ku kaʼansiktoʼon junpʼéel jatsʼuts baʼal: Jéeobaeʼ jach u yaabiltmaj le máaxoʼob meyajtik yéetel ku chaʼik u nuʼuktaʼaloʼob jeʼex tu beetil Joboʼ (Isaías 64:8). Jéeobaeʼ jach kʼaʼanaʼan u yilik le máaxoʼob ku chúukpajal u yóoloʼob tiʼoʼ, yéetel jach yaan u «yaakunaj» tiʼ le tsʼoʼok u kíimloʼoboʼ. Le tʼaan «yaakunajoʼ», ich hebreoeʼ u kʼáat u yaʼal jach u kʼáat. Yoʼolal lelaʼ juntúul máak jach ku xokik u tʼaaniloʼob le Bibliaoʼ ku yaʼalik: «Lelaʼ junpʼéel tiʼ le tʼaanoʼob maas ku yeʼesik jach taak u beetaʼal wa baʼaxoʼ». Jeʼex k-ilkoʼ Jéeobaeʼ maʼ chéen ku kʼaʼajsik le máaxoʼob meyajt tsʼoʼok u kíimloʼoboʼ; baʼaxeʼ jach u kʼáat u yil kuxaʼanoʼob tu kaʼatéen.

¿Máasaʼ jach uts Jéeoba úuchik u beetik u tsʼíibtaʼal le baʼax ken u beet tiʼ junpʼéel tiʼ le libroʼob maas úuchbentak ku taasik le Bibliaoʼ? * Letiʼeʼ jach u kʼáat ka k-il tu kaʼatéen le máaxoʼob k-yaabiltmaj tsʼoʼok u kíimloʼoboʼ. K-kʼaʼajsik lelaʼ jeʼel u yáantaj utiaʼal u líikʼil k-óol ken kíimik juntúul máax k-yaabiltmeʼ. ¿Maʼ wa a kʼáat a kʼaj óolt juntúul Dios jach nojoch u yaabilajiʼ? Wa ka chaʼik u nuʼuktik a kuxtaleʼ yaan a wantal ichil le máaxoʼob ken u yiloʼob bix ken u líiʼs Dios le máaxoʼob tsʼoʼok u kíimloʼoboʼ.

[Tsolajiloʼob]