Junpʼéel carta tsʼíibtaʼab México

«¿U yaabiltmoʼon wa Jéeoba kex máasewáaloʼon?»

MELESIO, juntúul máak ku tʼanik junpʼéel tʼaan ku kʼaabaʼtik oʼdameʼ, suuk kaʼach u lukʼul tu chan kaajal yaan tu joʼol le witsoʼob utiaʼal u bin u kaxt meyaj teʼ noj kaajoʼ. Yaan kʼiineʼ ken xiʼik teʼ noj kaajoʼ ku bin teʼ muchʼtáambaloʼob ku beetik u j-jaajkunajoʼob Jéeobaoʼ (testigos de Jehová), yéetel ku bisik publicacionoʼob utiaʼal u tʼox tiʼ le máaxoʼob u kʼaj óoloʼ. Tsʼoʼoleʼ tiʼ toʼon u j-jaajkunajoʼon Jéeobaeʼ, jach ku kʼáat óoltik ka xiʼikoʼon xíimbaltoʼob yéetel ka k-kaʼanstiʼob le baʼax ku yaʼalik le Bibliaoʼ.

Le máaxoʼob tʼanik oʼdamoʼ, (kʼaj óolaʼanoʼob xan bey tepehuanos) teʼ kajaʼanoʼob tuʼux yaan le witsoʼob tu xamanil u luʼumil Mexicooʼ (Sierra Madre Occidental). Le múuchʼulil tiʼ u j-jaajkunajoʼob Jéeoba yaan maas naatsʼoʼ, óoliʼ 60 leguas yanil (240 kilómetros). Junpʼéel kʼiineʼ, t-chʼaʼtuklaj k-bin iloʼob.

T-majáantaj junpʼéel camioneta, t-bisaj pasel nookʼoʼob (tiendas de campaña), teepʼoʼob especial utiaʼal k-wenel, janal yéetel gasolina utiaʼal óoxpʼéel kʼiin. Lukʼoʼon tu kaajil Durango las cuatro u sáastal. T-máansaj ocho horaʼob táan k-naʼaksik junpʼéel kaʼanal wits tak ka kʼuchoʼon tuʼux ku káajal u luʼum le oʼdamoʼoboʼ. Aktáan tiʼ toʼoneʼ yaan kaʼach junpʼéel taankach níixiʼ, tsʼoʼoleʼ uláakʼ junpʼéel wits.

T-pʼataj le camioneta tiʼ junpʼéel chan «kajtaliloʼ», t-kuchaj k-nuʼukuloʼobeʼ ka joʼopʼ k-bin xíimbalil. Óoxpʼéel horaʼob tu bisajtoʼon k-kʼuchul tu maas taamil le níixoʼ. Teʼeloʼ t-armartaj le pasel nookʼoʼoboʼ yéetel binoʼon k-kaxt siʼ utiaʼal k-tʼabik kʼáakʼ yoʼolal maʼ u náatsʼal le baʼalcheʼoboʼ. Utiaʼal maʼ u tuʼupul le kʼáakʼ teʼ áakʼaboʼ, cada óoxpʼéel horaʼobeʼ yaan máax kanáantik maʼ u tuʼupul.

Ka sáaschajeʼ káaj k-naʼaksik uláakʼ wits, baʼaleʼ tumen yaʼab tʼuʼul bejoʼob yanoʼobeʼ yaʼab u téenel saʼatoʼon. Juntúul tiʼ toʼoneʼ u yojel kaʼach u tʼan junpʼíit oʼdam, le oʼolal kʼaʼaytajnajoʼon teʼ najoʼob t-iloʼ. Le táan k-binoʼ le máakoʼoboʼ tu yaʼaloʼobtoʼoneʼ tu kaajil Los Arenales, le chan kaaj tuʼux k-bin kaʼachoʼ, yaan u j-jaajkunajoʼob Jéeobaiʼ yéetel ku beetkoʼob muchʼtáambaloʼob. Maʼ t-jach creertaj le baʼax tu yaʼaloʼobaʼ, baʼaleʼ kiʼimakchaj k-óol ka t-uʼuyaj.

Le ka kʼuchoʼon teʼ chan kaaj ku kʼaabaʼtik Los Arenalesoʼ, láaj xaakal k-ook úuchik k-sen xíimbal. U najiloʼobeʼ de kʼat u pakʼiloʼob yéetel u yóokʼoleʼ de cartón. Minaʼan escuelaiʼ mix corriente. Jach ich  óotsilil yanil u kajnáaliloʼob, náach tiʼ le noj kaajoʼoboʼ, maases chéen waajil ixiʼim ku jaantkoʼob. Ka tsʼoʼokeʼ t-ilaj Melesio, jach kiʼimakchaj u yóol ka tu yiloʼon yéetel tu jáan bisoʼon tu yotoch. Le xiʼipal bekʼechaʼ tu yaʼalajtoʼoneʼ tumen maʼ u yojel bix jeʼel u núukik le kʼáatchiʼob ku beetaʼal tiʼoʼ, sáamsamal ku kʼáatik tiʼ Jéeoba ka kʼuchuk le j-Jaajkunajoʼob tu yotoch utiaʼal ka kaʼansaʼak tiʼ u familia yéetel tiʼ u yéet kaajaloʼob le baʼax ku yaʼalik le Bibliaoʼ.

Le oʼdamoʼoboʼ ku creertikoʼob le j-meeniloʼ. Ku meyajtiʼob u baakel yéetel u kʼuʼumel iʼ utiaʼal bin u kanáantaʼaloʼob, ku adorartikoʼob le iikʼoʼ, le jaʼoʼ yéetel uláakʼ baʼaloʼob. Tsʼoʼoleʼ tumen saajkoʼob u beetaʼal loob tiʼobeʼ, le j-meenoʼoboʼ ku aprovechartikubaʼob tiʼob. Melesioeʼ tu yaʼalajtoʼoneʼ ikil u bin teʼ noj kaajoʼ tu kanaj chéen Jéeoba u jaajil Dios, le oʼolaleʼ tu tóokaj tuláakal le baʼaxoʼob ku adorartikoʼ. Úuchik u beetikeʼ joʼopʼ u yaʼalaʼaltiʼ tumen u vecinoʼobeʼ yaan u kíimsaʼal tumen le diosoʼoboʼ, baʼaleʼ tumen maʼ úuch mix baʼal tiʼeʼ tu tsʼaʼob cuenta maas yaan u páajtalil Jéeoba tiʼ u diosoʼob. Yoʼolal lelaʼ káaj u binoʼob teʼ xook ku tsʼáaik kaʼach Melesio tiʼ u láakʼtsiloʼob yéetel le publicacionoʼob yaan tiʼ u j-jaajkunajoʼob Jéeobaoʼ.

Melesioeʼ tu yaʼalajtiʼobeʼ unaj u tóokikoʼob tuláakal u imagenoʼob yéetel le baʼaxoʼob ku meyaj utiaʼal u kanáantaʼaloʼoboʼ. Yaʼab tiʼ letiʼobeʼ xuʼul u chʼaʼikoʼob saajkil, yéetel maʼ xáanchaj ka tu chukaj ochenta juntúulal máaxoʼob ku binoʼob teʼ xookoʼobaʼ. Jach kiʼimakchaj k-óol yéetel le baʼaxoʼob t-uʼuyaʼ, le oʼolaleʼ t-chʼaʼtuklaj k-beetik junpʼéel muchʼtáambal teʼ tardeoʼ. T-túuxtaj yaʼab máaxoʼob avisartik le máaxoʼob suuk u muchʼkubaʼob tu yotoch Melesiooʼ, yaʼab tiʼ le máaxoʼob t-túuxtoʼ binoʼob yóoʼ tsíimin. Yéetel kex chúumuk semana ka beetaʼab yéetel jach chukul úuchik u beetaʼaleʼ, náak veinticinco máaxoʼob biniʼ, yanoʼobeʼ xíimbalil binikoʼob yéetel uláakʼoʼobeʼ yóoʼ burro.

Tumen yaanal tʼaan u yojloʼobeʼ t-kʼáataj tiʼ Melesio ka u yaʼaltoʼon le baʼax taak u yojéeltik le máakoʼob tiʼ le Bibliaoʼ. Le máakoʼobaʼ tu beetoʼobtoʼon le kʼáatchiʼobaʼ: «¿U yaabiltmoʼon wa Jéeoba kex máasewáaloʼon?» «¿Ku yuʼubkoʼon wa kex ka orarnakoʼon ich yaanal tʼaan?», yéetel «Ken taalak le Armagedonoʼ, ¿yaan wa ta tʼaan k-kʼaʼajal tiʼ Jéeoba kex náach yaniloʼon tiʼ le noj kaajoʼ?». Toʼoneʼ yéetel kiʼimak óolal t-tsolaj tiʼob yéetel le Bibliaoʼ, Jéeobaeʼ u yaabiltmaj le máaxoʼob uts u puksiʼikʼaloʼob, kex jeʼel tuʼuxak kajaʼanoʼob yéetel kex jeʼel baʼalak tʼaanil u yojloʼobeʼ. Ka tsʼoʼokeʼ tu sen aʼaloʼobtoʼon ka k-túuxt wa máax utiaʼal u seguer u kaʼansaʼaloʼob.

Ka tsʼoʼok le muchʼtáambaloʼ t-múul jaantaj le janal t-bisaj yéetel le túumben amigoʼobaʼ. Séeb úuchik u yáakʼabtal yéetel tumen yóoʼ wits yanoʼoneʼ jach táaj keʼel, le oʼolal ka tu invitartoʼon pʼáatal tiʼ junpʼéel cuarto táan u beetkoʼobeʼ jach kiʼimakchaj k-óol. Ka sáaschajeʼ tu bisoʼonoʼob yiknal le camionetaoʼ, baʼaleʼ tiʼ junpʼéel bej maas naatsʼ. Kex kaʼanaʼanoʼon ka suunajoʼon Durangoeʼ, jach kiʼimakchaj k-óol úuchik k-biniʼ.

Jach nojoch baʼal k-ilik k-áantik le máakoʼob jach óotsiloʼobaʼ. Kex minaʼan mix junpʼéel publicación ichil u tʼaanoʼobeʼ, jach taak u kʼaj óoltikoʼob yéetel u adorartikoʼob le jaajil Diosoʼ. Desde teʼ kʼiin jeʼeloʼ, xíimbaltaʼab le chan kaaj tumen uláakʼ seis j-Jaajkunajoʼoboʼ. Ichil le óoxpʼéel semanaʼob tu beetoʼoboʼ tu káajsaj u tsʼáaikoʼob xook tiʼ cuarentaicinco tepehuanoʼob taak u kaanbaloʼob tiʼ Jéeoba. Bejlaʼeʼ le j-xoknáaloʼobaʼ ku binoʼob teʼ muchʼtáambaloʼoboʼ.

Táanil tiʼ u tsʼoʼokol le cartaaʼ, paʼatik in jáan tsikbaltikteʼex uláakʼ baʼax úuchi. Teʼ chan kaaj Los Arenalesoʼ, chéen junpʼéel tienda yaniʼ yéetel ku koʼonol chamal kaʼachiʼ, baʼaleʼ xuʼul u koʼonoliʼ. ¿Baʼaxten? Tumen tsʼoʼok u jach yaʼabtal máax xokik le Bibliaoʼ tsʼoʼok u pʼáatal mix máak ku tsʼuʼutsʼ. Tsʼoʼoleʼ le xiiboʼob yéetel le koʼoleloʼob chéen múul kajakbaloʼoboʼ, tsʼoʼok u beeloʼob.

[U tsolajil le oochel teʼ táan juʼun 25]

Melesio, u yatan, cuatro u hijaʼob yéetel u suegra

[U tsolajil le oochel teʼ táan juʼun 26]

Junpʼéel xook yéetel le Bibliaoʼ, yéetel junpʼéel muchʼtáambal tu chan kaajil Los Arenales

[U tsolajil le oochel teʼ táan juʼun 26]

Servicio Postal Mexicano, Correos de México